Kakekake Anga ki The Bottom o Tapa
KUA riro ana te airani Orani o Tapa ei punanga ketaketa no te aronga kino tei teretere i runga i te au moana o te Tai Karapieni te kimi no te keia anga. I teia tuatau, ko teia airani meangiti ua, te vai ra e 240 kiro mita i te tua itinga o Pueto Riko, e kainga ia no etai 1,600 tangata, e 5 o ratou e Au Kite o Iehova. Inara, te kimi ra teia aronga orometua mataku kore i tetai apinga puapinga maata roa atu i to te keia anga. Te kimi maroiroi ra ratou i te au tangata tei “akonoia no te ora mutu kore ra.”—Angaanga 13:48.
Kua tae mua atu te tuatua meitaki o te Patireia o te Atua ki te airani i roto ia Tiunu 22, i te 1952, i te tutau anga te pai Sibia e 18 mita te roa, na te Au Kite o Iehova e akatere ra, i te pae taatai ia Tapa. (Mataio 24:14) Kua kake atu te nga mitinari ko Gust Maki raua ko Stanley Carter i The Ladder, e mataara e tere atu e 500 te takainga toka ki The Bottom, te oire maata o Tapa.a No te au anere mataiti, ko teia ara oiti ua te ravenga e taeria atu ei te au tangata o te airani.
Te ripoti mua tikai tei neneiia no te angaanga akakitekite Kerititiano ra i Tapa kua tataia i roto i te 1966 Yearbook of Jehovah’s Witnesses. Kia tau ki taua ripoti, okotai ua rai Kite maroiroi i runga i te airani. I muri mai, kua akapou tetai ngutuare tangata no Kanata mai i te au mataiti e manganui i te tutu aere anga i te tuatua meitaki ki reira. I ou ua akenei, kua aere atu a Russel raua ko Kathy ki Tapa, e nga tokorua tei ritaea no Marike mai, e kua piri atu i roto i te angaanga tutu anga ki reira. E akamanako ana i ta raua tua.
Atoro Anga ia Tapa
Kua tae atu maua ko taku vaine na runga i te pairere ei nga manuiri na Ronald, koia ua te Kite i runga i te airani i te maataanga o te au mataiti 1990. Te tiaki ra to maua tangata akamanuiri ia maua i ko i te ngai to anga pairere. Kua rekareka aia i te pia meangiti no te au vetitaporo ta maua i apai atu ei apinga aroa, i te mea e kare e raveia ana te pama okooko anga i runga i te airani. Kake atu anga ki runga i tetai toroka meangiti, kua tere tapaepae marie ua atu matou ki runga i te tua o te Maunga Scenery ki te take o teia maunga ka kore ra.
Kua tapu matou ki te oire o Hell’s Gate kua aere atu a Ronald i te akara i te ngai tata anga akakitekite anga na te katoatoa i te akara e me te vai ua ra rai tetai pati anga no te tuatua na te katoatoa i te Tapati. Kua rekareka matou i te kite e te vai ua ra te reira. Kua kake akaou mai aia ki roto i te toroka, e kua aere atu matou ki te oire maata o te airani, ko Windwardside. Mei ta tona ingoa e akakite maira, te vai ra teia oire manea i te tua matangi o te airani, te vai ra mei te 400 mita te teitei i te tai. Ia matou e aere atura na runga i te mataara ki te are o Ron, kua kite atu matou i tetai akairo karakara i mua i te porotito i te akataka anga i te reira e e Are Uipaanga Patireia no te Au Kite o Iehova.
I te tuatau o te kaikai anga kua ui atu au i te uianga tei akakeu mai ia maua kia atoro atu, “Akapeea koe i riro mai ei ei tangata akakitekite no te Patireia i runga ia Tapa nei?”
“Te oti anga i te patu anga i te manga o te Au Kite o Iehova i Pueto Riko i te 1993,” i na Ron ei, “kua inangaro maua ko taku vaine i te noo mai ki roto i tetai tukuanga angaanga ke. I mua atu ana, kua atoro mai ana maua ia Tapa ma tetai nga tokorua painia e kua kite mai e te vai ra e 1,400 tangata inara kare ra e Au Kite. Kua tuatua atu maua i reira ki te Kumiti Manga o Pueto Riko kia neke mai maua ki konei.
“Te tere meitaki ra te au tupu anga, e i te openga ra kua rauka mai ia maua te akatika anga kia aere mai. Ma te mii tikai, e rua mataiti i muri mai kua tuia taku vaine e te maki kino tikai, e kua oki atu maua ki California. I muri mai i tona mate anga, kua oki akaou mai au ki Tapa nei. Kite korua eaa, kare au e reka ana i te akamata i tetai apinga e kare te reira i akaotiia.”
Akakitekite Anga Mei Tera Are ki Tera Are i Runga ia Tapa
Kua riro te ngai noo anga i roto i to Ron are e tai anere mataiti ra ei Are Uipaanga Patireia.b Ia matou e rekareka ra i te kaikai popongi e te teateamamao anga i te aere atu ki roto i te angaanga orometua, kua tamauuia te ngai kuki anga i vao mai e tetai tumurangi e pati ra. I muri ake i te kaikai popongi, kua akaruke matou i raro ake i tetai au tumurangi no te akakitekite anga i te popongi mei tera ngutupa ki tera ngutupa i The Bottom. I te kainga taki tai, kua aravei atu a Ron i te tangata o te kainga ma te ingoa. Kua akara mou atu ta matou uriuri anga ki runga i te au nuti tei tupu ua akenei no reira mai. E maata te au tangata tei matau ia Ron e tana angaanga orometua, e e manganui tei ariki meitaki mai i te puka Pipiria.
Te akono anga i tetai rekoti no te aronga tei inangaro mai i te karere Patireia kua riro ei mea ngata me kare koe i matau i te au tangata o te oire. No teaa ra? No te mea “te umuumuia ra e te ture e kia peni kara aiteite katoatoaia te au are,” i na Ron ei. E tika rai, kua akara aere au e kua kite atu e e teatea pouroa te au are i runga ia Tapa e e muramura te au tauu are.
I muri ake i te akamutu anga i ta matou uriuri anga Pipiria, kua pati atu maua i te tangata o te kainga kia aere mai ki te tuatua Pipiria na te katoatoa te ka raveia i te Tapati i ko i te Are Uipaanga Patireia. Mei tei te kainga a Ron i runga i te airani, nana e oronga atu i te au tuatua na te katoatoa i te au epetoma ravarai. I teianei, e 17 apii Pipiria e raveia ra i runga ia Tapa. E 20 tangata tei aere mai ki te Akamaara Anga i to Karaiti matenga i te 2004. Penei i te akara anga e meangiti tikai taua numero, te akatutu maira te reira i te 1 patene o te au tangata katoa o Tapa!
E tikai, kua tauta pakari te Au Kite o Iehova i te itae i te au tangata e manganui te ka rauka mai ki ta te Atua karere no te akaora anga. Noatu e airani meangiti ua te reira mei ia Tapa rai me kore e enua maata ra, te rave tiratiratu ra te Au Kite o Iehova i te akauenga kia “akariro i to te pa enua katoa ei pipi.”—Mataio 28:19.
Ma te mii, kua tae mai ta maua atoro anga ki te openga. Ia maua e kake atura ki roto i to maua pairere, kua tarevareva atu maua. Ka maara ua rai ia maua to maua atoro anga ia Tapa e to maua tuatau i te kakekake anga ki The Bottom!
[Au Tataanga Rikiriki i Raro]
a I te akaraanga kua kapiki te au keikeia i te reira e ko The Bottom no te mea kua manako oki ratou e tei te takere te reira o tetai vaarua maunga ka.
b I roto ia Tepetema 28, 2003, kua aere atu te aronga tauturu no Florida mai, U.S.A., ki Tapa e kua akaou i te are i te pae mai, te taangaangaia ra i teianei ei Are Uipaanga Patireia.
[Au Mapu i te kapi 10]
(No runga i teia, akara i te puka)
PUETO RIKO
[Akameitakianga no te Tutu i te kapi 10]
Background: www.sabatourism.com