Ka Au Ainei te Mareniamu Ou?

KUA akamataia te International Year for the Culture of Peace i Paris e New York City ia Tepetema 14, 1999. Kua akakiteia teia no te mataiti 2000 e te Tianara Putuputuanga o te United Nations. Kua manono ngakau pakari tikai a Federico Mayor, te tianara akaaere i mua ana o te UNESCO, no te “anga anga i tetai akapupuanga o te koropu no tetai peu au e te kore anga te ta ua.”

E kaveinga puapinga maata ta te UNESCO “mei te mea te akamata ra te au tamaki i roto i te au manako o te tangata, tei roto katoa i te au manako o te tangata e patuiai te au paruru anga no te au.” Kia rotai ki teia, te akakoro ra te akaaerenga no te akamaata i te peu au na roto i te “kite apii anga, te tataanga e te taokotai anga.” Kua tuatua a Mr. Mayor e kare e rava ua e “kia au ua, kare e rava e kia riro ei aronga patoi tamaki, mari ra ei aronga akatupu au.”

Ma te maromaroa, kare i au ua te mataiti 2000. Te akakite ra te tuatua enua o teianei​—kapiti mai i te au tupuanga i roto i te mataiti 2000​—i to te tangata tu rauka kore no te akakore i te tamaki e te ta ua noatu te tuke o te au tauta anga ngakau tae o tetai.

Inara, e mea tau kia akamanakoia e te kapiti ra te au ki te kite apiianga. I etai 2,700 mataiti i topa, kua totou te peroveta ko Isaia: “E te au tamariki katoa naau ra e apiiia e Iehova; e ei au nuingangare to te au tamariki naau ra.” (Isaia 54:13) Kua totou katoa taua peroveta i tetai tuatau ka aere te au tangata ravarai ki te akamori anga mou o te Atua ko Iehova kia apii i Tona au mataara. Eaa oki te tupu anga? “E tupaki oki ratou i ta ratou au koke ei auri arote, e ta ratou au korare ra, ei tipi tope ïa: kare tetai enua e tamaki mai ki tetai enua i te koke, kare oki ratou e apii akaou i te tamaki.” (Isaia 2:​2-4) Kia rotai ma taua totou ra, te rave nei te Au Kite o Iehova i tetai angaanga apii anga i te ao katoa tei tauturu ke i te au mirioni ua atu kia autu i te tu makitakita manako enua e te kiri tangata e ko te aka ia o te maata anga o te au tamaki.

I te openga ra ka kore te au tamaki i raro ake i to te Atua Patireia, te ka apai mai i te au e te tinamou mutu kore ki te enua nei. (Salamo 72:7; Daniela 2:44) I reira ka akatupuia te au tuatua a te tata taramo: “E akara i ta Iehova i rave, te au ngai i akataneaia e ia i te enua nei. Kua akakore aia i te tamaki e tae rava akenei ki te openga enua.”​—Salamo 46:​8, 9.