Takinga Kinoia no te Tuatua Tika

Penei kua rongo koe mei toou au taeake e mei toou kopu tangata e te o atu nei te au Kite o Iehova ki roto i te manamanata ma te ture, e kua araiia ratou e etai au kavamani, me kare penei kua karanga ratou e e aronga kino. Eaa ra i tupu ei teia tuatua akakino ia ratou?

Kare ra e no te mea e kare te au Kite e akangateitei i te ture mari ra no te mea te aru ra ratou i to Iesu rua tapuae. Kua akakite a Iesu ki tana au pipi e ka akakinoia ratou, e ka takinga kinoia ratou, e ka tapepe pikikaa ua ia ratou i te au kino katoa nei. Ko teia no te mea ko te patoi maata i te Atua, koia a Satani, ko te atua ia o teianei ao, e te anoano ra aia i te taruri ke i te au tangata kia kore e tavini i te Atua.—Mataio 5:10-12; 10:16-22, 34-39; 24:9, 10; Ioane 15:17–16:3; 2 Timoteo 3:12; 1 Petero 5:8; Apokalupo 12:17.

I te tapeka angaia te au aposetolo e kua rave iatu ki te akavaanga, kare no te mea e e aronga rave kino ratou, e e au tangata ta ua, me kare e akameameaau i te kavamani. Mari ra no ta ratou tutu anga i te tuatua meitaki. I ta te aposetolo ko Paulo tuku anga i tona akavaanga ki te akavaanga teitei ra, i rave aia i te reira kia paruruia e kia akamouia e te ture te tikaanga no te au Kerisitiano kia tutu aere i te tuatua meitaki.—Angaanga 4:18-20; 5:28-32; Philipi 1:7.

I teia tuatau, e au Kerisitiano tiratiratu te au Kite o Iehova i te pae o te ture te tutaki nei ratou i ta ratou tero e te kauraro ra i te aronga mana taoonga. Te oronga ra ratou i ta Kaisara kia Kaisara e ko ta te Atua ra ki te Atua. Me e maroanga ta ratou ki tetai mana kavamani, e mea papu e no te kore o te kavamani e akatika i ta ratou angaanga tutu aere me kore no to ratou kore e o atu ki roto i te au ravenga i rotopu i te au basileia. Inara no te reira tu e mea tau no te au Kite o Iehova kia mou i te turanga mei ta te au aposetolo i rave ra, ko ratou tei tuatua ra e: “Ko te Atua ta matou e akarongo e tikaʼi auraka te tangata.”—Angaanga 5:29; Mareko 12:17; Ioane 18:36; Tito 3:1, 2.

Kare te au Kite o Iehova e kimi ravenga ana kia takinga kinoia ratou mari ra te anoano ra i te oraanga maru ua e te au. Tera ra, me no to ratou aru anga i te ture a te Atua e te akatauanga a Iesu Mesia i takinga kinoiaʼi ratou, e mea rekareka na ratou te akakoromaki i te reira.—Mataio 5:10-12; Angaanga 5:40, 41; 1 Korinetia 4:12; 1 Timoteo 2:2; 1 Petero 3:14, 15; 4:12-16.

• Eaa ra te au tavini o Iehova i akakinoiaʼi e i takinga kinoiaʼi?

• Eaa ra i o atu ei te au Kite o Iehova ki roto i te maroanga ki te au mana taoonga o te au kavamani i etai taime, mei te au aposetolo Kerisitiano rai?

• Eaa te manako o te au Kite o Iehova no runga i te takinga kino?

[Au Tutu i te kapi 29]

I raveia a Iesu ki mua ia Pilato e i tapekaia te aposetolo ko Paulo no te tutu aere anga i te Basileia o te Atua