Tauturu i te au Taeake Kua Kopaeia e to Ratou Tokorua Akapeea Ra?

Akapumaana tetai vaine i te tuaine Kerititiano tei kopaeia e tona tokorua

Penei kua kite koe i tetai tangata tei kopaeia e tona tokorua. Kare teia i te mea poitirere no te mea e mea matau te kopaeanga i teia tuatau. Ei akaraanga, kua akaari mai tetai kimikimianga i Poland e i te maataanga o te taime, te aronga e 30 o ratou mataiti tei akaipoipo no te toru ki te ono mataiti, ka tataraia to ratou akaipoipo.

Akakite mai te Institute for Family Policy i Paniora e, “I Europa, kua akaari mai te au tareanga e e āpa o te au akaipoipo anga, ka tataraia te reira. E aiteite katoa teia numero i roto i te au pa enua ke mai.

TUPU TE AU MANAKO NGAKAU KINO

Eaa ra i tupu ei te kopaeanga? Kua akakite mai tetai vaine tei tukatau i te oronga tauturu no te aronga akaipoipo e: “Te akaari maira te kopaeanga e kua tupu takere te ke i rotopu i tetai nga tokorua, e oti aru mai i te reira kua tupu te au manako ngakau kino tikai.” Akakite katoa aia e: “Ka tupu te au manako kino mei te mamae, te riri, te tataraapa, te poitirere, e te akama.” Tetai taime, ka manako tetai pae i te tamate ia ratou uaorai. “Me akamanaia te kopaeanga i roto i te are akavaanga, ko teia te ka aru mai. No te mea kua tupu te mamae ngakau e te manako matiroeroe, penei ka akamanako te tangata tei kopaeia e: ‘I te mea kua akaruke toku tokorua iaku, eaa ra taku ka rave? Eaa toku akakoroanga no te oraanga?’”

Kua akamanako a Ewa no runga i te au mataiti i topa e kua karanga aia e: “Kua akama tikai au no te mea i muri ake i te kopaeanga, ka akara mai toku au oa kiaku ma te takirikiri i to ratou upoko. Riri tikai au. Kua akaruke taku tane iaku kia akono i te nga tamariki ko au anake ua, no reira kua anoanoia au kia riro mai ei metua vaine e ei metua tane no raua.”a Akakite mai a Adam, e tangata pakari no tetai 12 mataiti e: “Tetai taime kare au e manako papu ana iaku uaorai e ka riri tikai au, e oti ka inangaro au i te akaatea mai mei te katoatoa.”

NGATA KIA MEITAKI AKAOU TE TURANGA

No te mea te apiapi ra tetai pae no te tuatau ki mua, kua ngata ia ratou kia meitaki akaou mai to ratou turanga, noatu me kua pou tetai au mataiti i muri ake te kopaeanga. Penei ka manako ratou e kare tetai ke e inangaro ia ratou. Akakite katoa tetai vaine tata nuti pepa e, ka anoanoia ratou kia “taui i to ratou oraanga e kia apii akaou e ka akapeea me akono i te au manamanata ko ratou anake ua.”

Akakite mai a Stanisław e: “Te kopaeanga maua ko taku vaine, kua arai aia iaku mei te aravei anga i ta maua nga tamaine. Tei tupu mai, manako au e kare tetai ua atu tangata i inangaro akaou iaku e pera katoa kua akaruke atu a Iehova iaku. Kare au e inangaro akaou ana i te ora. Inara i te tuatau i aereia, kua kite mai au e e tarevake tikai toku manako.” Kua manamanata tetai vaine tei kopaeia, ko Wanda e: “Kua irinaki tikai au e i muri poto ake i te kopaeanga, kare e tangata—kapiti mai te au taeake e te au tuaine—e akaari mai ana i te inangaro kiaku e ki taku tamariki. Inara, te kite nei au e kua tauturu tikai te au taeake iaku e kua rauka iaku i te utuutu i taku tamariki kia akamori ia Iehova.”

Ka kite koe i roto i te au tuatua a teia au taeake e ka tupu te au manako ngakau kino i muri ake i te kopaeanga. Penei ka manako kino ratou no runga ia ratou uaorai, e ka manako ratou e kare ratou e puapinga ana e kare e tau kia inangaroia. Pera katoa, penei ka akamata ratou i te akaapa i te au taeake e te au tuaine. Me tupu te reira, penei ka manako ratou e kare te putuputuanga e inangaro ia ratou e kare e manako mai ia ratou. Noatu rai, te akaari maira teia au tuatua a te au taeake mei ia Stanisław e Wanda e te inangaro maata ra te au taeake e te au tuaine ia ratou. Te tikaanga, kua tauturu maata te au taeake Kerititiano ia ratou, noatu me kare ratou i kite vave ana i te reira.

ME MANAKO KOE E KARE TE TANGATA E INANGARO IA KOE

Kia akamaara tatou e noatu eaa ta tatou ka rave ei tauturu i te au taeake tei kopaeia e to ratou tokorua, i tetai taime ka manako ratou e ko ratou anake ua. Ko te au tuaine tikai tei akarukeia e ta ratou tane te ka manako e kare te tangata e inangaro mai ana ia ratou. Karanga a Alicja e: “Teianei, e varu mataiti tei topa i muri ake i toku kopaeia anga. Noatu rai, e manako ana au e e meitaki atu te katoatoa iaku. Me tupu te reira, ka inangaro au i te akaatea mai mei te tangata e kia aue no runga i toku turanga.”

Noatu e mea matau ua teia au manako no te aronga tei kopaeia e to ratou tokorua, te akakite maira te Pipiria e kare i te mea meitaki kia akaatea mai ia tatou uaorai mei te tangata. Me akapera tatou, penei ka patoi atu tatou i “te au tuatua pakari katoa.” (Mase. 18:1) Inara ka anoanoia te tangata tei matiroeroe kia matakite i te aere putuputu ki tetai tane me kore vaine no te tauturu e te pumaana no te mea penei ka timataia aia kia akatupu i te manako akainangaro.

Penei kua tamamaeia to tatou au taeake e te au tuaine no te au manako kino, mei te tu apiapi no te tuatau ki mua, e te manako ra e kare ratou e inangaroia mai. Me marama tatou e e au manako matau ua teia tei ngata i te akakoromaki, kia aru tatou i te akaraanga o Iehova na te tauturu anga i teia au taeake e te au tuaine. (Sala. 55:22; 1 Pete. 5:6, 7) Papu ia tatou e ka ariki rekareka mai ratou i te tauturu tei orongaia. Ae, ka tauturuia ratou e te au oa mou i roto i te putuputuanga!—Mase. 17:17; 18:24.

a Kua tauiia tetai au ingoa.

Manako Tau no Runga i te Kopaeanga

E apainga puapinga te akaipoipo ki te au tavini o Iehova. Te tumu, no te mea kua akatumuia to ratou manako ki runga i te Pipiria. Ei akatauanga, i roto ia Malaki 2:16, ka kite tatou i te manako tikai o te Atua: “E mea riri oki naku te kopae.” I roto i te Pipiria e okotai ua tumu tau no te kopaeanga, koia oki me piri tetai tokorua ki roto i te ainga tau kore. No reira, e mea tarevake tikai no tetai tane me kore vaine kia manako i te kopae atu i tona tokorua e kare e tau ana ki te Pipiria, no te mea kua inangaro aia i te akaipoipo i tetai atu tane me kore vaine ke.—Gene. 2:22-24; Deu. 5:21; Mata. 19:4-6, 9.

Inara me tupu te kopaeanga no te mea kare tetai tokorua e vai tiratiratu ana, ka tauturu mai te au taeake e te au tuaine i roto i te putuputuanga. Ka aru ratou i te akaraanga o Iehova na te tauta anga i te tauturu i te “aronga ngakau taitaia.”—Sala. 34:15, 18; Isa. 41:10.

KA RAUKA AINEI IA KOE I TE TAUTURU ATU?

Ka rauka ainei ia koe i te oronga i te tauturu? Eaa taau ka rave kia tauturu i tetai tangata i roto i te au turanga mei tei akatakaia i roto i te atikara i mua ake? Akamanako ana e eaa ta te Pipiria e akakite maira, e kia akara e akapeea tetai au taeake Kerititiano te oronga anga i te tauturu tau.

Akarongo meitaki. (Mase. 16:20, 23)

Penei kua kite koe e i muri ake i te kopaeanga, kare te tangata tei kopaeia e inangaro i te pukapuka atu no runga i te reira. Pera katoa me akakite aia i tona manako no runga i tei tupu i mua ake i te kopaeanga, penei kare te reira e oronga mai i te tauturu me kore te pumaana kiaia. (Mase. 12:25; Roma 12:15) Ko Michal, tei tauturu ia Adam tei taikuia i roto i te atikara mua, kua akakite aia e ka rauka ia tatou i te akarongo meitaki e te akaari i te tu tangi ma te kore e kite i te au mea ravarai tei tupu. Karanga aia e: “Kua karanga au kia Adam e me paruparu aia no te au manako taitaia, penei ka akakite mai aia i tetai mea ka tataraapa aia i muri ake.” Kua akapapu a Michal e kare aia e inangaro i te kite i te au mea ravarai no runga i tei tupu. Noatu rai, kua akarongo meitaki a Michal kia Adam ei oa mou. E maata te puapinga ka rauka mai me pukapuka tatou ki te taeake tei kopaeia e to ratou tokorua i mua ake e i muri ake i te au uipaanga Kerititiano. Penei ka karanga tatou e: “Te peea ua ra koe? Kua kite au e te na roto ra koe i tetai turanga ngata. Me inangaro koe i te tauturu, e pati ua mai i te reira.”

Akaari i te inangaro ngakau tae. (Phili. 2:4)

Karanga a Mirosław e: “Kua akanoo maua ko taku vaine i tetai tuatau kia tauturu i tetai tuaine tei kopaeia e to ratou tokorua. Ei akaraanga, kua ripea maua i te roka i runga i tona ngutupa. Pera katoa kua apai maua iaia ki te taote.” Penei e angaanga meangiti ua te reira; inara kua tauturu te reira i te tuaine. Aere ua rai, kua meitaki akaou te turanga o te tuaine ta raua i tauturu. Tei maata atu, kua akamata aia i te painia i muri mai e kua papetitoia tana tamaine e 11 mataiti.

Akamaroiroi i te tangata tei kopaeia e te marama ra a Iehova i tona turanga.

Me kare tetai tangata e manako papu no runga iaia uaorai, e akakite kiaia e te akaperepere ra te Atua i tona au tavini. E puapinga tatou kiaia; ae, “e maata to [tatou] meitaki i to te au manu rikiriki e manganui.” (Mata. 10:29-31) “Ko Iehova ra tei timata i te ngakau.” No reira, kua marama aia i te turanga o te aronga tei kopaeia e to ratou tokorua. Kare rava aia e akaruke i tona au tavini tiratiratu. (Mase. 17:3; Sala. 145:18; Ebe. 13:5) No reira e akamaroiroi i te tangata tei kopaeia e te ariki rekareka ra te Atua iaia no tona inangaro i te tuatua mou e tana tauta anga kia akamori Iaia.—Phili. 2:29.

Akamaroiroi i te tangata tei kopaeia e tona tokorua kia piri vaitata ua rai ki te putuputuanga.

Penei e ngata no tetai pae kia tae mai ki te au uipaanga. I na ka riro te au uipaanga ei akamaroiroi e ei akaketaketa ia ratou. Ka tauturu te reira ‘kia akatupu i te meitaki.’ (1 Kori. 14:26; Sala. 122:1) E mea meitaki no te aronga pakari kia akamaroiroi ia ratou kia tae mai ki te au uipaanga. Karanga a Wanda tei taikuia i mua ana e, “Te maara nei rai ia matou to ratou aroa.”

Akamaroiroi i te tangata tei kopaeia e tona tokorua kia akaketaketa i tona pirianga ki te Atua na roto i te pure, te apii nana uaorai, e te akamanako oonu. (Iakobo 4:8)

Noatu e ko Iehova te Atua Mana Katoatoa i te rangi, te akarongo ra aia ki “tei akaaka, e tei tataraara te ngakau, e tei ruketekete i [Tana] tuatua.” Kia akamaroiroi i te tangata tei kopaeia e ka tauturuia tatou pouroa na te akavaitata atu anga ki te Atua na roto i te pure e te apii na tatou uaorai.—Isa. 66:2.

Pati kia angaanga kapiti korua i roto i te angaanga orometua me kore kia akapapa no tetai uipaanga.

Ka tauturu teia i te taeake Kerititiano tei kopaeia e tona tokorua, kia manako papu. Karanga a Marta, tei tauturu i tetai tuaine maroiroi tei taitaia i muri ake i te kopaeanga e: “E angaanga kapiti ana maua i roto i te angaanga orometua. E mataora ana maua me kite e kua taeria to maua au akakoroanga tei akanooia. Tetai taime, e akapapa kapiti ana maua no tetai uipaanga, e oti ka tunu maua i tetai kai reka.”