TUA 41
Te Ovi Veo
E OVI tika tikai ainei tera i runga i te poupou? Kare. Kua maaniia te ovi ki te veo. Kua akakite a Iehova kia Mose kia tuku i te reira ki runga i tetai poupou, kia akara te tangata i te reira e kia ora. Te au ovi ke ra i runga i te enua, e au mea tika tikai te reira. Kua kakati ratou i te tangata e kua makiia te tangata. Kua kite koe e no teaa?
No te mea kua patoi to Iseraela i te Atua raua ko Mose. Kua kopekope ratou e: ‘Eaa koe i arataki mai ei ia matou mei Aiphiti kia mate matou i roto i teia metepara? Kare e kai me kore e vai i teia ngai. E kua iu matou i te kai i teia mana.’
Inara e kai meitaki te mana. Na roto i tetai temeio kua oronga a Iehova i te reira na ratou. E na roto i tetai temeio kua oronga katoa aia i te vai no ratou. Kare ra te tangata e akameitaki ana i te tu e akono ana te Atua ia ratou. No reira a Iehova i tuku mai ei i te au ovi poitini ei akautunga i to Iseraela. Kua kakatiia ratou e te ovi, e e manganui tei mate.
Te openga kua aere mai te tangata kia Mose e kua karanga e: ‘Kua ara matou, no te mea kua patoi matou ia Iehova e ia koe katoa. E pure koe kia Iehova kia apai ke i teia au ovi.’
I reira kua pure a Mose no te tangata. E kua akakite a Iehova kia Mose kia maani i teia ovi veo. Kua karanga aia kia tuku i te reira ki runga i te poupou, e ko tetai ua atu tei katia, kia akara i te reira. Kua rave a Mose i ta te Atua tikai i akakite mai. E te au tangata tei katia, kua akara ratou i te ovi veo e kua meitaki akaou.
E apiianga tetai ka rauka mai mei teia. Pouroa tatou, i tetai tu, kua aite rai ki taua iti tangata Iseraela ra tei kakatiia e taua au ovi ra. E turanga mate to tatou pouroa. Me akara aere koe, ka kite koe i te au tangata e ruaine atura, e maki ra, e e mate atura. Kua tupu teia no te mea kua akaruke te tangata e te vaine mua ko Adamu raua ko Eva ia Iehova, e e au tamariki pouroa tatou na raua. Inara kua akanoo a Iehova i tetai mataara kia rauka ia tatou te ora mutu kore.
Kua tono mai a Iehova i tana Tamaiti ko Iesu Karaiti ki te enua nei. Kua tamateia a Iesu ki runga i te rakau, no te mea e manganui te tangata i manako e e tangata kino aia. Inara kua oronga mai a Iehova ia Iesu ei akaora ia tatou. Me akara tatou kiaia, me aru tatou iaia, ka rauka ia tatou te ora mutu kore. Tera ra ka apii tatou i teia i muri ake.
Numero 21:4-9; Ioane 3:14, 15.