E Akaaerenga no te Akatupu Anga i to te Atua Akakoroanga

“[Te Atua] tei rave i te au mea katoa kia tau i te akakoro a tona anoano.”​—EPHESIA 1:11.

1. No teaa te au putuputuanga katoatoa o te Au Kite o Iehova ka akaputuputu mai ei i roto ia Aperira 12, 2006?

A TE aiai Ruitoru, Aperira 12, 2006, ka akaputuputu mai mei te 16 mirioni tangata i te akono i te Kaikai Anga Aiai a te Atu. I roto i te au ngai uipaanga tataki tai, ka vai tetai kaingakai e varaoa opue kore to runga, te akatutu maira i te kopapa o Karaiti, e te uaina muramura, e akairo no tona toto tei akamaringiia. Me vaitata ki te openga o te akoanga i te akamarama mai i te aiteanga o te Akamaaraanga i to Iesu matenga, ka pati aereia teia nga oroa​—te mea mua ko te varaoa, e oti i reira ko te uaina​—ki te katoatoa tei tae mai. E tokoiti ua rai te au putuputuanga o te Au Kite o Iehova, e tai me kore e maata atu te aronga tei tae mai ka kai i te oroa. I te maataanga, ra, kare te aronga i tae mai e kai. No teaa ra i tokoiti ua ai te au Kerititiano, te aronga e manakonako ra i te noo i te rangi, ka kai, kareka te maataanga, te aronga tei manakonako i te noo e mutu kore ua atu ki runga nei i te enua, kare e kai?

2, 3. (a) Akapeea ra a Iehova i te anga mai anga kia tau ki tona akakoroanga? (e) No teea akakoroanga i anga mai ei a Iehova i te enua e te tangata?

² E Atua no te akakoroanga a Iehova. I te akatupu anga i tona akakoroanga, e ‘rave ana aia i te au mea katoa kia tau ki te akakoro a tona anoano.’ (Ephesia 1:11) Kua anga aia na mua i tana Tamaiti anau tai. (Ioane 1:1, 14; Apokalupo 3:14) E oti i reira, na roto i tana Tamaiti, kua anga maira Iehova i tetai pamiri tamariki vaerua e i te openga iora i te ao tikai e pini ua ake, tei kapiti mai i te enua e te tangata i runga i te reira.​—Iobu 38:4, 7; Salamo 103:19-21; Ioane 1:2, 3; Kolosa 1:15, 16.

³ Kare a Iehova i anga mai i te enua ei ngai tamatamata anga no te akamaata atu i tona pamiri tamariki vaerua i te rangi, mei tei apiiia e te au ekaretia e manganui o Kerititome. Kua anga aia i te reira ma te akakoroanga papu tikai, no te reira “kia tangataia.” (Isaia 45:18) Kua anga te Atua i te enua no te tangata e i te tangata no te enua. (Salamo 115:16) Kia akariroia te ao katoa nei ei parataito, kia akakiia ki te au tangata tuatua tika, te ka tatanu i te reira e te ka akono i te reira. Kare roa te manakonakoanga no te aere ki te rangi i te openga i orongaia ana ki te nga tangata mua.​—Genese 1:26-28; 2:7, 8, 15.

Akaaoangaia to Iehova Akakoroanga

4. Akapeea te mataara e taangaanga ra a Iehova i te turanga ngateitei i te akaaoangaia i te akamataanga mai tikai te tuatua enua o te tangata?

⁴ Kua meameaau tetai tamaiti vaerua a te Atua e kua umuumu kia takino i to Iehova akakoroanga, na te taangaanga tau kore anga i te apinga aroa tu-Atua o te anoano rangatira. Kua tamanamanata aia i te au e rauka ra i te aronga pouroa e akaari ra i te kauraroanga aroa ki to Iehova turanga ngateitei. Kua arataki a Satani i nga tokorua mua kia akamata i tetai arataa takake roa mai mei te Atua. (Genese 3:1-6) Kare aia i patoi ana i to Iehova mana, kua akaao ra aia i te mataara e taangaanga ra Aia i te turanga ngateitei koia oki i Tona tikaanga kia tutara. I reira, kua akatuia mai te maroanga maata no to Iehova turanga ngateitei i runga nei i te enua, i te akamataanga mai tikai te tuatua enua o te tangata.

5. Eaa te rua o te maroanga tei akatuia mai, i te kapiti anga atu iaai ma?

⁵ Tei o mai ki roto i taua maroanga maata o te turanga ngateitei i te ao e pini ua ake koia oki ko te rua o te maroanga tei akatuia mai e Satani i te tuatau o Iobu. Kua akatupu a Satani i te ekoko no runga i te akakoroanga tikai o ta Iehova au mea ora i anga i roto i te kauraro anga Kiaia e te tavini anga Iaia. Kua karanga a Satani e te rave ua ra ratou i te reira no te au tumuanga noinoi e me rokoia ana e te timataanga ka akakino ratou i te Atua. (Iobu 1:7-11; 2:4, 5) Noatu kua akatuia mai teia i roto i te pirianga ki tetai tavini tangata ua nei o Iehova, te akao katoa maira teia akaaoanga i te au tamariki vaerua a te Atua, e te Tamaiti anau tai katoa a Iehova.

6. Akapeea a Iehova i te vai akarongo mou anga ki tona akakoroanga e tona ingoa?

⁶ Te vai akarongo mou anga ki tona akakoroanga e ki te aiteanga o tona ingoa, kua akariro a Iehova iaia uaorai ei Peroveta e ei Akaora.a Kua akakite aia kia Satani: “Ka tuku oki au i te ke ia korua ko te vaine, e to uanga e tona uanga; nana e akaparuparu i to mimiti, e naau e akaparuparu i tona pooavae.” (Genese 3:15) Na roto i te Uanga a tana “vaine,” me kore i te tuanga a tona akaaerenga i te rangi, e pau ei a Iehova i te akaaoanga a Satani e te oronga i te manakonakoanga o te rangatiraanga e te ora no te uanga a Adamu.​—Roma 5:21; Galatia 4:26, 31.

“Te Tuatua Ngaro o Tona Anoano”

7. Eaa te akakoroanga ta Iehova i akakite mai na roto i te apotetoro ko Paulo?

⁷ I roto i tana reta ki te au Kerititiano i Ephesia, kua akamarama manea tikai te apotetoro ko Paulo e akapeea a Iehova i te akaaere anga i te au mea kia akatupu i tona akakoroanga. Kua tata a Paulo: “E kua akakite mai ia tatou i te tuatua ngaro o tona anoano, i tona uaorai inangaro takinga-meitaki i akakoroia e ia i roto iaia uaorai: E kia tae ki te akaaerenga i te openga tikai o te au tuatau ra, kia tavaitai aia i te au mea katoatoa i te Mesia ra, to te rangi, e to te ao katoa nei.” (Ephesia 1:9, 10) To Iehova akakoroanga kaka koia oki kia akatupu i tetai ao taokotai e pini ua ake te ka nooia e te au mea ora ka kauraro ma te aroa ki tona turanga ngateitei. (Apokalupo 4:11) I reira e akatapuia ai tona ingoa, e akapapuia ai a Satani ei pikikaa, e akatupuia ai te anoano tu-Atua “i te enua nei, mei tei te ao katoa na.”​—Mataio 6:10.

8. Eaa te aiteanga o te tuatua tei uriia ei “akaaerenga”?

⁸ Ko to Iehova “inangaro takinga-meitaki,” me kore akakoroanga, ka akatupuia na roto i ‘tetai akaaerenga.’ Kua taangaanga a Paulo i tetai tuatua ko te aiteanga tikai e “akatereanga ngutuare.” Te tou ra te reira, kare ki tetai kavamani, mei te Patireia Mesia te tu, mari ra ki tetai mataara no te akatere anga i te au mea katoa.b Te mataara umere ka akaaere ei a Iehova i te au mea katoa kia akatupu i tona akakoroanga ka o mai tetai “tuatua ngaro” te ka akakite tamou uaia rai i te au anere ua atu mataiti ka aereia.​—Ephesia 1:10; 3:9, tataanga i raro ake, NW.

9. Akapeea ra a Iehova i te akaari tamou ua atu anga rai i te tuatua ngaro o tona anoano?

⁹ Na roto i te au koreromotu, kua akakite mari ua mai a Iehova e akapeea tona akakoroanga no runga i te Uanga tei taputouia mai i Edene me akatupuia. Kua akakite mai tana taputou tei koreromotuia kia Aberahama e ka aere mai te Uanga taputouia ki te enua nei na roto i te uanga o Aberahama e ko te ravenga te reira e akameitaki ei to te “pa enua katoa o te ao nei” ia ratou uaorai. Kua akakite katoa mai taua koreromotu ra e ka kapitiia mai etai ke atu ki te tuanga maata o te uanga. (Genese 22:17, 18) Kua akaari mai te Ture koreromotu tei papauia ki te Iseraela kopapa i to Iehova akakoroanga kia akatupu i tetai “basileia taunga.” (Exodo 19:5, 6) Kua akaari mai te koreromotu tei papauia kia Davida e ka riro ko te Uanga te Upoko o te Patireia e tuatau ua atu. (2 Samuela 7:12, 13; Salamo 89:3, 4) I te arataki anga rai te Ture koreromotu i te ngati Iuda ki te Mesia, kua akakite i reira a Iehova i tetai au tuanga ke atu o te akatupuanga o tona akakoroanga. (Galatia 3:19, 24) Taua au tangata tei kapitiia atu ki te tuanga maata o te uanga ko ratou te “basileia taunga” tei totouia e te ka apaiia atu ki roto i “tetai koreromotu ou” ei “Iseraela” ou, ei mea vaerua.​—Ieremia 31:31-34; Ebera 8:7-9.c

10, 11. (a) Akapeea a Iehova i te akakite anga mai i te Uanga tei totouia mai? (e) Eaa te tumu i aere mai ei te Tamaiti anau tai a te Atua ki te enua nei?

¹⁰ Kia tau ki te akaaerenga o te akakoroanga tu-Atua, kua tae te tuatau no te Uanga totouia kia mama mai ki te enua nei. Kua tono maira a Iehova i te angera ko Gaberiela kia akakite kia Maria e ka anau mai aia i tetai tamaiti te ka tapaia ko Iesu. Kua tuatua atura te angera kiaia: “Ka maata aia, e ka tuatuaia i te Tamaiti na Tei Teitei: e na te Atu ra, na te Atua e oronga mai i te terono o tona metua o Davida nona: Ei iaia te au i te kopu-tangata o Iakoba e tuatau ua atu, kare rava ïa e kore tona basileia.” (Luka 1:32, 33) I reira te akatakaanga o te Uanga taputouia i taka meitaki ei.​—Galatia 3:16; 4:4.

¹¹ Ka aere mai te Tamaiti anau tai a Iehova ki te enua nei e ka timataia e tae roa atu ki te openga. Tei roto i te pauanga apa kore tikai ki ta Satani akaaoanga i te rima o Iesu. Ka vai akarongo mou ua atu ainei rai aia ki tona Metua? Te akao maira teia i tetai tuatua ngaro. I muri mai kua akamarama maira te apotetoro ko Paulo i ta Iesu tuanga: ‘Kua tika tikai oki e, e tuatua ngaro maata to te akarongo, I kitea mai [“aia,” NW] i roto i te tangata nei, i akatikaia mai e te vaerua, i akaraia e te au angela, i tuatua aereia ki o te etene, i akarongoia i te ao nei, e raveia atura ki runga i te ao ra.’ (1 Timoteo 3:16) Ae, na roto i tona tu tiratiratu ngaueue kore e tae ua atu ki tona matenga, kua oronga mai a Iesu i te pauanga papu tikai ki ta Satani akaaoanga. Inara te vai nei rai tetai au akatakaanga o te tuatua ngaro kare i akaariia mai ake.

“Te Tuatua Ngaro o te Basileia o te Atua”

12, 13. (a) Eaa tetai tuanga o “te tuatua ngaro o te basileia o te Atua”? (e) Eaa ra tei o mai ki roto i te iki anga a Iehova i tetai au tangata tokoiti ua kia aere ki te rangi?

¹² I tetai o tona au tere tutu aere anga i Galilea, kua akakite a Iesu e e pirianga vaitata to te tuatua ngaro ki tona kavamani Patireia Mesia. Kua akakite aia ki tana au pipi: “No te mea kua orongaia mai te kite ia kotou i te tuatua ngaro o te basileia o te ao ra [“basileia o te Atua,” Mareko 4:11].” (Mataio 13:11) Te akao maira okotai tuanga o taua tuatua ngaro ra i te iki anga a Iehova i tetai “anana iti” e 144,000 tangata kia kapiti atu ki tana Tamaiti ei tuanga no te uanga, kia tutara kapiti e ia i te rangi.​—Luka 12:32; Apokalupo 14:1, 4.

¹³ I te mea i angaia te tangata kia noo ki runga nei i te enua, kua anoanoia mai i reira tetai “mea anga ouia” e Iehova kia rauka tetai au tangata i te aere ki te rangi. (2 Korinetia 5:17, NW) I te tuatua anga ei tangata ikiia no te aronga ka piri ki teia manakonakoanga tau no te rangi, kua tata te apotetoro ko Petero: “Kia akameitakiia te Atua te Metua o to tatou Atu ra o Iesu Mesia, ko te akaanau akaou ia tatou no te maata o tona aroa, kia rauka te manako ora i te tuakaouanga o Iesu Mesia mei te mate maira, Kia rauka te tuanga kino kore, e te viivii kore, e te mae kore, ko tei vaioia ki runga i te rangi na kotou.”​—1 Petero 1:3, 4.

14. (a) Akapeea ra te aronga kare i te ngati Iuda i te o anga atu ki roto i “te tuatua ngaro o te basileia o te Atua”? (e) No teaa i rauka ai ia tatou kia marama i teia “au mea oonu rai o te Atua ra”?

¹⁴ Tetai tuanga ke mai o te tuatua ngaro no runga i te kavamani Patireia no te tuatau ki mua koia oki to te Atua anoano kia kapiti mai i te aronga kare i te ngati Iuda ki roto i te au tangata tokoiti ua ka kapikiia mai kia tutara ma Karaiti i te rangi. Kua akamarama mai a Paulo i teia tua o ta Iehova “akaaerenga,” me kore mataara o te akatere anga i te akatupuanga o tona akakoroanga: ‘Ko tei kore i akakiteia mai ki te tangata i te au uki i muatangana ra, mei tei akakiteia mai e te vaerua i teianei ki tana au aposetolo tapu ra e te au peroveta nana ra; E ei aronga tuanga katoa te au etene, ei kapitianga okotai rai, e kia rauka katoa tei tuatuaia mai e ia i te Mesia i te evangelia nei.’ (Ephesia 3:5, 6) Kua akakiteia te maramaanga o teia tuanga o te tuatua ngaro ki te “au aposetolo tapu.” Mei te reira rai i teia tuatau, naringa kare te tauturu a te vaerua tapu, kare tatou e marama i teia “au mea oonu rai o te Atua ra.”​—1 Korinetia 2:10; 4:1; Kolosa 1:26, 27.

15, 16. No teaa a Iehova i iki ei i to Karaiti au oa tutara mei roto mai i te tangata?

¹⁵ Te “okotai anere e a ngauru ma a i te tausani” tei kiteaia e tu ra ma “te Punua-mamoe” i runga i te Maunga i Ziona kua karangaia e i “okoia no roto i teianei ao,” “i okoia ïa aronga no roto i te tangata nei, ei popo mua na te Atua e na te Punua-mamoe ra,” na Iesu Karaiti. (Apokalupo 14:1-4) Kua iki a Iehova i te mea mua o tana au tamariki i te rangi kia riro ei tuanga maata no te uanga i taputouia mai i Edene, inara no teaa aia i iki ei i to Karaiti au oa no roto mai i te tangata? Te akamarama maira te apotetoro a Paulo e ko teia numero tokoiti ua kua “karangaia mai i te akakoroanga nana ra [na Iehovah],” “tei tau i te anoano takinga-meitaki o tona uaorai ngakau.”​—Roma 8:17, 28-30; Ephesia 1:5, 11; 2 Timoteo 1:9.

¹⁶ To Iehova akakoroanga koia oki kia akatapu i tona ingoa maata e te tapu e kia akatika i tona turanga ngateitei. Na roto i te pakari akaaite koreia o tana “akaaerenga,” me kore mataara o te akatere anga i te au mea katoa, kua tono maira a Iehova i tana Tamaiti anau tai ki te ao nei, te ngai i timataia ai aia e tae ua atu ki te openga. Pera katoa, kua akakoro a Iehova e kia kapitiia mai ki te kavamani Patireia Mesia o tana Tamaiti tetai au tangata tei turuturu katoa i Tona turanga ngateitei e mate ua atu.​—Ephesia 1:8-12; Apokalupo 2:10, 11.

17. No teaa tatou ka rekareka ai e ko to Karaiti au oa tutara kua noo ana mei te au tangata nei rai i mua ana?

¹⁷ Kua akaari a Iehova i tona aroa maata no ta Adamu uanga na te tuku anga i tana Tamaiti kia aere mai ki te enua nei e na te iki anga i tetai aronga mei roto i te tangata te ka riro ei aronga tuanga kapiti ma te Tamaiti i roto i te kavamani Patireia. Akapeea ra te reira i te akapuapinga anga i te aronga ke atu tei vai akarongo mou ua kia Iehova, mei ia Abela mai e aere ua atu? Anau tuikaaia mai ki te ara e te mate, ka anoanoia te au tangata ara kia akaoraia i te pae vaerua e te pae kopapa e kia apaiia ki te turanga apa kore, kia tau ki to Iehova akakoroanga mua no te tangata. (Roma 5:12) E mea pumaana tikai no te aronga katoatoa e tapapa atura i te oraanga mutu kore i te enua nei kia kite e ka akaari mai to ratou Ariki i te aroa e te manako takinga meitaki no ratou mei tana rai i rave ana ki tana au pipi i te tuatau i tana angaanga orometua i te enua nei! (Mataio 11:28, 29; Ebera 2:17, 18; 4:15; 7:25, 26) E akapumaanaanga tikai no ratou kia kite e ko to Karaiti au oa ariki kau taunga i te rangi e au tane e te au vaine akarongo tei aro ana ratou uaorai i te au tu paruparu e kua kite ana i te au akaaoanga o te oraanga, mei ia tatou rai!​—Roma 7:21-25.

To Iehova Akakoroanga Poka Kore

18, 19. No teaa ra te au tuatua a Paulo i roto ia Ephesia 1:8-11 i taka meitaki atu ei kia tatou, e eaa te ka akamanakoia i roto i te atikara e aru mai nei?

¹⁸ I teianei ka rauka ia tatou kia marama meitaki atu i te aiteanga o ta Paulo au tuatua ki te au Kerititiano akatainuia, mei tei kiteaia i roto ia Ephesia 1:8-11. Kua tuatua aia e kua akakite mai a Iehova kia ratou i “te tuatua ngaro o tona anoano,” e “e tuanga oki” ratou ma Karaiti, e ko ratou kua “akono takereia i te akakoro nana, na tei rave i te au mea katoa kia tau i te akakoro a tona anoano.” Te kite nei tatou e te tano tikai ra teia ki roto i ta Iehova “akaaerenga” umere o te au mea katoa no te akatupu anga i tona akakoroanga. Te tauturu katoa maira teia ia tatou kia marama e no teaa i tokoiti ua ai te au Kerititiano e kai ana i te oroa i ko i te Kaikai Anga Aiai a te Atu.

¹⁹ I roto i te atikara e aru mai nei, ka kite tatou eaa te aiteanga o te Akamaaraanga no to Karaiti matenga ki te au Kerititiano tei te rangi te manakonakoanga. Ka kite katoa tatou e no teaa te au mirioni ua atu e manakonako ra i te noo e mutu kore ua atu i te enua nei ka tau ei kia akamanako meitaki i ta te Akamaaraanga e akatutu maira.

[Au Tataanga Rikiriki i Raro]

Na te Akamanako Akaou Anga

• No teaa a Iehova i anga mai ei i te enua e i tuku ei i te tangata ki runga i reira?

• No teaa i anoanoia ai kia timataia te Tamaiti anau tai a Iehova ki runga nei i te enua?

• No teaa a Iehova i iki ei i to Karaiti au oa tutara mei roto mai i te tangata?