Inangaro a Iehova i te Aronga Oronga ma te Rekareka

“E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.”​—2 KORINETIA 9:7.

1. Akapeea te Atua e Karaiti i te oronga anga ma te rekareka?

KO Iehova tei oronga mua mai ma te rekareka. Kua oronga rekareka aia i te oraanga ki tana Tamaiti anau tai e kua taangaanga iaia ei maani mai i te au angera e nga tangata kia ora mai. (Maseli 8:30, 31; Kolosa 1:13-17) Na te Atua i oronga mai i te ora e te aʼo e te au mea ravarai, kapiti katoa te ua no te rangi, e te tuatau mou, e te akaki anga mai i to tatou ngakau i te rekareka meitaki. (Angaanga 14:17; 17:25) E tika, ko te Atua raua ko tana Tamaiti, ko Iesu Karaiti, e nga oronga rekareka ra. Te oronga mataora ra raua ma te vaerua noinoi kore. No te maata to Iehova aroa i te ao tangata nei, “kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” E kare a Iesu i ‘oronga i tona meta ei oko no te aronga e manganui’ ma te reka kore ua.​—Ioane 3:16; Mataio 20:28, NW.

2. Kia tau ki ta Paulo, eaa te tu o te tangata oronga ta te Atua e inangaro ra?

² Ka tau i reira te au tavini a te Atua raua ko Karaiti, ei aronga oronga ma te rekareka. Kua akamaroiroiia te reira tu orongaanga i te rua o te reta a te apotetoro ko Paulo ki te au Kerititiano i Korinetia ra, tei tataia mai i te 55 T.N. I te akaraanga te taiku ra i te orongaanga takake i te apinga e te moni ei tauturu i te au Kerititiano tei ngere i Ierusalema e i Iudea katoa, kua karanga a Paulo e: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.” (2 Korinetia 9:7; Roma 15:26; 1 Korinetia 16:1, 2; Galatia 2:10) Akapeea te manako o te au tangata o te Atua ra no te au tuatau oronga anga? E eaa ta tatou i kite mei ta Paulo ako no te orongaanga?

Na te Au Ngakau Rekareka i Akakeu

3. Eaa te maata te turu anga a to Iseraela i te akatuanga i te puakapa no te akamorianga ia Iehova ra?

³ Na te au ngakau rekareka i akakeu i te au tangata o te Atua kia oronga ia ratou uaorai e pera katoa ta ratou apinga ei turu i te akakoroanga a te Atua ra. Ei akaraanga, kua turu rekareka ua to Iseraela i te tuatau ia Mose ra i te maani anga i te puakapa no te akamori anga ia Iehova ra. Na te ngakau o tetai papaki vaine ra i akakeu ia ratou kia taviriviri i te uru puakanio, ko etai o te aronga tane kua rave i te angaanga kite. Kua oronga rekareka ua mai te au tangata i te auro, te ario, te rakau, te orongā, e etai atu apinga ei oronga “atinga na Iehova” ra. (Exodo 35:4-35) No te maata ta ratou oronga anga e maata te apinga tei rauka, “e ope roa te au angaanga katoa i te oti, e e toe rai.”​—Exodo 36:4-7.

4. Eaa te tu manako o Davida e etai katoa atura i te tauturu anga i te iero ra?

⁴ I etai anere mataiti i muri akera, kua oronga maata te Ariki ko Davida i te apinga no te iero o Iehova na tana tamaiti na Solomona e akatu. E no te ‘anoano o Davida i te are o te Atua ra,’ kua oronga aia i ‘tona apinga nona uaorai’ i te auro e te ario. Te ui mataiapo, e te au rangatira, e etai atu ‘kua akaki i to ratou rima i te apinga oronga na Iehova.’ Eaa tei tupu? Inara, kua “mareka rava akera te tangata i te mea kua oronga ua ratou; e ma te ngakau meitaki i te oronga ua anga kia Iehova”! (1 Paraleipomeno 29:3-9) E aronga oronga ratou ra ma te rekareka.

5. Akapeea to Iseraela tauturu anga i te akamori mou i te au anere mataiti i topa ra?

⁵ I roto i taua au anere mataiti ra, kua akono te au Iseraela i te turu anga i te angaanga no te puakapa, i nga iero i muri akera, e te kautaunga e te au angaanga a te ngati Levi i reira ra. Ei akatauanga, i te tuatau ia Nehemia kua akatika te ngati Iuda kia oronga tauturu ei akono tamou i te akamori ma, i te manako anga kia kore ratou e akono kore i te are o te Atua ra. (Nehemia 10:32-39) Mei te reira katoa oki i teia tuatau nei, te oronga rekareka nei te Au Kite o Iehova i te au tauturu oronga uaia no te akatu anga e te akono tamou anga i te au ngai uipaanga e te tauturu katoa i te akamori anga mou.

6. E akakite mai i etai akaraanga no te orongaanga te au Kerititiano ma te rekareka.

⁶ E aronga oronga rekareka anake te au Kerititiano mua ra. Ei akaraanga, “e angaanga tika” ta Gaio i rave i te akamanuiri anga i te aronga tutaka aere i te angaanga no te Patireia ra, mei te Au Kite o Iehova e akamanuiri nei i te au akaaere tutaka aere tei tonokia maira e te Totaiete Punanga Tiaki Puka Tapu e te Pepa Akonoanga. (3 Ioane 5-8, NW) E moni tetai ka pou no te aere atu teia au taeake ki te au putuputuanga e te akamanuiri anga oki ia ratou, inara e puapinga maata te reira i te pae vaerua!​—Roma 1:11, 12.

7. Akapeea to Philipi i te akono anga i ta ratou apinga kopapa ra?

⁷ Kua akono te au putuputuanga i ta ratou apinga o te pae kopapa ei akatere atu i te angaanga no te Patireia. Ei akaraanga, kua akakite a Paulo ki te aronga akarongo i Philipi: “Iaku oki i Tesalonia ra i akau ake kotou i te apinga naku, e e rua oki akau anga ei tauturu iaku i toku nei ngere. Kare ra mei te mea, e inangaro apinga toku: i anoano ra au kia puapingaia ta kotou tuatua, kia riro ei meitaki no kotou.” (Philipi 4:15-17) Kua oronga ua to Philipi ma te rekareka, inara na teaa i akakeu i taua orongaanga rekareka ra?

Na Teaa e Akakeu i te Orongaanga Rekareka?

8. Akapeea koe me akapapu e na te vaerua o te Atua e akakeu ana i tona au tangata kia riro ei aronga oronga ua ma te rekareka?

⁸ Na te vaerua tapu o Iehova, koia tona mana rave angaanga, e akakeu i tona au tangata kia oronga ua ma te rekareka. I te ngere anga to Iudea au Kerititiano ra, kua akakeu te vaerua o te Atua ra kia tauturu etai atu aronga akarongo ra ia ratou i te pae kopapa. Ei akamaroiroi atu i te au Kerititiano i Korinetia ra kia rave pakari ratou i te orongaanga i te reira tu tauturu, kua taiku atu a Paulo i te akaraanga a te au putuputuanga i Makedonia ra. Noatu rai e takinga kinoia ra e te putaua ra taua aronga akarongo o Makedonia ra, kua akaari ratou i te aroa taeake na te orongaanga kia tere atu i tei tau kia raveia e ratou. Kua pati ra ratou kia akatikaia te reira angaanga orongaanga na ratou e rave! (2 Korinetia 8:1-5) Kare ta te Atua ra ravenga i runga anake i te tauturu anga a te aronga apinganui ra. (Iakobo 2:5) Ko tona au tavini akatapuia tei putaua ra kua riro ko ratou te pange maata i te tutakianga i te angaanga tutu aere i te Patireia. (Mataio 24:14) Inara, kare ratou i mamae no to ratou oronga ua anga, no te mea na te Atua rai e oronga papu ana no te apinga anoanoia no tona au tangata i teia angaanga, e ko te mana tauturu kia rave tamouia e kia tupu ua atu ko tona vaerua ia.

9. Akapeea te piri anga te akarongo, te kite, e te aroa ki te orongaanga ma te rekareka?

⁹ Na te akarongo, te kite, e te aroa i akakeu i te orongaanga ma te rekareka. Kua karanga a Paulo: “E teianei, te vai maata ra te au mea katoa nei ia kotou [au Korinetia] na, i te akarongo ra, i te tuatua ra, i te kite ra, e te maroiroi katoa, e to kotou aroa ia matou nei, kia maata katoa teianei mea aroa i roto ia kotou. Kare ra taku te tuatua akaue, no te maroiroi ra o tetai pae, e ei timata anga atu i te pikikaa kore o to kotou inangaro.” (2 Korinetia 8:7, 8) Te tauturuanga i ta Iehova ra ravenga, e mea maata oki ia me e meangiti ua te apinga ta tei oronga maira i tana, te umuumuia ra te akarongo i ta te Atua ra au apinga oronga mai a te tuatau ki mua ra. Te anoano ra te au Kerititiano te maata ra to ratou kite, kia rave atu i ta Iehova akakoroanga, e ko te aronga te maata ra te aroa nona e tona au tangata ka oronga rekareka ua i ta ratou apinga ei akatere atu i tana akakoroanga ra.

10. Eaa i raukai kia tuatuaia e te akakeu ra te akaraanga a Iesu i te au Kerititiano kia oronga ma te rekareka?

¹⁰ Na ta Iesu ra akaraanga e akakeu i te au Kerititiano kia oronga ua ma te rekareka. I muri ake i te raurauanga i to Korinetia kia oronga na te inangaro, kua karanga a Paulo: “Kua kite oki kotou i te aroa ua o to tatou Atu ra o Iesu Mesia, e e apinga maata tona, no kotou ra, riro mai nei aia ei apinga kore, kia maata to kotou apinga i taua apinga kore nona ra.” (2 Korinetia 8:9) E apinganui atu aia i te rangi ra i etai ua atu tamariki na te Atua, kua akakore atura aia i te reira au mea ravarai e kua rave i te oraanga tangata nei. (Philipi 2:5-8) Na te akariroanga iaia kia putaua na teia mataara noinoi kore, inara, kua tauturu a Iesu i te akatapu anga i te ingoa o Iehova e kua tuku i tona oraanga ei atinga oko ei puapinga no te au tangata te ka ariki i te reira. Kia rotai ki ta Iesu ra akaraanga, kare ainei tatou e tau kia oronga rekareka ua kia tauturu atu ia etai ke ra e kia oronga i te akatapu anga i te ingoa o Iehova ra?

11, 12. Akapeea te paranianga meitaki i te akariro anga ia tatou ei aronga oronga ma te rekareka?

¹¹ Na te paranianga meitaki e raukai te oronga anga ma te rekareka. Kua tuatua atura Paulo ki to Korinetia: “Kia tae ki te rā mua o te ebedoma ra, e vaio ake kotou ravarai i tetai papaki moni ki roto i te vairanga ra, kia tau i ta te Atua akamanuia anga mai iaia ra; e kia tae atu au ra, eiaa ei akaputu anga apinga i reira.” (1 Korinetia 16:1, 2) Na te reira tu takake e te mataara oronga ua, ka tau meitaki i te aronga te inangaro ra kia oronga moni tauturu ei akatere atu i te angaanga no te Patireia i teia tuatau nei kia akatakake i tetai tuanga o ta ratou moni i rauka mai no te reira akakoroanga. Ei tupu anga no te reira parani anga meitaki, ka rauka i te Au Kite tataki tai, i te au ngutuare tangata, e pera katoa te au putuputuanga te oronga moni tauturu ei akatere atu i te akamori anga tika.

¹² Na te raveanga i te au parani kia oronga tauturu ka akariro ia tatou kia rekareka. Mei ta Iesu i tuatua ra, “e maata atu te rekareka o te orongaanga i te raveanga mai.” (Angaanga 20:35, NW) E no reira ka rauka kia tupu te rekareka anga o to Korinetia na te aruanga i ta Paulo i ako atura kia rave i ta ratou i parani ra no tetai mataiti kia tuku moni tauturu ki Ierusalema. “E ārikiia ïa ta te tangata i rauka ra, kare i tei kore i rauka iaia ra,” tana i tuatua. Me oronga tetai i tana tauturu kia tau i tei rauka iaia ra, e mea tika kia manako teiteiia aia. Me e irinaki to tatou i te Atua, ka rauka iaia i te akatau i te au apinga e ko te aronga e maata ta ratou ka oronga ua, kare e kaimoumou, e ko te aronga e meangiti ta ratou kare ratou e ngere e kia akatopa mai i to ratou maroiroi e te inangaro kia tavini atu iaia.​—2 Korinetia 8:10-15.

Akatere Anga Matakite i te Orongaanga

13. Eaa to Korinetia i irinaki ei ia Paulo ei akaaere no te moni oronga uaia maira?

¹³ No atu rai na Paulo i akaaere i te akanoonoo anga no te oronga ua anga i te moni tauturu e kia rekareka te aronga akarongo te ngere ra i te tauturu kopapa e kia maata atu te maroiroi i te angaanga tutu aere, kare aia e kare katoa etai atu i rave i tetai moni no ta ratou uaorai au angaanga. (2 Korinetia 8:16-24; 12:17, 18) Kua rave angaanga a Paulo ei tutaki i tana uaorai apinga anoanoia no te pae kopapa kare i tuku i te au apainga no te pae i te moni ki runga i tetai ua atu putuputuanga. (1 Korinetia 4:12; 2 Tesalonia 3:8) No reira i te oake anga i te au moni tauturu kiaia, kua irinaki to Korinetia ra i te oronga anga i te reira ki tetai tangata irinaki meitakiia, e tavini rave pakari i te angaanga na te Atua ra.

14. No te akapou anga i te moni oronga uaia maira, eaa te tataanga tei te Totaiete Punanga Tiaki ra?

¹⁴ Mei te taokotai anga o te Totaiete Punanga Tiaki Puka Tapu e te Pepa Akonoanga i te 1884 mairai, kua rauka i te aronga oronga tauturu te akapapu anga e tetai akaaere tau kia irinakiia no te au moni tauturu ravarai tei orongaia ki te reira no te angaanga Patireia o Iehova. Kia tau ki tana papaanga, te tauta ra te Totaiete kia akaki i tei anoano maata ravaia no te au tangata ravarai, koia te au apinga anoanoia no te pae vaerua. Te raveia nei teia na roto i te au puka apii Puka Tapu e pera katoa te au apiianga akapeea e raukai te ora. I teia tuatau, te akarapurapu nei a Iehova i te akaputuanga i te aronga mei te mamoe rai te tu ki roto i tana akaaerenga, e na tona akameitakianga i te akonoanga pakari i te au moni tauturu i te angaanga tutu aere i te Patireia e akapapu anga taka meitaki i te mareka anga te Atua. (Isaia 60:8, 22) Te irinaki nei matou e ka rave tamou ua atu aia i te akakeu anga i te au ngakau o te aronga oronga ma te rekareka.

15. Eaa teia makatini i taiku ei i te moni orongaia mai i etai taime?

¹⁵ I etai tuatau te taiku ra te Totaiete i roto i etai tuanga o teia puka nei i te akamatakite anga i te aronga tatau kia kite i te tuatau no ratou no te oronga ua i tetai moni tauturu i te angaanga tutu aere i te Patireia i te ao katoa nei. Kare teia i te patianga, mari ra e akamaaraara anga ki te aronga katoatoa te inangaro ra kia turu i “te angaanga tapu o te tuatua meitaki” mei ta te Atua ra akapuapinga anga ia ratou ra. (Roma 15:16, NW; 3 Ioane 2) Te akono ra te Totaiete i te au moni ravarai tei orongaia mai na te mataara kaimoumou kore ei akakite anga i te ingoa o Iehova e tona Patireia. Te orongaia ra te akameitaki anga no te au moni tauturu ravarai te rauka maira, kua akakiteia, e kua raveia ei akatotoa i te tuatua meitaki o te Patireia o te Atua ra. Ei akaraanga, na te reira e tauturu tamou i te angaanga evangeria i te au enua e manganui, e kua akatinamouia e kua akatotoaia te au ngai neneiianga kia puapingaia te tuaanga i te kite Puka Tapu. Pera katoa, te akapouia ra te au moni tauturu i te angaanga no te ao katoa nei ei tutaki i te moni te kake aere nei no te maani anga Puka Tapu e te au puka apii Puka Tapu e pera katoa te au tepe tuatua e te vitio. Na te reira mataara te akatere atura te aronga oronga ma te rekareka i te au manako no te Patireia.

Kare na te Akaue Anga

16. Noatu rai e e tokoiti ua te Au Kite o Iehova ra tei apinganuiia i te pae kopapa ra, eaa ra ta ratou moni tauturu i arikiiaʼi?

¹⁶ E tokoiti ua te Au Kite o Iehova e apinganui. Noatu rai e meangiti ta ratou e oronga ana ei akatere i te au manako no te Patireia, e mea puapinga maata ra ta ratou tauturu e oronga ra. I to Iesu kite anga i te vaine takaua apinga kore i tana tuku anga e rua nga moni meangiti ua ki roto i te pia apinga i te iero ra, kua karanga aia: “E maata ta te vaine takaua apinga kore nei i tuku ki roto, i ta ratou ravarai: no roto oki i te toenga i to ratou apinga maata ta ratou [etai ke tei oronga ra] i tuku maira ki roto i te apinga a te Atua: kareka aia nei, kua ope rava tona apinga rikiriki i te tukuia e ia ki roto.” (Luka 21:1-4) Noatu rai e meangiti ua tana i oronga ua, kua oronga aia ma te rekareka​—e kua ariki ia tana moni tauturu.

17, 18. Eaa te tumu maata o ta Paulo au tuatua ia 2 Korinetia 9:7, e eaa te akakiteia maira e te tuatua Ereni tei uriia ra e “rekareka”?

¹⁷ No runga i te angaanga tauturu i te au Kerititiano o Iudea, kua karanga a Paulo: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.” (2 Korinetia 9:7) Penei kua taiku te apotetoro ra i tetai tuanga o Maseli 22:8 i te urianga Septuagint te tuatua ra: “Te akameitaki ra te Atua i tei oronga ma te rekareka; e ka oronga atu aia i te ngai ngere o tana au angaanga.” (The Septuagint Bible, na Charles Thompson i uri) Kua mono a Paulo i te tuatua “akameitaki” ma te tuatua “inangaro,” inara e pirianga tetai, no te mea ko te kokoti o te au akameitakianga e tupuanga ia no ko mai i to te Atua ra inangaro.

¹⁸ Ko tei oronga ma te rekareka e mataora tikai tona i te oronga anga. No te tuatua Ereni tei uriia e “rekareka” ia 2 Korinetia 9:7 no reira mai te tuatua “katakata mataora”! I muri ake i te akakiteanga mai i te reira, kua karanga tetai tangata apiiia ko R. C. H. Lenski e: “Te inangaro ra te Atua i tei oronga ma te ngakau mataora, rekareka, katakata . . . kua eiia [tona] akarongo ki roto i te katakata me ka aravei akaouia mai aia e tetai atu tuatau no te oronga anga.” Ko te tangata e vaerua rekareka tona mei te reira kare e oronga reka kore ua me kare na raro ake i te akaue anga mari ra tei roto tona ngakau i tana orongaanga. Mei te reira ainei toou tu rekareka no te orongaanga ei turu i te au manako no te Patireia?

19. Akapeea ta te au Kerititiano mua ra oronga anga i te au moni tauturu?

¹⁹ Kare te au Kerititiano mua ra i rave aere i te mereki no te koi moni me kare i rave i te ngauru anga na te orongaanga i te tuanga ngauru o ta ratou moni tei rauka mai no te au akakoroanga o te akonoanga. Mari ra ko ta ratou moni tauturu e mea oronga uaia ia. Kua tata a Tertullian, koia tei tauiia ra ki te akonoanga Kerititiano vaitata i te 190 T.N.: “Noatu rai e e pia vairanga apinga ta matou, kare no te [moni oko i te ora], mei ta tetai akonoanga e moni oko ra tana. I te ra akatakaia i te marama, me ka inangaro aia, ka tuku te aronga tataki tai i tetai moni tauturu meangiti ki roto; inara ko te reira me ka mareka aia i te rave, e me ka rauka anake iaia; no te mea kare i te akaue anga; e mea oronga ua anakeia e te katoatoa.”​—Apology, Pene XXXIX.

20, 21. Eaa te tuatua a tetai kapi mua o teia makatini no runga i te tauturuanga i ta te Atua ra akakoroanga i te pae o te moni, e eaa te aiteanga o te reira i teianei? (e) Eaa te tupuanga me ka akangateitei tatou ia Iehova na ta tatou apinganui?

²⁰ E mea matauia te oronga ua anga i rotopu i te au tavini o Iehova i teia tuatau nei. Inara i etai taime, kare tetai papaki i rave kia ki ta ratou turuanga i ta te Atua ra akakoroanga na te oronga ua anga i te moni tauturu. Ei akaraanga, ia Peperuare 1883, kua tuatuaia i teia makatini: “No te maata te apainga teiaa [no te moni] a tetai papaki no etai ke ra no te tuatau poto, e kua meangiti mai to ratou maroiroi i te oronga tauturu i te pae o te moni no te maata roa te angaanga e no te roiroi, e no reira kua akaapikepike i to ratou tu meitaki; kare ko te reira anake ua, mari ra ko te aronga katoa . . . oki kare ra i kite taka meitaki i te turanga, kua riro ko ratou tei ruti no te ngere i te rave anga na taua mataara ra.”

²¹ I te aere anga kapipiti te urupu maata ki roto i te akaaerenga a Iehova i teia tuatau nei, e ma te akatotoa anga te angaanga a te Atua ki roto i te Pae Itinga Ra o Europa e etai atu au ngai tei araiia i mua akenei, te tupu nei kia maata te umuumuia o te akatotoa anga i te au ngai neneiianga puka e etai atu au ngai angaanga. Ka tau ra kia maata atu te au Puka Tapu e etai atu puka kia maaniia. E manganui te au angaanga no ta te Atua tutara anga te raveia nei; inara ka viviki atu te oti naringa i rava te tauturu i te pae o te moni. E tika ra, e akarongo to tatou e ka oronga mai te Atua i te apinga anoanoia, e kua kite tatou e ko te aronga ‘akangateitei atu ia Iehova i ta ratou au apinga’ ka akameitakiia ratou. (Maseli 3:9, 10) E tika oki, “ko tei maata ra tana e ruru ka maata katoa tana e kokoti.” Ka ‘akaapinganui a Iehova ia tatou no te au tu oronga ua anga ravarai,’ e na to tatou orongaanga ma te rekareka ka akariro i te aronga e manganui kia akameitaki e kia akapaapaa iaia ra.​—2 Korinetia 9:6-14, NW.

E Akaari i Taau Akameitaki no ta te Atua Au Apinga Aroa

22, 23. (a) Eaa ta te Atua ra apinga aroa oronga uaia maira? (e) I te mea te ariki ra tatou i ta Iehova au apinga aroa, eaa ta tatou ka tau kia rave?

²² I te akakeu angaia e te akameitaki anga oonu, kua karanga a Paulo: “Kia akameitakiia te Atua no tana apinga aroa kare ra e rauka kia akatakaia.” (2 Korinetia 9:15, NW) Ei “atinga tarangaara” no te au ara a te au Kerititiano akatainuia ra e pera katoa ta to te ao nei, ko Iesu te tumuanga e te mataara no ta Iehova ra apinga aroa kare e rauka kia akatakaia. (1 Ioane 2:1, 2, NW) Ko taua apinga aroa ra “no te rai o te aroa ua o te Atua” tana i akaari maira ki tona iti tangata i te enua nei na roto ia Iesu Karaiti, e te vai maira te reira ei ora no ratou e ei akakaka ia Iehova e no te akatikaanga iaia.​—2 Korinetia 9:14.

²³ Te aere atura ta tatou akameitaki anga oonu kia Iehova no tana apinga aroa oronga uaia mai kare ra e rauka kia akatakaia, e etai atu au apinga aroa e manganui no te pae vaerua e te pae kopapa ki tona iti tangata. No reira, no te umere maata te tu meitaki o to tatou Metua i te rangi ra kua maata rava atu i to te mana tuatua kia akataka! E mea tika rava ia kia akakeu ia tatou kia riro ei aronga oronga ma te rekareka. Ma te ngakau ariki, e rave tatou i te ka rauka ia tatou kia akatere atu i te akakoroanga a to tatou Atua oronga ua ra, koia a Iehova, Tei Oronga mua maira ma te rekareka anga maata rava!

Te Maara Ra Ainei Koe?

◻ Eaa ta te au ngakau inangaro i akakeu i te au tangata o Iehova ra kia rave?

◻ Na teaa e akakeu i te orongaanga ma te rekareka?

◻ Akapeea ta te Totaiete Punanga Tiaki akapou anga i te au moni oronga uaia atu?

◻ Eaa te tu o tei oronga ra ta te Atua e inangaro, e akapeea tatou me akaari i ta tatou akameitaki anga no Tana au apinga aroa e manganui?

[Tutu i te kapi 15]

I te tuatau te akatuia ra te puakapa, kua angaanga pakari to Iseraela e kua oronga ua i te au apinga tauturu na Iehova

[Tutu i te kapi 18]

Te arikiia ra e te manakoia ra e apinga maata te au moni oronga uaia mei ta te vaine takaua apinga kore ra