Oraanga Kerititiano e te Angaanga Orometua—Au Manako ke Mai
TIURAI 1-7
AU MEA UMERE I ROTO I TE PIPIRIA | KOLOSA 1-4
“Kopae Oki Kotou i te Tangata Taito, e Kua Akatangata Ou”
(Kolosa 3:5-9) E tenana ka tamate i to kotou au melo i te au mea o teianei ao; te akaturi, te tuatua viivii, te anoano viivii ra, te inangaro tika kore, e te noinoi apinga, e akamori idolo oki te reira: 6 No taua au mea ra i rokoia mai ei te tamariki akarongo kore i te riri o te Atua: 7 Ko ta kotou ïa au mea i akono i muatangana, i to kotou noo anga i roto ia ratou ra. 8 I teianei ra, e kopae atu kotou i taua au mea katoa nei, te riri, te makitakita, te vareae, te akakino, te tuatua viivii ra, i to kotou vaa. 9 Auraka e pikikaa tetai ki tetai, kua kopae oki kotou i te tangata taito ra e tana katoa au ravenga.
Kia Rauka te Vaerua o te Atua, Kare to Teianei Ao
12 Ko teea vaerua ta toku tu e akaata ra? (E tatau ia Kolosa 3:8-10, 13.) E akakeu ana te vaerua o teianei ao i te au angaanga o te kopapa. (Gala. 5:19-21) E kiteaia ana e ko teea vaerua te akakeu ra ia tatou me timataia tatou, kare me te meitaki ra te au mea, mari ra me kare e meitaki ana, koia oki me manako kore mai, akariri mai, e me rave tetai taeake e te tuaine Kerititiano i te ara kia tatou. Pera katoa, i roto i to tatou kainga, penei ka kiteaia e ko teea vaerua e akakeu ra ia tatou. Penei ka anoanoia kia akara meitaki ia tatou uaorai. Ui kia koe uaorai e, ‘Nga marama e ono i pati, kua riro ainei toku tu mei to Karaiti rai me kore kua rave akaou ainei au i te au tuatua e te au tu peu kino?’
13 Ka tauturu te vaerua o te Atua ia tatou kia ‘kopae i te tangata taito e tana katoa au ravenga’ e kia “akatangata ou” ia tatou uaorai. Ka tauturu te reira ia tatou kia maata te aroa e te takinga meitaki. Ka inangaro tatou i te akakore atu i te ara a tetai e tetai, noatu e tumu tetai no te akaapaanga. Kare rava tatou e riri atu me kite tatou i te tu tau kore, na te tuatua anga ma ‘te maru kore, te rotoriri, te makitakita, te taumāro, e te tuatua akakino.’ Mari ra, ka tauta tatou kia “ngakau maru aroa ua.”—Ephe. 4:31, 32.
(Kolosa 3:10-14) E kua akatangata ou, ko tei akaouia i te kite mei te tu katoa o Tei anga iaia ra: 11 Kare oki e Eleni e te ngati Iuda, kare e peritome e te peritome kore, kare e tangata maori, e te Sekuti, kare e tuikaa e te rangatira; tei te Mesia anake ra, e tei roto aia i te aronga katoa e akarongo ra. 12 E tenana, ka akangakau aroa ua e te takinga-meitaki, te akaaka, te maru, te akakoromaki maata, mei te aronga tapu e te akaperepereia, e te ikiia e te Atua ra: 13 E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei te Mesia i akakore i ta kotou na, e akapera katoa kotou. 14 E ei runga ravao i taua au mea katoa nei e kakau na i te aroa, ko taua tatua apa kore ua ra ïa.
Kua Akatukeia Ainei Kotou?
18 Me ka inangaro tatou i te Tuatua a te Atua kia taui ia tatou, e maata atu te ka anoanoia tatou kia rave i to te tatau ua e te apii ua i te reira. E maata te tangata e tatau ana i te Pipiria e e maata ta ratou i kite no runga i te reira. Penei kua aravei ana koe i teia tu tangata i roto i te angaanga orometua. Kua mou ngakau ua i tetai aronga te au irava Pipiria. Inara, kare tikai te reira i akatuke i to ratou aerenga manako e to ratou tu oraanga. Eaa te tumu? No te mea ka taui ua te Tuatua a te Atua i te tangata me akatika ratou i te reira kia akaia i roto i to ratou ngakau. E rauka ai i te rave i te reira, ka anoanoia tatou kia akamanako marie i ta tatou i apii mei roto mai i te Pipiria. E mea tau kia ui kia tatou uaorai e: ‘Kua papu ainei iaku e na te Pipiria tikai teia apiianga e kare na te akonoanga? Te akaari ra ainei au i roto i toku oraanga e ko teia tikai te tuatua mou? Te akarotai ra ainei au i toku oraanga ki taku i apii? Te irinaki ra ainei au e ko taku e apii nei, no ko mai ia Iehova, mei te mea rai e koia te tuatua maira kiaku?’ Me akamanako tatou i teia au uianga, ka akavaitata roa atu te reira ia tatou kia Iehova. Me taeria to tatou ngakau e ta tatou i apii, ka akakeuia tatou kia rave i te au tauianga i roto i to tatou oraanga kia akamareka i te Atua.—Mase. 4:23; Luka 6:45.
19 Me tatau putuputu tatou i te Pipiria e me akamanako oonu no runga i te reira, na teia e tauturu ia tatou kia rave i ta Paulo i akakite mai e: “Kua kopae oki kotou i te tangata taito ra e tana katoa au ravenga; E kua akatangata ou, ko tei akaouia i te kite.” (Kolo. 3:9, 10) Me marama tikai tatou i ta te Pipiria e apii maira e me akono tatou i te reira, ka akakeuia tatou kia akatangata ou ia tatou te ka riro ei paruru ia tatou mei te au ereere a Satani.
Kimi i te Mārama o te Tuatua Mou
(Kolosa 1:13, 14) Ko tei akaora ia tatou i te mana o te poiri, e kua akaumu ia tatou ei roto i te basileia o tana Tamaiti akaperepere; 14 Nona i raukaʼi to tatou ora, ko te ara i akakoreia, i tona toto.
it-2 169 ¶3-5
Patireia o te Atua
“Te Basileia o Tana Tamaiti Akaperepere.” E tai ngauru rā i muri ake ka aere ei a Iesu ki runga i te rangi, i te Penetekote 33 T.N., kua kite tana au pipi i te akairo e “kua akateiteiia aia i te rima katau o te Atua” i te riringi mai anga a Iesu i te vaerua tapu ki rungao ia ratou. (Anga. 1:8, 9; 2:1-4, 29-33) Kua mana iora te “koreromotu ou” ki rungao ia ratou, e kua riro maira ratou ei tango no te “iti-tangata tapu” ou, ko te Iseraela vaerua.—Ebe. 12:22-24; 1 Pete. 2:9, 10; Gala. 6:16.
Kua noo iora te Mesia i te rima katau o tona Metua e koia te Upoko o teia putuputuanga. (Ephe. 5:23; Ebe. 1:3; Phili. 2:9-11) Te akaari maira te au Tuatua Tapu e mei te Penetekote 33 T.N. e aere ua atu, kua akanooia tetai patireia pae vaerua i rungao i tana au pipi. Te tata anga ki te au Kerititiano i Kolosa i te anere mataiti mua, taiku a Paulo e e patireia to Iesu Mesia i te na ko anga e kua: “akaora [te Atua] ia tatou i te mana o te poiri, e kua akaumu ia tatou ei roto i te basileia o tana Tamaiti akaperepere.”—Kolo. 1:13; akaaite kia Anga. 17:6, 7.
Mei te Penetekote 33 T.N. e aere ua atu, tutara te Mesia ki rungao i te patireia pae vaerua koia oki te Iseraela vaerua. E au Kerititiano teia tei akatainuia i te vaerua o te Atua e kua riro mai ei tamariki pae vaerua nana. (Ioa. 3:3, 5, 6) Me rauka ta ratou tutaki i te rangi, kare ratou i te au tangata akaou no te patireia pae vaerua o te Mesia i te enua nei mari ra, ka riro ratou ei ui ariki ma te Mesia i te rangi.—Apo. 5:9, 10.
(Kolosa 2:8) E matakite ko te pou aea kotou i te tuatua pakari e te pikikaa puapinga kore a tetai tangata atu, i te tuatua ikuiku a te tangata nei, tei tau i te apiianga mua o teianei ao, kare i ta te Mesia.
Au Manako Maata Mei te Au Reta Kia Galatia, Ephesia, Philipi, e Kolosa
2:8—Eaa “te apiianga mua o teianei ao” ta Paulo i akamatakite mai? Ko te au tu teia o te ao o Satani—te au mea puapinga me kore te au kaveinga te akatupu ra, te arataki ra, me kore te akakeu ra i te reira. (1 Ioa. 2:16) Kapitiia mai i roto i teia au mea nei ko te apiianga a te tangata, te manako maata anga i te au apinga, e te au akonoanga pikikaa o teianei ao.
Tatau Pipiria
(Kolosa 1:1-20) Paulo, e aposetolo na Iesu Mesia, i to te Atua inangaro, e taku taeake nei ko Timoteo, 2 Ki te aronga tapu i te au taeake akarongo i te Mesia, i Kolosa na; Ei ia kotou te aroa ua, e te au no ko mai i te Atua i to tatou Metua ra, e te Atu oki ia Iesu Mesia. 3 Te akameitaki nei oki matou i te Atua, i te Metua o to tatou Atu ra o Iesu Mesia, e kare e tivata i te pure ia kotou, 4 Mei to matou kite anga mairai i to kotou akarongo i te Mesia ra ia Iesu, e to kotou aroa i te aronga tapu katoa ra; 5 I te irinakianga i vaioia no kotou i te ao, ta kotou i kite i muatangana i te tuatua-mou i te evangelia nei; 6 Ko tei kitea mai i roto ia kotou na, e i te ao katoa nei, e te akatupu nei i te meitaki mei tei i o kotou katoa na, mei te rā mairai i akarongo ei kotou, e i kite tikaʼi i te aroa ua o te Atua ra: 7 Ko ta kotou rai oki i kite akenei ia Epaphera, i to matou taeake tavini akaperepere nei, e e orometua tuatua-mou na te Mesia ia kotou; 8 Ko tei akakite katoa mai ïa kia matou i to kotou aroa ngakau ia matou ra. 9 I kore katoaʼi matou i tivata i te pure ia kotou, mei te rā mairai i kite ei matou, e te pati akatenga anga atu kia akakiia mai kotou i te kite i tona anoano, i te pakari i te au mea ravarai e te kite i te vaerua; 10 Kia tau to kotou aerenga i te Atu i te au mea katoa e mareka mai ei ra, e kia tupu te au angaanga meitaki katoa ia kotou, e kia maata oki to kotou kite i te Atua; 11 Ma te akamaroiroiia mai i te au maroiroi katoa, kia tau i tona mana kakā, kia maata atu te akakoromaki, e te maru anga kia roa, ma te rekareka; 12 Te akameitaki nei matou i te Metua, i tei akatau mai ia tatou i tetai tuanga i te kainga o te aronga tapu i te ao ra: 13 Ko tei akaora ia tatou i te mana o te poiri, e kua akaumu ia tatou ei roto i te basileia o tana Tamaiti akaperepere; 14 Nona i raukaʼi to tatou ora, ko te ara i akakoreia, i tona toto; 15 Ko te tu tikai aia o te Atua akara koreia, ko te Tama mua aia o te au mea ravarai i angaia ra: 16 E nana oki i anga i te apinga tini ravarai nei, ko to te rangi, e to te enua nei, ko tei akaraia nei e te kore e akaraia, te au terono, e te aronga tutara, te ui ariki, e te aronga mana, nana ïa i anga, e nona anake: 17 Ko mua rai aia i te au mea ravarai nei, koia oki tei mou i te au mea katoa nei. 18 Koia te upoko o te kopapa, te ekalesia nei, ko te momua aia, te tama mua o te aronga i mate ra; kia maata ua atu rai aia i te au mea katoa nei. 19 E mea meitaki oki i te Metua e, ei roto iaia te ki o te au mea katoa nei e vai atu ei; 20 E kia ongi oki iaia te au mea katoa i roto iaia uaorai i te au i rauka i te toto o tona satauro; ko to te rangi, e to te enua nei oki, kia ongi rai iaia.
TIURAI 8-14
AU MEA UMERE I ROTO I TE PIPIRIA | 1 TESALONIA 1-5
“E Akapumaana Kotou Tetai ki Tetai, e Akatupu i te Meitaki Tetai ki Tetai”
(1 Tesalonia 5:11-13) E tenana, e akapumaana kotou tetai ki tetai, e akatupu i te meitaki tetai ki tetai, mei ta kotou rai oki e rave nei. 12 Te ako atu nei matou ia kotou, e te au taeake, e kite atu kotou i te aronga i rave i te angaanga a te Atu ki roto ia kotou na, ko te akakite ki rungao ia kotou i te Atu nei, e te ako atu oki ia kotou; 13 E kia maata rava i te akangateitei ia ratou ma te aroa no ta rotou angaanga. E ei au oki to roto ia kotou uaorai.
“Akamanako i te Aronga e Angaanga Pakari ra i Roto ia Kotou”
12 Maata atu te o maira ki te ‘akaaere anga’ i te putuputuanga i to te apii ua anga. Kua taangaangaia taua tu tuatua ra i roto ia 1 Timoteo 3:4. Te tuatua ra a Paulo e ka tau tetai akaaere “ei arataki meitaki i tona uaorai ngutuare ra, e tana au tamariki i te kauraro marie anga iaia.” Te tuatua “arataki meitaki” i konei, te kapiti maira i te apiianga i tana tamariki, e te arataki anga i tona pamiri e kia “kauraro marie” te tamariki. Ae, ka arataki te aronga pakari i te putuputuanga, te tauturu anga i te katoatoa kia kauraro kia Iehova.—1 Timo. 3:5.
“Akamanako i te Aronga e Angaanga Pakari ra i Roto ia Kotou”
19 Eaa taau ka rave me orongaia mai tetai apinga aroa tei maaniia naau? Ka ariki rekareka ainei koe na te taangaanga anga i te reira? Kua oronga mai a Iehova i “te meitaki i te tangata nei” kia koe na roto ia Iesu Karaiti. Tetai mataara ka ariki rekareka koe i teia au apinga aroa, e akarongo meitaki ki te au akoanga a te aronga pakari e kia taangaanga i te au manako ta ratou i taiku mai. Kia ariki rekareka katoa koe na te paupau meitaki anga i te au uipaanga. Turuturu i te angaanga ta te aronga pakari e arataki ra, mei te angaanga orometua rai. Me kua puapingaia koe e tetai akoanga a tetai tangata pakari, eaa ka kore ei e akakite atu kiaia? Pera katoa, eaa ka kore ei e ariki rekareka atu i te au pamiri o te aronga pakari? Kia maara e, no tetai tangata pakari kia angaanga pakari i roto i te putuputuanga, kua akaatinga tona pamiri i to ratou tuatau.
(1 Tesalonia 5:14) E te karanga atu nei rai matou kia kotou, e te au taeake, e ako atu kotou i te akono kore, e akapumaana atu i te ngakau taitaia, e tauturu atu i tei apikepike, kia roa te akakoromaki anga i te tangata ravarai.
“Ei Aroa Rave ra, ei Mea Mou”
13 E tauturu i te aronga tei apikepike. Ka riro te akauenga Pipiria ei “tauturu atu i tei apikepike, kia roa te akakoromaki anga i te tangata ravarai” ei timata i to tatou aroa ngakau tae. (1 Tesalonia 5:14) E manganui te au taeake tei apikepike i muri ake kua maroiroi ra i roto i te akarongo. Inara te anoano ra tetai pae i te akakoromaki e te tauturu aroa. Akapeea tatou me tauturu ia ratou? Ka taangaanga tatou i te Pipiria ei akamaroiroi ia ratou, ka pati tatou ia ratou kia piri mai ki te tutu aere, me kore kia akarongo kia ratou. Pera katoa, auraka tatou e manako i to tatou au taeake e te au tuaine e e “ketaketa” me kore e “apikepike.” Mari ra, kia manako tatou e tu maroiroi e te apikepike to tatou katoatoa. Kua akakite rai te apotetoro ko Paulo e au tu apikepike tona. (2 Korinetia 12:9, 10) Ka anoano pouroa tatou i te tauturu e te akamaroiroianga mei tetai e tetai.
Aru i te tu Akaaka e te tu Maru o Iesu
16 Ta tatou tuatua maru. Ka akakeu te tu maru ia tatou kia “akapumaana atu i te ngakau taitaia.” (1 Tesalonia 5:14) Eaa ta tatou ka tuatua ei akamaroiroi ia ratou? Penei ka akakite tatou i to tatou inangaro maata no ratou. Ka rauka i te akameitaki ia ratou e te tauturu ia ratou kia kite i to ratou au tu meitaki e te tu kite karape. Ka rauka katoa i te akamaara kia ratou e na Iehova i tauturu ia ratou kia kite i te tuatua mou, no reira te akaperepere ra aia ia ratou. (Ioane 6:44) Ka rauka i te akapapu kia ratou e te manako tikai maira a Iehova i te “aronga ngakau paruparu” e te “aronga ngakau taitaia.” (Salamo 34:18) Ka akamaroiroi tikai ta tatou au tuatua maru i te aronga tei inangaro i te akapumaana anga.—Mase. 16:24.
Kimi i te Mārama o te Tuatua Mou
(1 Tesalonia 4:3-6) Teia oki to te Atua inangaro, kia akatapuia kotou, e kia kore kotou e akaturi: 4 Kia kite kotou ravarai e pini ua ake i te vaio i tona uaorai āriki ma te tapu e te ngateitei; 5 Auraka i te inangaro tika kore, mei te etene tei kore i kite i te Atua ra: 6 Kia kore rava tetai e rave i te ara, e te mea tika kore i tona taeake i taua mea nei; no te mea na te Atu e tutaki mai i te reira, ko ta matou ïa i karanga atu, e kua akakite ua atu ia kotou i muatangana.
it-1 863-864
Moeaana
E ara te moeaana, (te au tu peu ainga viivii ravarai o te akaturi mei te; ainga ki te vaa, ainga na roto i te ara repo, tuku karere akainangaro ainga e te vai atura.) Te tangata e rave ra i teia, ka akaateaia aia mei roto i te putuputuanga Kerititiano. (1 Kori. 5:9-13; Ebe. 12:15, 16) Akamārama te apotetoro a Paulo, te Kerititiano e rave i teia kua ara aia i tona uaorai kopapa i te akariro i tona au mero anau tamariki no te au anoano viivii. Takino i tona pirianga ki te Atua, taviivii i te putuputuanga o Iehova e te apai mai te au tu maki kino ta te au peu ainga viivii ka akatupu. (1 Kori. 6:18, 19) Kopae aia i te tikaanga o tona au taeake Kerititiano (1 Tesa. 4:3-7) i te (1) apai mai i te au peu viivii akama kore ki roto i te putuputuanga (Ebe. 12:15, 16), (2) taviivii i te turanga tiama o te tangata tana i kanga, e to tera tangata tikaanga kia akaipoipo ma te tiama, (3) takino i te ingoa meitaki o tona ngutuare tangata, (4) tamamae i te ngakau o nga metua, te vaine me kore tane i tapaoia, e te tokorua o te tangata i akaturi aia. Kare ko te tangata tana i kopae, ko te Atua ra, nona te mana kia akautunga iaia no tana ara.—1 Tesa. 4:8.
(1 Tesalonia 4:15-17) Teia ta matou e karanga atu kia kotou, i ta te Atu ra tuatua, ko tatou ko te aronga e ora ko te toe i te ao, ka rokoia mai ei e te Atu, kare e na mua i te aronga e moe nei. 16 Ko te Atu uaorai oki te ka eke mai mei te rangi mai ma te maeva, ma te reo o te angela maata, e ma te pu a te Atua, e te aronga i mate i roto i te Mesia ra, te ka tu mai ana ïa ki runga: 17 E muri ake, ko tatou ko te aronga ora e toe ra, e rave katoaia mai e ratou katoa i reira, ka apaiiaʼi ki runga ki roto i te tiao, kia aravei atu i te Atu ki roto i te reva nei, ka noo mou atu ei tatou i vaitata uao i te Atu e tuatau ua atu.
“Te Vaitata Maira Oki to Kotou Ora”!
14 Eaa te ka tupu i muri ake me akamata a Goga o Magoga i te tamaki atu i te iti tangata o te Atua? Te akakite maira te Pipiria e ka “tono atu ei [te Tamaiti a te tangata] i tana au angela, e akaputuputu mai i tona tangata i ikiia ra, no nga rua matangi e a katoa, e no te openga mai o te enua, e tae ua atu ki te openga o te rangi ra.” (Mareko 13:27; Mataio 24:31) Kare teia akaputuputu anga e taiku ra i te tuatau e ikiia ai te au Kerititiano akatainuia no te taime mua. E kare katoa teia e taiku ra i te akairo anga openga o te aronga akatainuia i runga nei rai i te enua. (Mataio 13:37, 38) Ka tupu taua akairo anga ra i mua ua ake i te akamataanga o te mate maata. (Apokalupo 7:1-4) No reira, eaa teia akaputuputu anga? E tuatau te reira e rauka ai i te aronga akatainuia i te enua nei ta ratou tutaki no te aere anga ki te rangi. (1 Tesalonia 4:15-17; Apokalupo 14:1) Ka tupu teia i tetai tuatau i muri ake me akamata a Goga o Magoga i te tamaki atu. (Ezekiela 38:11) E oti, mei ta Iesu rai i tuatua e, “ei reira oki te aronga tuatua-tika e kakā mai ei i te basileia o to ratou Metua.”—Mataio 13:43. (Akara i te tataanga rikiriki i raro ake.)
15 E maata te au tangata i roto ia Kerititome te irinaki ra e ka apainaia te au Kerititiano ki runga i te rangi i roto i te kopapa tangata. Manako katoa ratou e ka kite mata ratou ia Iesu me oki mai aia i te tutara i runga i te enua. Inara te akataka meitaki ra te Pipiria e kare a Iesu e kite mataia me oki mai aia i te na ko anga e: “Ei reira e kiteaʼi te akairo o te Tamaiti a te tangata ki runga i te rangi” e ka aere mai a Iesu “na roto i te tiao rangi.” (Mataio 24:30) Te akakite katoa maira te Pipiria e “kare te kopapa toto nei e te kiko e noo ki te basileia o te Atua.” No reira ko te aronga te ka apainaia ki runga i te rangi, ka na mua ratou “i te akatu keia, Kare e mamia, mei te kamo anga mata nei, kia tae ki te pu openga ra.” (E tatau ia 1 Korinetia 15:50-53.) Ka akaputuputu vivikiia mai te aronga tiratiratu akatainuia i runga nei i te enua.
Tatau Pipiria
(1 Tesalonia 3:1-13) E kare akera i tika ia matou kia akakoromaki, tika atura ia matou kia noo ua i Atene, ko matou anake; 2 Unga akenei i to matou taeake ia Timoteo, e tavini no te Atua, e oa rave angaanga no matou i te evangelia o te Mesia, ei akatinamou ia kotou, e ei akapumaana ia kotou, i to kotou akarongo: 3 Kia kore rava tetai tangata kia ngaueue i teianei au mate; kua kite oki kotou uaorai e kua akonoia matou no te reira. 4 Ia matou oki i noo ia kotou na, kua akakite atea ua matou ia kotou, e e rokoia matou e te tumatetenga; e tupu atura, kua kite oki kotou. 5 No reira oki au, kare akera i tika iaku kia akakoromaki atu rai, i tono atu ei ia Timoteo, kia kite au i to kotou akarongo, ko te tapikipikiia aea kotou e taua pikikaa ra, ko te riro aea ta matou angaanga ei mea puapinga kore. 6 I teianei ra, kua oki mai a Timoteo mei ko na mai ia kotou na, e kua apai mai i te tuatua meitaki ra, ko to kotou akarongo e te aroa, e te vai marie anga o to kotou manako meitaki ia matou, kare e tivata, ma te anoano maata kia kite kotou ia matou, mei ia matou katoa nei oki kia kite atu ia kotou na; 7 No reira i pumaanaʼi matou ia kotou, e te au taeake, i to matou nei au mate katoa e te tumatetenga, no to kotou akarongo; 8 Te mou marie ra oki kotou i te Atu, te ora nei matou i reira. 9 Eaa ra oki te tu o ta matou akameitaki i te Atua ia kotou, i te rekareka maata ta matou e rekareka nei ia kotou i te aroaro o to matou Atua; 10 Ma te pure tamou tikai i te po e te ao, kia kite matou i to kotou na mata, e kia akarava oki i tei toe i to kotou akarongo? 11 E teianei kia arataki te Atua uaorai, i to tatou ra Metua, e to tatou Atu ia Iesu Mesia, ia matou ia kotou na. 12 E kia akaki mai te Atu ia kotou i te aroa, e kia maringi ua ia kotou uaorai, e te tangata katoa, mei ia matou e aroa ia kotou na: 13 Kia tinamou tikai to kotou ngakau iaia i te tapu, ma te apa kore, i mua i te aroaro o te Atua, to tatou Metua ra, kia mama mai to tatou Atu ra ko Iesu Mesia, ma te aronga tapu ravarai nona ra.
TIURAI 15-21
AU MEA UMERE I ROTO I TE PIPIRIA | 2 TESALONIA 1-3
“E Akakiteia Mai Oki Taua Tangata Ara Ra”
(2 Tesalonia 2:6-8) E teianei, kua kite kotou i te tāpu kia tae ki tona uaorai tuatau tikai e akakiteiaʼi. 7 Te angaanga ua nei rai taua kino ngaro ra i teianei; ko tei tāpu ra i teianei, ka tāpu mairai, e kia apai keia atu aia. 8 Ei reira taua Kino ra e akakiteiaʼi, ko ta te Atu ïa e rave e pou takiri atu i te aʼo o tona vaa, e e akakore takiri atu i te kakā o tona tae anga mai:
it-1 972-973
Akamori i te Atua
Teia tetai mea muna tei tuke takiri mei ta Iehova “tuatua ngaro.” Koia oki ko “taua kino ngaro ra.” E mea muna teia ki te au Kerititiano mou no te mea i te tuatau o te apotetoro ko Paulo, kare i taka meitaki tikai e koai “taua tangata ara ra.” E i muri katoa ake ka kitea mai ei teia “tangata,” kare rai te maataanga o te tangata i kite e koai aia no te mea te rave muna uaia ra tana au angaanga kino i raro i te tapoki o te ingoa o te akamorianga a te Atua. Kua akaruke aia i te akamorianga mou a te Atua. Akakite a Paulo e kua tupu ke ana “taua kino ngaro ra” i tona tuatau, no te mea te kiteia ra te au tu taitoito i roto i te putuputuanga Kerititiano te ka akatupu mai i teia pupu tangata pikikaa. I te openga, ka takoreia ratou e Iesu i te tuatau o tona tae anga mai. Teia “tangata” pikikaa ta Satani e taangaanga nei ka “akateitei rava iaia uaorai i te au mea katoa e karangaia e, e Atua, i tei akamoriia ra” (Gr., seʹba·sma). No reira e ririnui te akakeuanga pikikaa a teia enemi o te Atua e ka akapou aia i te au tangata pouroa e aru ra i tana au peu kino. I puapingaia ai “taua kino ngaro ra” no te mea kua uunaia tana au angaanga kino i raro ake i te ingoa o te akamorianga a te Atua.—2 Tesa. 2:3-12; akaaite kia Mata. 7:15, 21-23.
(2 Tesalonia 2:9-12) Ko taua Kino ra e tau tona aerenga mai i te ravenga ririnui a Satani ra, ma te mana e te akairo, e te au ravenga pikikaa tu ke ra, 10 E ma te tuatua-tika kore pikikaa katoa ra, i rotopu i te aronga e mate ra; no te mea kare ratou i āriki i te tuatua-mou ma te inangaro, kia ora ratou. 11 No reira oki te Atua e tuku mai ei i te ririnui o te pikikaa ki runga ia ratou; e e akarongo atu rai ratou i taua pikikaa ra: 12 E e ope takiri ratou i te akaapaia, i tei kore i akarongo i te tuatua-mou, i tei navenave i te tuatua-tika kore ra.
it-2 245 ¶7
Pikikaa
Akatika te Atua ko Iehova i te “ravenga ririnui a Satani” kia tupu ki te aronga tei iki kia “akarongo atu rai ratou i taua pikikaa ra” e kare e inangaro i te tuatua meitaki no runga ia Iesu Mesia. (2 Tesa. 2:9-12) Te akatutuia maira teia kaveinga i roto i tei tupu ki te Ariki o Iseraela ko Ahaba. Kua akapapu te au peroveta pikikaa kia Ahaba e ka manuia aia i te tamaki ia Ramoda-gileada, inara kua totou a Mikaia te peroveta o Iehova e ka pou ratou i te mate. Mei tei akakiteia i roto i te orama kia Mikaia, kua akatika a Iehova i tetai “vaerua pikikaa” kia tuatua na roto i te au peroveta o Ahaba. Kua taangaanga teia vaerua i tona mana ei akakeu ia ratou kia tuatua, i ta ratou uaorai e inangaro ra, e ta Ahaba e inangaro ra i te akarongo mai. Inara noatu kua akamatakiteia mai a Ahaba, kua inangaro rai aia kia akavareia e ta ratou pikikaa e kua riro atura ei mate nona.—1 Ari. 22:1-38; 2 Para. 18.
Kimi i te Mārama o te Tuatua Mou
(2 Tesalonia 1:7, 8) Kareka ia kotou i tei takinga-kinoia ra, ko te ora ïa tana e tuku mai no tatou katoa nei, kia mama mai te Atu ra ko Iesu mei te rangi mai, ma tana au angela mana katoa ra, 8 Ma te ai mura ra, i te tuku anga mai i te mate i te aronga kare i kite i te Atua, e tei kore i akarongo i te evangelia o to tatou Atu o Iesu Mesia.
it-1 834 ¶5
Ai
Kua tata a Petero e ko “te rangi e te enua e vai nei, te tāpuia nei ïa e taua tuatua ra no te ai.” Mei ta te katoaanga o te manako e te au irava turu e akakite ra, te taka ua ra e kare teia i te ai tikai mari ra te akatutu maira i te mate mutu kore. Kare te Vai Puke i te tuatau o Noa i takore ana i te rangi e te enua, mari ra ko te aronga tuatua tika kore ua, mei tera katoa me mama mai a Iesu Mesia e tana au angera ririnui mei te ai mura te tu, i te akapou takiri i te aronga akono kore i te Atua e te akatereanga kino o teia ao e noo nei ratou.—2 Pete. 3:5-7, 10-13; 2 Tesa. 1:6-10; akaaite kia Isa. 66:15, 16, 22, 24.
(2 Tesalonia 2:2) Kia kore to kotou ngakau e ngaueue vave, kia kore e poitirere, i tetai vaerua atu, e te tuatua, e te leta, mei te mea e no ko nei atu ia matou nei, i te na ko anga atu e, kua vaitata rava te rā o te Mesia ra.
it-1 1206 ¶4
Tuatua i ta te Vaerua
“Taua au Vaerua ra”—Tika e me Kare. Tuke rai te tu i taangaangaia ai te kupu pneuʹma (vaerua) i roto i tetai au tataanga a te au apotetoro. Ei akaraanaga, i roto ia 2 Tesalonia 2:2, akamaroiroi te apotetoro a Paulo i tona au taeake Tesalonia eiaa kia ngaueue me kore kia poitirere “i tetai vaerua atu [“vaerua” tikai], e te tuatua, e te leta, mei te mea e no ko nei atu ia matou nei, i te na ko anga atu e, kua vaitata rava te rā o te Mesia.” Te taka ua ra e ko te kupu pneuʹma (vaerua) ta Paulo i taangaanga, te ō maira te karangaranga anga atu i tetai “karere” me kore “leta.” Te tumu teia i karanga ai te Lange’s Commentary on the Holy Scriptures (kapi 126) no runga i teia irava e: “Te tuatua nei te Apotetoro no runga i te manako o tetai ua atu vaerua, te totou pikikaa, e te tuatua a tetai ua atu peroveta.” (Uriia e te neneiia e P. Schaff, 1976) Akakite te Vincent’s Word Studies in the New Testament e: “Na te vaerua. Na te au tuatua totou a te au tangata i roto i te au akaputuputuanga Kerititiano tei karanga e no ko i te Atua to ratou mana kia totou.” (1957, Vori. IV, kapi 63) Noatu kua taangaanga tetai au urianga Pipiria i te kupu pneuʹma ei “vaerua” i roto i teia e etai atu tataanga, i roto ra i te au urianga Pipiria a te (AT) e “karere na te Vaerua,” ta te (JB) e “totou,” ta te (D’Ostervald; Segond [French]) “tuatua i ta te vaerua” e ta te (NW) e “tuatua akauruia”
Tatau Pipiria
(2 Tesalonia 1:1-12) Paulo, e ko Siluano, e ko Timoteo, i te ekalesia i roto i te Atua ra i to tatou Metua, e te Atu oki ia Iesu Mesia, i Tesalonia: 2 Ei ia kotou te aroa ua, e te au, no ko mai i te Atua i to tatou Metua, e te Atu ra oki ia Iesu Mesia. 3 E mea tika ia matou kia akameitaki i te Atua ia kotou, e te au taeake, eiaa e tivata, e tau ïa, no te mea te tupu maata ra to kotou akarongo, e to kotou aroa ia kotou uaorai e pini ua ake, kua maata rava ïa; 4 Ko matou uaorai oki te paapaa ia kotou i te au ekalesia o te Atua, i to kotou akakoromaki, e te akarongo, i to kotou takinga-kino angaia mai, e te au mate oki tei tupu ia kotou na: 5 Ei akakite anga i te tuatua-tau tikai a te Atua, e kia karangaia kotou e aronga tau i te basileia o te Atua, no reira kotou i mate ei: 6 E mea tika ïa i te Atua kia tutaki i te aronga i mate ei kotou na i te mate: 7 Kareka ia kotou i tei takinga-kinoia ra, ko te ora ïa tana e tuku mai no tatou katoa nei, kia mama mai te Atu ra ko Iesu mei te rangi mai, ma tana au angela mana katoa ra, 8 Ma te ai mura ra, i te tuku anga mai i te mate i te aronga kare i kite i te Atua, e tei kore i akarongo i te evangelia o to tatou Atu o Iesu Mesia: 9 Ko te ka akautungaia mai ïa i te mate mutu kore mei te aroaro atu o te Atu ra, e te kakā o tona mana; 10 Kia tae ki te rā e tae mai ei aia ra, kia akakakāia aia i tona aronga tapu, e kia umereia i te aronga katoa i akarongo ra, i taua rā ra, (no te mea kua akarongoia ta matou tuatua i roto ia kotou na.) 11 I pure ei oki matou kia kotou, kare e tivata, kia akatau to tatou Atua ia kotou i taua kapiki anga nei, e kia akatupu i te inangaro i te meitaki e te au angaanga a te akarongo ma te maroiroi; 12 Kia akakakāia te ingoa o to tatou Atu ra o Iesu Mesia ia kotou, e ko kotou oki kia akakakāia iaia, i te aroa ua o to tatou Atua o te Atu ra o Iesu Mesia.
TIURAI 22-28
AU MEA UMERE I ROTO I TE PIPIRIA | 1 TIMOTEO 1-3
“Aruaru i te Rave i te Angaanga Meitaki”
(1 Timoteo 3:1) E tuatua-mou teia, kia inangaro tetai tangata i te taoonga episekopo ra, kua inangaro aia i te angaanga meitaki.
Te Kite ra Ainei Koe te Anoano Kia Tere ki Mua i te Pae Vaerua?
3 E tatau ia 1 Timoteo 3:1. Kua akameitaki te apotetoro ko Paulo i te au taeake tei “inangaro” i te riro mai ei au akaaere. Me itae tetai tangata i tetai apinga mamao, ka anoanoia aia kia tauta i te itae tikai kia rauka te reira. E akamanako ana i tetai taeake tei inangaro kia riro mai ei tavini tauturu. Kua kite aia e ka anoanoia kia tauta i te akameitaki atu i tona au tu Kerititiano. I reira, me riro mai aia ei tavini tauturu, ka angaanga pakari roa atu aia kia riro mai ei akaaere.
(1 Timoteo 3:13) Ko te aronga oki i rave meitaki ana i te taoonga diakono ra, e ngai meitaki tei rauka ia ratou, e te maroiroi maata i te akarongo i te Mesia ra ia Iesu.
km 9/78 4 ¶7
Te Aronga ‘Tei Rauka te Ngai Meitaki’
7 Mama ua i te kite e no teaa a Paulo i karanga ai e ko taua au tangata ra “e ngai metaki . . . tei rauka” ia ratou. Kare teia e akateitei atu i te taoonga o te au arataki akonoanga mei ta tetai aronga e manako ra. Mari ra no te au tavini tauturu tei “rave meitaki ana i te taoonga,” ei akapapu kia ratou i te akameitakianga a Iehova e Iesu, pera katoa te akangateitei e te turuturu a te putuputuanga. E tau rai e kua rauka ia ratou “te maroiroi maata i te akarongo i te Mesia ra ia Iesu.” Kua ārikiia ratou no to ratou tu tiratiratu e te angaanga meitaki; ngaueuekore ratou e te matutu i te akakite aere i to ratou akarongo ma te ngakau kopē kore e te mataku kore i te akakino.
Kimi i te Mārama o te Tuatua Mou
(1 Timoteo 1:4) Auraka e akono i te tuatua taeke ua, e te tui tangata openga kore, e tupu ei te māro ra, kare te maroiroi a te Atua i te akarongo ra.
it-1 914-915
Papaanga Tupuna
Te apii e te taumaro no runga i te papaanga tupuna e puapinga kore ua te reira, e mei tera katoa i to Paulo tataanga kia Timoteo. Kare e anoano akaouia kia akono i te au rekoti o te papaanga tupuna, no te mea ki te Atua, aiteite ua te ngati Iuda e te Ereni i roto i te putuputuanga Kerititiano. (Gala. 3:28) Kua akanoo takereia te rekoti o te Mesia na roto i te uanga o Davida. E kare i roa i muri ake i te tataanga a Paulo i teia tuatua i takoreia ai a Ierusalema e te au rekoti a te ngati Iuda. Kare te Atua i paruru ana i te reira. No reira a Paulo i ako ei ia Timoteo e te putuputuanga, eiaa kia kaimoumou i to ratou taime i te kimikimi i to ratou uaorai papaanga e te akamanako atu i te reira, no te mea e puapinga kore ua te reira ki to ratou akarongo Kerititiano. Kua rava ua ta te Pipiria papaanga tupuna ei akapapu mai e ko Iesu te Mesia, ko tei puapinga roa atu ïa no te au Kerititiano. Te au papaanga Pipiria ke mai e akapapuanga te reira e e tika tikai te au Tuatua Tapu e te au rekoti no te tangata i mua ana.
(1 Timoteo 1:17) E teianei, ei te Ariki au mutu kore, te mate kore, e te kitea kore kia akara ra, ei te Atua pakari okotai kore, e te kitea kore ia akara ra, ei te Atua pakari okotai kare atu, ei iaia te teitei, e te kakā, e tuatatau ua atu. Amene.
“Ina, ko to Tatou Atua Teia”
15 Ko tetai atu taoonga tei tau kia Iehova anake koia oki ko te “Ariki au mutu kore.” (1 Timoteo 1:17; Apokalupo 15:3) Eaa te aiteanga o teia? E mea ngata no to tatou manako kotinga uaia i te marama, inara e mutu kore a Iehova i roto i nga aerenga—i te tuatau i topa e te tuatau ki mua. Te akakite ra a Salamo 90:2 e: “Ko koe rai koe, e te Atua, mei tupua roa mai e tuatau ua atu.” No reira kare o Iehova akamata anga; e i vai ua ana aia. Kua tapa tikaia aia e ko “to te au rā taito ra”—i vai ua aia e tuatau ua atu i mua ake i tetai me kare i tupu mai ei tetai atu apinga ke i roto i te ao katoa e pini ua ake! (Daniela 7:9, 13, 22) Koai i reira ka tau kia uiui i tona tika anga kia riro e ko te Atu Ngateitei?
Tatau Pipiria
(1 Timoteo 2:1-15) E tamata ana au i te ako atu ia koe e, ei te akaora, te pure, te pati, e te akameitaki i te Atua, i te tangata katoa nei; 2 I te ui ariki, e te aronga mana katoa ra, kia noo kanga koreia mai tatou, ma te au, ma te akono i te Atua, e te au mea tika tikai. 3 E mea meitaki oki te reira, e te tau ki mua i te aroaro o to tatou Ora ra o te Atua; 4 Ko tei inangaro i te tangata katoatoa kia ora, e kia rauka te kite i te tuatua-mou. 5 Okotai oki Atua, okotai oki Arai i rotopu i te Atua e te tangata, ko te tangata ra ko Iesu Mesia; 6 Ko tei oronga iaia uaorai ei oko i te tangata katoa: kia akakiteia i te tuatau tika ra. 7 I akonoiaʼi au nei ei ako, e ei aposetolo, (e tuatua-mou taku i te Mesia nei, kare au i pikikaa,) ei orometua na te etene i te akarongo e te tuatua-mou. 8 E teianei ko toku ïa anoano i te au tane ra, kia pure i te au ngai katoa ra, ma te apai i te rima viivii kore ki runga, ma te riri kore, e te māro kore: 9 E te au vaine ra oki, kia akamanea ia ratou uaorai i te kakau e tau ra, ma te akatietie kore, e te akono meitaki; auraka ma te rauru iri, e te auro, e te poe, e te kakau oko maata ra; 10 Ma te tuatua meitaki ra, ko tei tau i te au vaine i mou i te akono i te Atua ra. 11 E apii te vaine ma te muteki ua e te kauraro marie. 12 Kare ra e tika iaku kia apii te vaine, e kia akateitei ki runga i te tane ra, kia muteki ua ra. 13 Ko Adamu oki tei angaia na, i muri ake a Eva. 14 Kare oki a Adamu tei vavare ana, ko te vaine ra tei vavare, ko tei araia na ïa. 15 E ora ra aia i te anau anga i te tamariki kia noo ratou ma te akarongo, e te aroa, e te tapu, ma te akono meitaki.
TIURAI 29–AUKUTE 4
AU MEA UMERE I ROTO I TE PIPIRIA | 1 TIMOTEO 4-6
“Akono i te Atua me ko te Apinga Maata”
(1 Timoteo 6:6-8) Kareka te akono i te Atua e te mareka ua ra, ko te apinga maata ïa. 7 Kare ua oki a tatou apinga i apai mai ki teianei ao; e kua kitea tikaia e kare takiri e apinga e tika kia apai katoa kia aere ke tatou nei. 8 E teianei, e kai ta tatou, e te kakau, kia mareka tatou i te reira.
Te Kite Anga i te Muna no te Mareka Ua
Ko tetai tumu maata te akatupu ra i to Paulo mataora e te merengo ua ko tona manako e te mareka ua. Inara, eaa ra te aite anga kia mareka ua? Kua akakite ngoie uaia e, ko te aiteanga kia mareka ua i te au apinga mama ua. No runga i teia, kua akakite a Paulo kia Timoteo, tona oa i roto i te angaanga orometua e: “Kareka te akono i te Atua e te mareka ua ra, ko te apinga maata ïa. Kare ua oki a tatou apinga i apai mai ki teianei ao; e kua kitea tikaia e kare takiri e apinga e tika kia apai katoa kia aere ke tatou nei. E teianei, e kai ta tatou, e te kakau, kia mareka tatou i te reira.”—1 Timoteo 6:6-8.
E akara ana e kua taokotai atu a Paulo i te mareka ua ki te akono i te Atua. Kua kite aia e te aere maira te mataora mou mei te akono i te Atua, koia oki, te tuku anga i ta tatou angaanga ki te Atua ko te ngai mua ia, e kare mei te au apinga materia ra me kare te apinganui ra. ‘E kai, e te kakau’ e ravenga uaia no te tauturu iaia kia aruaru ua atu i te akono i te Atua. No reira kia Paulo ra te muna no te mareka ua kia irinaki ki runga ia Iehova, noatu e eaa te au turanga.
(1 Timoteo 6:9) Kareka te aronga e māro e kia maata te apinga, e rokoia ïa e te timataanga, e te ereere, e te anoano neneva e manganui, e kino ei ra, e maremo takiri atu ei te tangata ki roto i te pou e te mate.
g 6/07 6 ¶2
Te Māro kia Maata te Apinga—Ta te Reira ka Akatupu Kia Koe
E tika, kare te maataanga e mate ana no tei aruaru kia maata te apinga. Inara, e mea viviki roa te tuatau i te ngaro ia ratou e varenga ra ki teia au mea. Ka riro te au taomianga o te oraanga, te ngai angaanga, te turanga o te moni ei apiapianga e kare e moe meitaki, te mamae upoko me kore te au maki ulcer—e au turanga anake teia te ka tapoto i te oraanga. Noatu me nakiro tetai e ka anoanoia aia kia taui i tona aerenga, penei kua tureti i reira. Kare tona tokorua e irinaki akaou iaia, kare te tamariki e akarongo kiaia e penei ka kino takiri tona oraanga kopapa. Noatu ka rauka kia akameitaki mai tona turanga, e aka angaanga ra. Teia aronga, kua “ko mama rava ia ratou uaorai i te iriea e manganui.”—1 Timoteo 6:10.
(1 Timoteo 6:10) Ko te anoano maata oki i te moni te tumu o te au kino katoa nei; kua taka ke rava oki tetai aronga i te akarongo nei, i te umuumu anga i te reira, e kua ko mama rava ia ratou uaorai i te iriea e manganui.
g 11/08 6 ¶4-6
E Ono Mataara e Puapingaia ai Tetai
Kua kite tatou i roto i te atikara mua, ko te aronga tei akariro e ko te aruaru i te apinga nui te mea maata e puapingaia ai tetai, e moemoea ua rai. E tu taitaia e te mamae ngakau te ka tupu. Ei akaraanga, ia ratou e aruaru ra kia rauka te apinga nui, te takino ra ratou i to ratou pirianga ki te kopu tangata e te au oa. Kare tetai pae e moe meitaki ana—no te angaanga me kore no te apiapi e te manako mirimiri ngatā. “E meitaki te moe o te tangata rave angaanga ra, iti oti, e rai oti, tana kai: no te ki kopu ra o te tangata apinga nui ra i ngere ei aia i te moe,” i akakite ei a Koheleta 5:12.
E pu kino tikai te moni e te pikikaa. Kua tuatua ana Iesu no runga i “te pikikaa o te apinga.” (Mareko 4:19) Taputou mai te reira e ka rauka te mataora, kare ra e akatupu. Ko te kaki maata ua i te apinga nui ta te reira ka akatupu. “Ko tei inangaro i te ario ra, kare ïa e mareka,” i akakite ei a Koheleta 5:10.
Te anoano maata i te moni ka riro ei manamanata e i te openga ka akatupu i te makitakita, te taitaia e penei te rave i te kino. (Maseli 28:20) Tei tau meitaki ki te tu mataora e te puapinga koia oki, ko te tu oronga ua, te tu akakore ua i te apa, te tu tiamā, te aroa e to tatou turanga akarongo.
Kimi i te Mārama o te Tuatua Mou
(1 Timoteo 4:2) No te pikikaa ra; ko te aronga i tungia to ratou akava-ngakau ki te auri vera.
Akapeea Koe te Akono Marie Anga i te Akava Ngakau Meitaki?
17 Kua tata te apotetoro a Petero e: “Ei akava-ngakau meitaki to kotou.” (1 Petero 3:16) Ko te akava ngakau mā i mua i te aroaro o Iehova, e apinga aroa manea tikai te reira. Kare i aite mei te akava ngakau o te manganui i teia tuatau. Te akataka maira a Paulo no runga i te “aronga i tungia to ratou akava-ngakau ki te auri vera.” (1 Timoteo 4:2) Mei ta teia irava e akataka maira, mei te reira rai te manganui o te tangata kare e angaanga meitaki akaou ana to ratou akava ngakau i te akamatakite mai i te tarevake, me kore i te patoi atu i te reira. Kare e kite akaou ana i te akama e kare e tataraara no te rave i te kino.
(1 Timoteo 4:13) E akamaroiroi rai i te tatau i te tuatua, e te ako, e te apii, e tae ua atu au ra,
it-2 714 ¶1-2
Tatau ki te Katoatoa
I roto i te Putuputuanga Kerititiano. I te anere mataiti mua, tokoiti ua tei tu i te au pokaikai o te Pipiria, no reira i anoanoia ai kia tatau ki te katoatoa. Kua akaue te apotetoro a Paulo kia tatauia tana au reta i ko i te au uipaanga a te putuputuanga Kerititiano e kia tatau katoaia tana au reta ki te au putuputuanga ke mai. (Kolo. 4:16; 1 Tesa. 5:27) Kua ako a Paulo i te akaaere Kerititiano ko Timoteo kia “tatau i te tuatua, e te ako, e te apii.”—1 Timo. 4:13.
Kia takataka meitaki me tatau ki te katoatoa. (Haba. 2:2) I te mea kua akakoroia te tatau ki te katoatoa ei apii, kia akamanako meitaki te tangata tatau i tana e tatau ra e kia mārama tikai i te akakoroanga o te tangata tata, kia matakite i te tu o te tatau anga eiaa e tarevake te aerenga manako. Te akakite ra a Apokalupo 1:3, e ko tei tatau, tei akarongo e tei akono i taua totou ra, ka mataora aia.
Tatau Pipiria
(1 Timoteo 4:1-16) Te tuatua pu ua maira te vaerua, e kia tae ki te au tuatau a muri atu e akaruke ei tetai papaki i tei akarongoia nei, i te akono anga atu i te au vaerua pikikaa, e te tuatua o te au demoni ra; 2 No te pikikaa ra; ko te aronga i tungia to ratou akava-ngakau ki te auri vera; 3 I te akakore anga i te akaipoipo, e auraka e kai i tetai papaki kai, i ta te Atua i anga kia kaingaia ma te akameitaki e te aronga i akarongo, e tei kite i te tuatua-mou ra. 4 E mea meitaki anake oki ta te Atua i anga, kare e e tika kia akarukeia, kia kaingaia ra ma te akameitaki i te Atua: 5 E mea akatapuia oki i te tuatua a te Atua e te pure. 6 Kia akakite atu koe i te au taeake i teianei au tuatua, ka riro koe ei tavini meitaki no Iesu Mesia, i angaiia i te tuatua i akarongoia nei, i taua tuatua meitaki taau i kite tikai na. 7 Kareka te tuatua taeke ua mako kore a te aronga vaine tangata metua ra, e akaruke atu ïa, e akamātau ua ra koe i te akono i te Atua. 8 Ko te akamātau i te kopapa nei, e puapinga mea ngiti ua to reira: kareka te akono i te Atua ra, e puapinga to te reira i te au mea katoa nei, e meitaki tei akakiteia mai to te reira i teianei ao, e te ao a muri atu. 9 Ko te tuatua-mou oki teia, e te tau oki kia āriki katoatoaia. 10 No reira oki tatou nei i roiroi ei, e i akakoromaki ei i te akakino, no te mea te irinaki nei tatou i te Atua ora ra, i te Ora o te tangata katoa nei, e maata atura i te aronga i akarongo. 11 E akaue ua atu, e e apii ua atu, i teianei au tuatua. 12 Auraka rava e tangata e akavaavaa mai i toou ou anga ra, ei akaraanga ra koe na tei akarongo ra, i te tuatua, i te aerenga, i te aroa, i te tu o te ngakau ra, i te akarongo ra, i te viivii kore. 13 E akamaroiroi rai i te tatau i te tuatua, e te ako, e te apii, e tae ua atu au ra, 14 Auraka e vaoo uaia tei orongaia mai e te vaerua i roto ia koe na; i orongaia mai ia koe ma te totou ra, e te tuku katoa anga i te rima o te au aronga orometua ki rungao ia koe. 15 Ka akamanako tikai i teianei au tuatua; ko taau ïa e rave auraka e tivata; kia kite te tangata katoa i te tupu anga o toou kite. 16 Kia matakite ia koe, e taau e apii ra; e tamou tika rai i te reira: tei te akapera oki e oraʼi koe, e te aronga katoa e akarongo mai ia koe ra.