Kua Tutakiia Raua no te Aaereanga Apakore Ua

TE AKAMEITAKI ra e te tutaki ra a Iehova i tona au tavini tiratiratu. Penei ka tiaki ratou no etai tuatau e kite ei e akapeea me akatupuia te au akakoroanga a te Atua, inara mei teaa te rekareka me kiteaia tana akameitaki anga!

Kua akatutu meitakiia teia i etai rua tauatini mataiti i topa i tei tupu ra ki tetai taunga ngati Iuda ko Zakaria e tana vaine, ko Elisabeta, e puke tangata raua mei te ngutuare tangata o Aarona. Kua taputou te Atua e te akameitaki i te ngati Iseraela ma te uanga me ka tavini tiratiratu ratou iaia. Kua karanga aia e e akameitaki anga te au tamariki. (Levitiku 26:9; Salamo 127:3) Inara, kare a Zakaria raua ko Elisabeta tamaiti e kua pakari raua.​—Luke 1:1-7.

Te tuatua ra te au Tuatua Tapu e ko Zakaria raua ko Elisabeta “e puke tangata tuatua-tika raua i mua i te aroaro o te Atua, i te akono marie anga i te au akauenga, e te au akonoanga katoa a te Atu, ma te apa kore.” (Luka 1:6) Kua inangaro tikai raua i te Atua e kare i te mea teiaa na raua i te kimi i tetai aerenga tuatua tika e te akono i tana au akauenga.​—1 Ioane 5:3.

Au Akameitakianga Kare i Akamanakoia Ana

Ka oki tatou i teianei ki te openga o te tuatau tupuanga rau me kare ki te akamata anga o tuatau maana i te mataiti 3 M.T.N. Te tutara ra a Heroda Maata ei ariki i Iudea. I tetai ra, kua tomo atu te taunga ko Zakaria ki roto i te ngai Tapu o te iero i Ierusalema. Koi akaputuputu ei te tangata i roto i te pure i vao ake i te nao, kua tutungi aia i te rakau kakara ki runga i te atarau auro. Penei te tamanakoia ra e ko te angaanga akangateitei ravaia atu o te ra, kua raveia teia i muri ake i te oronga anga i te atinga. Penei ka rauka ua teia akameitaki anga ki tetai taunga okotai anake taime i roto i tona oraanga.

Kare i rauka ia Zakaria i te irinaki i tana i kite. Eaa ra, te tu ua ra ta Iehova angera i te pae katau o te atarau rakau kakara ra! Kua manamanata e kua mataku te taunga ruaine. Inara kua tuatua atu te angera e: “Eiaa e mataku, e Zakaria; kua akarongoia oki taau pure; e ka anau taau vaine, ko Elisabeta, i tetai tamaiti naau, e naau e tapa i tona ingoa ko Ioane.” Ae, kua akarongo ia e Iehova te pure akatenga a Elisabeta raua ko Zakaria.​—Luka 1:8-13.

Kua kapiti atu te angera e: “E rekareka maata toou iaia; e manganui te ka rekareka me anau aia ra. E maata oki aia i mua i te aroaro o te Atu; e kare e inu i te wina e te kava kona, ka akakiia ra aia e te Vaerua Tapu, mei te kopu mai o tona metua vaine.” Ka riro mai a Ioane ei Nazira i te oraanga tei kiia e te vaerua tapu o te Atua. Kua tuatua ua atu te angera e: “E manganui te tamariki a Iseraela tana e akaariu ki te Atu ki to ratou Atua. E na mua aia iaia i te aere ma te vaerua e te mana o Elia, ei akaariu mai i te ngakau o te aronga metua ki te tamariki, e te aronga akarongo kore ki te pakari o te aronga tuatua-tika ra; ei akonokono i tetai pae tangata e tau no te Atu.”​—Luka 1:14-17.

Kua ui atu a Zakaria e: “Eaa au e kite ei i te reira? e tangata metua oki au, e kua ruaine katoa taku vaine.” Kua pau atu te angera e: “Ko Gaberiela au, e tu au i mua i te aroaro o te Atua; i tonokia mai nei au e tuatua kia koe, e akakite kia koe i taua tuatua meitaki nei. E i na, ka akamurareia koe, e kare e tau i te tuatua, e tae ua atu ki te rā e ope ei teianei tuatua i te tupu, ko koe kare i akarongo i taku tuatua nei, ka tupu ïa kia tae ki tona tuatau.” I te aere anga mai a Zakaria ki vao mei te nao, kare i rauka iaia i te tuatua, e kua manako te tangata e kua kite ana aia i tetai orama. Te ka rauka ua iaia i te rave koia oki ko te maani anga i te au akairo, te taangaanga anga i te rima kia akakite i tona au manako. I te akamutu anga tana angaanga papuriki, kua oki atu aia ki te kainga.​—Luka 1:18-23.

Te Tumu no te Rekareka

Kia tika i tei totouia, kare i roa ana e tumu to Elisabeta no te rekareka anga. Kua nui maira aia, te akakore anga i te akakino no te pa. Kua rekareka katoa tetai i tona kopu tangata ko Maria, no te mea kua akakite katoa taua angera, ko Gaberiela ra, kiaia e: “E i na, ka to oki koe, e ka anau taau tamaiti, e naau e tapa i te ingoa ia Iesu. Ka maata aia, e ka tuatua ia i te Tamaiti na Tei Teitei: e na te Atu ra, na te Atua e oronga mai i te terono o tona metua o Davida nona.” Kua puareinga ua a Maria i te apai i te reira akakoroanga ei ‘tavini no te Atu.’​—Luka 1:24-38.

Kua aere viviki atura a Maria ki ko i te are o Zakaria e Elisabeta i tetai oire i te pae enua maunga o Iudea. I te akarongo anga i te aroa a Maria, kua rere iora te tamaiti i roto i to Elisabeta kopu. I raro ake i te akakeu anga a te vaerua tapu o te Atua, kua kapiki ua maira te reo o Elisabeta e: “Ko koe tei meitaki i te au vaine nei, e e meitaki oki te uanga o toou kopu. No te aa ra oki au i kiteia mai ei, i aere mai ei te metua vaine o taku Atu kiaku nei? I na oki, tei te o anga mai to reo i te aroa anga mai iaku nei ki roto i toku taringa, kua rere io nei te tamaiti i roto i toku kopu i te rekareka. E ao oki tona to tei akarongo, e akatupuia oki te au mea ta te Atu i akakite mai kiaia ra.” Kua akarongo atu a Maria ma te rekareka maata. Kua noo atura e toru marama ki ko ia Elisabeta.​—Luka 1:39-56.

Kua Anauia a Ioane

Kare i roa ana kua anauia tetai tamaiti ki nga ruaine ko Elisabeta e Zakaria. I te varu o te ra, kua peritomeia te pepe. Kua inangaro te kopu tangata i te kapiki i te tamaiti ko Zakaria, inara kua tuatua atu a Elisabeta e: “Eiaa, e tapa ra iaia ia Ioane.” Kua akatika ana ainei tana tane kare e rauka i te tuatua? I runga i tetai toka tataanga tuatua kua tata aia e: “Ko Ioane tona ingoa.” I reira rai, kua akamataraia to Zakaria arero, e kua akamata aia i te tuatua, i te akameitakianga i te Atua.​—Luka 1:57-66.

Te ki anga i te vaerua tapu, kua totou rekareka iora te taunga. Kua tuatua aia e i te mea e kua akatu takereia te Akaora tei taputouia​—‘i tetai tara akaora i te kopu tangata o Davida’​—kia rotai ma te koreromotu a Aberahama no runga i te Uanga ei akameitakianga no te au pa enua ravarai. (Genese 22:15-18) Ei akateateamamaoanga na mua no te Mesia, ko ta Zakaria uaorai tamaiti temeio tei anauia ka ‘na mua i te mata o te Atu i te aere, ei akakite i te tangata i te kite no te ora.’ I te au mataiti e pati ra, kua tupu a Ioane e kua matutu i te pae vaerua.​—Luka 1:67-80.

Tutakiia ma te Puapinga

E nga akatauanga meitaki tikai a Zakaria raua ko Elisabeta i te akarongo e te akakoromaki. Kua rave ua atu raua i te tavini tiratiratu ia Iehova noatu e ka tiaki raua ki rungao i te Atua, e ta raua au akameitakianga maata kua aere anake mai i to raua pakari anga.

Inara, mei teaa ra te au akameitakianga ta Elisabeta raua ko Zakaria i rekareka! I raro ake i te akakeu anga a te vaerua o te Atua, kua totou raua roaʼi. Kua akameitakiia raua kia riro mai ei nga metua ei nga tangata ikuiku o te akateateamamaoanga na mua o te Mesia, ko Ioane Papetito. Pera katoa, kua akara te Atua i raua ei tuatua tika. Pera rai, te aronga i teia tuatau te kimi ra i te aerenga tu Atua ka rauka te turanga tuatua tika ma te Atua e ka rauka te au tutaki anga e manganui no te aaereanga apakore ua i roto i te au akauenga a Iehova.