Ako Pakari no te Mata
● E apinga manea tikai te mata tangata. E maata atu ra te o maira i to te tu manea ua. E ririnui katoa te reira. Te karanga ra te puka Visual Impact, Visual Teaching e “e a ngauru patene o te au uaua katoatoa o te roro, te tukati ra ki te retina,” e kau angiangi e auaro ra i a roto i te mata.
Kua tau rai kia kapiki a Iesu Karaiti i te mata e, ko ‘te mārama o te kopapa.’ Te akamarama mai anga i tana tuatua, kua akakite aia e: “Te meitaki ra to mata [taka meitaki, te akamou ra ki runga i te mea meitaki], kua mārama ïa to kopapa katoa: Kia kino ra toou mata, ka poiri ïa to kopapa katoa.” (Mataio 6:22, 23) Na roto i teia au tuatua, te akamaara maira a Iesu ia tatou i te ririnui o te mata, na roto i te tuatua akatutu, ei akakeu i te manako, manako ngakau, e ta tatou au angaanga. Ka riro te au manako meitaki ei marama no te oraanga o te tangata; ka akapoiri ra te au manako kino i te reira.
Ei akaraanga, akamanako ana i ta Iesu au tuatua i roto ia Mataio 5:28, 29 e: “Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau. E te pekapeka na koe i toou mata katau, e koiti [i na te tuatua akatutu ei].” Eaa te aiteanga o tana tuatua? Ka akatupu te mata koka aere i te au anoano tika kore, me rauka ana tetai atianga, penei ka rave tetai i te angaanga tau kore e ka ngere i te akaperepereanga a te Atua.—Iakobo 1:14, 15.
E meitaki atu i te akakoromaki, noatu e aite rai te ngata mei te koiti anga i te mata ki vao! E puapinga ainei te ka rauka i te akaatinga i te oraanga mutu kore no te navenave poto ua nei?
Ta tatou ka akara ka akatupu katoa i te noinoi. No reira te Pipiria i akamatakite mai ei ia tatou e ‘kare te anoano tika kore o te mata nei, i to ko mai i te Metua ra, no teianei ao anake ïa. Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.’—1 Ioane 2:16, 17.
E maata roa ainei te arairaianga a te Pipiria? Kare! Me kopaeia te au kaveinga Pipiria ka tupu mai te au manamanata e kare e mataora. (Galatia 6:7, 8) Me aruia ra te Tuatua a te Atua, e tana ako pakari no ta tatou ka akara, ka tupu te mataora. ‘Ko tei akarongo i te tuatua a te Atua e kua akono atura, ko ratou tei mataora,’ i akakite ei a Iesu. (Luka 11:28) Tei maata atu, ka rauka ia ratou te manakonakoanga kia noo tamou e tuatau ua atu i te enua nei, te aronga ra e mata tau kore to ratou me kore e mata noinoi ka ngere ratou i te mataora e te ora.