Akapeea Koe me Akono i te Tu Pikikaa?

I ROTO i te kainga i Getesemane ra, kua aere atura a Iuda Ikariota kia Iesu e kua “ongi maira iaia.” E peu matauia teia no te akaari anga i te tu aroa. Inara e tu tapikipiki ua ta Iuda akono anga kia akataka ia Iesu ki te aronga tei aere atu i te po i te opu iaia. (Mataio 26:​48, 49) E tangata pikikaa a Iuda​—e tangata tapikipiki ua kare e koia tikai, ko tetai tei uuna i tona akakoroanga kino i muri i tetai arai anga ngakau tae. Te tuatua Ereni tei uriia e “pikikaa” te aite anga “ko tetai tei pau atura” e te akakite katoa ra i tetai tangata akatutu. Kare i roa ana, kua riro mai taua tuatua e kia taikuia no runga i tetai tei rave i te tu tapikipiki ua e raukai i te akavare atu i tetai.

Eaa toou manako i te tu pikikaa? Ei akaraanga, te riri ra ainei koe, me kite atu koe i te aronga maani avaava te akamaata ra i te kai avaava noatu e kua akapapuia mai i te pae vairakau e mea kino ta ratou au apinga? Te makitakita ra ainei koe i te tu pikikaa o te aronga akono tei takinokino i te aronga i raro ake i ta ratou akono anga? Te mamae ra ainei koe me tiratiratu kore tetai taeake taau i manako e te meitaki ra? Akapeea te tu pikikaa i te pae o te akonoanga i te akakino anga ia koe?

“Aue Kotou . . . e Aronga Pikikaa!”

Ka akara ana i te reva akonoanga tei vai ana i to Iesu tuatau i te enua nei. Kua tapikipiki ua te au tata tuatua e te au Pharisea ei au puapii tiratiratu o te Ture a te Atua, inara e tikai kua akaki ratou i te au manako o te tangata ma te au apiianga a te tangata tei uri ke ia ratou mei te Atua. Kua maro pakari te au tata tuatua e te au Pharisea no te akono atu i te reta o te ture, inara kua kopae ratou i te au kaveinga puapinga tei akaata i te aroa e te tangi aroa. I te ngai tangata kua tapikipiki ua ratou ei aronga akamori i te Atua, inara i te ngai ko ratou ua kua ki ratou i te kino. Kare rava ta ratou au angaanga i rotai ana ki ta ratou au tuatua. Ko to ratou akakoroanga no te rave anga i te au mea koia oki ‘kia akaraia e te tangata.’ Kua akatutu mai ratou i te “tanumanga akateateaia nei, tei akaieie i vao ake, ko roto ra, kua ki ïa i te ivi turuma e te au mea viivii katoa.” I te akakite mataku kore anga i to ratou tu pikikaa, kua tuatua taokioki ua a Iesu kia ratou: “Aue kotou, e te au tata tuatua, e te au Pharisea e, e aronga pikikaa!”​—Mataio 23:​5, 13-31.

Naringa koe i ora ana i taua tuatau, mei tetai atu au tangata ngakau tika papu rai ka rikarika katoa koe i te tu pikikaa o te akonoanga. (Roma 2:​21-24; 2 Petero 2:​1-3) Inara ka akatika ainei koe i te tu pikikaa o te au tata tuatua e te au Pharisea kia akariri ia koe e kua akakeu atu ia koe kia patoi i te au akonoanga pouroa, kapiti mai i tei apiiia e tei taangaangaia e Iesu Karaiti e tana au pipi? Kare ainei e ka riro te reira ei mea kino kia koe?

Penei ka uri ke te tu akono pikikaa o te au tangata akonoanga ia tatou ma te rikarika i te akonoanga. Inara, ka akamatapo katoa teia ariu anga ia tatou kia kore e kite atu i te tu ngakau tae o te aronga akamori mou. Ko te au arai anga ta tatou e patu ra ei paruru mei te tu pikikaa, te riro ra e te uri ke ra ia tatou mei te au taeake tika tikai. No reira, ta tatou ariu anga ki te tu pikikaa, ka tika ei mea tau e te akono ua.

“E Matakite Oki”

Te mea mua, kia apii tatou i te akataka i te au tu pikikaa. Kare teia e ngoie ua. Kua kite oki tetai pamiri i teia ma te mamae kia ratou uaorai. Kua topa atu te mama ki roto i tetai turanga kare e apinga i kite. I te tuku anga i tetai pira akavaanga no te akono tau kore a te are maki te ngai i tupu ei teia, kua tutaki atu te pamiri i tetai roia e tangata tutu aere katoa i roto i tetai are pure i reira. Noatu kua tutaki atu te are maki e $3.4 mirioni U.S. no te reira, kua kino pakari atu te tumatetenga o te pamiri. Kua mate te mama ei vaine putaua, e kare e moni no te tutaki i tona tanumanga. No teaa ra? No te mea kua keia te roia i te maata anga o te moni. No runga i teia roia, kua tata tetai tianara i te pae ture e: “Me te akakite ra aia i te tu akono tana e rave ra . . . , ko tana tuatua i reira: e keia tatou mei tetai atu.” Akapeea e raukai ia tatou i te paruru ia tatou uaorai mei te au tangata mei te reira te tu?

“E matakite oki,” ko te ako anga ia ta Iesu i oronga atu ki te au tangata i tona tuatau tei aro atu i te tu pikikaa akonoanga. (Mataio 16:6; Luka 12:1) Ae, kia matakite oki tatou. Penei ka akapapu mai te au tangata i te au akakoroanga tau ua e ka akaari mai i te ngakau tika, inara ka anoanoia tatou kia akono i te tu matakite e auraka kia ariki vave i te katoatoa. Kare ainei e ka akara meitaki tatou i ta tatou moni me kua kite tatou e te tuaia ra te moni pikikaa?

Kua tupu mai te aronga pikikaa i roto i te akonoanga Kerititiano mou. Kua akamatakite mai te pipi ko Iuda no runga ia ratou, te na ko anga: “E topata ïa ratou i ta kotou au kaingakai aroa ra; kia kai ratou ma kotou katoa ra, te kai ra ïa ma te mataku kore: e tumurangi vai kore ra ratou, e peke aere ua i te matangi ra; e rakau marō ra, kare e uua anga.”​—Iuda 12.

Kia “matakite oki” te aite anga kia kopae e kia akavareia e tetai tei tapikipiki ua e te manako aroa ra inara te manako ra iaia uaorai e te akakite ra i te au manako kare i akanooia ki runga i te Tuatua a te Atua. Mei tetai toka keokeo i raro i tetai vai maru, ka akatupu taua tangata i te akangaa pai i te pae vaerua ki te aronga paruparu. (1 Timoteo 1:19) Penei ka taputou mai te aronga pikikaa i te akaangaroi anga i te pae vaerua inara kua riro mai ei ‘au tumurangi vai kore ra’​—kare i akatupu mai i tetai apinga. Mei te tumu rakau kare e ua, kare tei akavare ra i uua mai i te ua Kerititiano ngakau tika. (Mataio 7:​15-20; Galatia 5:​19-21) Ae, ka anoanoia tatou kia matakite i taua aronga akavare ra. Inara, kia rave tatou i te reira ma te kore e tarotokaka i te au akakoroanga o tetai atu.

“Auraka e Akakino Atu”

Mei teaa te ngoie ua i tetai au tangata apa ua i te tuatua i te au tu apa ua o tetai au tangata koi kopae ei i to ratou uaorai! Inara, te akariro nei teia tu ei mea ngoie ua no tatou kia rave i te tu pikikaa. “E tera ra pikikaa e,” i na Iesu ei. “E timata ana i te kiriti i te rakau maata i roto i toou uaorai mata; ei reira koe e kite meitaki ei, kia kiriti i te tanga iti i roto i te mata o to taeake.” Ka meitaki tatou i te akono i tana ako anga: “Auraka e akakino atu; kia kore kotou e akakinoia mai. Ko ta kotou oki e akakino ia etai ke ra, e akakino katoaia kotou i te reira . . . E eaa koe i akaraʼi i te tanga iti i roto i te mata o to taeake ra, e kare koe i kite e tei roto i toou uaorai mata te rakau maata?”​—Mataio 7:​1-5.

Me rave tetai i te au mea i te akaraanga e mea pikikaa ia, kia matakite tatou auraka e kapiki viviki ia ratou ei aronga pikikaa. Ei akaraanga ko te apotetoro ko Petero, kua “kotoe ke akera aia, akataka atura iaia uaorai” mei te au taeake irinaki Kenitara i Anetioka e raukai i te akamareka i nga manuiri ngati Iuda no Ierusalema mai. Kua ‘riro katoa atura [a Banaba] kia Petero e tetai i tapikipiki ratou.’ Kua rave a Petero i teia noatu kua akameitakiia aia kia akatuera i te mataara no te aronga Kenitara kia arikiia mai ki roto i te putuputuanga Kerititiano. (Galatia 2:​11-14; Angaanga 10:​24-28, 34, 35) Inara ko teia raveanga tarevake i te tua o Banaba raua ko Petero papu e kare i tuku ia raua ki roto i tetai turanga aiteite atu ki te au tata tuatua e te au Pharisea me kare kia Iuda Ikariota.

“Ei Aroa Pikikaa Kore Rai”

“Me rave atu koe i te meitaki ki tetai tangata,” i ako mai ei a Iesu, “auraka koe e tutaki atu i tetai tei akatangi pu kia na mua atu ia koe​—mei te aronga akatutu i te au tunako e i te au mataara tei akapapu e te mareka maira te au tangata ia ratou.” (Mataio 6:2, Phillips) “Ei aroa pikikaa kore rai,” i tata ei te apotetoro ko Paulo. (Roma 12:9) Kua akamaroiroi aia i te mapu ko Timoteo kia “aroa ïa no roto i te ngakau mā, . . . e te akarongo pikikaa kore.” (1 Timoteo 1:5) Me e tika tikai to tatou aroa e te akarongo​—kare i tarepoia e te tu noinoi uaorai e te akamea ua​—ka irinaki mai tetai ia tatou. Ka riro tatou ei tumu akaketaketa anga e te akamaroiroi anga ki te aronga takapini mai ia tatou. (Philipi 2:4; 1 Ioane 3:​17, 18; 4:​20, 21) Tei maata atu, ka rauka ia tatou to Iehova tu mareka anga.

I tetai tua, ko te pikikaa ka riro i te openga ra ei rave anga matenga ki te aronga te akono ra i te reira. I te openga ra, ka akamaeuia te tu pikikaa. “Kare rava e mea tapokiia e toe i te akakiteia,” i na Iesu Karaiti ei, “e kare oki e mea ngaro e toe i te kitea.” (Mataio 10:26; Luka 12:2) Kua akakite te ariki pakari ko Solomona: “E apai oki te Atua i te au tuatua katoatoa ki te akavaanga, e te au mea ngaro katoa ra, te au mea meitaki, e te kino katoa ra.”​—Koheleta 12:14.

I teianei, eaa tatou ka akatika ei i te tu pikikaa o tetai kia akakino ia tatou e tae ua atu e kua kore ia tatou te aroa tikai o te au taeake mou? Kia matakite tatou ma te kore e tarotokaka maata. E pera katoa, kia akono tatou i to tatou aroa e te akarongo ma te kore te tu pikikaa.​—Iakobo 3:17; 1 Petero 1:22.

[Au Tutu i te kapi 22, 23]

Ka akatika ainei koe i te tu pikikaa o te au tata tuatua e te au Pharisea kia uri ke ia koe mei ia Iesu Karaiti e tana au pipi?