Te Au Kerititiano​—Kia Mataora e Koai Kotou!

‘Ko tei akatietie ra, kia akatietie aia ia Iehova.’​—1 KORINETIA 1:31, akaaite ia NW.

1. Eaa te turanga e kiteaia ra i roto i te tu o te tangata ki te akonoanga?

“TU MANAKO KORE.” Kare i roa akenei kua taangaanga tetai vaa tuatua no te au akakoroanga akonoanga i taua tuatua ra i te akataka mai i te tu o te tangata e manganui ki to ratou akarongo. Kua akamarama aia e: “Kare te turanga maata roa atu i roto i te akonoanga i teia tuatau i te akonoanga tikai​—e tu ra te reira te tau meitaki ra kia akatakaia e e ‘tu manako kore.’” I te akamaata atu anga, kua akataka aia e ko te tu manako kore e “tu inangaro kore i te kea atu no runga i ta tetai uaorai akonoanga.” Kua akakite aia e, e maata te tangata, e “irinaki ra i roto i te Atua . . . ; kare ua ra oki ratou e kea atu ana no runga iaia.”

2. (a) Eaa i kore ei i te mea poitirere e te noo manako kore ua ra te tangata i te pae vaerua? (e) Eaa te kino ta te tu kare e kea atu ka akatupu ki te au Kerititiano mou?

² Kare teia tauianga ki te tu manako kore i te mea poitirere ki te aronga apiipii i te Pipiria. (Luka 18:8) E no runga i te akonoanga, te tapapaia atu nei rai taua tu inangaro kore ra. Kua roa akenei te akonoanga pikikaa i te akavare anga e te akataitaia anga i te tangata nei. (Apokalupo 17:15, 16) No te au Kerititiano tika tikai, ra, ka riro te tu tae kore o te ngakau e te ngere i te maroiroi e totoa ua nei ei kino. Ka rokoia tatou e te kino me kare tatou e kea atu no runga i to tatou akarongo e me kore to tatou maroiroi i te tavini i te Atua e no te tuatua mou o te Pipiria. Kua akamatakite mai a Iesu no runga i taua tu pumaana ra i tona akamatakite anga i te au Kerititiano i te anere mataiti mua e noo ra i Laodikea: “Kare koe i anu, kare oki i maana: naringa koe i anu, e kare ïa, kia maana, ko taku ïa e tika. . . . Te pumaana ua na koe.”​—Apokalupo 3:15-18.

Kite Anga e Koai Tatou

3. I roto i teea au tu o to ratou akatakaanga e rauka ai i te au Kerititiano kia mataora?

³ Kia tamaki atu i te tu manako kore i te pae vaerua, ka anoanoia te au Kerititiano kia marama meitaki e koai ratou, e kia mataora tikai ratou i to ratou akatakaanga takake. Ei au tavini no Iehova e ei au pipi na Karaiti, ka kite tatou i roto i te au akatakaanga a te Pipiria e koai tatou. E “kite” tatou no Iehova, ‘e oa rave angaanga no te Atua,’ ia tatou e akakite maroiroi ra i te “tuatua meitaki” ki etai ke. (Isaia 43:10; 1 Korinetia 3:9; Mataio 24:14, NW) E iti tangata ‘aroa tatou ia tatou uaorai.’ (Ioane 13:34) Ko te au Kerititiano mou e aronga ia tei “mātau i kite ei to ratou ngakau i te meitaki e te kino.” (Ebera 5:14) Te ‘kakā ra tatou ei rama i teianei ao.’ (Philipi 2:15) Te tauta nei tatou “kia meitaki ta [tatou] tuatua i rotopu i te au etene.”​—1 Petero 2:12; 2 Petero 3:11, 14.

4. Akapeea te tangata akamori ia Iehova i te iki anga e eaa te mea kare aia i te reira?

⁴ Kua kite katoa te aronga akamori mou ia Iehova e eaa te mea kare ratou i te reira. “Kare ratou i to teianei ao,” mei to ratou Arataki, mei ia Iesu Karaiti, kare i to teianei ao. (Ioane 17:16) Te noo takake maira ratou mei “tetai papaki etene,” tei “manako akapoiriia, e te taka ke i te ora a te Atua ra.” (Ephesia 4:17, 18) Tei tupu, ki te au pipi a Iesu kua ‘kopae te au pipi a Iesu i te akono kore i te Atua, e te anoano o teianei ao, kia noo ma te tau meitaki, te tuatua-tika, e te akono i te Atua, i teianei ao.’​—Tito 2:12.

5. Eaa te aiteanga o te akoanga e ‘kia akatietie ia Iehova’?

⁵ Te marama taka meitaki anga tatou i to tatou akatakaanga takake e to tatou pirianga ki te Tutara Ngateitei o te ao katoa nei e pini ua ake te akakeu ra ia tatou ‘kia akatietie ia Iehova.’ (1 Korinetia 1:31) Eaa ra taua tu akatietieanga? Ei au Kerititiano mou, te mataora nei tatou e ko Iehova to tatou Atua. Te aru nei tatou i te akoanga e: “Ko tei akatietie ra, teia tana e akatietie, koia i kite, e kua kite tikai aia iaku nei e, ko Iehova au, ko tei rave i te takinga-meitaki, te tuatua-tau, e te tuatua-tika, ki runga i te enua nei: ko taku ïa au mea inangaro, te tuatua mairā Iehova.” (Ieremia 9:24) Te “akatietie” nei tatou i te akameitakianga no te kite anga i te Atua e no te taangaangaia nei e ia ei tauturu i etai ke.

Te Akaaoanga

6. Eaa ra i riro ei ei akaaoanga no tetai papaki i te tamou marie i te manako papu no to ratou akatakaanga ei au Kerititiano?

⁶ E tika ua ra e, kare te tamou marie anga i te manako papu no to tatou akatakaanga takake ei au Kerititiano i te mea ngoie. Kua akamaara tetai tamaiti mapu tei utuutuia ei Kerititiano e i tetai taime kua kite ana aia i te tu apikepike i te pae vaerua: “I tetai au taime, e manako ana au e kare au i kite eaa au i riro mai ei e ko tetai o te Au Kite o Iehova. Kua kite au i te tuatua mou mei toku varevareanga mai. Tetai au taime e manako ana au e ko teia tetai o te au akonoanga tumu arikiia.” Penei kua akatika etai kia akakeuia to ratou akatakaanga e te ao tamataora, te akakitekite nuti maata, e e te manakonakoanga no te oraanga akono kore i te Atua i teianei. (Ephesia 2:2, 3) Penei i tetai au taime ka na roto tetai au Kerititiano i te au tuatau ekoko uaorai e te akamanako akaou anga i to ratou au puapinga e te au akakoroanga.

7. (a) Eaa te tu akara matatio anga uaorai ka tau no te au tavini o te Atua? (e) Teiea te ngai e vai ua ra te kino?

⁷ E tarevake ainei te akara matatio meitaki ia koe uaorai? Kare. Me te maara ra ia koe e kua akamaroiroi te apotetoro ko Paulo i te au Kerititiano kia akara matatio ia ratou uaorai: “E kimi matatio ia kotou uaorai i to kotou akarongo; e akara matariki ia kotou uaorai.” (2 Korinetia 13:5) Te akamaroiroi maira te apotetoro i te tautaanga tau kia kite i tetai ua atu au tu apikepike pae vaerua tei tupu mai, ma te akakoro kia rave i te au takainga tau i te akatano atu i te reira. I te kimi matatio anga e me tei roto rai aia i te akarongo, kia iki te Kerititiano e me te rotai ra tana au tuatua e te au angaanga ki tana e aaki ra e te irinaki ra. Inara, me kua tarurikeia, ka puapinga kore ua te akara matatio uaorai e akakeu ra ia tatou kia kimi i to tatou “akatakaanga” me kore kia kimi i te au pauanga i vao ake i to tatou pirianga ma Iehova me kore ki te putuputuanga Kerititiano e ka akatupu i te kino pae vaerua.a Kare roa tatou e inangaro ‘kia tupu te akangaa pai anga ki to tatou akarongo’!​—1 Timoteo 1:19.

Kare Tatou i Takake Mai Mei te Au Akaaoanga

8, 9. (a) Akapeea a Mose i te akakite anga i tona manako ekoko uaorai? (e) Akapeea a Iehova i te pau anga i te au manako emiemi o Mose? (nga) Akapeea te au akapumaanaanga a Iehova i te akakeu anga ia koe?

⁸ Ka tau ainei te au Kerititiano e kite ra i te ekoko uaorai i tetai au taime kia manako e kua puapinga kore ratou? Kare rava! E tikai, ka rauka ia koe te pumaana i te kite anga e kare taua au manako ra i te mea ou. Kua kite ana te au tavini tiratiratu o te Atua i te au tuatau i topa i te reira. Akamanako ana, ei akaraanga, ia Mose, tei akaari i te akarongo takake, te tu tiratiratu, e te tu akono i te Atua. I te tuku angaia tetai angaanga akara anga ngata, kua ui a Mose ma te emiemi tikai e: “Koai oki au?” (Exodo 3:11) I te akaraanga, ko te pauanga i roto i tona manako koia oki, ‘E tangata puapinga kore ua au!’ me kore ‘Kare e rauka iaku!’ Penei na tetai au tu o to Mose oraanga i akakeu iaia kia manako tukatau kore: No roto mai oki aia i tetai iti tangata tuikaa. Kua kopaeia ana aia e te ngati Iseraela. Kare aia i te tangata vaa tukatau. (Exodo 1:13, 14; 2:11-14; 4:10) E tangata tiaki mamoe oki aia, e ngai angaanga akaviiviiia e to Aiphiti. (Genese 46:34) No reira rai aia i manako ei e kare aia e tau ei akaora no te iti tangata akatuikaaia o te Atua

⁹ Kua akapumaana atura Iehova ia Mose na te oronga anga e rua nga taputou puapinga maata: “Ei vaitata katoa ïa au ia koe; e teia taau akairo, e kua tonokia koe e au: Kia ope te au tangata i te aratakiia mai e koe mei Aiphiti mai, ei runga tikai i teianei maunga kotou e akamori ei i te Atua.” (Exodo 3:12) Te akakite ra te Atua ki tona tavini emiemi e ei vaitata ua rai Aia iaia. Kapiti katoa atu, te akakite ra a Iehova e kare aia e poka i te akaora i tona iti tangata. Na roto i te au anere mataiti i aereia, kua oronga te Atua i te au taputou mei te reira rai ei turuturu anga. Ei akatauanga, kua tuatua aia na roto ia Mose ki te iti tangata ngati Iseraela e vaitata ra ratou i te tomo ki te Enua Taputouia: “Kia ketaketa, e kia maroiroi roa, . . . ko to Atua oki ko Iehova, koia uaorai te aere katoa nei i vaitata ia koe; kare aia e akaruke ia koe, kare e taka ke ia koe.” (Deuteronomi 31:6) Kua akapumaana katoa a Iehova ia Iosua: “Kare rava e tangata e mou ki mua i to aroaro i toou au rā katoa i te ora anga na; . . . . ei vaitatao oki au ia koe: kare rava oki au e akaruke atu ia koe, kare oki e taka ke ia koe.” (Iosua 1:5) E kua taputou aia ki te au Kerititiano e: “Kare rava au e akaruke atu ia koe, kare oki au e taka ke ia koe, kare, kare rava atu.” (Ebera 13:5) Tikaanga ka akangakau parau tikai taua tu turuanga ra ia tatou ei au Kerititiano!

10, 11. Akapeea te ngati Levi ko Asapha i te tauturu angaia kia tamou marie i te tu tau ki te puapinga o tana tavinianga ia Iehova?

¹⁰ Mei te rima anere mataiti i muri ake ia Mose, kua tata tika tikai te ngati Levi tiratiratu ko Asapha no runga i tona au manako ekoko i te puapinga o te aruaru anga i te arataa tiratiratu. Iaia e tauta ra i te tavini i te Atua noatu te au manamanata e te au timataanga, kua kite a Asapha i tetai aronga aviri i te Atua e tupu atura ki te maata e te puapingaia ra. Eaa ta teia i akatupu kia Asapha? “Kareka au nei, kua vaitata toku vaevae i te paeke,” i akakite ei aia. “Me turori oki toku takainga; Iaku i vareae i te aronga neneva, ka kite ei au i te meitaki o te aronga kino ra.” Kua akamata aia i te ekoko i te puapinga o te riro mai anga ei tangata akamori ia Iehova. “E tamā anga puapinga kore tikai toku e toku nei ngakau, e te orei anga oki i toku rima i te apa kore,” i manako ei a Asapha. “Kua tairoia ra au e po ua atu te rā.”​—Salamo 73:2, 3, 13, 14.

¹¹ Akapeea a Asapha i te akono anga atu i teia au manako mirimiri ngata? Kua akakore ainei aia i te reira? Kare. Kua akakite aia i te reira ki te Atua na roto i te pure, mei ta tatou e kite ra i roto ia Salamo 73. Te tauianga maata roa atu no Asapha koia oki i te atoro anga i te ngai tapu o te iero. Iaia i reira, kua kite aia e ko te arataa meitaki roa atu koia oki ko te akono i te Atua. I na e kua akaouia tona marekaanga pae vaerua, kua marama aia e e mea rikarika na Iehova te kino e i te tuatau tau ka akautungaia te aronga kino. (Salamo 73:17-19) I te akatupu anga i te reira, kua akaketaketa atu a Asapha i tona tu akatakaanga ei tavini akameitakiia no Iehova. Kua akakite aia ki te Atua: “Ei ia koe rai au; na to rima katau i mou mai iaku. Ka riro rai koe i te arataki iaku i taau ra tuatua, e te openga iora ka apai ei koe iaku ki te ao.” (Salamo 73:23, 24) Kua mataora akaou atura a Asapha i tona ra Atua.​—Salamo 34:2.

E Ketaketa Tikai to Ratou Tu Akatakaanga

12, 13. Oronga mai i te au akaraanga no te au tangata Pipiria tei mataora tikai i to ratou pirianga ma te Atua.

¹² Tetai mataara i te akaketaketa i to tatou tu akatakaanga ei Kerititiano koia oki ko te akara matatio e te aru i te akarongo o te aronga akamori tiratiratu, tei mataora tikai i to ratou pirianga ma te Atua noatu te kino. E akamanako ana ia Iosepha, te tamaiti a Iakoba. I te tamariki anga, kua takinga kinoia aia e kua okoia ei tuikaa e kua apainaia ki Aiphiti, e anere ua atu au kiro mita mei tona metua tane mataku i te Atua e te mamao takiri mei te turanga pumaana, turuturu anga o tona kainga. Iaia i Aiphiti, kare e tangata kia uri atu a Iosepha no te akoanga tu Atua, e kua aro atu aia i te au turanga akaaoanga tei timata i tona tu akono tau e te irinakianga ki runga i te Atua. Inara, kua tauta aia ma te akava ngakau taka meitaki i te tamou i te tu akatakaanga ei tavini no te Atua, e kua vai tiratiratu ua ki te mea tika tana i kite. Kua mataora tikai aia kia riro ei tangata akamori ia Iehova noatu tei roto i tetai ngai kino, e kare aia i akama ana i te akakite i tona manako.​—Genese 39:7-10.

¹³ E varu anere mataiti i muri mai, kare te tamaine Iseraela tei riro ei tuikaa na te tianara Arama ko Naamana i akangaropoina ana i tona tu akatakaanga ei tamaine akamori ia Iehova. I te tae anga te tuatau, kua oronga aia i tetai akakiteanga meitaki ma te mataku kore no runga ia Iehova i tona akataka anga e e peroveta a Elisaia no te Atua mou. (2 Ariki 5:1-19) I te au mataiti i muri mai, noatu tei roto i te ngai kino, kua rave te ariki mapu ou ko Iosia i te au tauianga ki te akonoanga no tetai tuatau roa, na te ripea anga i te iero o te Atua, e kua arataki akaou i te iti tangata kia Iehova. Kua mataora tikai aia i tona akarongo e tana akamorianga. (2 Paraleipomeno, pene 34, 35) Kare roa a Daniela e tona au taeake Epera toko toru i Babulonia i akangaropoina ana i to ratou tu akatakaanga ei au tavini no Iehova, e noatu te au taomianga e te timataanga, kua tamou marie rai ratou i to ratou tu apa kore. Te taka meitaki ra e, kua mataora tikai ratou i te riro anga mai ei au tavini no Iehova.​—Daniela 1:8-20.

Kia Mataora e Koai Koe

14, 15. Eaa te o maira ki te akatietie anga i to tatou akatakaanga ei Kerititiano?

¹⁴ Kua puapingaia teia au tavini o te Atua no te mea kua akatupu ratou i te tu mataora tau no to ratou turanga i mua i te Atua. Akapeea tatou i teia tuatau? Eaa te o maira ki te akatietie anga i to tatou akatakaanga ei Kerititiano?

¹⁵ Te tumu maata, te kapiti maira teia i te marekaanga oonu no te riro anga ei tangata no te ingoa o Iehova, te rauka anga tana akameitakianga e te arikianga. Kare roa te Atua e ekoko ana i tona uaorai. Kua tata te apotetoro ko Paulo, tei noo ana i te tuatau kononinoni anga maata o te akonoanga: “Kua kite [“a Iehova,” NW] i tona uaorai.” (2 Timoteo 2:19; Numero 16:5) Te mataora ra a Iehova i “tona uaorai.” Te akakite ra aia: “Ko tei akatukia atu oki ia kotou ra, kua akatukia ïa i [“toku,” NW] koringo mata nei.” (Zekaria 2:8) Te taka meitaki ra e, te inangaro maira a Iehova ia tatou. No reira, e mea tau kia akanooia to tatou pirianga ma ia ki runga i te inangaro oonu nona. Kua akakite a Paulo: “Te inangaro ra tetai tangata i te Atua, koia tei kiteia mai e ia.”​—1 Korinetia 8:3.

16, 17. Eaa ka rauka ai i te au Kerititiano, mapu ou ua e te pakari, i te mataora i to ratou tuanga puapinga maata tikai?

¹⁶ E mea tau kia akara matatio tikai te au mapu tei utuutuia mai ei Au Kite o Iehova me te ketaketa maira to ratou akatakaanga ei Kerititiano tei akanooia ki runga te pirianga uaorai ma te Atua. Kare e rauka kia irinaki ua ratou ki runga i te akarongo o to ratou nga metua. No runga i to te Atua tavini tataki tai, kua tata a Paulo: “Tei tona uaorai pu tona mou e tona inga.” No reira, kua tuatua atu rai a Paulo: “Ka ope takiri rava tatou i te aaki i te tuatua iaia uaorai ki te Atua ra.” (Roma 14:4, 12) Te taka ua ra e, kare te aru tamou i te akonoanga matau a te pamiri ma te kore e tae te ngakau e rauka i te utuutu i tetai pirianga vaitata, no te tuatau roa ma Iehova.

¹⁷ Na roto i te tuatua enua i aereia mai ana, e manganui te au papaanga no te au kite o Iehova. Kua tae roa mai te reira mei te tangata tiratiratu ko Abela​—mei te 60 anere mataiti i topa​—ki te “aronga maata rava” o te Au Kite e tae ua atu ki te au urupu o te aronga akamori ia Iehova te ka rekareka i tetai tuatau mutu kore ki mua. (Apokalupo 7:9; Ebera 11:4) Ko tatou te aronga ou o teia papaanga roa o te aronga akamori tiratiratu. E tuanga puapinga maata tikai to tatou!

18. Akapeea to tatou au tu puapinga e te au turanga i te akatakake anga ia tatou mei to te ao?

¹⁸ Te kapiti katoa maira to tatou akatakaanga ei Kerititiano i te au puapinga, te au tu, te au turanga, e te au tu tangata e akataka ra ia tatou ei au Kerititiano. Ko “Te Mataara” oki te reira, te mataara puapinga anake rai o te oraanga e no te akamareka anga i te Atua. (Angaanga 9:2, NW; Ephesia 4:22-24) Te au Kerititiano “e akara matariki marie i te au mea katoa ra” e “te meitaki ra e tāpu marie”! (1 Tesalonia 5:21) Kua marama taka meitaki tatou i te tuke maata i rotopu i te Akonoanga Kerititiano e te ao tei takake mai mei te Atua ra. Kare a Iehova i vaoo mai i tetai ngai no te ekoko i rotopu i te akamorianga mou e te pikikaa. Na roto i tana peroveta ko Malaki, kua akakite aia: “Ei reira kotou e kite akaou ei i te tu ke anga i te tangata tuatua-tika e te tangata kino, i te tangata i akamori i te Atua, e i tei kore i akamori iaia.”​—Malaki 3:18.

19. Eaa te ka kore rava te au Kerititiano mou e riro mai?

¹⁹ I te mea e puapinga tikai te akatietie anga i roto ia Iehova i roto i teia ao oripu e te kononinoni ua, eaa te ka tauturu ia tatou kia tamou marie i te mataora tau i roto i to tatou Atua e te tu akatakaanga ketaketa ei Kerititiano? Ka kiteaia tetai au tamanakoanga tauturu i roto i te atikara e aru mai nei. I te akamanako anga i te reira, ka papu roa ia koe teia: Kare rava te au Kerititiano mou e riro mai ei aronga “tu manako kore.”

[Tataanga Rikiriki i Raro]

Maara Ainei ia Koe?

• Akapeea te au Kerititiano me ‘akatietie ia Iehova’?

• Eaa taau i mou mai mei te nga akaraanga o Mose raua ko Asapha?

• Koai te au tangata Pipiria tei mataora tikai i roto i ta ratou tavinianga i te Atua?

• Eaa te o maira ki te akatietie anga i to tatou akatakaanga ei Kerititiano?

[Tutu i te kapi 14]

No tetai tuatau, kua tu ana a Mose i te manako ekoko uaorai

[Au Tutu i te kapi 15]

E manganui te au tavini taito o Iehova tei mataora tikai i to ratou akatakaanga takake