TUA 49
Noo Ua te Ra
AKARA ana ra ia Iosua. Te karanga ra aia e: ‘E te ra, e noo ua ana!’ E kua noo ua rai te ra. E kua noo ua rai te reira i runga i te rangi no te ra katoa. Na Iehova i akatupu te reira! Inara ka akara ana tatou e eaa a Iosua i inangaro ei kia iti ua mai te ra.
I te akamata anga te au ariki kino e rima o Kanaana i te tamaki mai i to Gibeona, kua tono te ngati Gibeona i tetai tangata kia pati kia Iosua i tetai tauturu. ‘Aere viviki mai ana koe kia matou!’ i nana ai. ‘E akaora ia matou! Kua aere pouroa mai te au ariki i runga i te maunga i te tamaki mai i to au tavini.’
I te reira taime rai kua aere atu a Iosua e tona au tangata tamaki pouroa. Kua mati ratou no taua po katoa ra. I to ratou tae atu anga ki Gibeona, kua mataku te au vaeau o te au ariki e rima e kua oro aere ratou. I reira kua akatupu a Iehova i tetai ua toka mamaata kia pururu mai mei te rangi, e e maata atu te au vaeau i mate no te ua toka, i tei tamateia e te au tangata tamaki o Iosua.
Te kite ra a Iosua e kare e roa atu ana ka opu te ra. Ka poiri e ka pou te maata anga o te au vaeau o te au ariki kino e rima i te oro. No reira a Iosua i pure ei kia Iehova i te karanga anga e: ‘E te ra, e noo ua ana!’ E i te noo ua anga mai te ra, kua rauka i to Iseraela i te akaoti i te tamaki kia autu ratou.
E maata ua atu te au ariki kino i Kanaana e riri ana i te iti tangata o te Atua. Kua pou ia Iosua e tona nuku mei te ono mataiti i te akavi anga i te au ariki e 31 i roto i te enua. I te oti anga teia, kua akapapu a Iosua e kia akatuangaia te enua o Kanaana ki te au kopu tangata kare o ratou enua.
Maata te au mataiti i aereia, e kua mate iora a Iosua, e 110 ona mataiti. Iaia e tona au oa e ora ra, kua akarongo te iti tangata ia Iehova. I te mate anga ra teia au tangata meitaki, kua akamata te iti tangata i te rave i te au angaanga kino e kua o ki roto i te manamanata. I teianei te anoanoia ra te tauturu a te Atua no ratou.
Iosua 10:6-15; 12:7-24; 14:1-5; Te Au Akava 2:8-13.