‘Te Tuatua a te Atua e Ririnui’ — RUNANGA PUKA I RUNGA I TE INITANETI Punanga Tiaki

Ripoti a te Aronga Tutu Patireia

‘Te Tuatua a te Atua e Ririnui’

I ROTO i te airani maanaana i te Caribbean i Jamaica, kua matau te maata anga o te au tangata i te Pipiria. Ko te tika, te King James Version, vaitata rai e ka kiteaia i roto i te au kainga pouroa, e kua kite tetai au tangata e “e mea ora oki te tuatua a te Atua, e te ririnui.” (Ebera 4:12) Ka rauka i teia ririnui nei i te taui i te au oraanga, tei akaariia mai e te kite anga te aru maira.

Koi tae ei tetai tangata ko Cleveland tona ingoa ki te kainga mei te angaanga maira i atoro atu ei tetai o te Au Kite o Iehova iaia ra. I muri ake i te orongaanga i tetai au tumu manako no roto mai i te au Tuatua Tapu, kua akaruke atu te Kite kiaia ra i te puka tauturu Pipiria te Kite te ka Arataki ki te Ora Mutu Kore. Kare a Cleveland i kite ana e mei teaa te maata i te ririnui i ta te Atua ra Tuatua i roto i tona oraanga.

Kua pure ana a Cleveland e toru taime i te ra, i te patianga ki te Atua kia tauturu mai iaia kia kitea te mataara tika kia akamori Iaia. Kua papu ia Cleveland e kare tona nga metua e akamori ana i te mataara tika, inara i muri ake i te akara matatio anga i etai au akonoanga, kua manako oripu ua aia. Noatu e kua rongo ana aia i te Au Kite o Iehova, kua ekoko aia e mei tei ia ratou te tuatua mou. Noatu tona manako ekoko, kua akatika a Cleveland i te apii i te Pipiria ma te Kite tei atoro mai iaia i tona ngutupa. No teaa ra? No te mea te inangaro ra aia i te akaari e te tarevake ra te Au Kite!

Kare i roa ana kua kite a Cleveland e ko te au piri anga tau kore tana e rave ra ki nga vaine e rua e mea reka koreia e te Atua. (1 Korinetia 6:9, 10) E rua apii anga i muri mai, kua akaari mataku kore aia na te akaruke anga i tona pirianga ma nga vaine ra. Kua akamata katoa aia i te aere ki te au uipaanga Kerititiano i te Are Uipaanga Patireia. Inara kua riro teia e ko tetai atu timata anga.

E pirianga oonu tikai to Cleveland i roto i te pupu tueporo i tona tapere, e te tamanamanata ra tana au tarekareka i tana aere anga ki te uipaanga. Eaa ra tana ka rave? Noatu te taomi anga pakari o tona pupu oa, te tangata tereni ra, e te au oa, kua iki a Cleveland i te akaruke i te pupu tueporo. Ae, kua akamata te Tuatua a te Atua i te oronga mai i te ririnui, i te akakeuanga iaia kia meitaki!

Te ririnui o te Tuatua a te Atua kua akaari akaouia mai i te akamata anga a Cleveland i te akakite i tona kite Pipiria ki tetai ke. (Angaanga 1:8) Tei tupu, e rua nga tangata i roto i tona pupu i mua ana tei akamata i te aere ki te au uipaanga a te Au Kite o Iehova. Kua tau a Cleveland i muri mai ei papuritia no te tuatua meitaki, e kua kite aia i te rekareka maata i roto i te angaanga orometua, i te taangaangaanga i te Tuatua a te Atua ei tauturu i tetai ke.

Na te raveanga kia akakeuia e te ririnui o te Tuatua na te Atua, kua akatutu a Cleveland i te openga iora i tona akatapu anga kia Iehova na te papetito angaia ki te vai e kua akameitakiia ei tavini orometua tamou e ei tavini tauturu i roto i te putuputuanga.

E tikai, i Jamaica e takapini i te ao, e tauatini ua atu te au tangata tei kite e, ko te Tuatua a te Atua ‘e mea ora oki, e te ririnui.’

[Mapu/Tutu i te kapi 8]

(No runga i teia, akara i te puka)

JAMAICA

[Akameitakianga]