Tauturu i te Aronga Apii Pipiria Kia Tavini ia Iehova

1-2. (a) Eaa tetai aronga apii Pipiria i ekoko ei i te tavini ia Iehova? (e) Eaa ta tatou ka uriuri i roto i teia atikara?

E APINGA ainei tetai tei tamanata ia koe kia riro ei Kite no Iehova? Penei kua mataku koe ka riri toou au oa angaanga, au taeake e toou ngutuare tangata me riro koe ei Kite no Iehova. Me kore penei kare e rauka ia koe i te aru i ta Iehova au apiianga. Me ko te reira, ka mārama koe i te tumu i ekoko ei i tetai kia riro ei Kite no Iehova.

² Kua kite a Iesu e ka tāpu teia au mea i tetai tangata kia tavini ia Iehova. (Mata. 13:​20-22) Inara, ka tauturu ua rai aia i te aronga tei ekoko kia aru iaia. Kua akaari a Iesu ki tana au pipi akapeea me tauturu ia ratou kia (1) kite i te au manamanata ka na roto ratou, (2) akaari i to ratou akaperepere ia Iehova, (3) akatanotano i to ratou au turanga, e te (4) kia autu i te au manamanata. Akapeea tatou me aru i te apii a Iesu me taangaanga i te puka Oraanga Mataora e Tuatau Ua Atu! ei tauturu i tetai tangata apii Pipiria kia tavini ia Iehova?

TAUTURU IAIA KIA KITE I TE AU MANAMANATA KA NA ROTO AIA

3. Eaa i ngatā ei ia Nikodemo i te aru ia Iesu?

³ E tutara puapinga a Nikodemo no te ngati Iuda inara, kua ngatā iaia i te aru ia Iesu. E ono marama te tutu aere anga a Iesu, kua kite a Nikodemo e ko Iesu te Mesia. (Ioa. 3:​1, 2) Inara, kua inangaro a Nikodemo i te aravei ia Iesu i roto i te poiri no tona “mataku i te ngati Iuda.” (Ioa. 7:13; 12:42) Penei kua manako aia e maata tana au apinga ka akaruke me riro mai aia ei pipi na Iesu.a

4. Akapeea a Iesu te tauturu anga ia Nikodemo kia mārama eaa ta Iehova e inangaro maira iaia kia rave?

⁴ Kua kite a Nikodemo i te ture a Mose inara, kua anoano aia i te tauturu kia mārama eaa ta Iehova e inangaro maira iaia kia rave. Akapeea a Iesu te tauturu anga iaia? Kua oronga a Iesu i tona taime i te aravei ia Nikodemo i te po. Kua akataka meitaki a Iesu eaa ta Nikodemo ka rave kia riro mai ei pipi, kia tataraara i tana ara, kia papetito i roto i te vai e kia rauka te akarongo i roto i te Tamaiti a te Atua.—Ioa. 3:​5, 14-21.

5. Akapeea tatou me tauturu i te tangata apii Pipiria kia kite eaa te tāpupu ra iaia?

⁵ Noatu kua kite meitaki tetai tangata apii Pipiria i te au Irava, penei ka tauturu tatou iaia kia kite eaa te tāpupu ra iaia. Ei akaraanga, penei ka pou tona taime i te angaanga e ka patoi te ngutuare iaia kia kore e riro ei Kite no Iehova. Mei ia Iesu, e oronga i toou taime no te tauturu iaia. Penei ka pati koe iaia ki te kainga no te kaikai me kore ki tetai tamataoraanga. Me rave korua i teia, ka māmā ua iaia i te akakite mai i tona au manamanata. No reira, e akamaroiroi i taau tangata apii Pipiria kia rave i te au tauianga, kare kia akamareka ia koe, mari ra kia akaari i tona akaperepere ia Iehova.

6. Akapeea koe me tauturu i te tangata apii Pipiria kia taangaanga i tana e apii ra? (1 Korinetia 16:13)

⁶ Me papu i taau tangata apii Pipiria e ka tauturu a Iehova iaia kia rave i te mea tika, ka akamaroiroiia aia kia taangaanga i tana e apii ra. (E tatau ia 1 Korinetia 16:13.) Ka akaaiteia taau apainga mei tetai puapii. Koai toou puapii i reka ana koe i toou taime i te apii? Penei ko te puapii tei irinaki e ka rauka ia koe i te rave i te reira. Mei tera katoa, ka apii tetai puapii meitaki i ta te Atua ka inangaro i tana tangata apii Pipiria kia rave e kia akapapu e ka tauturu a Iehova iaia kia taui i tona oraanga. Akapeea koe me rave i te reira?

TAUTURU IAIA KIA AKAPEREPERE IA IEHOVA

7. Akapeea a Iesu me tauturu i te aronga e akarongo ra kiaia kia akaperepere ia Iehova?

⁷ Kua kite a Iesu e ka akakeu te inangaro i te Atua, i tana au pipi kia taangaanga i ta ratou e apii ra. Kua apii aia ia ratou kia akaperepere i to ratou Metua i te rangi. Ei akaraanga, kua akaaite aia ia Iehova ki tetai tei oronga i te au mea meitaki ki tana tamariki. (Mata. 7:​9-11) Tetai pae aronga e akarongo ra kia Iesu, penei kare to ratou metua i aroa ana ia ratou. Akamanako ana te akarongo anga ratou i ta Iesu akatutuanga no tetai metua aroa tei āriki akaou mai i tana tamaiti rave kino, kua oro aia i te aravei atu iaia. No reira, te kite ra ratou i to Iehova akaperepere i tana au tamariki i te enua nei.—Luka 15:​20-24.

8. Akapeea koe me tauturu i te tangata apii Pipiria kia akaperepere ia Iehova?

⁸ Ka rauka katoa ia koe i te tauturu i tetai tangata apii Pipiria kia akaperepere ia Iehova na te apii anga i Tona au tu manea. Ia korua e apii ra, e akamārama i tana e apii ra e te akaperepere ra a Iehova ia tatou. Me uriuri korua no runga i te atinga oko o Iesu, akaari kiaia i te puapinga o te reira. (Roma 5:8; 1 Ioa. 4:10) Ka akakeuia te tangata apii Pipiria kia inangaro ia Iehova, me akamanako aia ki runga i to Iehova akaperepere maata iaia.—Gala. 2:20.

9. Eaa tei tauturu ia Michael kia rave i te au tauianga i roto i tona oraanga?

⁹ Akamanako ana ia Michael, mei Indonesia mai. Kua tupu aia i roto i te tuatua mou, inara kare aia i papetito. E 18 ona mataiti, kua aere aia ki tetai enua ke no te angaanga ei tangata akaoro toroka. I muri mai kua akaipoipo aia, inara kua akaruke aia i tona ngutuare tangata no te angaanga i tetai enua mamao. I te reira taime, kua apii tana vaine e te tamaine i te Pipiria e kua taangaanga i ta raua i apii. Te mate anga tona metua vaine, kua oki a Michael i te akono i tona metua tane e kua āriki i te apii Pipiria. Te akamanako anga i te tuanga “Kimi Oonu” i roto i te apii 27 o te puka Oraanga Mataora e Tuatau Ua Atu!, kua pakia te ngakau o Michael. Kua aue aia no to Iehova mamae te mate anga Tana Tamaiti. Te kite anga i to Iehova e to Iesu inangaro iaia, kua mareka tikai aia, kua rave aia i te au tauianga e kua papetito.

TAUTURU IAIA KIA AKATANOTANO I TONA AU TURANGA

10. Akapeea a Iesu te tauturu anga i tana au pipi mua kia akatanotano i to ratou turanga? (Luka 5:​5-11) (Akara katoa i te tutu.)

¹⁰ Kua kite te au pipi mua e ko Iesu te Mesia Taputouia, inara kua anoanoia ratou kia tuku i te angaanga tutu aere ei mea puapinga. E pipi takere a Petero e Anederea, te patianga a Iesu kia aru raua iaia e kia tavini tamou. (Mata. 4:​18, 19) Kapiti mai kia Iakobo e Ioane, e angaanga tautai ta ratou e kua puapingaia te reira. (Mare. 1:​16-20) Te akaruke anga a Petero e Anederea i ta raua angaanga tautai, kua akapapu katoa raua kia akonoia to raua ngutuare tangata. Eaa tei akakeu ia raua kia akatanotano i to raua turanga? Akakite maira a Luka e kua rave a Iesu i te semeio ei akapapu e ka akono ua rai a Iehova ia ratou.—E tatau ia Luka 5:​5-11.

11. Akapeea to tatou akaraanga me akaketaketa i te akarongo o tetai tangata apii Pipiria?

¹¹ Kare e rauka ia tatou i te rave i te au semeio mei ia Iesu rai, inara e akakitekite i ta Iehova tauturu me tuku Iaia na mua i roto i to tatou oraanga. Ei akaraanga, te maara ra ainei ia koe ta Iehova tauturu te akamata anga koe i te aere ki te au uipaanga? Penei ka anoanoia koe kia akamārama ki toou pu angaanga, kare e rauka ia koe i te angaanga i te au rā o te uipaanga. No reira e akakite ki taau tangata apii Pipiria, akapeea a Iehova te akameitaki anga ia koe te tavini Iaia.

12. (a) Eaa tatou ka pati ei i tetai taeake e te tuaine ki te apii Pipiria? (e) Akapeea koe me taangaanga i te au vitio ki taau tangata apii Pipiria? Oronga mai i tetai akaraanga.

¹² Ka puapinga katoaia taau tangata apii Pipiria me akarongo aia akapeea tetai au Kerititiano te akatanotano anga i to ratou turanga. No reira, e pati i tetai au taeake e te au tuaine mei te au enua tukeke kia piri mai ki taau apii Pipiria. E ui akapeea ratou i kite ei e ko te tuatua mou teia e eaa ta ratou i rave no te tavini ua rai ia Iehova. E akara kapiti i te au vitio mei roto i te tuanga “Kimi Oonu” e te “Kimi Kimi” o te puka Oraanga Mataora e Tuatau Ua Atu! Ei akaraanga, me uriuri korua i te apii 37, e akataka i te au kaveinga mei roto i te vitio Ka Akono a Iehova i to Tatou au Anoano.

TAUTURU IAIA KIA AUTU I TE AU MANAMANATA

13. Akapeea a Iesu te akamatakite anga i tana au pipi me patoiia mai ratou?

¹³ Kua akakite a Iesu ki tana au pipi e ka takinokinoia ratou e tetai ke e te kopu tangata. (Mata. 5:11; 10:​22, 36) I mua ake ka mate ei a Iesu, kua akamatakite aia i tana au pipi e ka tamate katoaia ratou no te akamori ia Iehova. (Mata. 24:9; Ioa. 15:20; 16:2) Kua akaue aia kia vai teateamamao ua ratou me tutu aere. Ei akaraanga, akakite aia kia ratou e auraka e marō atu i te aronga tei patoi e kia matakite i ta ratou au tuatua e ta ratou ka rave.

14. Akapeea tatou me tauturu i te aronga apii Pipiria kia akapapa me patoiia mai ratou? (2 Timoteo 3:12)

¹⁴ Mei ia Iesu, ka akamārama tatou ki te tangata apii Pipiria i ta tetai au oa angaanga, au oa e te au ngutuare tangata ka tuatua me kore ka rave no tei apii aia i te Pipiria. (E tatau ia 2 Timoteo 3:12.) Ka aviri tetai au oa angaanga iaia. Ka akaapa tetai pae e tetai o tona ngutuare tangata no tana e apii ra. No reira, e mea meitaki kia pukapuka korua akapeea me paruru i te tuatua mou me patoiia aia. Me tupu teia, kare te tangata apii Pipiria e mataku, ka kite aia eaa tana ka tuatua e ka rave me patoiia aia.

15. Eaa te ka tauturu i te tangata apii Pipiria kia akakoromaki me patoi mai te ngutuare tangata?

¹⁵ Me patoi mai te ngutuare tangata, e akamaroiroi i taau tangata apii Pipiria kia kite i te tumu i riri ei ratou iaia. Penei kua manako ratou e te pikikaaia ra aia, me kore kare ratou e reka ana i te Au Kite o Iehova. Kua akakino katoaia a Iesu e tona ngutuare tangata. (Mare. 3:21; Ioa. 7:5) No reira, e tauturu i taau tangata apii Pipiria kia akakoromaki e kia tuatua marū ki tetai ke e pera te ngutuare tangata.

16. Akapeea tatou me tauturu i te tangata apii Pipiria kia akamārama i tana irinakianga?

¹⁶ Me inangaro te ngutuare tangata i te kite maata atu no runga i te Pipiria, kare te tangata apii Pipiria e akakite pouroa i tana i kite. No te mea, ka apiapi te ngutuare tangata e kare e inangaro i te pukapuka akaou. No reira, e akamaroiroi i taau tangata apii Pipiria kia akamārama i tona irinakianga e kia pukapuka akaou a te tuatau ki mua. (Kolo. 4:6) Penei e pati ia ratou kia aere ki runga i te jw.org. I reira, ka kite maata atu ratou no te Au Kite o Iehova i te ora tei tau kia ratou.

17. Akapeea koe me tauturu i te tangata apii Pipiria kia akapapa me ui mai tetai ke no runga i te Au Kite o Iehova? (Akara katoa i te tutu.)

¹⁷ Penei e taangaanga i te “Au Uianga a te Tangata” i runga i te jw.org, ei tauturu i taau tangata apii Pipiria kia akapapa i tetai au pauanga māmā me ui mai tona ngutuare tangata me kore te au oa angaanga. (2 Timo. 2:​24, 25) I te openga o te apii, e uriuri i te tuanga “Karanga te Tangata” o te puka Oraanga Mataora e Tuatau Ua Atu! E apii iaia akapeea me akamārama i tana e irinaki ra ki te tangata. E tauturu katoa iaia kia akameitaki atu i tana ka tuatua. Ka riro te reira ei paruru i tona irinakianga.

18. Akapeea koe me tauturu i te tangata apii Pipiria kia riro mai ei papuritia? (Mataio 10:27)

¹⁸ Kua akaue a Iesu i tana au pipi kia akakite aere i te nuti meitaki. (E tatau ia Mataio 10:27.) Me akamata te tangata apii i te tutu aere, ka kite aia i ta Iehova tauturu e ka irinaki kia Iehova. Akapeea koe me tauturu iaia kia akono i tana akakoroanga? Me akakiteia tetai porokaramu tutu aere i roto i te putuputuanga, e akamaroiroi iaia kia akamanako eaa tana ka rave kia riro mai ei papuritia. E akamārama i te tumu i inangaro ei tetai pae i te tutu aere i tera tuatau. Ka puapinga katoaia aia me oronga i tetai ako i te au uipaanga epetoma. Me rave aia i teia, ka māmā ua iaia i te akakite i tona irinakianga.

E IRINAKI E KA AKAMAREKA AIA IA IEHOVA

19. Eaa a Iesu i papu ei ka aru tana au pipi iaia, e akapeea tatou me aru i tona akaraanga?

¹⁹ I mua ake ka aere ei a Iesu ki te rangi, kua akakite aia ki tana au pipi e ka taokotai akaou ratou. Kare ratou i mārama i ta Iesu tuatua e ka aere ratou ki te rangi. Kua akamou aia ki runga i to ratou tu tiratiratu, kare i to ratou manako ekoko. (Ioa. 14:​1-5, 8) Kite aia e ka anoanoia te tuatau kia mārama ratou e ka aere ratou ki te rangi. (Ioa. 16:12) Mei ia Iesu, ka akakite tatou ki te aronga apii Pipiria e ka rauka katoa ia ratou i te akamareka ia Iehova.

20. Eaa i papu ei i te tuaine i Malawi e ka rave te tangata apii Pipiria i te tika?

²⁰ Mea papu ka inangaro te tangata apii Pipiria i te rave i te tika. Ei akaraanga, tetai tuaine ko Chifundo e noo ra i Malawi. Kua apii aia i te Pipiria ki tetai vaine Katorika ko Alinafe i roto i te puka Oraanga Mataora e Tuatau Ua Atu! Ia raua e uriuri ra i te apii 14, kua ui a Chifundo eaa tona manako no te akamori itoro. Kua pau riri a Alinafe, “Naku rai tera ikianga!” Manako a Chifundo e ka akamutu ta raua apii Pipiria. Noatu ra, kua apii ua atu raua e penei ka kite a Alinafe kua tarevake te akamorianga itoro. I muri mai, kua ui a Chifundo i te uianga o te apii 34: “Kua puapingaia ainei koe mei taau apii i te Pipiria e te Atua mou ko Iehova?” Akakite a Chifundo i ta Alinafe pauanga, “E maata tana au apii i kite mai, tetai kare te Au Kite e rave ana i te au peu ta te Pipiria e karanga ra e tarevake.” Tei tupu, kua akamutu a Alinafe i te akamori i te au itoro e kua papetito aia.

21. Akapeea tatou me tauturu i te tangata apii Pipiria kia tavini ia Iehova?

²¹ Noatu na Iehova e “akatupu” i te ua, ka rauka ia tatou i te tauturu i te aronga apii Pipiria kia tere ki mua i te pae vaerua. (1 Kori. 3:7) E maata atu ta tatou ka apii kiaia i ta te Atua e anoano maira kia rave aia. Ka tauturu tatou iaia kia akaperepere ia Iehova. Ka akaari aia i tona inangaro na te akatanotanoanga i tona au turanga. E ka apii tatou iaia kia irinaki ia Iehova me patoi tetai ke iaia. Me akakite tatou ki te tangata apii Pipiria e ka rauka iaia i te akamareka ia Iehova, te tauturu ra tatou iaia kia tavini ia Iehova.