Mei Tetai Tumu Rakau Lagani Auna Ainei Koe?
I ROTO i tetai oire i vao mai ia Port Moresby, Papua Nu Kini, te oki ra nga orometua e rua ki te kainga mei ta raua angaanga tutu anga. Ia raua e aaere ra, kua kite atu raua i tetai tumu rakau manea. “Aue, e lagani auna!” i karanga ai te tangata pakari ake. I te taanga atu anga ki te tangata mapu ake, kua karanga atu aia: “Te aiteanga oki o tera ingoa e ‘tumu rakau mataiti.’ Kare mei tetai au tumu rakau e manganui o te au toropika, i te au mataiti ravarai e pururu ana to te reira au rau e kua akaraanga mate. Inara, me aere mai ana te ua, kua ora akaou mai, kua puera te au tiare, e kua akaari akaou mai i tona manea.”
Ka kiteaia mai tetai apiianga mei te lagani auna, me kore te royal poinciana, tei kitea matauia te reira. Kia tau ki etai au aronga kite, kua manakoia te reira e ko tetai o te au tumu rakau tiare manea roa atu e rima i roto i te ao nei. Noatu e pururu ana tona tiare e te au rau i te tuatau maro, e akaputu ana te tumu rakau i te vai. E ketaketa te akatereanga o tona aka e ka rauka i te tupu ua takapini i te au toka te vai oonu ra i raro i te enua. Na teia ravenga, e tutau ei te reira iaia uaorai i te au matangi pakari. I te akataka poto ua anga, e tupu ruperupe ana te reira na te taui ua anga ki te au turanga ngata.
Penei ka kite mai tatou ia tatou uaorai i roto i te au turanga te timata ra i te tu o to tatou akarongo. Eaa te ka tauturu ia tatou i te akakoromaki? Mei te lagani auna rai, ka rauka ia tatou i te inu e i te akaputu i te vai oronga ora no te Tuatua a te Atua. Ka tau tatou kia mou piri katoa ki to ‘tatou mato,’ ko Iehova, e pera katoa ki tana akaaerenga. (2 Samuela 22:3) E tikai, e akamaaraanga manea tikai te lagani auna e noatu i roto i tetai turanga ngata, ka rauka ia tatou i te tamou marie i to tatou maroiroi i te pae vaerua e te manea me ariki tatou i te au tauturu ta Iehova e oronga maira. Na te rave anga i teia, ka “rauka ia [tatou] te au taputou” tana i akanoo mai, kapiti mai te taputou no te ora mutu kore.—Ebera 6:12, NW; Apokalupo 21:4.