“E Aere Mai Kotou Kiaku Nei, . . . Naku e Akaanga i to Kotou Roi”

“Ka Tiaki i te Anana a te Atua”

“Tei reira ua kotou i te akarongo ua mai e te oronga mai i te au tuatua mei te Pipiria te akamaroiroi ra ia matou.”​—Pamela.

“Kia akameitakiia kotou no ta kotou i rave no matou katoatoa. Te akatupu ra te reira i te tuke anga.”​—Robert.

KUA akakeuia a Pamela raua ko Robert kia tata i teia au tuatua ariki anga ki te aronga pakari Kerititiano i roto i ta raua nga putuputuanga. Te akameitaki katoa ra tetai atu o to te Atua au tavini takapini i te ao no te tauturuanga tamou ua e te akono anga te rauka ra ia ratou mei te aronga tei “tiaki i te anana a te Atua.” (1 Petero 5:2, NW) E tikai, te ariki mareka nei to Iehova au tangata i te au apinga e manganui te rave ra te aronga pakari no ratou e te mataara te akono ra ratou i te reira.

“Kia Maata Nei te Rave Anga i te Angaanga”

Kua orongaia te au apainga e manganui ki te au tangata pakari Kerititiano. (Luka 12:48) Te akapapa ra ratou i te au tuatua no te au uipaanga putuputuanga e te piri katoa ra ki roto i te tutuanga papuriki i te tuatua meitaki o te Patireia o te Atua. Te kapiti maira i roto i ta ratou au angaanga te raveanga i te atoroanga i te au taeake irinaki. Te akapou ra te aronga pakari i te taime ma te aronga te umuumu ra i te akonoanga takake​—te aronga pakarikari e tetai atu​—pouroa ma te kore i kopae i te au mea pae vaerua e te apinga no to ratou uaorai pamiri. (Iobu 29:12-15; 1 Timoteo 3:4, 5; 5:8) Te tauturu ra etai aronga pakari i te akatu i te au Are Uipaanga Patireia. Te angaanga ra etai i roto i te Hospital Liaison Committees me kore ei au mema no te au Pupu Atoro Aronga Maki. E manganui ia ratou te rave i te angaanga tauturu ua i te au akaputuputuanga e te au uruoaanga. Ae, ko te aronga pakari “kia maata nei te rave anga i te angaanga a te Atu.” (1 Korinetia 15:58) No reira rai taua aronga pakari angaanga maroiroi i ariki oonuia ei e te aronga i raro ake i ta ratou akono anga!​—1 Tesalonia 5:12, 13.

Ko te aronga pakari te atoro putuputu ra i te au taeake Kerititiano i te kainga me kore i tetai atu ngai e raukai i te akaketaketa ia ratou i te pae vaerua e tumu akamaroiroi tikai. “Naringa kare te tauturuanga aroa e te akamaroiroi anga a te aronga pakari,” i na Thomas ei, tei tupu mai ma te kore e metua tane i te kainga, “toku manako kare e rauka iaku i te tavini ia Iehova ei orometua tamou i teia ra.” E manganui te au mapu tei utuutuia mai i roto i te au pamiri okotai metua te akakite ra e ko te manako akara anga tei rauka mai ia ratou mei te aronga pakari kua tauturu ia ratou kia akatupu i tetai pirianga vaitata ma te Atua.

Te akaperepere katoaia ra te au atoroanga tiakianga e te aronga pakarikari i roto i te putuputuanga. I muri mai i te atoro angaia nga tokorua mitinari i roto i to raua 80 mataiti e tetai nga tangata pakari, kua tata raua: “Te inangaro nei maua i te akakite i to maua tu ariki ua no ta korua atoro anga ariki uaia. I muri ake i te akaruke anga korua, kua tatau akaou maua i te au irava ta korua i uriuri mai kia maua. Kare rava e ngaropoina ia maua ta korua au tuatua akamaroiroi.” Kua tata tetai takaua e 70 mataiti ki te aronga pakari: “Kua pure ana au kia Iehova no te tauturu, e kua tuku mai aia ia korua nga taeake ki toku kainga. Kua riro ta korua atoro anga ei akameitakianga no ko mai ia Iehova!” Kua akapuapingaia ainei koe i ou ake nei mei te atoro anga te raveia ra e te aronga pakari i roto i toou putuputuanga? Papu tikai te ariki meitaki ra tatou katoatoa i ta ratou au angaanga i te tiakianga i te anana i tukunaia mai kia ratou!

Te Au Tiaki te Aru ra i te Atua e Karaiti

E Tiaki aroa ua a Iehova. (Salamo 23:1-4; Ieremia 31:10; 1 Petero 2:25) E Tiaki meitaki katoa a Iesu Karaiti. Ko te tika, kua tapaia aia e ko “te tiaki mamoe meitaki,” “te tiaki mamoe maata,” e “te Tiaki maata.” (Ioane 10:11; Ebera 13:20; 1 Petero 5:4) Akapeea a Iesu i te akono anga i te aronga tei inangaro kia riro mai ei pipi nana? Kua oronga aia i te pati anga maanaana kia ratou: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi.” ​—Mataio 11:28.

Te tauta katoa ra te aronga pakari i teia tuatau kia riro ei tumu akaangaroi anga e ei paruru ki te anana. Ko taua au tangata ra kua ‘riro oki mei te punanga i te uriia ra, mei te pipinianga i te matangi maata ra; mei te au vai taʼe i te ngai keremāro ra, mei te marumaru o tetai mato maata i te enua papamāro ra.’ (Isaia 32:2) Te apai maira taua tu aronga paruru ra i te akaangaroi anga, te rauka ra te tu ngateitei mei te anana, e te rauka ra to te Atua tu mareka ra.​—Philipi 2:29; 1 Timoteo 5:17.

Tauturu Anga Puapinga Maata mei ta Ratou Au Vaine

Te ariki mareka ra to te Atua iti tangata i te aronga pakari Kerititiano e no te tauturuanga aroa ua te rauka ra i teia aronga mei ta ratou au vaine. E putuputu te taime te umuumu ra te tauturu ua anga i te au atinga i te tuanga o taua au vaine ra. I tetai taime, tei te kainga ratou koi akono ei ta ratou au tane i te au tumu putuputuanga me kore te akono ra i te au atoroanga tiaki. I tetai taime, kua akapae keia te au parani akapapa meitakiia no te mea kua tupu mai tetai manamanata rapurapu i roto i te putuputuanga. “Noatu rai,” i na Michelle ei, “me kite atu au i te maroiroi o taku tane i te akapapa anga i te au uipaanga me kore te akonoanga i te au atoroanga tiaki, kua akamanako ua au e te rave ra aia i ta Iehova angaanga, e ka tauta au kia riro ei vaine tauturu ua i te ka rauka iaku.”

Kua akakite a Cheryl, tei akaipoipo katoa ki tetai tangata pakari, e: “Te kite ra au e te umuumu ra te au taeake tungane e te au tuaine i roto i te putuputuanga i te tuatua ki tetai tangata pakari, e te inangaro ra au ia ratou kia kite e ka rauka ua ia ratou te aere atu ki taku tane i tetai ua atu taime ta ratou e inangaro ra iaia.” Ko te au vaine tauturu ua, mei ia Michelle raua ko Cheryl, te puareinga ra i te akono i te au atinga e raukai i ta raua nga tane i te akono i ta te Atua mamoe. Te ariki marekaia ra te au vaine a te aronga pakari no to ratou tu tauturu ua.

Inara, auraka tetai tangata pakari angaanga maata e manako kore i te au umuumu anga pae vaerua e tetai atu au mea o tana vaine e te tamariki. Kia “apa kore [tetai tangata pakari akaipoipo], vaine okotai ra, e te tamariki akarongo, kare i tapepeia i te kaimoumou, e te akongata.” (Tito 1:6) Kia akono aia i tona pamiri na roto i te tu tau i te Atua tei umuumuia e te Tuatua Tapu no te au akaaere Kerititiano.​—1 Timoteo 3:1-7.

No tetai tangata pakari angaanga maroiroi, e akaperepere tikai tetai vaine tauturu ua. Akapera te aronga pakari akaipoipo i te manako anga. Mei ta te Pipiria ra e karanga ra: “Ko tei rauka iaia te vaine ra, e meitaki rai tana i rauka.” (Maseli 18:22) Na roto i te tuatua e te angaanga, te akaari ra taua aronga pakari i te tu ariki ngakau tae ki ta ratou au vaine. I te pae mai i te pure pakari e te apii mareka anga ma te kapipiti, te akanoo ke ra teia au tokorua akaipoipo Kerititiano i te taime kia rekareka i te au mea mei te aaere anga i te pae taatai, te aaere anga na roto i te vao rakau, me kore te aaere anga na roto i te paka. Ae, te kitea ra e te aronga pakari te tu rekareka i roto i te akono aroa ua i ta ratou au vaine.​—1 Petero 3:7.

Ko te aronga pakari te tiaki noinoi kore ra i te anana a te Atua e tumu akaangaroi anga ia ki to Iehova iti tangata. E “meitaki i te tangata nei,” ratou e akameitakianga ki te putuputuanga!​—Ephesia 4:8, 11-13.