Na roto i toou tu ketaketa, kare rava koe e inga
AU MAPU
9 Toou Tu
EAA TE AITEANGA
E maata atu te ō maira no te akataka anga i toou tu, i te pae mai i toou ingoa e toou tutu mata. Ka kapiti mai toou tu tau, toou irinakianga, e toou tu ei tangata. Pouroa teia, kua riro ei akataka anga e koai koe.
EAA I PUAPINGA AI
Me papu ia koe toou tu, ka paruru koe i toou irinakianga e kare koe e akatika i toou au oa kia akavare ia koe.
“Maata te tangata kua aite ratou ki te au apinga tei akakakauia i roto i te are toa. Kare ratou e iki i ta ratou ka aao, mari ra na tetai ke.”—Adrian.
“Kua rauka iaku i te iki i te au mea tau noatu te ngata. Kua kite au koai ma toku au oa mou, na roto i to ratou tu kiaku e toku tu kia ratou.”—Courtney.
KAVEINGA PIPIRIA: “Eiaa e akatau atu i teianei ao: ei tu ke ra to kotou i te akaou anga o to kotou ngakau.”—Roma 12:2.
TAAU KA RAVE
E akara i toou tu i teianei, e taau ka inangaro kia riro mai na te akamanako meitaki i toou tu maroiroi, toou tu paruparu e toou irinakianga. Ei akamata, e pau i teia au uianga.
Toou Maroiroi: Eaa ra toku au tu karape e te kite? Eaa toku turanga maroiroi? (Ei akaraanga: E tangata tae vave ana au ki tetai ngai? akaari ana au i te tu akono? maroiroi ana au i te angaanga? e te oronga ua?) Eaa te au angaanga meitaki taku e rave ana me kore i tuatua ana?
RAVE I TEIA: E ngata ainei ia koe i te akamaara i te au angaanga meitaki taau i rave? E ui ki toou nga metua me kore ki toou oa mou eaa te au tu maroiroi ta ratou i kite i roto ia koe, e no teaa ra.
KAVEINGA PIPIRIA: “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke.”—Galatia 6:4.
Tu paruparu: Eaa te au ngai paruparu o toku tu ka anoanoia au kia akatanotano? Eaa te au mea ka timata iaku? Akapeea au me akaari maata i te akakoromaki?
KAVEINGA PIPIRIA: “Kia karanga tatou e kare a tatou ara, te pikikaa nei tatou ia tatou uaorai.”—1 Ioa. 1:8.
Toku irinakianga: Eaa te turanga ngateitei e aru ana au, e eaa te tumu? E irinaki ana au i te Atua? Eaa te au mea taku e kite nei tei akapapu e e Atua tetai? Eaa te au angaanga taku i manako e e mea tau kore, e no teaa ra? Eaa toku irinakianga no te tuatau ki mua?
KAVEINGA PIPIRIA: “Na te akono meitaki e tapapa ia koe i reira; e na te kite e tiaki ia koe.”—Maseli 2:11.