Au Uianga a te Aronga Tatau

Kua taangaanga ainei a Iosepha, e tavini tiratiratu no Iehova, i tetai kapu ario tuke ake rai i te tatau i te au akairo, mei tei manakoia ia Genese 44:5?

Kare e tumu i te irinaki e kua taangaanga tikai a Iosepha i tetai angaanga purepure.

Te akakite maira te Pipiria i to Iosepha maramaanga tikai no runga i te taangaanga anga o te au peu manamana kia kite i te tuatau ki mua. I mua atu ana, i te patiia atu anga kia akamarama i te au moemoea a Pharao, kua putuputu a Iosepha i te akapapu e ko te Atua anake ua te ka ‘akakite’ mai i te au tupuanga e vaitata maira. Tei tupu, kua irinaki mai a Pharao uaorai e ko te Atua ta Iosepha e akamori ra​—te Atua mou, kare te au mana purepure—​tei akakeu ia Iosepha kia kite te au akatakaanga no runga i te tuatau ki mua. (Genese 41:16, 25, 28, 32, 39) I roto i te ture orongaia kia Mose i muri roa mai, kua ture a Iehova i te taangaanga anga o te angaanga manamana me kore te purepure, i te akapapu mai anga i reira e Koia anake ua te ka rauka i te akakite i te ka tupu i te tuatau ki mua.​—Deuteronomi 18:10-12.

Eaa, i reira, a Iosepha i akakite atu ei na roto i tana tavini e kua taangaanga aia i tetai kapu ario kia ‘tatau meitaki i te au akairo’?a (Genese 44:5, NW) Ka anoanoia tatou kia akamanako i te au turanga i tataia ai teia tuatua.

No tetai onge kino pakari tikai, kua aere atu te au tuakana o Iosepha ki Aiphiti i te tiki kai mai. I te au mataiti i mua atu ana, kua oko teia au tuakana nei tikai ia Iosepha ei tuikaa. I teianei, kare oki ratou i kite ana, te pati tauturu ra ratou ki to ratou uaorai teina, ko tei riro mai ei tangata akaaere no te kai i Aiphiti. Kare a Iosepha i akakite ana kia ratou e koai aia. Mari ra, kua manako mai aia i te timata atu ia ratou. E tau tikai, kua inangaro a Iosepha i te kite i te tu tika tikai o to ratou tataraara. Kua inangaro katoa aia i te kite​—e mei teaa rai te maata—​o to ratou aroa no to ratou teina ko Beniamina e to ratou metua tane, ko Iakoba, tei akaperepere tikai ia Beniamina. E no reira, kua rave a Iosepha i tetai angaanga akavare.​—Genese 41:55–​44:3.

Kua akaue a Iosepha i tetai tavini ona kia akaki i te au pute a tona au tuakana ki te kai, kia akaoki tataki tai i ta ratou moni ki roto i tana uaorai pute, e kia tuku i te kapu ario a Iosepha ki roto i te pute a Beniamina. I roto i teia au apinga katoatoa nei, te akatutu ra a Iosepha iaia uaorai ei tangata akaaere no tetai enua peikani. Kua taui aia iaia uaorai, tana au angaanga, e tona reo ki te tu o etai tangata akaaere, mei tei kiteaia mai i roto i te au mata o tona au tuakana kite kore ra.

I te aravei atu anga a Iosepha i tona au tuakana, kua aere ua atu aia i tana akavareanga, i te uianga kia ratou: ‘Kare kotou i kite e, e riro te tangata mei iaku nei i te tatau meitaki i te au akairo?’ (Genese 44:15, NW) E no reira, i te akaraanga e tuanga ua te kapu no tetai angaanga akavare. Kare a Iosepha i taangaanga ana tikai i te kapu kia tatau i te au akairo, mei ia Beniamina rai kare i keia tikai ana i te reira.

[Tataanga Rikiriki i Raro]