Mei Teaa ra te Ketaketa i Toou Irinaki Anga i te Atua?
“E na mua ra kotou i te kimi i te basileia.”—MATAIO 6:33.
1, 2. Eaa te takainga no te angaanga ta tetai tangata mapu i rave, e no teaa ra?
KUA inangaro tetai tangata mapu kia taangaanga maataia i roto i tona putuputuanga. Te tamanamanata maira tana angaanga iaia te aere putuputu anga ki te uipaanga. Akapeea aia i te akatikatika anga i te turanga? Kua akamama mai aia i tona oraanga, kua akaruke i tana angaanga, e kare i roa ana kua kiteaia mai tetai angaanga kare e tamanamanata ana i tana au angaanga Kerititiano. I teia ra, e meangiti ake tana moni i to mua ana, inara te akono ua ra rai aia i te au anoano o tona ngutuare e kua tauturu maata atu i te putuputuanga.
2 Te marama ra ainei ia koe e eaa taua tangata mapu i rave ei i taua takainga? Te kite ra ainei koe ia koe uaorai i te rave anga i taua takainga me tei roto koe i te au turanga mei iaia rai? Ei akameitaki anga, e manganui te au Kerititiano tei rave ana i te reira, e te akaari maira ta ratou au angaanga i to ratou irinaki anga i ta Iesu taputou e: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.” (Mataio 6:33) Te irinaki ra ratou kia Iehova no te tinamou kare ra ki teianei ao.—Maseli 3:23, 26.
3. Eaa ra etai i manako ei e me e mea tau i teia tuatau nei i te tuku i te Patireia o te Atua na mua ra?
3 I te akamanako anga i te au tuatau ngata ta tatou e kite nei, penei te manako ra etai e me kua rave ra te tangata mapu i te iki anga pakari. I teia tuatau, tetai tuanga o te au tangata ra tei roto i te putaua ko tetai pae te rekareka ra i te turanga teitei roa atu i roto i te tuatua enua. Te maata anga o te au tangata i te au enua putaua te tamou rekareka ra i tetai tuatau kia meitaki mai to ratou oraanga. I tetai tua, te kite ra te manganui i roto i te au enua puapingaia te taomianga no te akono tamou anga i to ratou turanga no te akono anga i te oraanga noatu e te ngaro ke atura te au mea puapinga, te taui anga te ngai angaanga, e te maro anga maata a te au pu angaanga. I te akamanako anga i te taomianga te o maira te akono anga i tetai oraanga, penei ka manako etai e, ‘Ka tau ainei rai i te kimi i te Patireia na mua?’ E pau ei i taua uianga, e akamanako ana i te aronga tei akarongo ana ki ta Iesu e tuatua ra.
“Auraka e Apiapi”
4, 5. Akapeea a Iesu i te akatutu anga mai e e mea tau no te au tangata o te Atua ra e auraka e apiapi tikai no runga i te au manamanata o te au ra katoa ra?
4 Tei Galilea a Iesu, te tuatua anga ki te urupu maata mei te au ngai e manganui. (Mataio 4:25) E tokoiti ua te au tangata apinganui. I te akara anga, ko te maata anga e putaua. Inara, kua raurau atura a Iesu kia ratou e kia tuku i te mea mua, kare ki te akaputu anga i te apinganui i te pae kopapa ra, mari ra kia akaputu i tetai apinga puapinga maata roa atu—te apinga maata i te pae vaerua. (Mataio 6:19-21, 24) Kua karanga aia e: “Auraka e apiapi i to kotou ora, i ta kotou e kai, e ta kotou e inu, e te kakau no to kotou kopapa. Kare aina e maata te ora i te kai, e te kopapa i te kakau?”—Mataio 6:25.
5 Ki te maata anga o te au tangata te akarongo maira, penei kare e tau ana ta Iesu au tuatua. Kua kite ratou e me kare ratou e angaanga pakari ana, ka taitaia to ratou ngutuare tangata. Inara, kua akamaara atura a Iesu kia ratou no runga i te au manu. Ka kimi te au manu i te kai e te ngai noo anga mei tera ra ki tera ra, inara te akono ra a Iehova ia ratou. Kua tou katoa mai a Iesu i te mataara e manako maira a Iehova i te au tiare o te ngangaere, e manea atu i to Solomona i roto i tona kaka katoa. Me te manako maira a Iehova i te au manu e te au tiare, mei teaa atura te maata tona manako mai anga ia tatou? (Mataio 6:26-30) Mei ta Iesu e karanga ra, e puapinga maata atu to tatou ora (au meta) e te au kopapa i te kai ta tatou e oko ra i te akaora mai i to tatou oraanga e te akakakau anga i to tatou kopapa. Me oronga tatou i ta tatou au tautaanga katoa i te angai e te akakakau ia tatou uaorai, kare e apinga puapinga e toe mai i te tavini anga ia Iehova, kua ngaro ia tatou te akakoroanga tikai o te oraanga.—Koheleta 12:13.
Tetai Manako Tau
6. (a) Eaa te apainga a te au Kerititiano? (e) Ka tuku te au Kerititiano i to ratou irinaki anga tikai kiea?
6 E tikai, kare a Iesu i akamaroiroi i te aronga te akarongo ra kiaia kia akamutu i te angaanga e kia tiaki atu i te Atua ra i te tauturu mai anga i to ratou ngutuare tangata. E kimi katoa ana te au manu i te kai na ratou uaorai e na ta ratou punupunua. No reira, ka angaanga te au Kerititiano me te inangaro ra ratou i te kai. Ka akono ratou i te au apainga a te ngutuare. Ka angaanga pakari te au tavini e te au tuikaa Kerititiano no to ratou pu. (2 Tesalonia 3:10-12; 1 Timoteo 5:8; 1 Petero 2:18) Kua angaanga putuputu ana te apotetoro ko Paulo ei tangata maani i te are puakapa ei turu iaia uaorai. (Angaanga 18:1-4; 1 Tesalonia 2:9) Noatu rai, kare taua au Kerititiano i akara ana ki te angaanga a teianei ao ei tinamou anga. Kua irinaki ratou kia Iehova. Tei tupu mai, te rekareka ra ratou i te au mei roto roa mai kare tetai ke i kite ana. Te karanga ra te tata taramo e: “Te aronga i irinaki ia Iehova ra, ka vai ïa mei te maunga ra mei ia Ziona, kare e keukeu e tuatau ua atu.”—Salamo 125:1.
7. Eaa ra te manako o tetai kare e irinaki tikai ana ia Iehova?
7 Ko tetai tangata kare e irinaki tikai ana ia Iehova penei e manako tuke tona. Te manako ra te maata anga o te au tangata i te apinganui i te pae kopapa ei puapinga maata no te tinamou. No reira, te au metua i akamaroiroi maata ai i ta ratou tamariki kia tuku i to ratou pakari anga mai ki roto i te apii teitei, i te manako anga e te teateamamao ra te reira ia ratou no te au angaanga tutaki meitakiia. Ma te mii, kua kiteaia mai e etai au ngutuare Kerititiano ra e e tutaki anga maata tikai taua tutakianga, te akangaro anga ta ratou tamariki i to ratou manako i te pae vaerua te aruaru anga i te au akakoroanga i te pae kopapa.
8. Eaa te akatau anga ta te au Kerititiano ka akono tamou?
8 No reira, te kite ra te au Kerititiano pakari e e mea tau ta Iesu akoanga i teia tuatau mei te anere mataiti mua rai, e te tauta ra ratou kia tau te ravenga. Noatu me ka akapou ratou i te au ora e manganui i roto i te angaanga a teianei ao i te akono i te au apainga Tuatua Tapu, kare ratou e tuku i te anoano kia rauka mai te moni kia akangaropoina ratou i te au mea puapinga maata i te pae vaerua.—Koheleta 7:12.
“Auraka Kotou e Apiapi Ua”
9. Akapeea a Iesu i te akapapu atu anga ki te aronga te irinaki pu tikai ra ia Iehova?
9 I roto i tana Tuatua i te Maunga, kua raurau a Iesu i te aronga te akarongo maira kiaia e: “Auraka kotou e apiapi ua, ka na ko ei ra, Eaa ua ta matou kia kai? e, Eaa oki ta matou kia inu? e, Eaa to matou kakau kia kakau? (Te kimi ra oki te au etene i taua au mea katoa ra:) kua kite oki to kotou Metua i te ao ra e, kia rauka taua au mea katoa ra ia kotou e tikaʼi.” (Mataio 6:31, 32) E au tuatua akamaroiroi anga te reira! Me irinaki pu tikai tatou ia Iehova, ka turu ua rai aia ia tatou. Inara, e manako akakeu anga katoa te au tuatua a Iesu. Te akamaara maira te reira ia tatou e me aruaru “tikaʼi” tatou i te au mea i te pae kopapa, mei to te “au etene” rai to tatou manako, e au tangata ratou kare i te au Kerititiano mou.
10. Te aere mai anga tetai tangata ou kia Iesu no te akoanga, akapeea a Iesu i te akaari anga e eaa ta te tangata ou e inangaro maata ra?
10 I tetai atianga, kua ui tetai tangata ou apinganui ra kia Iesu e eaa tana ka rave kia rauka mai te ora mutu kore. Kua akamaara atura a Iesu kiaia i te au umuumuanga no te Ture, te angaanga ra rai i taua tuatau. Kua akapapu atu te tangata ou kia Iesu e: “Kua ope te reira i te akonoia e au, mei toku ou anga mai: eaa ua te toe iaku?” Penei kare e tau ana ta Iesu pau anga ki te manganui. Kua karanga aia e: “Kia inangaro koe e kia apa kore, ka aere ka oko i taau apinga, ka apai atu ei na te putaua; e apinga taau i reira i te rangi; ka aere mai ei ka aru mai iaku.” (Mataio 19:16-21) Kua aere maromaroa atu te tangata ou, no te mea kare i rauka iaia i te ariki i te manako e ka ngaro ke atu tana apinga. Noatu eaa te maata tona inangaro ia Iehova, e maata atu ra tona inangaro i tana au apinga.
11, 12. (a) Eaa te au tuatua tau ta Iesu i tuatua ana no runga i te apinganui? (e) Akapeea te au apinganui i riro ei ei arai anga i te tavini anga ia Iehova?
11 Kua taki atura taua tupuanga ra kia tuatua mai a Iesu i tetai apinga kare i tapapaia ana: “E akao ngata te tangata apinga ki roto i te basileia ra i te ao. . . . E akao ngoie ake te kamela na roto i te puta nira, i te tangata apinga nui kia akao ki roto i te basileia o te Atua ra.” (Mataio 19:23, 24) Te karanga ra ainei a Iesu e kare e tangata apinganui e noo i te Patireia? Kare, te tuatua maira aia e: “E tika ra te au mea katoa i te Atua.” (Mataio 19:25, 26) E tikai, ma te tauturu anga a Iehova kua riro mai etai au tangata apinganui i te reira tuatau ei au Kerititiano akatainuia. (1 Timoteo 6:17) Noatu rai, te tuatua ra a Iesu i taua au tuatua umere no te tumu anga tau. Te oronga maira aia i te akamatakiteanga.
12 Me mou piri tikai tetai tangata ki tana au apinga mei taua tangata ou rai ra, ka riro mai te reira ei arai anga iaia i te tavini ngakau katoa anga ia Iehova. Te tika katoa ra te reira ki te aronga kua rauka takere te apinganui e ki te aronga e “māro e kia maata te apinga.” (1 Timoteo 6:9, 10) Te irinaki maata anga i roto i te au apinga o te kopapa ka taki atu i tetai tangata kia ‘manako kore i tona anoano i te pae vaerua.’ (Mataio 5:3, NW) Tei tupu mai, penei kare tona manako e aiteite ana no ta Iehova tauturu. (Deuteronomi 6:10-12) Penei te tapapa ra aia i te akono anga takake i roto i te putuputuanga. (Iakobo 2:1-4) E ka akapou maata aia i tona taime i te rekareka anga i tana apinganui kare i te tavini anga ia Iehova.
Tatanu Anga i te Manako Tika
13. Eaa te manako tarevake ta te au tangata i Laodikea i manako ana?
13 Ko tetai pupu ma tetai manako tarevake no te au apinga ra ko te putuputuanga i te anere mataiti mua i Laodikea. Kua karanga a Iesu kia ratou e: “No te mea te karanga na koe, E apinga maata taku, e kua akamaata au i taku taonga, e kare ua e mea toe iaku, e kare koe i kite e, e mate maata toou, e mei te mea e aroaia ra, e te puapinga kore, e te matapo, e te putaua.” Kare e no ta ratou apinganui i apai mai i te au tangata o Laodikea ki roto i taua turanga kino i te pae vaerua. Te tika anga kua irinaki atu ratou ki runga i te apinganui kare ra kia Iehova. Tei tupu mai, e pumaana ua ratou i te pae vaerua, vaitata atura i te ‘akapuakiia ki vao’ mei roto mai i to Iesu ra vaa.—Apokalupo 3:14-17.
14. Eaa ra i tau ei ki te au Kerititiano Epera ta Paulo akameitakianga?
14 I tetai tua, kua akameitaki a Paulo i te au Kerititiano Epera no to ratou tu i te tuatau i mua ake te takinga kinoanga. Kua karanga aia: “Kua aroa mai oki kotou iaku i toku tapeka angaia ra, e kua āriki ua kotou i te noni anga i to kotou apinga ma te rekareka, kua kite oki kotou e apinga meitaki maata ua atu ta kotou e tika i te vai marie anga tei te ao.” (Ebera 10:34) Kare taua au Kerititiano i taitaia ana te ngaro anga ta ratou au apinga. Kua akono tamou ratou i to ratou rekareka no te mea te mou piri ra ratou ki ta ratou apinga puapinga maata, ta ratou “apinga meitaki maata ua atu . . . te vai marie anga tei te ao.” Mei te tangata okooko i roto i ta Iesu parapore tei oronga i te au mea ravarai no tetai poe meitaki maata roa, kua kimi manako ratou kia kore e akarukenaia te manakonakoanga o te Patireia, noatu eaa te tutakianga. (Mataio 13:45, 46) E tu meitaki tikai!
15. Akapeea tetai vaine Kerititiano i Riperia i te tuku anga i te au anoano o te Patireia na mua?
15 Kua tatanu te manganui i teia tuatau i taua tu memeitaki. I Riperia, ei akaraanga, kua orongaia ki tetai vaine mapu Kerititiano te akameitaki anga kia apii i ko i te apii teitei. I roto i taua enua, te manakoia ra taua oronga anga ra ei mataara no tetai tuatau tinamou ki mua. Inara, kua riro mai aia ei painia, e vaine tutu evangeria tamou, e kua rauka mai tetai pati anga kia tavini ei painia takake no tetai tuatau poto ua. Kua iki aia i te kimi i te Patireia na mua e kia vai ua rai i roto i te angaanga tamou. Kua aere atu aia ki tana tukuanga angaanga e toru marama e 21 apii Pipiria i akamataia. Te kimi ra teia tuaine mapu e te aronga e tauatini ua atu mei iaia rai i te Patireia na mua, noatu te akaruke anga i te au puapinga i te pae kopapa. Akapeea ratou i te akono tamou anga i taua tu i roto i teia ao materia? E maata te au tu memeitaki ta ratou i tatanu. Ka uriuri ana tatou i etai o teia au mea.
16, 17. (a) Eaa ra te tu tau ka puapinga ai me ka irinaki atu tatou kia Iehova? (e) Eaa ra tatou ka tatanu ei i te irinaki anga i roto i te au taputou a te Atua?
16 Tu tau: Te karanga ra te Pipiria e: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa. Auraka koe kia pakari i toou uaorai manako.” (Maseli 3:5-7) I tetai au taime, i te akara anga penei e mea tau tetai aerenga i ta teianei ao e manako ra. (Ieremia 17:9) Noatu rai, te akara ra tetai Kerititiano ngakau tae kia Iehova no te arataki anga. (Salamo 48:14) ‘I tona katoa ra au aerenga’—i roto i te au angaanga a te putuputuanga, i te apii me kore i te angaanga a teianei ao, te akaangaroi anga, me kore tetai apinga ke atu—te kimi tau ra aia i ta Iehova akoanga.—Salamo 73:24.
17 Irinaki anga i ta Iehova au taputou: Kua karanga a Paulo e: “Ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.” (Ebera 11:6) Me ka ekoko tatou e kare a Iehova e akatupu i tana au taputou, i te akara anga penei e mea tau i te ‘rave i te tu o teianei ao.’ (1 Korinetia 7:31) I tetai tua, me e ketaketa atu to tatou irinaki anga, ka tauta tatou i te kimi i te Patireia na mua. Akapeea te akatupu anga i tetai irinaki anga ketaketa? Na te akavaitata putuputu anga kia Iehova, ma te pure akatenga e na roto i te apii putuputu uaorai. (Salamo 1:1-3; Philipi 4:6, 7; Iakobo 4:8) Mei te Ariki ko Davida ra, ka rauka ia tatou i te pure e: “I irinaki ana au ia koe, e Iehova: i tuatua ana au e, Ko koe taku Atua. Te maata oki o te au mea memeitaki naau.”—Salamo 31:14, 19.
18, 19. (a) Akapeea te maroiroi i te akaketaketa anga i to tatou irinaki kia Iehova? (e) Eaa ra tetai Kerititiano ka rave puareinga ai i te au atinga?
18 Maroiroi i roto i ta Iehova angaanga: Kua kapiti a Paulo i te irinaki anga i roto i te au taputou a Iehova ki te maroiroi te tata anga aia e: “E te inangaro nei matou kia akakite tamou marie rai kotou katoa i taua maroiroi ra, kia rauka te irinaki kite pu tikai e tae ua atu ki te openga.” (Ebera 6:11) Me te angaanga maata ra tatou i roto i te angaanga a Iehova, ka turu aia ia tatou. Ia tatou e kite ra i taua turu anga i te au taime ravarai, ka ketaketa atu to tatou irinaki anga iaia, ka ‘maroiroi tatou kare e ngaueue.’ (1 Korinetia 15:58) Ka akaouia to tatou akarongo, e ka akapapuia to tatou manakonakoanga.—Ephesia 3:16-19.
19 Rave puareinga anga i te au atinga: Kua akaruke a Paulo i tetai oraanga tau kia aru atu ia Iesu. Kua rave meitaki aia i te iki anga tika, noatu e ngata tona oraanga i tetai au taime mei te akara anga materia. (1 Korinetia 4:11-13) Kare a Iehova e taputou maira i tetai oraanga puapinga, e i tetai au taime te akakoromaki ra tona au tavini i te au turanga ngata. To tatou akamama puareinga anga mai i to tatou tu oraanga e te rave anga i te au atinga te akapapu maroiroi maira i ta tatou tautaanga kia tavini ia Iehova.—1 Timoteo 6:6-8.
20. Eaa ra i puapinga ai te akakoromakianga ki te aronga tei tuku i te au anoano o te Patireia na mua?
20 Akakoromaki anga: Kua raurau maira te pipi ko Iakobo i te au taeake Kerititiano e: “E teianei e akakoromaki, e aku au taeake, e kia tae mai te Atu ra.” (Iakobo 5:7) I roto i teia ao taitaia, e mea ngata i te akakoromaki. Te inangaro ra tatou kia tupu viviki ua te au mea. Inara te raurau maira a Paulo ia tatou kia aru i te aronga tei “tuatuaia maira i te akarongo e te akakoromaki.” (Ebera 6:12) E tiaki puareinga ua ia Iehova. Te ora mutu kore i runga i tetai enua parataito—papu tikai e e puapinga i te tiaki anga i te reira!
21. (a) Eaa ta tatou e akaari ra me tuku tatou i te au anoano o te Patireia na mua? (e) Eaa te ka uriuriia i roto i te atikara e aru maira?
21 Ae, e mea tau te akoanga a Iesu kia kimi i te Patireia na mua. Me rave tatou i te reira, te akaari ra tatou e te irinaki tikai ra tatou kia Iehova e te iki anga i te mataara meitaki roa atu no tetai Kerititiano kia akono. Inara, te ako katoa maira a Iesu ia tatou kia tamou ua atu i te ‘kimi na mua ra i te tuatua-tika a te Atua.’ I roto i te atikara e aru maira, ka kite tatou e eaa taua akamaroiroianga i inangaroia ai i teia tuatau.
Ka Rauka Ainei ia Koe te Akataka?
• No runga i te au mea i te pae kopapa, eaa te tu tau ta Iesu e akamaroiroi maira kia rave tatou?
• Eaa ta tatou i kite mai mei ta Iesu akatutuanga no te kamera e te puta o te nira?
• Eaa te au tu Kerititiano te tauturu maira ia tatou kia kimi i te Patireia o te Atua na mua?
[Tutu i te kapi 21]
Te manganui tei akarongo ki te au tuatua a Iesu e aronga putaua
[Tutu i te kapi 23]
E maata atu te inangaro o te tangata ou apinganui ra no tana au apinga i tona inangaro i te Atua
[Tutu i te kapi 23]
Kua oronga te tangata okooko i roto i ta Iesu parapore i te au mea ravarai kia rauka mai te poe meitaki maata roa
[Tutu i te kapi 24]
Me te angaanga maata ra tatou i roto i ta Iehova angaanga, ka turu mai aia ia tatou