TUA 64
Akatu a Solomona i te Iero
MUA ake ka mate ei a Davida, kua oronga aia kia Solomona i te parani mei te Atua no te akatu i te iero o Iehova. I te a o te mataiti i tona tutaraanga, kua akamata a Solomona i te akatu i te iero, e kua pou e itu e te apa mataiti i oti ei te reira. Ngauru ua atu te au tauatini tangata i angaanga ki runga i te iero, e e maata tikai te moni tei pou i te akatu i te reira. Te tumu, no te mea e maata te auro e te ario i taangaangaia no te reira.
E rua o te iero nga pia mamaata, mei to te tapenakara rai. Inara e rua taime te mamaata i teia nga pia i to te nga pia i roto i te tapenakara. Kua tuku a Solomona i te aruna koreromotu ki roto i te pia i roto roa i te iero, e ko tetai au apinga ke atu tei vai ana ki roto i te tapenakara, kua tukuia ki roto i tetai mai pia.
I te oti anga te iero, kua raveia tetai tamataora anga maata. Kua tuturi a Solomona ki mua i te iero e kua pure, mei taau rai e kite ra i roto i te tutu. ‘Kare koe e o ki roto i te au rangi pouroa,’ i karanga ai a Solomona kia Iehova, ‘mei teaa atura i reira te meangiti o teia iero i te mou ia koe. Inara, e taku Atua e, akarongo mai i toou iti tangata me pure ratou kia koe i roto i teia ngai.’
Te oti anga te pure a Solomona, kua topa mai te ai mei te rangi. Kua ka te au atinga manu tei akapapaia i te ai. E kua ki te iero i tetai marama kaka no ko mai ia Iehova. Te akaari maira teia e te akarongo maira a Iehova, e kua mareka aia i te iero e te pure a Solomona. Kua riro te iero kare te tapenakara i teianei ei ngai ka aere te tangata i te akamori.
Kua roa te tuatau i tutara ai a Solomona na roto i te mataara pakari, e kua mataora te tangata. Inara kua akaipoipo a Solomona i te au vaine e manganui no te au enua ke, kare e akamori ana ia Iehova. Te kite ra koe i tetai ia ratou e akamori ra i mua i te itoro? Te openga kua maani te au vaine a Solomona iaia kia akamori i te au atua ke katoa. Kua kite koe eaa tei tupu i te rave anga a Solomona i teia? Kare aia i takinga meitaki akaou ana i te iti tangata. Kua riro aia ei tangata kino, e kare te tangata i mataora akaou ana.
Kua riri a Iehova ia Solomona e kua akakite kiaia e: ‘Ka apai ke au i te patireia mei ia koe e ka oronga au i te reira ki tetai tangata ke. Kare au e rave i teia i roto i toou oraanga, i roto ra i te tutara anga a taau tamaiti. Kare katoa au e apai ke i te tangata pouroa o te patireia mei taau tamaiti.’ Ka akara tatou e akapeea teia e tupu ei.
1 Paraleipomeno 28:9-21; 29:1-9; 1 Ariki 5:1-18; 2 Paraleipomeno 6:12-42; 7:1-5; 1 Ariki 11:9-13.