TUA 91
Apii a Iesu i Runga i te Maunga
AKARA ana ia Iesu e noo ra i konei. Te apii ra aia i teia au tangata pouroa i runga i te maunga i Galilea. Te aronga e noo vaitata ra i te pae iaia ko tana au pipi. Kua iki aia e 12 ia ratou ei au apotetoro. Te au apotetoro e au pipi akaperepere na Iesu. Kua kite koe i to ratou ingoa?
Ko Simona Petero e tona teina ko Anederea. Ko Iakobo e Ioane, e teina tuakana raua. Tetai apotetoro ko Iakobo, e tetai atu ko Simona. E rua apotetoro to raua ingoa ko Iuda. Tetai ko Iuda Ikariota, e tetai atu ko Iuda tei kapiki katoaia e ko Tadaio. I reira ko Philipa e Natanaela (tei kapiki katoaia e ko Baratolomea), ko Mataio e Toma.
Muri ake i te oki anga mai ki Samaria, kua akamata a Iesu i te tutu aere no te taime mua e: ‘Te vaitata mai nei te patireia o te rangi.’ Kua kite koe e eaa taua patireia ra? E kavamani tika tikai na te Atua. Ko Iesu te ariki o te reira. Ka tutara aia mei te rangi e ka apai mai i te au ki te enua nei. Ka maani te patireia o te Atua i teianei ao katoa ei parataito manea.
Te apii nei a Iesu i te au tangata i konei no runga i te patireia. ‘E akapenei kotou me pure,’ i akamarama ai aia. ‘To matou Metua i te rangi, kia tapu toou ingoa. Kia tae mai toou patireia. Kia akonoia toou anoano i te enua nei mei te rangi katoa.’ E kapiki ana te maataanga o te tangata i teia e ko ‘Te Pure a te Atu.’ Tetai pae e kapiki ana e ko te pure ‘To Matou Metua.’ Kua kite koe i te katoa anga o te pure?
Te apii katoa ra a Iesu i te tangata e akapeea i te akono i tetai e tetai. ‘E rave koe ki etai ke i taau e inangaro ra ia ratou kia rave mai kia koe,’ i karanga ai aia. Kare ainei koe e reka ana me akono meitaki mai tetai tangata ia koe? No reira, te karanga ra a Iesu e ka tau tatou kia akono i te au tangata ke ma te takinga meitaki. Kare ainei i te mea mataora me rave te au tangata ravarai i teia i roto i te enua parataito?
Mataio pene 5 ki te 7; 10:1-4.