Mataora Tatou i te Oronga ia Tatou Uaorai i Roto i ta Iehova Tavini Anga!

¹ Kua mataora te apotetoro ko Paulo i te ‘akaope rava i tona maroiroi’ no te akatupuanga i tana angaanga orometua Kerititiano. (2 Kori. 12:15) Aiteite ua i teia tuatau, te angaanga maroiroi ra te au Kerititiano e manganui ei au painia. Tetai atu ma te au apainga teimaa no te pamiri, e akanoo ana i tetai tuatau i roto i ta ratou papaanga angaanga kia piri atu ki roto i te angaanga orometua i te au epetoma ravarai. E taangaanga ana tetai pae ma te au maki kino i to ratou maroiroi kotingaia i te akakite i te au inangaro o te Patireia. E akamaroiroi anga tikai i te kite i to Iehova iti tangata, noatu te mataiti me kore te au turanga, i te orongaanga ia ratou uaorai i roto i ta Iehova tavinianga!

² Aroa no te Tangata Tupu: I te rave anga i ta tatou ka rauka i te tavini ia Iehova, te akaarianga i te aroa no te Atua e no te tangata tupu, te oronga maira kia tatou i tetai akava ngakau ma. No te mea kua oronga a Paulo i tona oraanga i te akakite i te tuatua meitaki, kua mataora aia i te karanga e: “E akakite ua atu na au kia kotou i teianei rā, kare rava oku viivii i te toto o te tangata katoa nei.” (Anga. 20:24, 26; 1 Tesa. 2:8) Te piri atu anga ki roto i te angaanga orometua tei rauka i to tatou au turanga, te paruru ra ia tatou mei te akamaringianga toto.​—Ezeki. 3:18-21.

³ Te angaanga pakari anga i te tauturu i tetai ke, te oronga maira i te mataora kia tatou. (Anga. 20:35) Kua karanga tetai taeake e: “Me poiri ana, e kua oki atu au ki te kainga i muri ake e tai ra i roto i ta Iehova tavinianga, e tika, e roiroi ana au. Inara kua mataora au, e te akameitaki nei au ia Iehova no te oronga mai anga kiaku i tetai rekareka kare e rauka i tetai i te apai ke.”

⁴ Aroa no te Atua: Te tumu puapinga maata tikai no te oronga anga ia tatou uaorai i roto i ta Iehova tavini anga koia oki te akamareka ra te reira i to tatou Metua i te rangi. E akakeu ana te aroa no te Atua ia tatou i te akono i tana au akauenga, te o maira te tutu anga e te akariroanga i te au tangata ei pipi. (1 Ioane 5:3) Noatu te tu inangaro kore me kare te tu patoi o te au tangata, ka angaanga pakari ua atu rai tatou na Iehova ma te rekareka.

⁵ Kare e ko te taime teia i te akamarie mai. Te noo nei tatou i te tuatau kokotianga. (Mata. 9:37) E angaanga roa ua ana te tangata pama i te tuatau kokotianga no te mea e poto ua tona taime i te akaputu i te ua kai i mua ake ka akamata ei te reira i te pe. Kua kotinga katoaia te tuatau akanooia no te angaanga kokotianga pae vaerua. I te akamanakoanga i te tuatau e noo nei tatou, kia uapou ua atu rai tatou katoatoa ia tatou uaorai i roto i te angaanga orometua.​—Luka 13:24; 1 Kori. 7:29-31.