Pene 13
E Urupu Maata i Mua i te Terono o Iehova
1. (a) I mua ake ka raukaʼi te tutaki no ratou i te au tavini o te Atua o mua ake i te tuatau Kerititiano ra e pera katoa te 144,000, eaa te ka tau kia tupu kia ratou? (e) Inara eaa te ka rauka kia tupu no te urupu maata te vaira a te akamata anga te “mate maata”?
NOATU rai e i tuku te au tavini tiratiratu o te Atua mei ia Abela kia Ioane Papetito, i te rave anga i te anoano o te Atua na mua i to ratou oraanga, kua mate ratou katoatoa e te tapapa ra i te tuakaouanga. Pera katoa oki te 144,000 te ka piri atu kia Karaiti i tona Patireia i te rangi ra ka mate ratou na mua ake i te rauka anga ia ratou to ratou tutaki. Ei tuke anga, kua akaariia ki te apotetoro ko Ioane na roto i te orama e e urupu maata tetai te ka ora atu i te “mate maata” e, kare e mate, e manakonakoanga to ratou no te oraanga e tuatau ua atu.—Apokalupo 7:9-17.
Akatakaanga i te “Urupu Maata”
2. Eaa tei taki atu ki te marama meitaki anga o te akatakaanga i te “urupu maata” o Apokalupo 7:9 ra?
2 No etai au anere mataiti kare i maramaia te parapore o teia “urupu maata.” Inara na te tupu anga te marama no runga i te au totou tei piri atu ki te reira, i akateateamamao i te mataara. I te 1923 i kitea maramaiaʼi e ko te “au mamoe” o ta Iesu parapore ia Mataio 25:31-46 e te “mamoe ke atu” tana i taiku ra ia Ioane 10:16 ko te aronga ratou te ora nei i teianei, ko ratou te ka noo ki runga i te enua e tuatau ua atu. Kua akatakaia i te 1931 e ko te aronga i akakiteia maira ia Ezekiela 9:1-11 tei akairoia ra to ratou rae e te tangata ma te ariki inika a te tata tuatua ra, ko te “au mamoe” ratou ia Mataio pene 25 ra. E i te 1935 kua kitea mai e ko te “aronga maata,” me kare “urupu maata,” ia Apokalupo 7:9-17 ko ratou rai te “au mamoe” o ta Iesu parapore no te mamoe e te puakanio ra. Noatu rai e mei te 1923 mai i kiteaʼi e ko tetai papaki o te reira aronga mei te mamoe rai te tu kua akamata ke ana i te akakite mai ia ratou uaorai, mari ra no te tae anga ki te 1935 i akamataʼi to ratou au numero i te tupu viviki. I teia tuatau e au mirioni ua atu te aronga te kimi ra kia akatakaia ratou ei tuanga no te reira “urupu maata” o te “au mamoe ke atu” te akaperepereia ra e te Atua.
3. Eaa ra i kore ei te aite anga o to ratou “tu ua anga ki mua i te terono” e e pupu ratou no te rangi?
3 Te kitea meitakiia ra te tuke anga o te “urupu maata” mei te 144,000 au mema o te Iseraela vaerua ra, tei taikuia ra i te tuanga mua o te reira pene rai o Apokalupo. I roto i tana orama ra, kare a Ioane i kite i te “urupu maata” e i te rangi ratou. Ko to ratou “tu ua anga ki mua i te terono” (te reo Ereni: e·noʹpi·on tou throʹnou, “i kitea atu ana mei te terono”) o te Atua ra kare i te mea e tei te rangi ratou. Tei mua to ratou ra turanga i te “ngai kitea atu” e te Atua, koia te akakite maira kia tatou e mei te rangi mai te akara maira aia i te tamariki a te tangata nei. (Apokalupo 7:9, NW; Sa. 11:4; akaaiteia atu kia Salamo 100:1, 2, pera katoa kia Luka 1:74, 75 e Angaanga 10:33, i te Kingdom Interlinear.) Mei te reira katoa oki, kare e anoanoia “to te pa enua ravarai” e ki te rangi ratou e tau ei e tei mua ratou i te terono o Karaiti (ki, ‘mua tikai iaia’), mei tei akakiteia maira ia Mataio 25:31, 32. Ko te tika e ko te “urupu maata, kare takiri e pou kia tatau te tangata,” kare ia i te pupu no te rangi te akaariia maira i te akataka anga ia Apokalupo 7:4-8 e Apokalupo 14:1-4, te ngai e akakiteia maira e e numero taka meitaki to te aronga te ka raveia mei te enua nei ki te rangi noo ei.
4. (a) Eaa te “mate maata” ta ratou ka ora atu? (e) Mei tei akakiteia maira ia Apokalupo 7:11, 12, koai ma te akara ra i te “urupu maata” e te piri atu ra kia ratou i te akamori anga?
4 I te akatakaanga i te “urupu maata,” kua tata a Ioane e: “Ko te aronga teia i aere mai mei roto i te mate maata.” E tika rai, e ko ta ratou ka ora mei roto mai, ko te mate maata rava ia tei tupu ki runga i te enua nei. (Apokalupo 7:13, 14; Mata. 24:21) Kare e ekoko anga no te aronga te ka ora i te reira ra mataku a Iehova e naai i akono to ratou akaoraanga. Kia akameitaki ratou no to ratou ora, kia Iehova e te Punua mamoe, ei reira tupu ei ta Ioane i kite i roto i te orama ra, ko te au mea ora tiratiratu ravarai i te rangi ra ka taokotai i to ratou reo ma ratou katoa i te akamori i te Atua mou anake ra, i te na ko anga: “E tika ïa: ko te akapaatu, e te kakā, e te pakari, e te akameitaki, e te ngateitei, e te mana, e te maroiroi, ei to tatou Atua ïa, e tuatau e tuatau ua atu. Koia ïa.”—Apokalupo 7:11, 12.
Timataia e me te Tau ra no te Ora Atu Anga
5. (a) Akapeea tatou e kite ei e eaa te anoanoia ra kia riro ei tuanga tatou no te “urupu maata” te ka akaoraia? (e) Na te pauanga i te au uianga i te openga o teianei parakarapa, e akamarama mai e eaa te anoanoia ra kia oraʼi i te “mate maata.”
5 Ka tupu te akaoraanga i te “urupu maata” ra kia rotai ki ta Iehova uaorai turanga no te tuatua tika. Ko te au akataka anga marama meitaki tikai o te aronga te ka akaoraia kua tauruia ki roto i te au totou o te Puka Tapu te taiku ra ia ratou. No reira, ka rauka i te aronga inangaro i te tuatua tika kia rave i te angaanga i teianei ma te manakonako i te ora atu anga. Kua uriuri ke ana tatou i te tuatua tapu te aru mai nei. Inara e akara matatio ia ratou i teianei, ma te tauturu anga a etai atu au irava tei tataia, e ka akamanako ana e eaa taau ka tau kia rave kia tau ei ki teia au akakitekite anga totou.
Te “au mamoe ke atu” tei taikuia ra ia Ioane 10:16
Eaa te aite anga tikai no tetai e kia akarongo i te reo o Iesu? (Ioane 10:27; Mata. 9:9; Ephe. 4:17-24)
Akapeea ta tatou akaari anga e te akatika ra tatou e “okotai oki tiaki” no tatou ko Karaiti ia? (Mata. 23:10, 11)
“Au mamoe” o ta Iesu akatutuanga no te mamoe e te puaka nio (Mata. 25:31-46)
Koai ma te “au taeake” o Karaiti tei raveia ra e teia aronga te meitaki kia ratou? (Ebera 2:10, 11; 3:1)
I raro ake i teea au tu ngata ratou i te akataka anga ia ratou uaorai ma te au taeake o Karaiti i runga i te enua nei? E eaa te angaanga ta ratou e tauturu tiratiratu atu ra? (Apokalupo 12:12, 17; Mata. 24:14; 28:19, 20)
Te aronga akairoia e te tangata ma te ariki inika a te tata tuatua ra, no te ora (Eze. 9:1-11)
Akapeea ta ratou akakite mai anga e kare ratou e rotai ana ki te au mea rikarika e raveia ra i roto i te Ierusalema tikai, me kare ia Kerititome? (Apokalupo 18:4, 5)
Eaa te kapitiia atu ra ki te “akairo” te akatuke ra ia ratou mei te au Kerititiano akameamea ua ra e te akapapa ra ia ratou kia tau no te akaoraanga? (1 Pe. 3:21; Mata. 7:21-27; Ioane 13:35)
6. Akapeea ta Ioane akataka anga i te “urupu maata” i te tauturu anga ia tatou kia marama e eaa ratou i akaoraiaʼi?
6 Te akataka anga i te “urupu maata” te kitea ra ia Apokalupo 7:9-15 te tapiri maira i etai atu tumu maata. I te akakiteanga kia tatou e akapeea te akaraanga i te aronga o te “urupu maata” i muri ake i te “mate maata,” te arataki katoa atu ra te au Tuatua Tapu i te manako ki te au tumu tei taki atu ki to ratou akaora angaia.
7. Eaa ta ratou i rave i mua ake i te “mate maata,” e akapeea te akakite anga mai i te reira?
7 Noatu rai e no te pa enua ravarai ratou, e te au kopu ravarai, te au iti tangata ravarai e te au reo katoa oki, te akaariia maira ratou i te “tu ua anga ki mua i te terono” ma te taokotai, i te oronga anga i te tika kia Iehova, Tei noo ki rungao i te terono, e koia te Ngateitei i te Ao Katoa e Pini ua Ake. Kua akapapuia e ratou na te tu o to ratou oraanga e e aronga mou ratou i tona ra tutara anga. Na te tika e “kua orei i to ratou kakau, e kua akateatea i te toto o te Punua-mamoe ra” te akakite maira e kua kite ratou i tei umuumuia no ratou koia te puapinga o te tarangaara o to Iesu ra atinga ei te Punua mamoe a te Atua. (Ioane 1:29; 1 Ioane 2:2) Na te akarongo kua akatapu ia ratou uaorai ki te Atua na runga i te tumuanga o te reira atinga, kua akatutu ratou i te reira na te taruku anga i te vai e i teianei e turanga ma to ratou ki mua i te Atua, mei tei akatutuia maira e to ratou kakau teatea. Kare ratou i tapupu i te akakite anga i to ratou akarongo i te Tamaiti a te Atua i te ngai tangata ra. (Mata. 10:32, 33) Kia tau ki te reira katoa, te akaariia maira ratou i te nao o te Atua ra, me kare i te are akamori anga no te ao katoa e pini ua ake, ei aronga te oronga ra ki te Atua i te “akamori . . . i te po e te ao.” E no reira kua akanoo ratou i te tika ei aronga tauturu tiratiratu i te akamori mou e ei aronga akakitekite i tona Patireia.—Isaia 2:2, 3.
8. E puapingaiaʼi tatou i teia akakitekite anga, eaa ta tatou ka tau kia rave?
8 Te tau ra ainei te au tika o teia au tutu totou kia koe? E au mataara ainei etai tei tau koe kia akatanotano i toou oraanga kia tano tikai ki tei akakiteia maira i konei? Me koia ia, ko teianei tikai te tuatau no te rave i te reira!
Te Oraanga ki Roto i te Parataito Vaerua
9. Akapeea ta Ioane akataka anga i te au akameitakianga te rekarekaia ra e te “urupu maata” i teianei tikai?
9 Ko koe ainei tetai te manakonako ra kia ora atu ei tuanga no te “urupu maata”? Me kua akatano koe i toou oraanga kia tau ki to Iehova au mataara no te tuatua tika, kare e ekoko anga i reira e kua akamata ke ana koe i te rekareka i te au tu tei taputouia mai tei tau ra kia tapaia e e parataito vaerua. Kua akakiteia atu ki te apotetoro ko Ioane e: “Kare ratou e pongi akaou, kare oki e kaki vai akaou; kare oki ratou e iti akaouia e te rā, e te veravera. Na te Punua-mamoe oki ko tei noo i rotopu i te terono ra e angai ia ratou, e e arataki oki ia ratou ki te au pupui anga o te vai ora, e na te Atua e orei i to ratou roi-mata katoa i to ratou mata.” (Apokalupo 7:16, 17) Akapeea te akapapu anga e e tika te reira no toou oraanga?
10. (a) I te pae vaerua akapeea i tikai te tuatua no te “urupu maata” e “kare ratou e pongi akaou, e kare oki e kaki vai akaou”? (e) Kua tupu ainei te reira kia koe uaorai?
10 I mua ake i te aereanga mai ki raro ake i te utuutu anga aroa a te Tiaki Meitaki, koia a Iesu Karaiti, i mate pongi ana ainei koe e i kaki ana oki no te tuatua tika? (Akaaiteia atu kia Mataio 5:6) Me koia ia, ko taau i kaki ana e apinga ia te ka rauka anake ua na Iehova e oronga mai na roto i tana Tamaiti. Ia koe i apii ei i to Iehova ra au mataara no te tuatua tika—tana akakoroanga kia akapou i te aronga rave kino, mari ra na tona aroa ua kua akapapa kia rauka te ora no te au uanga o Adamu—e no reira, kare e ekoko anga, te taime mua i toou oraanga i kite tikai koe i te manako pumaana. Kua tamou te kaikai e te inu vai i te pae vaerua mei te Tuatua mai a te Atua, tei tuaia mai na roto i tana akaaerenga, i te apai mai kia koe i te merengoanga. (Isaia 65:13, 14) E me kua akatapu koe ia koe uaorai ki te Atua na roto ia Karaiti ra kua rauka ia koe i teianei tetai akakoroanga tikai no te oraanga. (Akaaiteia atu kia Ioane 4:32-34.) Te vai maira ki mua ia koe te manakonako rekareka no te ora mutu kore ki runga i te enua Parataito, no te mea na te Punua mamoe “e arataki [i te “urupu maata”] ki te au pupui anga o te vai ora.”
11. (a) Na teea tu i tikai e ‘kare oki ratou e iti akaouia e te rā, e te veravera’? (e) Eaa te puapinga o te reira kia koe uaorai?
11 Ei “au mamoe” te irinaki ra, ka paruru katoaia te aronga o te “urupu maata” e ka arataki meitakiia e te Tiaki Meitaki ra. No reira rai, i te tuatua akatutu anga e ‘kare oki ratou e iti akaouia e te rā kia veravera roa.’ Kare te aite anga o te reira e, me ko koe tetai o te “urupu maata,” kare koe e mamae i te takinokino anga mei teianei ao. Mari ra, te akataka maira e ka paruruia koe mei te veravera maata o to te Atua uaorai riri. E kia tuku mai aia i te akapou anga tapu ki runga i te aronga rave kino, kare koe e o atu ki te mate. Ka vai tamou rai te reira piri anga akaperepere e tuatau ua atu.—Ezeki. 38:22, 23; akaaiteia atu kia Salamo 11:6; 85:3, 4.
12. I akapeea te orei anga i te roi mata i toou nga mata i teianei?
12 Ka rauka ia koe te au tumu umere tikai no te rekareka me ko koe tikai tetai o te reira “urupu maata”! Tei ia koe te manakonakoanga taka ke i te kiteanga i te takore takiri angaia te aronga kino e te akariro anga i toou uaorai manako e toou kopapa kia atea ke mai i te au tupuanga katoa no te ara. Noatu rai i teianei kare koe e rokoia e te au mamae ngakau te tupu ra ki te au tangata no te kore ratou i kite i te Atua ra. Te akamata ra koe i te kite i te rekareka te vaira no te aronga anake ua ko Iehova ra to ratou Atua. (Sa. 144:15e) Na teia tu kua akamata ke ana koe i te kite i te tupu anga o te totou e: “Na te Atua e orei i to ratou roi-mata katoa i to ratou mata.”
13. Eaa te ka kapitiia atu ki te rekareka anga o te parataito vaerua a te roa atu anga o te tutara o Karaiti no te tauatini mataiti?
13 Mei te “urupu maata” rai te ka ora atu i te openga o teia akatereanga o te au mea nei, ka pera katoa oki te parataito vaerua. Me ko koe tetai o ratou ra, ka rekareka tamou rai koe i reira i te kaikai vaerua i te au mea matu i te aere ua atu anga te tutara o Karaiti ra no te okotai tauatini mataiti. Ka oonu toou kite i te Atua uaorai i toou kite anga i te tupu anga tana akakoroanga puapinga kia tae ki tona otinga kaka maata. Ka maata atu toou rekareka ia koe ka o atu ei i te turou i te aronga maata te ka oki mai mei te mate e ka kapiti katoa atu kia koe i te akamorianga mou. Ka riro ei apinga meitaki rava te au akameitakianga no te kopapa te ka orongaia mai i reira no te au tavini tiratiratu o te Atua no te mea ka kitea te reira e e au tupu anga no te aroa o Iehova uaorai.—Isaia 25:6-9; Iakobo 1:17.
Uriuri Akaou Anga
● Eaa te tupu anga umere roa te kapitiia maira e te Puka Tapu ki te “urupu maata,” e naea?
● Me te anoano papu ra tatou kia o atu ki te reira “urupu maata” te akaperepereia ra, eaa ta tatou ka tau kia rave i teianei?
● Eaa te puapinga kia koe o te au akameitakianga o te parataito vaerua ra?