Au Uianga a te Aronga Tatau

Te tuatua takake anga, e tuke anga ainei tetai i rotopu i te au tuatua Puka Tapu no te “mamoe ke atu” e te “aronga maata rava”?

Ae, inara auraka tatou e manamanata tau kore atu no runga i te tuatua te taangaangaia ra me kare ka manamanata atu me te taangaanga ra tetai i te au tuatua tauiui anga.

Te maata anga o te au Kerititiano te matau ra i te au tuatua te ngai e kiteaʼi tatou teia au tuatua. Ko Ioane 10:16 tetai. I reira te karanga ra a Iesu: “E mamoe ke atu rai taku, kare no teianei koro: e arataki katoa mai au ia ratou e tikaʼi, e akarongo mai oki ratou i toku nei reo: kia okotai oki anana, okotai oki tiaki.” Ko tetai atu tuatua, ko te “aronga maata rava,” te kitea ia ra teia ia Apokalupo 7:9. Ka tatau tatou: “E i muri ake i te reira, akara atura au, e i na, e aronga maata rava [“urupu maata,” NW], kare takiri e pou kia tatau, no te pa enua ravarai, e te au kopu ravarai, e te au iti-tangata ravarai, e te au reo katoa oki, i te tu ua anga ki mua i te terono, e ki mua i te Punua-mamoe, ma te kakau teatea i te kakau anga, e ma te kikau nu tamara i to ratou rima.”

Na mua tatou i te tamanako ia Ioane 10:16. Koai ma te mamoe? E mea meitaki kia tamou ki te manako e pouroa te au pipi tiratiratu a Iesu te karangaia ra ei mamoe. Tei ia Luka 12:32, kua kapiki aia i taua o tana au pipi te ka aere ki te rangi ra ko te “anana iti.” E anana no te aa? No te mamoe. E tuanga no te Patireia i te rangi ra te “mamoe” o te “anana iti.” Inara, te vaira tetai, e manakonako anga tuke to ratou, ko ta Iesu ia e akara katoa ra rai ei mamoe.

Ka kite tatou i teia i roto ia Ioane pene 10. I muri ake i te tuatuaanga no runga i te mamoe mei tana au apotetoro ra tana i pati ra ki te oraanga i te rangi, kua kapiti mai a Iesu i roto i te Ioa 10 irava 16: “E mamoe ke atu rai taku, kare no teianei koro: e arataki katoa mai au ia ratou.” Kua kite takere te Au Kite o Iehova e i roto i teia irava te tuatua ra a Iesu no te au tangata te manakonako ra i te oraanga i te enua nei. E manganui te aronga tiratiratu i te au tuatau Kerititiano mua, mei ia Aberahama, Sara, Noa, e Malaki, e au manakonako anga tetai. No reira ka rauka ia tatou i te akatika i te kapiti atu kia ratou ei tuanga no te “mamoe ke atu” ia Ioane 10:16. I te tuatau o te Tauatini Mataiti, ka akatuakaouia taua au Kerititiano kite tiratiratu mua ra e ka apiiia e ka ariki ia Iesu Karaiti, te riroanga mai e “mamoe ke atu” na te Tiaki Mamoe Meitaki.

Kua kite katoa oki tatou e i te oti anga te kapiki anga noa nei no te pupu o te rangi ra, e mirioni ua atu tei riro mai ei Kerititiano tika tikai. E tika kia tuatuaia ratou e e “mamoe ke atu,” i te mea e kare ratou i te tuanga no te “anana iti.” Mari ra, te tapapa atura te mamoe ke atu o teia tuatau i te nooanga atu ki roto i tetai enua parataito.

I teianei, eaa te ka tuatuaia no runga i te akataka anga o te “aronga maata rava” tei taikuia ia Apokalupo 7:9? Ka akara i te Apo 7 irava 13 e te uianga, “Koai ra ratou e noea mai ratou i te ngai i aere mai ei?” Ka kite tatou i te pau anga i roto ia Apokalupo 7:14: “Ko te aronga teia i aere mai mei roto i te mate maata.” No reira ko te “aronga maata rava” ko ratou te pupu tei aere mai ki vao, me kare tei ora, i te mate maata. Mei ta te Apo 7 irava 17 e karanga ra, ka ‘arataki ia [ratou] ki te au pupui anga o te vai ora’ i runga i te enua.

Noatu, kia marama katoa, e oraʼi ratou i te mate maata te vaitata maira, kua orei ratou i mua atu ana i to ratou au kakau ki roto i te toto o te Punua Mamoe, te riroanga mai ei aronga akamori anga tika. No reira, noatu te akataka ra a Apokalupo 7:9 i teia pupu i muri ake i te mate, penei ka taangaanga tatou i te tuatua “aronga maata rava” ki te katoatoa ma te au manakonako anga i te enua te oronga ra i teia tuatau nei te angaanga tapu kia Iehova, i mua ake ka akamataʼi te mate maata ma te au pa enua e tamaki atura ki te akonoanga pikikaa.

Te akaoti anga, penei ka maara ia tatou te “mamoe ke atu” ei tuatua maata, te koropini katoatoa angaia te au tavini o te Atua te manakonako ra i te noo e tuatau ua atu ki runga i te enua. Te kapitiia maira te tuanga kotinga anga maata o te aronga tu mamoe i teia tuatau tei akaputuputuia mai ei tetai “aronga maata rava” ma te manakonako anga kia ora ua atu i roto i te mate maata tei vaitata maira. Te maata anga o taua au Kerititiano tiratiratu te ora ra i teia ra e “mamoe ke atu,” e e tuanga katoa ratou no te “aronga maata rava.”

E meitaki kia ripiti ia te reira, e mea tau kia maramaia teia au akataka anga, kare e anoanoia tetai ua atu Kerititiano kia manako maata atu i te tuatua​—penei e te kapikiia ra e e akakino anga tuatua. Te akamatakite maira a Paulo no runga i etai tei “nengonengo ïa” e te o ra ki roto i te “māro anga tuatua.” (1 Timoteo 6:4) Me ka kite tatou uaorai i tetai au tuke anga i rotopu i te au tuatua, e meitakiia. Inara, kare tatou e anoanoia, noatu i vao me kore i roto tikai, kia akakino i tetai ke ra me kare e taangaanga meitaki tikai ana i te au tuatua Puka Tapu.