Ka “Kite Oki te au Etene e ko Iehova Au”

KA AKAPEEA koe me akaapaia no tetai kino kare koe i rave ana? Akapeea me kua riro taua kino ra ei tamamae i etai ke atu, kapiti mai i te aronga meitaki ua? Papu e ka inangaro koe kia tiama toou ingoa! Kua kite ainei koe e te akaperaia ra rai a Iehova? Teia tuatau e manganui te akaapa nei i te Atua no te tu tika kore e te mamae e tupu nei i roto i teia ao. Te inangaro ra ainei a Iehova kia tiama tona ingoa? Ae! Akamanako ana i tei tataia i roto i te puka o Ezekiela.​—E tatau ia Ezekiela 39:7.

“Kare oki e tika iaku kia akaviivii akaouia toku ingoa tapu,” i karanga ai a Iehova. Me akaapa te tangata iaia no te tu tika kore, te akakino ra ratou i tona ingoa. Akapeea? I roto i te Pipiria, tetai taime ko te kupu “ingoa,” te aiteanga e rongo. Te karanga ra tetai tataanga e te tuatua ra te ingoa o te Atua i “tei kiteia no runga iaia​—tana i akakite mai no runga iaia uaorai; e te akatutu katoa ra i tona turanga rongonui e tona tu ngateitei.” Te ingoa o Iehova te o maira tona rongo. Eaa tei kiteaia no runga ia Iehova, me tupu te tu tika kore? E rikarika ana aia i taua tu ra! E e tangi katoa ana aia i te aronga tei rokoia e te mamae no te tu tika kore.a (Exodo 22:22-24) Me karanga te tangata e no te Atua rai te apa no te au mea tana e rikarika ra, te taviivii ra ratou i tona rongo meitaki. Te ‘akakino tamou ra ratou i tona ingoa.’​—Salamo 74:10.

Akara ana e te taangaanga ra a Iehova i te tuatua “toku me kore taku ingoa tapu.” (Irava 7) I roto i te Pipiria e maata te taime e piri atura te ingoa o Iehova ki te tuatua “tapu” e te “tu tapu.” Te tuatua “tapu” te akakite ra i te manako no te tu takake; te akaari katoa ra te reira i te tu viivii kore e te tiama. Te ingoa o Iehova e mea tapu no te mea e tu tapu tona​—takake takiri mai mei tetai ua atu apinga ara e te viivii. Te kite ra ainei koe e no teaa ra te aronga tei akaapa ia Iehova no te au angaanga kino, i akamaata rava atu ei i te akakino ki runga i tona “ingoa tapu”?

To Iehova akakoroanga kia tiama tona ingoa na roto i tona Patireia, ko te tumu manako maata ia o te Pipiria. Te akaketaketaia ra taua tumu manako ra i roto i te puka o Ezekiela, tei akakite putuputu e “e kite oki te au etene e ko Iehova au.” (Ezekiela 36:23; 37:28; 38:23; 39:7) Akara ana e kare na te au etene e iki e me ka inangaro ratou i te kite e me koia a Iehova me kare. Mari ra, ka “kite oki” ratou. Koia oki, te akakoro ra a Iehova no te pa enua kia kite e koia tika rai tana e karanga ra e koia​—ko Iehova, te Atu Ngateitei e ko tona ingoa te akatutu ra i te au mea tapu ravarai tei tiama e te viivii kore.

Ko te taputou, “e kite oki te au etene e ko Iehova au,” tei akakite putuputuia mai ana, e tuatua meitaki te reira no te aronga e inangaro ra i te kite i te openga o te tu tika kore e te mamae. Kare e roa atu ana ka akatupu a Iehova i taua taputou ra e ka akakore aia i te kino tei tukuia ki runga i tona ingoa. Ka takore takiri aia i te au tu kino e te aronga tei akatupu i te reira, inara ka akaora aia i te aronga tei ariki e tei akangateitei i tona ingoa e te aiteanga o te reira. (Maseli 18:10) Te akakeuia ra ainei koe kia kite e ka akapeea koe me akavaitata atu kia Iehova, te Atua tapu, ko ‘tei inangaro i te tuatua tau me kore i te tu tika’?​—Salamo 37:9-11, 28.