Riro te au Tuatua Akatuke ei Tauturu ia Koe

Ka akatika ainei koe e ko Iesu te Puapii maata rava atu tei noo i te enua nei? Penei kua tamata ana koe i te aru i tana au apiianga te taangaanga anga aia i te au uianga e te au akatutuanga. Inara, kua kite ainei koe e kua taangaanga putuputu aia i te au tuatua akatuke?

E tuatua ana te maataanga o te tangata na roto i te au tuatua akatuke. Penei e tuatua akapera ana rai koe. Ei akaraanga ka karanga koe e, “Karangaia mai kiaku e kua para te meika, inara te pi nei rai teia.” Me kore ka karanga koe, “E tamaine akama ua aia i mua ana, inara i teianei, e tamaine oaoa aia.”

I roto i teia nga akaraanga, ka akakite koe i te tumu manako na mua; aru mai, ko te tuatua akatuke mei te au tuatua inara, kareka ra, mari ra, me kore i tetai tua. Ka rauka katoa ia koe i te akakite i te tuke na te kapitianga mai i tetai manako ei akaketaketa i taau tuatua. Me tuatua akapera koe, ka tano toou aerenga manako e ka marama te tangata i taau e tuatua ra.

Noatu kare te au tuatua akatuke i te mea matau i roto i tetai au reo me kore au peu, kia kite ra tatou i te puapinga o te reira. No teaa ra? No te mea e maata te au tuatua akatuke i roto i te Pipiria. Kua taangaanga putuputu a Iesu i te au tuatua akatuke. Akamanako ana i teia: “Kare oki te tangata e tutungi i te lamepa, ka tuku atu ei ki raro ake i te aite, ei runga ra i te vairanga.” “Kare au i aere mai e akakore [i te Ture], e akatupu ra.” “Kua akarongo kotou e, i tuatuaia mai e te aronga taito ra e, ‘Auraka rava koe e akaturi:’ Te karanga atu nei ra au kia kotou, Ko tei akara ua atu i te vaine . . .” “I tuatuaia maira, E mata ra, ei mata ïa te tutaki, e nio ra, ei nio ïa: Te karanga atu nei ra au kia kotou, Auraka e akaoki atu i te kino: ko te moto mai i toou paparinga katau nei, e ariu katoa atu i tetai.”—Mata. 5:15, 17, 27, 28, 38, 39

E au tuatua akatuke rai tetai i roto i tetai au irava o te Pipiria. Ka tauturu te reira ia koe kia marama i te manako me kore kia akaketaketa atu i taau i tuatua. Me e metua koe, akamanako ana i teia tuatua akatuke: “Ko kotou oki te aronga metua, auraka e akariri atu i ta kotou au tamariki ra: e apii ra ia ratou kia pakari ma te ako a te Atu ra.” (Ephe. 6:4) Naringa te apotetoro ko Paulo i tata e na te metua tane (me kore te metua vaine) e apii i te tamaiti i te ako a te Atua, ka riro rai te reira ei akoanga pakari e te tika. Inara te taka meitaki ua ra te manako o te tuatua akatuke, “auraka e akariri atu i ta kotou au tamariki ra: e apii ra ia ratou kia pakari ma te ako a te Atu ra.”

I roto rai i taua pene ra, kua tata a Paulo e: “Kare oki te tangata anake ta tatou e kukumi nei, ko te au ariki katoa ra, . . . e te au vaerua kikino i te reva nei.” (Ephe. 6:12) Tauturu taua tuatua akatuke ia koe kia marama e e kukumi anga ngata taau ka aro atu. Kare teia i te kukumi anga ki te tangata ua nei; mari ra, ki te au vaerua kikino.

PUAPINGA O TE AU TUATUA AKATUKE

E maata rai te au tuatua akatuke ta Paulo i taangaanga i roto i te puka o Ephesia. Me akamanako tatou i teia au tuatua, ka marama tatou i to Paulo manako e ka taka meitaki ua kia tatou i ta tatou ka rave.

Ka mataora koe me akara i te kapi 4 e te 5 o teia atikara e akaari maira i tetai au tuatua akatuke i roto ia Ephesia pene 4 e te 5. Me tatau koe i te au tuatua akatuke, akamanako i toou uaorai oraanga. Ui kia koe e: ‘Mei teaa tikai toku tu? Eaa taku ka rave i roto i teia turanga me kore i roto i tetai turanga mei teia rai? Eaa ta te tangata ka manako no runga iaku?’ Me kite koe i te ngai ka anoanoia koe kia taui, e rave i te tauianga. Ka riro te reira ei tauturu ia koe.

Me kore e uriuri i te kapi 4 e te 5 o teia atikara i roto i ta kotou akamorianga a te ngutuare. Mea mua, e tatau te katoatoa i te au tuatua akatuke. E oti, na tetai e tatau i tetai tuatua akatuke i te tua kaui, e na te ngutuare e tamata me ka maara ia ratou te manako tei taikuia i roto i te tua katau. Ka mataora te ngutuare i te uriuri e akapeea me taangaanga i te tuanga i te tua katau. Na te uriuri anga i te au tuatua akatuke na roto i teia tu, e tauturu ei i te au taeake mapu e te pakari kia akaari i te tu Kerititiano i roto i te ngutuare e te au ngai ke atu.

Maara ainei ia koe te au tuatua akatuke i te tua katau?

Me kite koe i te puapinga o te au tuatua akatuke, ka ngoie ua ia koe i te akataka i taua au tuatua i roto i te Pipiria, e ka riro te reira ei tauturu ia koe i roto i te angaanga orometua. Ei akaraanga, penei ka karanga koe ki tetai pu ngutuare e: “Maata te tangata e karanga ra e kare te kopapa o te tangata e mate ana, e oti akera, teia ta te Tuatua a te Atua e akakite nei.” Me kore, penei ka rauka ia koe i te ui ki tetai tangata e apii ra i te Pipiria e: “Maataanga o te tangata te irinaki ra e ko te Atua e Iesu, e tai rai ia tangata; inara, eaa ta te Pipiria e akakite maira? E eaa taau e irinaki ra?”

E maata rai te au tuatua akatuke i roto i te Pipiria ei tauturu ia tatou kia aaere na te arataa o te Atua, e kia kite tetai ke i te tuatua mou i roto i te Pipiria.

Tetai au Tuatua Akatuke i Roto ia Ephesia Pene 4 e te 5

Tamata i teia au tuatua akatuke i te tuatau o te akamorianga a te ngutuare!

“Kia kore tatou e . . . akapeke aereia . . . i te ravenga a te tangata nei, e te pakari i te ravenga tini o te pikikaa ra.”—4:14.

“Kia akatika ra tatou i te tuatua-mou ma te aroa, kia tupu te tau iaia, i te upoko, i te Mesia, i te au mea katoa nei.”—4:15.

“Akapoiriia [te au pa enua], . . . no te . . . paetaeta oki o to ratou ngakau.”—4:18, 19.

“Kare ra mei te reira ta kotou i apii i te Mesia; Kua akarongo oki kotou i tana, e kua apiiia kotou e ia.”—4:20, 21.

“Kia kopae kotou i ta kotou tuatua i muatangana ra, i te tangata taito.”—4:22.

“E kia akaouia oki kotou i to kotou vaerua ra i te ngakau: E kia akatangata ou oki.”—4:23, 24.

“Te tangata i keia na, auraka aia e keia akaou.”—4:28.

“E rave ra i te angaanga, kia rauka iaia te mea meitaki i tona uaorai rima.”—4:28.

“Auraka ei tuatua viivii e mama mai no roto i to kotou vaa.”—4:29.

“Ei tuatua meitaki ra e tupu ei te meitaki tika.”—4:29.

“Kia kopae ravaia oki te maru kore, e te rotoriri, e te makitakita, e te taumāro ra, e te tuatua akakino, e te vareae, auraka takiri ïa.”—4:31.

“Kia takinga-meitaki kotou ia kotou uaorai, ma te ngakau maru aroa ua ra, ma te akakore oki i te ara tetai e tetai.”—4:32.

“Kareka te akaturi, e te au tuatua viivii ravarai, e te noinoi apinga, auraka rava e akaikiia ki o kotou na.”—5:3.

“Kareka te akameitaki, e tau ïa.”—5:4.

“I poiri ana oki kotou i muatangana ra.”—5:8.

“I teianei ra, kua mārama kotou i te Atu.”—5:8.

“Auraka e kapiti ki te angaanga puapinga kore a te poiri.”—5:11.

“E ako atura.”—5:11.

“E tenana, kia matakite i to kotou aerenga, eiaa mei ta te [aronga] kite kore.”—5:15.

“Mei ta te aronga pakari ra. Ma te taporoporo marie i te tuatau.”—5:15, 16.

“Auraka kotou ei manako kore.”—5:17.

“Kia kite ra kotou i to te Atu ra anoano.”—5:17.

“Auraka e kona i te wina, e tupu ei te kanga maata.”—5:18.

“Kia ki ra kotou i te Vaerua.”—5:18.

“Kia tuku [a Karaiti] iaia i mua i tona aroaro ei ekalesia kakā, e te topata kore, e te korokoromingo kore, e te au mea katoa mei te reira te tu.”—5:27.

“Kia tapu ra e te apa kore.”—5:27.

“Kare ua e tangata e makitakita i tona uaorai kopapa.”—5:29.

“Kareka e angai e te akaperepere marie; mei ta te Atu i te ekalesia nei.”—5:29.