Pene 6

Te Tamaiti o te Taputou

KARE i oki atu ki Nazareta, kua noo mai rai a Iosepha raua ko Maria i Betelehema. E i te tae anga kia varu ra to Iesu pakari, kua peritome atura raua iaia, mei ta te Ture a te Atua kia Mose i akaue atura. E i te akaraanga ko te peu katoa ia kia oronga atu i te ingoa no te pepe i te ra varu. No reira kua tapa raua i ta raua tamaiti ia Iesu, mei ta te angera ko Gaberiela i akaue atu i mua akera.

E tere atu i te marama i topa, e kua 40 ra to Iesu pakari. Kua rave atu tona nga metua iaia ki ea? Ki te iero i Ierusalema, e toko iti ua maire mei to raua ngai nooanga. Kia tau ki ta te Atua ra Ture kia Mose, e 40 ra i muri ake i te anau anga i tetai tamaroa, te umuumuia ra te metua vaine kia apai atu i te atinga tama anga i te iero.

Ko ta Maria ia i rave. Ei atinga nana, kua apai atu aia e rua manu rikiriki. Te akakite maira teia i te turanga o Iosepha raua ko Maria i te pae o te apinga. Te akakite maira te Ture a Mose e ei toa punua mamoe, tei maata atura tona puapinga i to nga manu rere ra, ko te reira e apai atu. Inara me kare a te metua vaine ra, kia rua kukupa i reira, e kare ra, e rua punua rupe kua rava ia.

I te iero ra kua ikiiki iora tetai tangata ruaine ia Iesu. Ko Simeona tona ingoa. Kua akakite te Atua kiaia e kare aia e mate i mua ake ka kite ei aia i ta Iehova Mesia i taputouia maira, me kare tei akatainuia ra. I to Simeona aerenga ki te iero i te reira ra, kua aratakiia aia e te vaerua tapu ki te tamaiti te apaiia atura e Iosepha raua ko Maria.

Ia Simeona e mou ra ia Iesu kua akameitaki aia i te Atua, na ko atura: “E taku Atu e, e tuku koe i toou tavini i teianei ma te au, kua tau oki i taau tuatua; kua kite akenei oki toku mata i te Ora naau, I akonoia e koe ki mua i te mata o te tangata katoa nei; Ei turama, ei akamārama mai i te au etene, e ei kakā oki no toou iti-tangata no Iseraela.”

Kua umere a Iosepha raua ko Maria i te rongo anga i te reira. Ei reira a Simeona i akameitaki atu ei ia raua e kua na ko atura kia Maria e “kua tukuia [tana] tamaiti nei, ei mea e ingaʼi, e e tu akaou ei, to Iseraela e manganui” e ka ko te mii i tona meta mei te puta koke ra.

I reira katoa i taua atianga ra ko tetai peroveta vaine e 84 ona mataiti, ko Ana tona ingoa. Ko te tika ra, kare rava aia i kore ana i te iero ra. I tera ora tikai kua akavaitata maira aia e kua akameitaki atura i te Atua ma te tuatuaanga no Iesu ki te katoatoa tei akarongorongo maira.

E rekareka tikai to Iosepha raua ko Maria i teia au mea i tupu i te iero ra! E tika tikai, ko teia au mea pouroa e akapapu anga anake kia ratou e ko teia tamaiti ko Tei Totouia mai ia e te Atua ra. Luka 2:​21-38; Levitiku 12:​1-8.

▪ Ko teea tikai te tuatau tau i te peu a to Iseraela no te tapa anga i te ingoa o te pepe tamaroa?

▪ Eaa tei umuumuia ra i te metua vaine Iseraela me tae tana tamaroa i te 40 ra tona pakari, e i akapeea te akatupuanga i te reira akauenga i te akakite mai anga i te turanga o Maria i te pae o te apinga?

▪ Koai tei kite i te akataka anga ia Iesu i te reira atianga, e akapeea ta raua akaari anga i te reira?