“Mei te Iale te Manea”

KARE e ko te manea te tuatua akataka ta tatou ka taiku no te puakanio. Penei ka manako tatou i te puakanio ei au animara meitaki te ka kai i tetai ua atu apinga e te oronga maira i te kiko reka e te u matutu na tatou​—inara kare tatou e tapa ia ratou e e manea tikai.

Noatu rai, te akataka ra te Pipiria i tetai vaine e ei “aili te inangaro! e mei te iale te manea.” (Maseli 5:​18, 19) Ko Solomona, e tangata tata o te puka o Maseli, e tangata kite i te oraanga taetaevao o Iseraela, no reira kare e ekoko anga e e tumu meitaki tana no te taangaangaanga i teia tuatua akaaite. (1 Ariki 4:​30-33) Penei, mei tona Papa ko Davida, kua kite ana aia i te au puakanio maunga tei aere putuputu i te ngai takapini ia Eni-gedi, vaitata mai i te pae tai o te Tai Mate.

E atoro putuputu ana te au anana iti o te au puakanio maunga e noo ra i te pae Metepara o Iuda i te vai pupu o Eni-gedi. I te mea e e puna vai irinakiia i teia ngai metepara, kua riro a Eni-gedi ei ngai inu vai no te au puakanio maunga no tetai au anere mataiti. Te tika penei te aite anga o te ingoa Eni-gedi “puna vai no te pepe puakanio,” e akapapu anga no te putuputu i te au puakanio ou i teia ngai. Kua kitea e te Ariki ko Davida te punanga i konei mei te takinokino anga a te Ariki ko Saula, noatu rai e kua noo ana aia mei tetai tangata oro ke “i roto i te au mato i aereia e te au puakanio momoavao ra.”​—1 Samuela 24:​1, 2.

I Eni-gedi ka kite rai koe i tetai ua puakanio, me kore puakanio momoavao, e rere maru ra mei tetai mato ki tetai iaia e aru ra i tetai toa puakanio ki te puna vai. I reira ka marama ei koe i te akaaite anga o tetai ua puakanio ki tetai vaine tiratiratu. Tona tu maru e te tau te akataka katoa ra i te au tu meitaki o te vaine. Te tuatua “manea” te taiku ra ki te tu tau e te maru i te akara anga o tetai puakanio maunga.a

Kia pakari te ua puakanio e pera katoa kia tau ua. Mei ta Iehova i tou tika kia Iobu, te anau ra te puakanio maunga i roto i te au ngai mato, tokatoka, kare e rauka i te itaeia te ngai kare e maata te kai e e kino tikai te reva. (Iobu 39:1) Noatu teia au tu ngata, te akono ra aia i tana uanga e te apii ra ia ratou kia kake e kia rererere aere na runga i te au mato e te tau mei iaia rai. Te paruru maroiroi ra te ua puakanio i tana punua mei tetai te umuumu ra i te kai. Kua kite atu tetai tangata akara i tetai puakanio maunga e tamaki ra i tetai aeto no tetai apa ora, koi pipini ei te punua i raro ake iaia.

E putuputu te taime ka utuutu mai te au vaine Kerititiano e ei metua vaine i ta ratou tamariki i raro ake i te au turanga ngata. Mei te puakanio maunga, te akaari ra ratou i te tu akatapu anga e te noinoi kore i te akonoanga i teia apainga orongaia mai e te Atua. E te tauta pakari ra ratou i te paruru i ta ratou tamariki mei te au tumatetenga i te pae vaerua. No reira, e mamao ke atu i te akameangiti anga i te au vaine ma teia tuatua akataka, te akakite ra a Solomona no runga i te tu tau e te manea o tetai vaine​—e au tu pae vaerua te iti ra noatu i roto i te reva ngata.

[Tataanga Rikiriki i Raro

[Au Tutu i te kapi 30, 31]

Te akaari ra tetai vaine Kerititiano e e metua vaine i te au tu pae vaerua manea i te akatupuanga i tana au apainga orongaia mai e te Atua