“Tetai Ra Meitaki Roa Atu i Toku Oraanga”

“KO TE taitaia te mea ripoti maata putuputuia, e kare ekokoanga ko te manamanata puapinga maata rava atu i te oraanga i te pae manako no te aronga mapu,” i karanga ai a Beyondblue, tetai ngai angaanga tauturuia e te kavamani i Autireria. Te akakite maira te au apii e mei tetai 100,000 au mapu Autireria tei rokoia e te taitaia i te au mataiti ravarai.

Kare te au Kerititiano mapu e kapeia i te taitaia. Inara, ko te akarongo ki roto ia Iehova, tei tauturu i te manganui ia ratou kia autu i te au manako papu kore e kia akapuapinga i to ratou mapuanga. I te rave anga i teia, kua riro ratou ei akaraanga meitaki ki tetai ke ra. Akapeea?

Akamanakoanga i te tupuanga o Claire e 18 mataiti i te pakari. E aere ana raua ko tona mama ki tetai putuputuanga no te Au Kite o Iehova i Melbourne. I te akaruke anga tona papa i te pamiri, kua taitaia mai aia. Inara tona akarongo i roto i tona Metua i te rangi ra, ko Iehova, kua vai ketaketa ua atu. I tetai ra, kua aere mai te taote o te pamiri, ko Lydia, ki te kainga o Claire i te akara i te mama o Claire, kua maki oki aia. I muri akera, kua pati aroa aia kia akaoro ia Claire ki te ngai okooko anga maata. Te aaere ra, kua ui atu aia kia Claire me e tane tana. Kua akataka atu a Claire e ko tetai o te Au Kite o Iehova, kare aia e aru kapiti aere ua ana i te au tamariki tamaroa. Kua poitirere teia i te taote. Kua akataka atu a Claire e akapeea te Pipiria i te tauturu anga iaia kia akono i te au ikianga pakari i roto i te oraanga. Taopenga ra, kua pati aia ki te taote kia apai mai i tetai kopi o tetai puka tumuia ki runga i te Pipiria tei tauturu maata ia Claire. Te ingoa o te puka ko te Questions Young People Ask​—Answers That Work.

E toru ra i muri i te rauka mai anga i te puka, kua ringi atu a Lydia i te mama o Claire i te akakite i tona rekareka maata i te tatau anga i te reira. Kua pati atu aia i reira e ono akaou puka no tona au taeake. I te apai atu anga a Claire i te au puka, kua akataka atu te taote i tona rekareka i te akarongo o Claire. Kua pati atu a Claire kia apii i te Pipiria kiaia, e kua ariki mai te taote.

No te au marama e manganui, kua akono a Claire i te apii i te ora kaikai o te taote. E oti kua pati atu a Lydia me ka rauka ia Claire i te tuatua ki tetai apiianga no runga i te tumu manako no te taitaia i roto i te au mapu. Noatu te mataku, kua akatika atu a Claire. Kua tere atu i te 60 tangata tei aere atu ki te apiianga. E a aronga kite no te oraanga i te pae manako​—e aronga maata pouroa​—tei tuatua atu ki te katoatoa. E oti kua tae mai ki to Claire taime i te tuatua. Kua akakite aia i te puapinga no te aronga mapu kia rauka i tetai pirianga ki te Atua. Kua akamarama atu aia e te manako tikai maira te Atua ko Iehova i te aronga mapu e te tauturu ra i te aronga katoatoa tei taanga atu kiaia no te turuturu e te pumaana. Kapiti atu, kua akakite aia i tona irinaki e kare e roa atu ka takore a Iehova i te au tu ravarai no te maki i te pae kopapa e te pae manako. (Isaia 33:24) Eaa tei tupu mei teia akakite anga meitaki?

“E manganui tei aravei mai iaku i muri ake i te atianga i te karanga e kua umereia ratou i te akarongo i tetai tangata mapu i te tuatua anga no runga i te Atua,” i karanga ai a Claire. “Kua vaoo atu au e 23 kopi o te puka Young People Ask. E toru tamaine i roto i te katoatoa tei oake mai i to ratou au numero terepaoni. Te apii ra tetai o taua tamaine ra i teianei i te Pipiria. Ko tetai ra meitaki roa atu te reira i toku oraanga.”