“Te Tuatua ra i Tuatuaia i te Tuatau E Tau ei, E meitaki Roa Ïa”
I TETAI akaputuputuanga e tai ra katoa a te Au Kite o Iehova, kua tauta meitaki a Kim i te akarongo atu e kia tata i te au manako iaia e tauta ra i te akono i tana tamaine e rua e te apa mataiti i te pakari kia noo muteki ua. I te openga o te porokaramu, tetai tuaine Kerititiano te noo ra i runga i taua rai pa nooanga kua taanga atu kia Kim e kua akameitaki ngakau tae iaia i te tu i akono ei raua ko tana tane i ta raua tamaine i te tuatau o te porokaramu. Kua riro taua akameitakianga ei puapinga maata tikai kia Kim e i teianei rai, i te au mataiti i muri mai, kua karanga aia: “Me roiroi tikai ana au i ko i te au uipaanga, e manako ana au i ta tera tuaine i tuatua mai. Te akamaroiroi nei rai tana au tuatua takinga meitaki iaku kia tereni ua atu rai i ta maua tamaine.” E tikai, ka rauka te au tuatua tau i te akamaroiroi i tetai tangata. Te karanga ra te Pipiria: “Te tuatua ra i tuatuaia i te tuatau e tau ei, e meitaki roa ïa.”—Maseli 15:23.
No tetai ia tatou, ra, penei e mea ngata i te akameitaki atu i tetai ke. I tetai au taime, te kite anga i to tatou uaorai au tu paruparu ka akariro te reira ei mea ngata i te rave. I karanga ai tetai Kerititiano: “Iaku rai, mei te mea e te tu ra au i runga i tetai ngai e paruparu te one. Te maata atu taku akamaroiroi anga i tetai ke te maata atu taku e kite maira iaku uaorai e te oparaia ra ki raro.” Te au tumu mei te tu akama, te manako papu kore ia koe uaorai, me kore te mataku e ka marama koreia ka riro katoa te reira ei mea ngata i te oronga i te akameitakianga. Kapiti katoa, me kare tatou uaorai i akameitakiia ana me kore e meangiti ua te akameitakianga i to tatou tupu mai anga, penei ka kite mai tatou ei mea ngata i te akameitaki atu i tetai ke.
Noatu rai, i te kiteanga e e akakeuanga meitaki to te akameitakianga ki runga i te tangata oronga e te tangata katoa e tuatuaia ra penei ka akakeu ia tatou kia rave i te ka rauka meitaki ia tatou i te oronga i tetai tuatua akameitakianga i te tuatau tau. (Maseli 3:27) Eaa, i reira, te au tupu anga meitaki te ka tupu mai no te rave anga i teia? E akamanako poto ua ana tatou i tetai.
Au Tupu Anga Meitaki
Ka rauka te akameitakianga tau i te akamaroiroi i te tu papu i roto i te tangata te tuatuaia ra. “Me akameitaki mai ana te tangata iaku, te manako ra au e e irinaki to ratou i roto iaku, e te irinaki ra ratou iaku,” i karanga ai a Elaine, e vaine akaipoipo Kerititiano. Ae, te akameitaki anga i tetai tangata te ngere ra i te tu papu i roto iaia uaorai, te oronga ra ki te reira tangata i te mataku kore kia akono i te au araianga, e te ka tupu, ka kite mai aia i te rekareka. Ka puapinga tikaiia te au mapu mei teia akameitakianga tau. Kua karanga tetai tangata mapu tei akatika e e taitaiaia ana aia e tona uaorai au manako papu kore: “E tauta pakari ua ana au i te akamareka ia Iehova, inara i tetai au taime e manako ana au e noatu eaa taku ka rave, kare roa te reira e meitaki rava ana. Me akameitaki mai tetai tangata iaku, i roto iaku e mataora ana au.” E tika, tikai, te materi a te Pipiria: “Mei te apara auro i roto i te vairanga ario ra, ko te tuatua ïa me tuatuaia i te tuatau tikai ra.”—Maseli 25:11, NW.
Ka akakeu e ka akamaroiroi te akameitakianga i tetai tangata. Kua karanga tetai orometua tamou, “E akamaroiroi ana te akameitaki anga iaku kia angaanga pakari atu e kia akameitaki atu i te tu o taku angaanga orometua.” Kua kite mai tetai metua vaine e rua ana tamariki e me akameitaki ana tetai au mema o te putuputuanga i tana nga tamariki no te oronga anga i te au paupau anga i te au uipaanga, kua inangaro raua i te paupau maata atu. Ae, ka akakeu te reira i te aronga mapu kia tere meitaki ki mua i roto i te oraanga Kerititiano. E tikai, te inangaro ra tatou katoatoa kia akapapuia e te akangateiteiia ra e te akaperepereia ra tatou. Teia ao tei ki te manamanata penei ka akaroiroi e ka akateimaa ia tatou. Te karanga ra tetai tangata pakari Kerititiano, “Tetai taime me taitaiaia au, te akameitakianga mei te pauanga rai te reira ki taku au pure.” Mei te reira katoa rai, kua karanga a Elaine, “Tetai taime e manako ana au e te akaari maira Iehova i tona akaperepere anga iaku na roto i te au tuatua a tetai ke.”
Ka akatupu te akameitakianga i tetai tu noo anga tamou. Te oronga anga i te akameitakianga tika tikai te akaari ra i te tu manako meitaki e te akamaroiroi ra i tetai tu pumaana, te tinamou e te akaperepereanga. E akapapuanga te reira e te inangaro tikai ra tatou i to tatou au taeake Kerititiano e te akaperepere ra ia ratou. Kua karanga a Josie, tetai metua vaine e: “I mua atu ana, kua akamou au i toku turanga no te tuatua mou i roto i tetai ngutuare tangata e tukeke te akonoanga. I taua taime ra, te rauka anga i te arikianga mei te au tangata pakari i te pae vaerua kua akamaroiroi i toku inangaro e auraka e tuku i te au.” E tikai, “e melo anake oki tatou no tatou uaorai.”—Ephesia 4:25.
Te inangaro anga i te akameitaki atu te tauturu ra ia tatou i te akara i te meitaki i roto i tetai ke. E akara ana tatou i te au tu meitaki o tetai ke, kare i to ratou au tu paruparu. Kua karanga tetai tangata pakari Kerititiano ko David, “Te akaperepere anga i ta tetai ke e rave ra ka tauturu ia tatou i te akameitaki putuputu atu i tetai ke.” I te akamanako anga i te tu aroa o Iehova e tana Tamaiti i te tuatua meitaki anga i te au tangata apa ka akakeu ia tatou kia aroa katoa i roto i teia tu.—Mataio 25:21-23; 1 Korinetia 4:5.
Aronga Tau tei Akameitakiia
No te mea nana i Anga mai ia tatou, ko te Atua ko Iehova, tei maata rava o te aronga te tau ra kia akapaapaaia. (Apokalupo 4:11) Mei te mea e kare aia e inangaro ia tatou kia akaketaketa i tona tu irinaki me kore kia akamaroiroi iaia, me akapaapaa tatou ia Iehova no tona tu umere e tona takinga meitaki, te akapiri vaitata ra aia kia tatou, e te akatupu ra tatou i tetai pirianga kiaia. Te akatupu katoa ra te akapaapaaanga i te Atua i tetai akaraanga maroiroi e te tau ua o ta tatou uaorai au apinga i rave e te akakeu ra ia tatou kia oronga te meitaki o ta tatou au puapinga kia Iehova. (Ieremia 9:23, 24) Te oronga ra Iehova ki te au tangata tau katoatoa ra i te manakonakoanga no te oraanga mutu kore, e ko te reira katoa tetai tumu akamaroiroi akaou mai no te akapaapaaanga iaia. (Apokalupo 21:3, 4) Kua maroiroi te Ariki pakari ko Davida kia ‘akapaapaa i te ingoa o te Atua’ e kia ‘akamaata iaia i te akameitaki.’ (Salamo 69:30) Kia riro te reira ei inangaro katoa no tatou.
Te tau ra te au taeake akamori i te akameitakianga tau. Me oronga tatou i te reira, te rave rotai ra tatou ma te akauenga tu-Atua kia “akamaroiroi atu ei kia maata te aroa, e i te angaanga memeitaki ra.” (Ebera 10:24) Tetai akaraanga meitaki i roto i teia tu koia oki ko te apotetoro ko Paulo. Kua tata aia ki te putuputuanga i Roma: “E akameitaki ana au i taku Atua, no Iesu Mesia ra, ia kotou ravarai, no te mea kua tuatuaia to kotou akarongo e kako roa ake te ao katoa nei.” (Roma 1:8) Mei te reira katoa rai, kua akameitaki te apotetoro ko Ioane i tona taeake Kerititiano ko Gaio no tona tu akaraanga meitaki tikai no tei “akono i te tuatua- mou.”—3 Ioane 1-4.
I teia tuatau, me akaari tetai taeake Kerititiano i te tu mei ia Karaiti rai i roto i tetai tu akaraanga meitaki tikai, kua oronga atu i tetai tuanga akapapa meitakiia no te uipaanga, me kore kua oronga atu i tetai pauanga ngakau tae i tetai uipaanga, tei ia tatou te atianga meitaki i te akakite i to tatou arikianga ki taua tangata ra. Me kore me te tauta ra tetai tamaiti i te akara i te au irava i te au uipaanga putuputuanga, ka rauka ia tatou i te oronga i te akameitakianga. Ia Elaine, tei taikuia i mua atu ana, kua karanga e: “E tuke tatou i to tatou au tu meitaki. Na te kite mai anga i ta tetai ke e rave ra, te akaari ra tatou i to tatou arikianga no te au tu meitaki tukeke i rotopu i to te Atua iti tangata.”
I Roto i te Pamiri
Akapeea te akakiteanga i to tatou arikianga no te au mema o to tatou uaorai pamiri? Ka umuumu maataia te tuatau, te tautaanga, e te akamanako anga aroa no te tane e te vaine kia oronga i te turuturuanga i te pae vaerua, te pae manako, e te pae materia no to ratou pamiri. Ka kore ei ka tau ratou i te akarongo i te au tuatua akameitakianga mei tetai e tetai e mei ta ratou au tamariki. (Ephesia 5:33) Ei akatauanga, no runga i te vaine akono meitaki, te karanga ra te Tuatua a te Atua: “E tu tana au tamariki ma te akaora iaia; e tana tane katoa, ma te akapaapaa iaia.”—Maseli 31:10, 28.
Te tau katoa ra te tamariki i te akameitakianga. Ma te tangi, e viviki ana tetai pae metua i te akakite ki ta ratou tamariki eaa ta ratou e umuumu ra ia ratou inara kare takiri e akameitaki ana ia ratou no te tautaanga ta ratou e tuku ra kia akaari i te ngateitei e te akarongo. (Luka 3:22) Me orongaia ana i te akamataanga i te tupuanga o tetai tamaiti, te akameitakianga e akakeu putuputu ana i tetai tamaiti i te manako mai e te inangaroia ra aia e kua kite mai te tu tinamou.
E tika, te anoanoia ra te tautaanga i te akameitaki atu i tetai ke, inara ka kokoti tatou i te au puapinga e manganui no te rave anga i te reira. Ko te tika, te maata atu to tatou maroiroi i te akameitakianga i te aronga tei tau ra, te maata atu to tatou mataora.—Angaanga 20:35.
Ariki e e Oronga i te Akameitaki Anga na Roto i te Tu Meitaki
Inara, te rauka anga i te akameitakianga, ka riro ei timataanga no tetai pae. (Maseli 27:21) Ka rauka te reira, ei akaraanga, i te akamaroiroi i te au tu manako teitei i roto i te aronga e akakeuanga ngakau parau to ratou. (Maseli 16:18) No reira, e tumu anga tetai kia matakite. Te oronga maira te apotetoro ko Paulo i teia akoanga tau meitaki: ‘Teia taku tuatua kia kotou katoatoa e ope rava ake, eiaa e maata te manako iaia uaorai, i tei tau iaia kia manako ra; ka akono tikai ra te manako kia arite i te tu o te akarongo i tuaia e te Atua i te tangata katoatoa.’ (Roma 12:3) Kia tauturu i tetai ke kia kore e topa ki roto i te ereere kia manako maata roa iaia uaorai, penei e mea meitaki e auraka e akamou ki runga i te au tu mei te tu viviki i te kite me kore te tu akaraanga manea. Mari ra, kia akakite tatou i tetai ke no ta ratou au angaanga meitaki.
Me orongaia e kua arikiia na roto i te tu meitaki, ka akakeu te au tuatua akameitakianga ia tatou i roto i te tu papu. Penei ka akakeu ia tatou kia akakite i ta tatou kaiou kia Iehova no tetai ua atu meitaki ta tatou i rave ana. Penei ka akamaroiroi katoa te akameitakianga ia tatou kia akono ua atu rai ia tatou uaorai i roto i te tu meitaki.
Te akameitakianga ngakau tae e te tau meitaki ra e apinga aroa ia te ka rauka ia tatou katoatoa i te oronga. Me akamanako meitaki tatou i te oronga i te reira ki tetai tangata, penei ka maata atu to te reira akakeuanga ki te tangata e tuatuaia ra i ta tatou ka kite mai.
[Pia/Tutu i te kapi 18]
Tetai Reta tei Akakeu i Tona Ngakau
Kua maara meitaki i tetai akaaere tutaka i tetai atianga i te oki mai anga raua ko tana vaine ki to raua ngai nooanga i muri ake i tetai ra anu pakari tikai i roto i te angaanga orometua. Te karanga ra aia: “Kua anuia taku vaine e kua taitaia mai, e kua akakite mai aia kiaku e kare aia i manako ana e ka rauka iaia i te angaanga ua atu rai. ‘Mei teaa tikai te meitaki atu,’ i karanga ai aia, ‘kia tavini atu ki roto i te angaanga orometua tamou ma tetai putuputuanga, kia noo ua ki roto e tai ngai, e kia akono i ta taua uaorai au apii Pipiria.’ Kua akaruke ua au i te maanianga i tetai tuku anga tika, i te karanga anga e ka angaanga maua i te toenga o te epetoma e ka akara i reira eaa tona manako me oti mai. Me te pakari ra rai tona manako e kia akamutu mai, ka akangateitei au i tona au manako. I taua ra rai, kua tapu maua ki te opati mere e kua kite mai i tetai reta mei te opati manga tei tataia kiaia tikai. I roto i te reta ko te akameitakianga pumaana no tana au tautaanga i roto i te angaanga orometua e tona akakoromaki, i te arikianga e mei teaa tikai te ngata i te moe anga i roto i tetai roi tuke i te au epetoma ravarai. Kua akakeu tikai ia aia e taua akameitakianga e kare roa aia i tuatua akaou mai ana no te akaruke anga i te angaanga tutaka. Ko te tika, e manganui te au taime kua akamaroiroi mai aia iaku kia angaanga ua atu rai i te taime i manako mai au i te akamutu.” Kua noo ua atu rai teia tokorua i roto i te angaanga tutaka vaitata rai e 40 mataiti.
[Tutu i te kapi 17]
Koai i roto i toou putuputuanga te tau ra kia akameitakiia?
[Tutu i te kapi 19]
E reka ana te tamariki i te akamanakoanga aroa e te akameitakianga