Pene 3
Tei Teateamamao i te Mataara Kua Anauia Mai
KUA vaitata roa a Elisabeta i te anau mai i tana pepe. No nga marama e toru i topa, kua noo atu a Maria kiaia ra. Inara i teianei kua tae te tuatau no Maria kia na ko atu e e noo ra, e ka aere atu ei i te aerenga roa ki tona kainga i Nazareta. E vaitata e ono marama toe e koia katoa tetai ka anau i tetai pepe.
I muri poto ake i to Maria akaruke anga, kua anau a Elisabeta. Mei teaa ra te rekareka i te meitaki te anau anga e te ora meitaki ra a Elisabeta raua ko tana pepe! I ta Elisabeta akaari atu anga i te pepe ki tona au tangata tupu i te pae mai e tona kopu tangata katoa, kua rekareka ratou ma ia katoa.
I te ra varu i muri ake i tona anau anga, kia tau ki ta te Ture a te Atua, ka anoanoia te pepe tamaroa i Iseraela ra kia peritomeia. No te reira atianga kua aere katoa mai te au oa e te kopu tangata kia aravei atu. Kua tuatua ratou e e mea tau kia tapaia taua tamaroa ra i te ingoa o tona metua tane, koia a Zakaria. Inara kua tuatua maira a Elisabeta. “Eiaa”! e nana ei, “e tapa ra iaia ia Ioane.” Kia maara, e ko te ingoa ia a te angera ko Gaberiela ra i karanga e kia tapaia taua tamaiti ra.
Kua patoi atura to raua au oa: “Kare rava toou kopu-tangata i tapaia i te reira ingoa.” Ei reira, na te rave anga i te tuatua akairo rima, kua ui ratou eaa ta tona metua ka anoano kia tapaia ei ingoa no taua tamaroa ra. Kua pati a Zakaria i tetai potonga tataanga, kua poitirere te katoatoa i tana tataanga e: “Ko Ioane tona ingoa.”
I reira, i akaora semeioiaʼi te reo tuatua o Zakaria. Ka maara koe e i ngaro iaia tona kite i te tuatua no tona kore i irinaki i te akakite anga a te angera ra e ka anauia tetai tamaiti na Elisabeta. Inara, i to Zakaria tuatua anga, pouroa te aronga te noo ra i te pae mai kua umere e kua tuatua kia ratou uaorai: “E riro ei aa teianei tamaiti?”
Kua ki a Zakaria i reira i te vaerua tapu, e kua akapaapaa: “Kia akameitakiia te Atu [ko Iehova, NW], te Atua no Iseraela; kua akono mai oki aia, e kua akaora i tona tangata. E kua akatupu i tetai tara akaora no tatou, i te kopu-tangata o tona tavini ra o Davida.” Ko teia “tara akaora,” ko te Atu ia ko Iesu, te ka anauia mai i reira ra. Na roto iaia, e na Zakaria ei, “e oronga mai [te Atua] no tatou, i akaoraia i te rima o to tatou au enemi, kia akamori tatou iaia ma te mataku kore, Ma te tapu, e te tuatua-tika, ki mua i tona aroaro, e ope rava ake to tatou puke rā i te ora anga nei.”
I reira kua totou maira a Zakaria no tana tamaiti no Ioane: “E ko koe na, e teianei tamaiti, ka tuatuaia koe e peroveta no Tei Teitei: na mua oki koe i te mata o te Atu [o Iehova, NW] i te aere, ei akameitaki i tona aerenga; Ei akakite i tona tangata i te ora, i te akakore anga i ta ratou ara, I te ngakau aroa o to tatou Atua, i taea mai ei tatou e te mārama no runga mai; Ei akamārama i te aronga e noo i te poiri, e i te ngai maru-mate, ei arataki oki i to tatou vaevae na te ara au.”
I te reira tuatau te vai ra a Maria, ei vaine kare i akaipoipoia, kua tae atu ki tona kainga i Nazareta. Eaa te ka tupu kiaia me kitea mai e kua nui aia? Luka 1:56-80; Levitiku 12:2, 3.
▪ Eaa to Ioane pakari atu ia Iesu?
▪ Eaa tei tupu i to Ioane tae anga e varu ra te pakari?
▪ Akapeea to te Atua ariu anga i tona manako ki tona au tangata ra?
▪ Eaa te angaanga i totouia na Ioane kia rave?