“Ko te Tangata Oronga ma te Rekareka ta te Atua e Inangaro”

Eaa ra taau apinga aroa mareka roa atu? Kare e ekoko, e mareka ana tatou i te apinga aroa tei orongaia mai ma te ngakau aroa, eiaa ra mei te apainga rai. Me oronga, e mea puapinga kia kite e eaa te tumu i oronga ai tatou. E mea puapinga tikai tera kia tatou. I puapinga roa atu ra te reira ki te Atua. Ka akamanako ana ra i te au tuatua akauruia a te apotetoro ko Paulo tei rekotiia i roto ia 2 Korinetia 9:7.

No teaa a Paulo i tata ai i taua tuatua ra? Kua inangaro aia i te akamaroiroi i te au Kerititiano i Korinetia kia turu i te angaanga tauturu i te au oa akarongo tei ngere, i Iudea. Kua titau ainei aia i te maro i to Korinetia kia oronga? Kare. Kua tata aia e: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.” I na ka akara marie ana tatou i teia ako.

“I tana i akakoro i roto i tona ngakau.” Ko te Kerititiano tika tikai, ka oronga aia no te mea kua ‘akakoro aia i roto i tona ngakau’ kia oronga, i karanga ai a Paulo. No reira ka akamanako meitaki tetai Kerititiano no runga i te au anoano o tona au oa akamori. Te reo mua no te tuatua “akakoro,” te o maira te parani anga me kore te akamanako meitaki anga i mua ake” i karanga ai tetai tangata kite no runga i teia. No reira ka kimikimi marie te Kerititiano e eaa ra te anoanoia ra no te au oa akarongo, e ka ui kiaia uaorai e eaa ra tana ka rave ei akatupu i taua au anoano ra.​—1 Ioane 3:17.

“Eiaa ma te noinoi, e mei te mea e no te umuumu.” E rua tu orongaanga ta Paulo e tuatua ra te ka anoanoia te au Kerititiano kia kopae​—inangaro kore, e te maroia. Ko te tangata inangaro kore i te oronga, te oronga ra aia “mate ngakau taitaia no te mea ka takake aia mei tana moni,” e akamarama maira tetai tataanga. E ko te tangata tei maroia kia oronga, oronga aia no te mea te umuumuia ra aia kia oronga. Koai ra ia tatou te ka inangaro i te apinga aroa mei ko i tetai tangata inangaro kore me kore tei maroia kia oronga mai?

“Ko te tangata oronga ma te rekareka ta te Atua e inangaro.” Me iki tetai Kerititiano kia oronga, kia rave aia i te reira ma te rekareka me kore ma te mataora, i na Paulo ei. E tika rava e, e tupu ana te mataora me oronga ma te ngakau tae. (Angaanga 20:35) Ka kite uaia te rekareka o te tangata oronga. Te akataka meitaki maira tera tuatua “rekareka” i te tu o te tangata oronga, i roto i tona ngakau e i runga i tona mata. E akakeuanga maata tikai tona ki runga ia tatou, e te akapumaana katoa i to tatou ngakau. Te karanga ra tetai urianga ke mai e: “E akaperepere ana te Atua i te aronga inangaro i te oronga.”​—Contemporary English Version.

E kaveinga te au tuatua akauruia a te apotetoro ko Paulo, no te au Kerititiano kia aru me oronga. Noatu te oronga ra tatou i to tatou taime, e to tatou maroiroi me kore i ta tatou au apinga, kia rave tatou i te reira no to tatou inangaro, e no te mea e rekareka ana tatou i te oronga ki etai ke e ki te aronga tikai tei ngere. Ka mataora tatou i teia tu oronga anga, e ka mareka katoa mai te Atua ia tatou no te mea “ko te tangata oronga ma te rekareka ta te Atua e inangaro.”