‘Kua Akakite Mai Koe i te Reira ki te Tamariki Nei’

Te inangaro ra ainei koe i te kite i te tuatua mou no runga i te Atua—koai aia, eaa tana e inangaro ra e e rikarika ra, e eaa tona anoano? I roto i tana Tuatua, te Pipiria, kua akakite mai te Atua ko Iehova i te tuatua mou no runga iaia. Kare ra e rauka i tetai ua atu tangata i te tatau i te Pipiria e kia marama tikai i te reira. No teaa ra? No te mea e tikaanga ngateitei te marama anga i te tuatua mou pae vaerua; kare ra e rauka i te katoatoa. Ka uriuri ana tatou i ta Iesu e tuatua ra no runga i te reira.​—E tatau ia Mataio 11:25.

Te akamata ra taua irava ra ma te au tuatua e: “Kua karanga aturā Iesu i reira ra, na ko atura.” No reira, ko ta Iesu e aere ra ka tuatua, penei no runga i tei tupu i mua ana. Koi ako ua atura aia i te iti tangata akarongo kore i roto i te oire e toru o Galilea, te ngai i rave ana aia i te au angaanga temeio. (Mataio 11:20-24) Penei ka manako koe e, ‘Akapeea tetai tangata te kite anga i te au angaanga temeio a Iesu e kare aia e irinaki ana i te tuatua mou tana e apii maira?’ Te tumu kare te iti tangata i akarongo ana no te tu marokiakia o to ratou ngakau.​—Mataio 13:10-15.

Kua kite a Iesu e e marama ai tatou i te tuatua mou i roto i te Pipiria, ka anoano tatou e rua apinga: Te tauturu a te Atua e te tu ngakau tika. Kua akamarama mai a Iesu e: “E akameitaki au ia koe, e taku Metua, e te Atu no te rangi e te enua, i te mea ko koe i uuna ke atu i teianei au mea i te aronga pakari e te kite, e kua akakite mai ki te tamariki nei.” Te kite ra ainei koe eaa i riro ei te marama anga i te tuatua mou pae vaerua i roto i te Pipiria ei tikaanga ngateitei? Ka uuna me kore ka akakite mai a Iehova, “te Atu no te rangi e te enua” i te tuatua mou kia tau ki tona anoano ngateitei. Kare te Atua e papaki tai ana, mari ra e oronga ana aia i te tikaanga ki te katoatoa kia marama i te tuatua mou. Na roto i teea tu e akakite ra aia i te tuatua mou Pipiria ki tetai pae e kare ki tetai atu?

Te akaperepere ra a Iehova i te aronga akaaka, kare i te aronga ngakau parau. (Iakobo 4:6) Kua uuna aia i te tuatua mou mei “te aronga pakari e te kite” o teianei ao, inara no to ratou tu ngakau parau e te irinaki ia ratou uaorai, kua manako ratou e kare ratou e anoano i tana tauturu. (1 Korinetia 1:19-21) Inara kua akakite aia i te tuatua mou ki te “tamariki nei”​—te aronga te aere maira kiaia ma te ngakau tika e te akaari maira i te tu akaaka mei tetai tamaiti iti rai. (Mataio 18:1-4; 1 Korinetia 1:26-28) Kua kite a Iesu, te Tamaiti a te Atua i te reira nga tu tangata. E maata te au arataki akonoanga ngakau parau tei apii meitakiia e kare i marama ana i ta Iesu karere, inara kua marama te aronga tautai ngakau akaaka i te reira. (Mataio 4:18-22; 23:1-5; Angaanga 4:13) I taua taime rai, kua riro mai tetai aronga apinga nui e tei apii meitakiia ei au pipi na Iesu, tei akaari mai i te tu akaaka tika tikai.​—Luka 19:1, 2, 8; Angaanga 22:1-3.

Ka akara akaou tatou i te uianga tei uiia ana i te akamataanga: Te inangaro ra ainei koe i te kite i te tuatua mou no runga i te Atua? Me koia ia, ka pumaana koe i te kite e kare te Atua e mareka ana i te aronga e manako ra e e aronga kite pakari ratou no teianei ao. Tetai tua ra, te akaperepere ra aia i te aronga e akavaavaaia ra e te aronga kite o teianei ao. Me apii koe i te Tuatua a te Atua ma te tu ngakau akaaka, ka o atu koe ki roto i te aronga te oronga maira a Iehova i tetai mea akaperepere​—te marama anga i te tuatua mou no runga iaia. Me marama koe i taua tuatua mou ra ka puapinga atu toou oraanga i teianei e ka arataki atu te reira ki “te ora mutu kore”​—e oraanga e tuatau ua atu i roto i to te Atua ao ou tuatua tika tei taputouia mai e e vaitata maira.a​—1 Timoteo 6:12, 19; 2 Petero 3:13.