Tauturu i te Tangata Ngutuare kia Akamanako
1. Eaa te aravei anga meitaki atu i roto i te angaanga orometua?
1 Eaa te aravei anga meitaki atu i roto i te angaanga orometua—no runga i tetai tu taumaroanga me kore te tauturu anga i te tangata ngutuare kia akamanako e kia kite mai i te pauanga tikai? Kua taangaanga te apotetoro ko Paulo i te rua o te manako te tuatua anga ki te ngati Iuda i Tesalonia, e tei tupu mai “kua akarongo maira tetai papaki.” (Anga. 17:2-4) Eaa te o maira ki te uriuri manako anga ki tetai ke?
2. Akapeea tatou me aru i te akaraanga o Paulo me akakitekite aere tatou i te tuatua meitaki?
2 Akamanako i te Manako e te Turanga: Tetai aravei anga meitaki kia akamanako i te manako o te aronga i te ngai tutuanga. Kua akamata a Paulo i tetai akoanga ki te aronga irinaki kore o Ereni i Areopago na te taiku anga i te au mea kua kite ana ratou e kua ariki ana. (Anga. 17:22-31) No reira, me akapapa i taau orongaanga, e akamanako i te irinaki tei kite matauia, e te manako papakitai o te tangata i te ngai tutuanga. (1 Kori. 9:19-22) Me patoi mai te tangata ngutuare, e kimi i tetai manako tei kite matauia, e kia akamaata atu i te manako ki runga i te reira.
3. Akapeea tatou me uriuri manako meitaki ki tetai ke na te taangaanga karape anga i te au uianga?
3 Taangaanga Karape i te Au Uianga: Kare e rauka ia tatou i te oronga i te au aratakianga ki tetai tangata e teretere ra kia tae ki tana ngai e akakoro ra, kia kite roa tatou i te ngai ka aere ei aia. Kare katoa e rauka ia tatou te tauturu i te tangata ngutuare kia kite i te pauanga tikai, kia kite roa tatou i tona manako. Mua ake ka uriuri manako ei ki te tangata e akarongo maira, kua ui putuputu a Iesu i te au uianga kia kite aia i ta te tangata e manako ra. Ei akaraanga, te uianga tetai tangata kia Iesu e “Akapeea au nei e raukaʼi iaku te ora mutu kore?,” kua kimi a Iesu i te manako o te tangata i mua ake ka pau atu ei aia. (Luka 10:25-28) Tetai atianga, te oronga mai anga a Petero i te pauanga tarevake, kua taangaanga karape a Iesu i te au uianga i te akatikatika i tona manako. (Mata. 17:24-26) No reira me ui mai te tangata ngutuare i tetai uianga me kore me akakite mai i tetai manako tarevake, e taangaanga tatou i te uianga kia tauturu iaia kia akamanako no runga i te reira.
4. Eaa ra tatou ka tauturu ei i te tangata ngutuare kia akamanako?
4 Me tauturu tatou i te tangata ngutuare kia akamanako, te aru ra tatou i te Puapii Maata, ko Iesu, e te au tangata tutu evangeria karape i te anere mataiti mua. Te akaari katoa ra tatou i te akangateitei anga ki te tangata ngutuare. (1 Pete. 3:15) Te ka tupu mai, ka inangaro aia ia tatou kia atoro akaou iaia.