TUA 85
Anau a Iesu Roto i te Are Manu
KUA kite koe e koai teia pepe? Ae, ko Iesu. Koi anau ua akenei aia i roto i te are o te manu. Te tuku ra a Maria ia Iesu ki roto i te vairanga kai, e ngai e vai ana te kai a te au atini e tetai atu au manu. Inara akapeea ake a Maria raua ko Iosepha i noo ei ki konei i te au manu? Kare teia ngai e tau no te anau anga i tetai pepe, me kare ainei?
Kare. Ko te tumu ra teia ia ratou i konei: Kua maani a Kaisara Auguso, te tutara o Roma i tetai ture kia oki te tangata ravarai ki te oire i anauia ai aia kia tataia tona ingoa ki roto i tetai puka. I na, kua anauia a Iosepha ki Betelehema nei. Tera ra i te tae anga mai raua ko Maria, kare e ngai ke no raua i te noo. No reira, kua aere mai raua ki konei i te ngai o te manu. E i teia ra tikai kua anau a Maria ia Iesu! Inara, mei taau rai e kite ra, meitaki ua aia.
Te kite ra koe i te au tiaki mamoe e aere maira i te akara ia Iesu? No vao ratou i te kainga i te po i te tiaki i ta ratou mamoe, e kua turamaia mai ratou e tetai marama kaka takapini ia ratou. E angera teia! Kua mataku tikai te au tiaki mamoe. Inara kua karanga te angera e: ‘Auraka e mataku! E tuatua meitaki taku ka akakite atu kia kotou. I teia ra, kua anauia te Atu ko te Karaiti i Betelehema. Nana e akaora i te tangata! Ka kite kotou iaia kua vaiia ki te kakau i roto i te vairanga kai a te manu.’ Poitirere ua ake maata te au angera i aere mai e kua akamata i te akapaapaa i te Atua. Taua taime rai kua aere viviki atu teia au tiaki mamoe i te akara ia Iesu, e i teianei kua kite ratou iaia.
Kua kite koe i te tumu i puapinga ai a Iesu? Kua kite koe e koai tikai aia? Akamaara ana ra, i roto i te tua mua o teia puka kua akakite atu matou no runga i te Tamaiti mua a te Atua. Kua angaanga teia Tamaiti e te Atua i te maani i te rangi e te enua e te au apinga pouroa. I na, ko teia i reira a Iesu!
Ae, kua rave a Iehova i te ora o tana Tamaiti mei te rangi mai e kua tuku i te reira ki roto ia Maria. Te reira taime rai kua tupu tetai pepe i roto iaia mei te au pepe rai e tupu ana i roto i to ratou au mama. Inara e Tamaiti na te Atua teia pepe. Te openga kua anauia a Iesu i konei i roto i tetai are manu i Betelehema. Te kite ra koe i reira i teianei, i te tumu i rekareka ai te au angera i te akakite anga ki te tangata e kua anauia a Iesu?