Pene 34

Ikianga i Tana au Apotetoro

E VAITATA i te mataiti e te apa i topa mei ta Ioane Papetito akakite atu anga ia Iesu e ko te Punua mamoe a te Atua, e to Iesu akamata anga i tana angaanga ei orometua. I reira a Anederea, a Simona Petero, a Ioane, e penei ko Iakobo (taeake o Ioane), pera katoa a Philipa raua ko Natanaela (tei tapaia ra ko Baratolomea), kua riro mai ei pipi mua nana. I muri akera, e manganui etai atu tei kapitiia atu kia ratou ei pipi na te Mesia.

Ei reira kua papa a Iesu i te iki i tana au apotetoro. Ka riro ko ratou ei taeake piri vaitata kiaia ko te ka akamatauia no ta ratou angaanga. Inara i mua ake i to ratou iki angaia, kua aere atura a Iesu ki tetai maunga e kua noo atu ki reira no taua po roa katoa ra ma te pure anga, penei no te patianga i te pakari e te akameitakianga mei te Atua mai. E ao akera te ra, kua kapiki atura aia i tana au pipi e kua iki i te 12 no roto ia ratou. Inara, i te mea te vaira ratou na Iesu i apii, kua karangaia ratou e e pipi katoa nana.

Ko te toko ono ta Iesu i iki, tei taikuia ra to ratou ingoa i mua akenei, ko ratou tei riro ei pipi mua nana. Ko Mataio, ta Iesu i kapiki ra mei tona opati tero mai, kua iki katoaia ia. Ko etai atu e toko rima tei ikiia ra ko Iuda (tei karanga katoaia ra ko Tadaio), ko Iuda Ikariota, ko Simona te Kanana, ko Toma, e ko Iakobo tamaiti a Alephaia. Ko teia Iakobo kua tapa katoaia e ko Iakobo Meangiti, penei no te meangiti i tona kopapa me kare e mapu ake tona mataiti i to tetai atu apotetoro ko Iakobo ra.

Kua roa teia 12 ma Iesu, e kua kite meitaki aia ia ratou. E tika, ko tetai papaki i o ratou ra e kopu tangata nona uaorai. I te akaraanga ko Iakobo raua ko tona taeake koia a Ioane e katini mua no Iesu. E penei ko Alephaia e taeake no Iosepha, koia te metua angai o Iesu ra. No reira ko te tamaiti a Alephaia, koia te apotetoro ko Iakobo ra, ei katini katoa ia no Iesu.

Ae, kare o Iesu manamanata no te maaraanga i te ingoa o tana au apotetoro ra. Inara te maara ra ainei koe ia ratou. E maara ua koe e e toko rua tei tapaia ko Simona, e tokorua tei tapaia ko Iakobo, e rua tei tapaia ko Iuda, e e taeake to Simona ko Anederea, e e taeake to Iakobo ko Ioane ia. Ko te taviri ia no te maaraanga i nga apotetoro e toko varu. Ko etai toko a te kapiti ra i tetai terona (koia a Mataio), ko tetai tei ekoko i muri akera (ko Toma ia), ko tei kapikiia no raro mai i te pu rakau ra (ko Natanaela ia), e tona oa ko Philipa ia.

E tai ngauru ma tai apotetoro no Galilea mai, koia te enua kainga o Iesu ra. Ko Natanaela no Kana mai. A Philipa, a Petero, e Anederea no Betesaida mai, ko Petero raua ko Anederea kua aere atu ki Kaperenauma i muri akera, i te akaraanga ko to Mataio ngai ia i noo ei. E tautai ta Iakobo raua ko Ioane angaanga e penei katoa kua noo raua ki Kaperenauma me kare i vaitata ua i reira. I te akaraanga ko Iuda Ikariota, koia tei pikikaa ra ia Iesu koia anake ua te apotetoro no Iudea mai. Mareko 3:​13-19; Luka 6:​12-16.

▪ Ko teea te au apotetoro e kopu tangata no Iesu ra?

▪ Koai ma te au apotetoro a Iesu, e akapeea e raukai ia koe i te maara anga i to ratou au ingoa?

▪ No teea au ngai mai te au apotetoro ra?