“Ko Iehova Toku Tauturu”
1 I to Iesu akaueanga i tana au pipi mua, kua karanga aia: “I na, te akaunga atu nei au ia kotou, mei te mamoe i rotopu i te au luko ra.” (Mata. 10:16) Kua akatupu ainei te reira kia emiemi ratou e kia tapupu? Kare. Kua akono ratou i te tu tei akakiteia maira i muri ake e te apotetoro ko Paulo i tona akakiteanga ki te au taeake Kerititiano e: “Kia akamaroiroi, e kia karanga e, ‘Ko Iehova toku tauturu, kare au e mataku; eaa ta te tangata kia rave mai iaku?’ ” (Ebera 13:6) Kua rekareka ratou no te mea kua manako tauia ratou kia akangateitei koreia no tona ra ingoa, e kua rave tamou ua atu ratou ma te kore e akamutu i te apiianga e te akakitekiteanga i te tuatua meitaki.—Anga. 5:41, 42.
2 I teia tuatau tei te au tuanga openga te angaanga tutuanga i te ao katoa. Mei ta Iesu rai i totou, ka makitakitaia tatou e te pa enua ravarai. (Mata. 24:9) Ta tatou angaanga tutuanga kua patoiia e kua aviriia, e i roto i tetai au tuanga o te ao nei, kua arai katoaia te reira. Me te ngere ra tatou i te akarongo, penei ka mataku mai tatou. Inara, i te kiteanga e ko Iehova to tatou Tauturu te akaoraora ra ia tatou e te akamatutu ra ia tatou kia tamou marie ua atu.
3 Te mataku kore e tu ia no te ketaketa, te maroiroi, te manava. E tuke te reira no te mataku, te akama, te matakutaku. E umuumu ua ana rai te au pipi a Iesu i te mataku kore i te tamou marie anga. Ka inangaro maataia te reira me ka kopae tatou kia kore e ngakau taitaiaia e te au tu e te au angaanga no tetai ao ei enemi ra ki te Atua. Mei teaa tikai te akamaroiroianga kia tatou i te akamanakoanga i te akaraanga tau tikai o Iesu, ei tangata autu o teianei ao! (Ioane 16:33) E akamaara, katoa, i te au apotetoro koi aro atu ei ratou i te au timataanga kino tikai kua akakite maroiroi atu e: “Ko te Atua ta matou e akarongo e tikaʼi auraka te tangata.”—Anga. 5:29.
4 Kare ra Tatou i to te Aronga i Unui ki Muri: Ka tau tatou kia tauta kia aruaru i te tamou marie i te tu manako papu ki ta tatou angaanga. (Ebera 10:39) E akamanako ua ana e te tonokia ia ra tatou e Iehova ei akakiteanga o tona aroa e te tu akaaroa ki te au tangata ravarai. Kare roa aia e pati ana i tona au tavini kia rave i tetai ua atu apinga e kare o te reira akakoroanga puapinga tikai. Pouroa te apinga i akatuangaia tatou kia rave e meitakianga ia i te openga ra no te aronga te inangaro ra i te Atua.—Roma 8:28.
5 Ka tauturu te akaraanga papu ia tatou kia kimi ua atu rai i te aronga e tu mamoe to ratou i roto i to tatou ngai. Penei ka akara tatou i te tu manako kore te akaariia ra e te tangata ei akakiteanga o to ratou manamanata e te tu puapinga kore. E akatika i to tatou inangaro i te akakeu ia tatou kia aroa e kia akakoromaki. Pouroa te taime e oake ana tatou i te au puka me kore te kite ra i tetai ai ka no te inangaro, ta tatou akakoroanga koia oki kia atoro viviki akaou atu e kia akakeu maata atu i te inangaro. Auraka rava tatou e ekoko i to tatou tu kite i te akamataanga i tetai apii Pipiria me kore kia meitaki tikai i te akonoanga i te reira. Kareka ra, ka tau tatou kia kimi putuputu e te pureanga i ta Iehova tauturu e te aratakianga, papu tikai e ka tauturu mai aia ia tatou.
6 Kua irinaki tikai tatou e ka akono a Iehova i te angaanga ki to te reira akaotianga. (Akaaite ia Philipi 1:6.) To tatou irinaki anga tikai ki roto iaia e ko to tatou Tauturu akamaroiroi te akamatutu ra ia tatou, kia kore oki tatou e “roiroi i te takinga-meitaki.”—Gala. 6:9.