TUA 30
Te Pu Tita Ka
KUA tae roa mai a Mose ki runga i te maunga ko Horeba i te kimi kai na tana mamoe. I konei kua kite atu aia i tetai pu tita e mura ra, kare ra i pou i te ka!
‘E mea umere tikai teia,’ i manako ei a Mose. ‘Ka akavaitata atu au kia kite meitaki atu.’ I tona akavaitata atu anga, kua akarongo aia i tetai reo mei te pu tita, i te karanga anga e: ‘Auraka e akavaitata mai. Kiritiia toou tamaka no te mea te tu ra koe i te ngai tapu.’ Ko te Atua teia e tuatua maira na roto i tetai angera, no reira a Mose i arai ei i tona mata.
Kua karanga i reira te Atua e: ‘Kua kite au i te kino e tupu ra ki toku iti tangata i Aiphiti. No reira te aere nei au e arataki mai ia ratou, e ko koe taku ka tono ei arataki mai i toku iti tangata mei Aiphiti.’ Ka apai mai a Iehova i tona iti tangata ki te enua manea o Kanaana.
Inara kua karanga a Mose e: ‘E tangata puapinga kore ua au. Akapeea au i te rave anga i teia? Me ka aere au, ka karanga mai te ngati Iseraela kiaku e, “Naai koe i tono mai?” Eaa i reira taku ka tuatua atu?’
‘Teia taau e karanga atu,’ i pau mai ei te Atua. ‘“Na IEHOVA te Atua o Aberahama, te Atua o Isaaka e te Atua o Iakoba i tono mai iaku kia kotou.”’ E kua karanga atu a Iehova e: ‘Ko toku ingoa teia e mutu kore ua atu.’
‘Akapeea i reira me kare ratou e irinaki mai me karanga atu au e naau au i tono mai,’ i pau atu ei a Mose.
‘Eaa tena i roto i to rima?’ i ui ei te Atua.
Pau mai a Mose e: ‘E rakau.’
‘Titiriia ki runga i te one,’ i na te Atua ei. E i te rave anga a Mose i te reira, kua riro mai te rakau ei ovi. Kua akaari i reira a Iehova kia Mose i tetai temeio ke mai. Karanga aia e: ‘Tukuia to rima ki roto i toou pereue.’ Kua akapera a Mose, e i tona akapae anga mai i tona rima, kua teatea te reira mei te kiona rai! Te akara anga o te rima, mei te mea atura e kua tuia e te maki kino tei kapikiia e repera. Aru mai kua oronga a Iehova i te mana kia Mose kia rave i te toru o te temeio. I te openga karanga atu aia e: ‘Me rave koe i teia au temeio ka irinaki te ngati Iseraela e naku koe i tono atu.’
Muri ake i te reira kua oki a Mose ki te kainga e kua karanga atu kia Ietero e: ‘E tuku ana koe iaku kia oki au e akara, e te peea maira toku kopu tangata i Aiphiti, ine.’ Kua tuku atura a Ietero ia Mose kia aere, e kua oki atu a Mose ki Aiphiti.