Ka Akaoraora te Akameitakianga
1 “Kare ainei e tamaine meitaki au i teia ra?” i aue ngingiti ua ai te manga tamaine i te taime ka moe. Kua poitirere te mama i te uianga. Noatu oki e kua kite ana i tana manga tamaine i te tauta pakari anga kia akamako i taua ra ra, kare ra aia i akakite ua atu e tai ua tuatua akameitakianga. Kia riro te vai mata o tera manga tamaine ei akamaaraanga e ko tatou pouroa—ou e te pakari—ka anoano i te akameitakianga. Te akaoraora ra ainei tatou i te aronga i vaitata ao ia tatou na te akakite anga i te arikianga no te meitaki ta ratou e rave ra?—Maseli 25:11.
2 Te oronga maira te au oa Kerititiano i te au tumu e manganui no tatou kia akameitaki ia ratou. Te aronga pakari, te au tavini tauturu, e te au painia te angaanga pakari nei i te akatupu i ta ratou au apainga. (1 Timo. 4:10; 5:17) Te au metua mataku i te Atua te rave maroiroi nei i te utuutu i ta ratou tamariki na to Iehova au arataa. (Ephe. 6:4) Te au mapu Kerititiano te tauta pakari nei i te patoi i “te vaerua o teianei ao.” (1 Kori. 2:12, NW; Ephe. 2:1-3) Ko etai te tavini tiratiratu nei ia Iehova noatu te ruaineanga, te au manamanata o te pae kopapa, me kore e etai atu au timataanga. (2 Kori. 12:7) Pouroa teia aronga nei ka tau i tetai akameitakianga. Te ariki ra ainei tatou i ta ratou au tautaanga tei tau kia akapaapaaia?
3 Kia Tatou Uaorai e kia Akataka Tikaia: E rekareka tikai ana tatou i te akarongo i te akameitakianga mei te paata mai. Inara, e oraora roa atu te akameitakianga me tuku tika ia mai te reira kia tatou uaorai. Ei akatauanga, i te pene 16 o tana reta ki to Roma, kua taiku atu a Paulo i te au tuatua akameitakianga tei akataka tikaia no runga ia Phebe, Peresila e Akuila, Teruphaina, e Teruphosa, e Peresi, e etai ke atu. (Roma 16:1-4, 12) Mei teaa ra te akaoraora anga o tana au tuatua ki taua aronga tiratiratu ra! Te akapumaana maira taua au akapaapaanga ra i to tatou ai tungane e te ai tuaine e te anoanoia ra ratou e te tau ra ei akapiri vaitata roa atu ia tatou. I oronga ana ainei koe i tetai akameitakianga akataka tikaia i nga taime ua akenei?—Ephe. 4:29.
4 Mei te Ngakau Mai: Kia oraora tika tikai, ko te akameitakianga ka anoanoia te ngakau tae. Ka kite ua te tangata e me te tuatua ra tatou mei te ngakau mai me ‘e arero taparu ua.’ (Maseli 28:23) Ia tatou e tereni nei ia tatou uaorai kia kite i te meitaki i roto i etai ke, ka akakeuia to tatou ngakau kia akameitaki atu. Kia maoraora ua rai tatou i te oronga anga i te akameitakianga ngakau tae, i te kite anga e ko “te tuatua ra i tuatuaia i te tuatau tau e tau ei, e meitaki roa ïa.” —Maseli 15:23.