“Kua Kitea Iaku te Tu Rangatira Mou”

TOKU ORAANGA I MUA ANA:

Kua anauia au i Moundsville, e oire i te pae i te Kauvai o Ohio i te tua tokerau o West Virginia, U.S.A. Ko au te rua o te a o te tamariki i roto i toku pamiri, e no reira e mataora ua ana to matou oraanga e kare e maromaroa ana. E nga metua tuatua tika e te angaanga pakari toku te inangaro ra i te au tangata. Kare e maata ana ta matou moni, inara e rauka ua ana ta matou e anoano ra. Ei Au Kite no Iehova, kua tauta toku nga metua i te apii i te au kaveinga Pipiria kia matou mei to matou tamariki anga.

Inara te mapu mai anga au, kare toku ngakau i tamou mai ana i tei apiiia mai kiaku. Kua ekoko au me e puapinga ainei me kore e mea mataora tikai ainei tetai oraanga tei aratakiia e te au kaveinga Pipiria. Kua manako mai au e ko te tu rangatira no te rave anga i taku e inangaro ra i te rave, ko te mataara anake ia no te tu mataora tikai. Kare i roa ana, kua akamutu au i te aere ki te au uipaanga Kerititiano. Kua aru mai toku tuakana e toku tuaine i toku tu meameaau. Kua rave to matou metua i ta raua i rauka i te tauturu ia matou, inara kua kopae matou i ta raua tautaanga.

Kare au i kite ana e te arataki ra te tu rangatira taku e inangaro ra iaku ki roto i te turanga kino no te kai i te au apinga akakona. Tetai ra te oki ra au ki te kainga mei te apii mai, kua oronga mai tetai oa i tetai avaava. Kua ariki au i te reira. Mei te reira taime mai, kua ariki au i tetai atu au peu kino. Aere ua rai, kua kai au i te au apinga akakona, kua inu i te kava e kua rave i te au mea tau kore. I te au mataiti tei aru mai, kua tamata au i te au apinga akakona pakari atu e kua maata atu taku kai anga i te reira. Kua kino roa atu toku turanga, e kua akamata au i te oko i te au apinga akakona ei turuturu i taku peu.

Noatu kare au i akarongo ana ki toku akava ngakau, kua akamaara ua mairai te reira kiaku e e tarevake taku e rave ra. Noatu rai, kua manako au e kua kino roa toku oraanga e kare e rauka i te taui i te reira. Noatu e kua takapiniia au e te au tangata i te au ngai tamataoraanga e te au ngai akatangi anga imene, kua maromaroa tikai au e te taitaia. I tetai au taime e akamanako ana au i te tu mako e te tu meitaki o toku nga metua, e i akapeea au i te aere ke anga.

KUA TAUI TE PIPIRIA I TOKU ORAANGA:

Noatu e kua manako au e kare rava au e taui, kare ra tetai pae i manako akapera ana. I te mataiti 2000, kua pati mai toku nga metua iaku kia aere ki te uruoaanga tapere a te Au Kite o Iehova. Kua aere au noatu kare au e inangaro roa ana i te aere. Kua poitirere au e kua aere mai toku tuakana e te tuaine tei aere ke katoa.

Iaku i ko i te uruoaanga, kua maara mai iaku e i aere mai ana au ki teia ngai no tetai akatangi anga imene i tera atu mataiti i topa. Kua akakeu maataia toku ngakau i te kite anga i te tuke o te reira ngai. Iaku i ko i te akatangi anga imene, kua ki te ngai i te tita e te auai o te avaava. Maata te aronga i reira kare e oaoa ana, e e taitaia tikai te au tuatua o te au imene. Inara i ko i te uruoaanga, kua takapini ia au e te au tangata mataora tikai​—tei ariki pumaana mai iaku, noatu kare au i kite ana ia ratou no tetai au mataiti. E ma tikai te reira ngai, e e pumaana tikai te au tuatua tei orongaia mai no runga i te tuatau ki mua. Te kite anga au i te akakeuanga meitaki o te tuatua mou Pipiria kua manako mai au eaa ra au i kopae ei i te reira!—Isaia 48:17, 18

I muri ua ake i te uruoaanga, kua akamata au i te aere ki te putuputuanga Kerititiano. Kua akakeu katoaia toku tuakana e toku tuaine i ta raua i kite i ko i te uruoaanga e kua akamata raua i te aere katoa ki te putuputuanga. Kua ariki matou tokotoru i te apii i te Pipiria.

Tetai irava Pipiria tei akakeu tikai iaku ko Iakobo 4:8, te tuatua ra e: “E akavaitata atu ki te Atua, e nana e akavaitata mai kia kotou na.” Kua kite mai au e me ka inangaro au kia akavaitata atu ki te Atua, ka anoanoia au kia tama i toku oraanga. Kapiti mai ki tetai atu au tauianga, kua anoanoia au kia akamutu i te kai avaava, kai maata i te apinga akakona e te inu i te kava.​—2 Korinetia 7:1.

Kare au i piri akaou atu ana ki toku au oa i mua ana e kua piri atu au ki te au oa ou​—mei roto mai i te aronga akamori o Iehova. Kua tauturu maata mai tetai tangata pakari Kerititiano iaku, tei apii mai i te Pipiria kiaku. Kua ringi putuputu mai aia iaku e kua atoro mai aia kia kite e te akapeea ra au. Tae mai ki teia ra, koia tetai o toku oa piri vaitata tikai.

I te tuatau tupuanga rau i te mataiti 2001, kua akatapu au i toku oraanga ki te Atua na te papetitoanga ki te vai, pera katoa toku tuakana e te tuaine. Kua mataora tikai toku nga metua e toku teina akarongo mou te taokotaiia anga to matou pamiri i te akamorianga ia Iehova.

KUA PUAPINGAIA AU:

I manako ana au e e tu pakari roa te au kaveinga Pipiria, inara i teianei te manako nei au i te reira ei paruruanga meitaki tikai. Kua akamaroiroi mai te Pipiria iaku kia akamutu i te kai e te oko i te au apinga akakona e kia riro mai ei tangata meitaki atu.

Kua rauka iaku te tikaanga ngateitei kia riro mai ei tuanga i roto i te taokotaianga taeake o te aronga tei akamori ia Iehova. Te aroa tikai nei teia au tangata i tetai e tetai, e te tavini taokotai nei ratou i te Atua. (Ioane 13:34, 35) I roto i taua taokotaianga taeake ra, kua rauka mai tetai akameitakianga tikai—taku vaine, ko Adrianne, taku e inangaro maata ra e e akaperepere ra. Te rekareka tikai nei maua i te tavini kapiti anga i Tei Anga mai ia maua.

Kare au e aruaru ana i tetai oraanga noinoi, mari ra te tavini puareinga nei au ei orometua tamou, te apii anga i te tangata e akapeea ratou e puapinga katoaia ai mei te Tuatua a te Atua. Kua oronga mai teia angaanga i te mataora maata tikai. Ka rauka iaku i te tuatua ma te irinaki papu tikai e kua taui te Pipiria i toku oraanga. Kua kitea iaku te tu rangatira mou.