Au Uianga a te Aronga Tatau
Ka rauka ainei i te kite e eia tikai au totou no te Mesia i roto i te au Tuatua Tapu Epera?
Ka tauturu te apii meitaki anga i te au Tuatua Tapu Epera ia tatou kia akataka i tetai au totou tei akatupuia i roto ia Iesu Karaiti. Te akaari maira teia au totou e ka na roto mai te Mesia i teea kopu tangata, aea aia e riro mai ei ei Mesia, tana ka rave, te tu o te tangata kiaia, e ta te Atua e inangaro ra iaia kia rave. Kua kapiti pouroaia mai teia ei tauturu ia tatou kia kite e ko Iesu te Mesia. E akamatakiteanga ra tetai, me te tauta ra tatou i te akapapu e eia tikai au totou no te Mesia ka kiteaia i roto i te au Tuatua Tapu Epera.
Kare te katoatoa e ariki ana i te totou Mesia, e tei kare i te totou Mesia. I roto i tana puka The Life and Times of Jesus the Messiah, kua akakite mai a Alfred Edersheim e kua irinaki te au ngati Iuda i mua ake i to Iesu tuatau e e 456 totou no runga i te Mesia i roto i Tuatua Tapu Epera, noatu e kare te maataanga i taiku mai ana i te Mesia. Te akara meitakiia anga teia au irava e 456, kua tupu mai te au manako ekoko e me no runga rai ia Iesu Karaiti tetai o teia au totou. Ei akaraanga, kua karanga a Edersheim e kua manako te ngati Iuda e te tuatua ra a Genese 8:11 i te Mesia. Kua karanga ratou e ko “te rau olive, ta te kukupa i kave mai, kua raveia mai mei te Maunga o te Mesia.” Kua taiku katoa mai te tangata tata ia Exodo 12:42. Te akamarama anga i te tu marama kore o te ngati Iuda i teia irava, kua tata aia e: “Te aere mai anga a Mose mei roto mai i te metepara, ka aere mai te Mesia mei roto mai ia Roma.” Ngata ra i te maata anga o te au tangata kite e tetai aronga ke mai i te marama i te pirianga o teia nga irava e te au akamaramaanga tarevake no runga ia Iesu Karaiti.
Noatu e ka manako ua tatou ki runga te au totou tei akatupuia no runga ia Iesu Karaiti, ka ngata rai ia tatou te ariki e eia tikai numero totou. Ei akaraanga e maata te au totou no runga i te Mesia i roto ia Isaia pene 53. Te totou ra a Isaia 53:2-7 e: “Kare ona tu e te manea . . . Kua akavaavaaia aia, e kua kopaeia e te tangata . . . Kua rave tika ra aia i to tatou paruparu . . . Kua koia ra aia no ta tatou au ara . . . i aratakiia aia mei te punua mamoe ki te tainga.” Ka tau ainei kia tareia teia au tuanga katoa o Isaia pene 53 ei totou okotai no runga i te Mesia, me kore ka tau ainei teia au tu tataki tai o te Mesia kia akamanakoia ei totouanga takake?
Akamanako katoa ana ia Isaia 11:1, te tatau ra e: “E tupu tetai tupu ou no roto i te tumu o Iese; e no roto mai i tona au aka e tupu mai ei tetai uri uua.” I roto i te irava 10, kua mama akaou mai teia totou, tei aiteite te tuatua. Ka tare ainei tatou i teia nga irava e e rua nga totou, me kore e tai rai totou e ripitiia ra? Te au taopenga anga no runga ia Isaia pene 53 e Isaia pene 11 ka taui takiri i te katoaanga o te numero o te au totou no te Mesia.
Kare i te mea puapinga kia kite tatou e eia tikai totou no runga i te Mesia i roto i te au Tuatua Tapu Epera. I roto i ta tatou puka ka kite mai tatou i te au papaanga totou e manganui no runga ia Iesu e te tupuanga o te reira.a Ka rauka ia tatou i te taangaanga i te au manako i roto i teia au papaanga no ta tatou uaorai apii e ta te pamiri, e i roto katoa i ta tatou angaanga orometua. Ka akaketaketa teia i to tatou akarongo e ka akatupu ua rai a Iehova i tana i tuatua.
[Tataanga i Raro Ake]