Oraanga Kopapa
Kare te Pipiria ei puka no te rapakauanga maki. Inara, ka tauturu te reira ia tatou kia rauka te oraanga meitaki. Akamanako i te au kaveinga Pipiria te ka akameitaki atu i toou kopapa.
AKONO I TOOU KOPAPA
KAVEINGA PIPIRIA: “Kare ua e tangata e makitakita i tona uaorai kopapa e teia noaʼi oki; kareka e angai e te akaperepere marie.”—Ephesia 5:29.
EAA TE AITEANGA: Te akamaroiroi maira teia kaveinga Pipiria ia tatou kia akono i to tatou kopapa. Akaari maira tetai ripoti e e tupu ana te au manamanata no te au mea ta tatou i rave i roto i to tatou oraanga. No reira, e rave i te ikianga te ka akatupu i te oraanga meitaki.
TAAU KA RAVE:
Kai Meitaki. E iki i te au kai meitaki e kia inu i te vai.
Akamatutu i te Kopapa. Ka tauturu te akamatutuanga kopapa ia koe noatu eaa toou mataiti, me e pakipakitai e me e maki kino. Noatu e ka tauturu mai toou akaperepere e te au taote ia koe, tei ia koe te maroiroi kia rave i te akamatutu anga!
Kia Rava te Moe. Ka tupu mai te au maki me kare e rava ana te moe. E maata te au tangata kare e rava ana ta ratou moe no ta ratou ikianga. Inara, me iki koe kia rava te moe, e oraanga meitaki atu toou.
KOPAE I TE AU PEU KINO
KAVEINGA PIPIRIA: “E tamā ua tatou ia tatou uaorai i te au viivii katoa o te kopapa e te vaerua.”—2 Korinetia 7:1.
EAA TE AITEANGA: Ka puapingaia tatou me kare tatou e taviivii i to tatou kopapa ki te au mea kino, mei te kai avaava rai te ka akatupu i te au maki e te mate.
TAAU KA RAVE: Iki i te rā ka akamutu koe i te kai avaava, e oti akaira ki runga i taau karena. I mua ake i taua rā, e titiri i te au avaava, te mereki reu, te mati, e te au apinga kai avaava ki vao. Eiaa e aere ki te au ngai e raveia ana teia peu. E akakite ki toou au oa i taau ikianga.
TETAI AU KAVEINGA PIPIRIA
Ka rauka ia koe tetai kopi o te Pipiria na te patianga ki te Au Kite o Iehova i te ngai e noo ra koe
KIA MATAKITE I TAAU KA RAVE.
“Kia patu koe i te are ou ra, ei paruru taau e anga no rungao, ko te taka mai aea tetai tangata ki raro, ko te viivii aea to are ia koe i te toto.”—DEUTERONOMI 22:8.
AKAMARU I TOOU RIRI.
“Ko tei kore e riri vave ra, e kite maata tona: ko tei rapurapu ra te ngakau ra, kua akateitei ïa i te tuatua neneva.”—MASELI 14:29.
EIAA E KAIKAI MAATA.
“Auraka koe e kapiti katoa . . . ki roto i te aronga e kaituauau i te puaka.”—MASELI 23:20.