Kua Akaperepere Ravaia Aia e Iehova

“KIA ora koe, e tei akaperepere ravaia mai e! tei ia koe te Atu.” Mei teaa ra te turouanga! Ko tei tuatua ra kare i tetai atu mari ra ko te angera Gaberiela. Te tuatua ra aia ki tetai vaine ou ma te ngakau akaaka​—ko Maria, e tamaine na tetai tangata ko Eli. Ko te mataiti e 3 M.T.N., e te ngai ko te oire o Nazareta.​—Luka 1:26-28.

Kua taputouia a Maria kia akaipoipo ia Iosepha te tangata kamuta. E tau ki te ture e te peu a te ngati Iuda, kua akaraia aia ei vaine akaipoipo nana. (Mataio 1:18) Mei iaia rai, e turanga akaaka tona i te oraanga. Eaa ra, i reira, te angera ka tuatuaʼi kiaia mei tetai tei akaperepere ravaia ra?

Tana Akameitakianga Vavaria

E kapiti atu a Gaberiela e: “Auraka e mataku, e Maria; kua kite aroaia mai koe e te Atua. E i na, ka to oki koe, e ka anau taau tamaiti, e naau e tapa i te ingoa ia Iesu. Ka maata aia, e ka tuatuaia i te Tamaiti na Tei Teitei: e na te Atu ra, na te Atua e oronga mai i te terono o tona metua o Davida nona: Ei iaia te au i te kopu-tangata o Iakoba e tuatau ua atu, kare rava ïa e kore tona basileia.”​—Luka 1:29-33.

Ma te poitirere e te manamanata, kua ui atura a Maria e: “Eaa e tikaʼi; kare oki au i kite i te tane?” Kua pau maira a Gaberiela e: “Ka eke mai te Vaerua Tapu ki rungao ia koe, e na te mana o Tei Teitei e tamaru i rungao ia koe; e tuatuaiaʼi oki tenana tamaiti tapu, i te Tamaiti na te Atua.” Ei akakore atu i te au ekoko anga, e kapiti atu te angera e: “E i na oki, to tuakana ko Elisabeta, kua to katoa aia i tana tamaiti i tona ruaine anga nei: ko te ono oki teia o tona marama, ko tei tuatuaia ra e, e pa. Kare rava oki e mea e kore e tika i te Atua.”​—Luka 1:34-37.

E ariki viviki a Maria i teia akameitakianga vavaria no te tavini. Ma te arikianga tu akaaka, kua pau atura aia e: “I na, ei tavini au no te Atu; kia peraia mai au mei taau i tuatua ana.” I reira, e aere atura a Gaberiela. E akaviviki atu a Maria ki tetai oire i te ngai maunga o Iudea. I te tae anga ki te kainga o te taunga ko Zakaria e tana vaine, ko Elisabeta, e kite atura aia i te turanga tikai mei ta te angera i akatutu ra. Mei teaa te rekareka anga i te akaki anga i to Maria ngakau! E pupu mai mei tona vaa te au tuatua akapaapaa ia Iehova.​—Luka 1:38-55.

Riro Mai Aia ei Vaine na Iosepha

Na tetai paretenia e oronga mai i to Iesu kopapa tangata, ko te reira anau anga kua totouia. (Isaia 7:14; Mataio 1:22, 23) Inara eaa ra ka umuumuiaʼi tetai paretenia tapaoia? E rauka mai ei tetai metua tane angai te ka akakite ki te tamaiti i te tikaanga tau ki te terono o te Ariki ko Davida. No roto mai a Iosepha e Maria i te kopu o Iuda e uanga raua no te Ariki ko Davida. I reira e akatumu tikaiiaʼi te tikaanga ariki o Iesu. (Mataio 1:2-16; Luka 3:23-33) Ko teia te tumu i akapapu ei te angera kia Iosepha i muri mai e auraka aia e taroaroa i te apai ia Maria ei vaine tikai nana, noatu e nui aia.​—Mataio 1:19-25.a

No te ture tero ta Kaisara Auguso i tuku i riro ei ei apainga na Iosepha e Maria kia retita i Betelehema. Koi vai ei ki reira, kua anau aia i tana tamaroa mua. E aere mai te au tiaki mamoe i te akara i te pepe, e kua oronga ratou i te akapaapaa anga ki tona Metua, ko Iehova. I muri ake i te 40 ra no te tama anga kia tau ki te Ture a Mose, aere atura a Maria ki te iero i Ierusalema kia rave i te tapokianga no tana au ara. (Levitiku 12:1-8; Luka 2:22-24) Ae, i te mea e kare aia i anau ara koreia mai, e no reira kare i matara mai mei te kino o te ara, ka tau tona au tu ara natura kia tapokiia na te au atinga tapokianga.​—Salamo 51:5.

Ia Maria e Iosepha i te iero, kua akameitakiia a Simeona ruaine ra e te peroveta vaine pakari ko Ana i te kite i te Tamaiti a te Atua. Kare a Maria i te mea puapinga maata. (Luka 2:25-38) I muri mai, akapaapaa atura te au tangata pakari ia Iesu kare iaia.​—Mataio 2:1-12.

I muri ake i te oroanga ki Aiphiti e te nooanga i reira e tae ua atu ki te matenga o Heroda kino ra, e oki atura to Iesu nga metua e kua noo i roto i te vira meangiti ko Nazareta. (Mataio 2:13-23; Luka 2:39) E i reira a Iosepha raua ko Maria i utuutu ei ia Iesu i te au turanga pamiri tu Atua.

E Tamariki Ke Atu ta Maria

Kare i roa ana, kua oronga mai a Maria raua ko Iosepha i te au teina e te au tuaine natura no Iesu. I te apai anga mai ta Iesu angaanga orometua iaia ki tona oire kainga ko Nazareta, kua maaraia aia e tona au oa mei te tamariki anga mai. “Kare aina teia te tamaiti a te kamuta ra?” i ui ei ratou. “E kare aina ko Maria te ingoa o tona metua vaine? e ko Iakobo, ko Iose, ko Simona, e ko Iuda tona au taeake? E kare aina te noo nei tona au tuaine ki o tatou nei?” (Mataio 13:55, 56) Te tuatua ra te au Nazareta i te pamiri tikai o Iosepha e Maria, kapiti mai tana au tamaroa e te au tamaine tei kite ratou e e au teina e te au tuaine natura no Iesu.

Kare teia au teina e te au tuaine i to Iesu au katini. E kare katoa ratou i te au pipi nana, me kore te au teina e te au tuaine pae vaerua, no te mea kua akataka ua mai a Ioane 2:12 i te tuke i teia nga pupu e rua na te tuatuaanga e: “Aere atura aia [ko Iesu] ki Kaperenauma, koia ma tona metua vaine, tona au taeake, e tana au pipi.” E au mataiti i muri mai i Ierusalema, kua kite atu te apotetoro Paulo ia Kepha, me kare Petero, e kua tuatua: “Kare au i kite i tetai atu au apotetoro; kua kite ua rai au ia Iakobo, te teina o te Atu ra.” (Galatia 1:19, The Jerusalem Bible) No reira, ko te tuatua e “kare ra [a Iosepha] i rave atu [ia Maria], e anau ua maira tana tama mua” te akakite maira e kua piri te metua tane angai o Iesu kiaia i muri ake e i metua mai ei i tetai atu o tana tamariki ra. (Mataio 1:25) E no reira, a Luka 2:7 i kapiki ei ia Iesu e ko tana tamaroa “tama mua.”

E Metua Vaine Mataku i te Atua

Ei metua vaine mataku i te Atua, e taokotai ana a Maria ma Iosepha i te ikuikuanga i tana tamariki i te tuatua tika. (Maseli 22:6) Te kiteaia ra aia ei vaine apii aruaru i te au Tuatua Tapu no tana tuatua puapinga i te pae vaerua i tona aravei anga ia Elisabeta. I te reira taime kua ripiti ua te metua vaine o Iesu i te au manako mei te imene a Hana e kua akaari atu i te kite i te au taramo, te au tataanga tuatua enua e te au totou, e te au puka a Mose. (Genese 30:13; 1 Samuela 2:1-10; Maseli 31:28; Malaki 3:12; Luka 1:46-55) Kua tamou ngakau a Maria i te au tupu anga e te au tuatuaanga totou, te akaperepere ia ratou i tona ngakau e te akamanako anga ia ratou i tona manako. E no reira kua papa meitaki aia i te orongaanga i te ikuiku anga metua ki te tamaiti ko Iesu.​—Luka 2:19, 33.

Ko Iesu e 12 ona mataiti tei apii meitakiia ra, kua akaari i te kite Tuatua Tapu tei akapoitirere i te au tangata kite i te iero. I te takakeanga aia mei tona nga metua i te tuatau Pasa, kua karanga atura tona metua vaine e: “E tama, eaa koe i pera mai ei kia maua? i na, i kimi ua ana au ma toou metua tane ia koe ma te aue.” Kua pau maira a Iesu e: “Eaa korua i kimi ei iaku? kare korua i kite e, ei roto rai au i te are o taku Metua e tau ei?” Te marama kore anga i te aiteanga o teia pauanga, kua tamou a Maria i te reira ki roto i tona ngakau. I te oki anga ki Nazareta, e tupu atura a Iesu “i te maata anga e te pakari, e te akaperepereia mai e te Atua e te tangata katoa.”​—Luka 2:42-52.

Maria ei Pipi na Iesu

Mei teaa ra te tau i te riro anga mai a Maria ei pipi akonoia na Iesu! E akaaka aia e kare ona inangaro kia akateiteiia aia no tana tukuanga umere rava no te Atua maira. Kua kite a Maria i te au Tuatua Tapu. Me kimi koe i te reira, kare koe e kite iaia e akatutuia ra ma tetai aro, te noo ra ki runga i tetai terono ei “metua vaine ariki” e tei tamaruia i te kaka o Karaiti. Inara ka kite koe iaia i muri roa, tei mamao ra mei te ngai akateiteiia.​—Mataio 13:53-56; Ioane 2:12.

Kua tapu a Iesu i te akamata anga o te akamorianga ia Maria i rotopu i tana au pipi. Koi tuatua ra aia i tetai atianga, kua “kapiki maira tetai vaine mei tei putuputu maira, ‘E akameitakiia te kopu tei anau ia koe e te u tei utuutu ia koe!’ ‘Inara,’ tana i pau mai, ‘e akameitakiia te aronga tei akarongo ki te tuatua a te Atua e tei rave tamou ra i te reira.’” (Luka 11:27, 28, The New American Bible, tei uriia e te au mema o te Taokotai Anga Puka Tapu Katorika o Marike) I tetai kaikai anga akaipoipo, kua akakite atura a Iesu kia Maria e: “Eaa taau iaku nei, e maine? kare i tae ki toku ora.” (Ioane 2:4) Te tatau ra etai au uri anga e: “E akaruke i te mea nei i toku rima.” (Weymouth) “Auraka e tauta i te akatere mai iaku.” (An American Translation) Ae, kua akangateitei a Iesu i tona metua vaine, tera ra kare aia i akamori ana iaia.

Te Au Akameitakianga Mutu Kore

Mei teaa ra te au akameitakianga ta Maria i rekareka! Nana i anau mai ia Iesu. E kua akono e te tereni atura aia i te tama ou. I te openga iora, kua akono aia i te akarongo, te riroanga mai ei pipi e ei tuaine pae vaerua na Karaiti. I to tatou kite anga openga ia Maria i roto i te Tuatua Tapu, te kite ra tatou iaia i roto i tetai pia i runga i Ierusalema. Tei reira aia ma te au apotetoro a Iesu, tetai atu au tamaroa nana, e etai vaine tiratiratu​—e aronga akamori pouroa ia Iehova.​—Angaanga 1:13, 14.

E tae te tuatau, kua mate a Maria e kua oki atura tona kopapa ki te one pueu. Mei tetai atu au pipi mua tei akatainuia e tana tamaiti akaperepere ra, kua moe aia na te ara tiroa o te mate e tae ua atu ki to te Atua tuatau tau no te akatu mai iaia ei mea vaerua ma te ora mutu kore i te rangi ra. (1 Korinetia 15:44, 50; 2 Timoteo 4:8) Mei teaa ra te mataora i teianei o “tei akaperepere ravaia” i mua i te aroaro o te Atua ko Iehova e Iesu Karaiti!

[Au Tataanga Rikiriki i Raro]

[Tutu i te kapi 31]

Kua akaperepere ravaia a Maria ei metua vaine no Iesu