Pene 7

A Iesu e te Aronga Akara Etu

KUA aere mai etai tangata no te Itinga o te ra mai. E aronga akara etu ratou​—⁠te karanga ra ratou e ka kite ratou i te akakite i te turanga o te au etu. Ia ratou i to ratou kainga i te Itinga o te ra, kua kite ratou i tetai etu ou, e kua aru mai ratou i te reira no etai anere maire e tae roa mai ki Ierusalema.

I te taenga mai taua aronga akara etu ra ki Ierusalema, kua ui ratou: “Teiea te Ariki anau ou o te ngati Iuda nei? kite akenei oki matou i tona etu i te itinga o te rā, i aere mai nei matou e araara atu iaia.”

I te akarongo anga te Ariki ko Heroda i te reira i Ierusalema, kua taitaia roa aia. No reira kua akaputu maira aia i te kau taunga nunui e kua ui atura kia ratou i te ngai e anau ei te Mesia. Na te akanooanga i ta ratou pauanga ki runga i te au Tuatua Tapu ra, kua pau ratou: “Ei Betelehema.” I reira, kua pati atura a Heroda kia aratakiia mai taua aronga akara etu ra kiaia e kua na ko atura kia ratou: “Ka aere ka kimi marie i taua tamaiti iti ra; e kia kitea atu ia kotou, e oki mai, e akakite mai kiaku, kia aere katoa atu au e araara atu iaia.” Inara, ko ta Heroda tikai e anoano ra kia kitea te tamaiti ra e kia tamate iaia!

I muri ake i to ratou akaruke anga, e mea umere tikai tetai tei tupu. Te etu ta ratou i kite ra ia ratou i te Itinga o te ra, kua aere na mua ia ratou. E mea taka meitaki, e kare teia i te etu noa ua nei, mari ra kua oronga tikaia mai te reira ei arataki ia ratou ra. Kua aru tamou atu ra taua aronga akara etu ra i te reira e tae roa kia tapu i runga ake i te are tikai, te ngai e noo ra a Iosepha raua ko Maria i reira.

I te tomo atu anga taua aronga akara etu ra ki roto i te are, kua kite atura ratou ia Maria, ma tana tamaiti ou, koia a Iesu. I reira kua tupou ratou katoa kiaia. E kua kiriti akera ratou i te au apinga taoonga rima no roto i ta ratou pute, te auro, te tapou kakara, e te manongi. I muri akera, e kua vaitata ratou i te oki e akakite atu kia Heroda i te ngai te vai ra te tamaiti, kua akamatakite te Atua ia ratou na roto i te moemoea e auraka e rave i te reira. No reira kua oki atu ratou ki to ratou uaorai enua na tetai mataara ke.

Naai i toou manako i oronga mai i te etu tei aere ra i te rangi ei arataki i te aronga akara etu ra? Kia maara, e kare taua etu ra i arataki tika atu ia ratou kia Iesu i Betelehema. Mari ra, kua aratakiia atu ia ratou ki Ierusalema te ngai i aravei ra ratou i te Ariki ia Heroda, koia tei anoano ra kia tamateia a Iesu. E ka rave aia i te reira naringa kare te Atua i takai atu ki roto i te akamatakite anga i taua aronga akara etu ra e auraka e akakite kia Heroda i te ngai i reira ra a Iesu. Ko te enemi o te Atua, koia a Satani te Tiaporo, tei anoano ra kia tamateia a Iesu, e nana i taangaanga i taua etu ra ei akatupu i tona akakoroanga. Mataio 2:​1-12; Mika 5:⁠2.

▪ Eaa te akaari maira e ko te etu ta te aronga akara etu i kite ra e kare ia i te etu noa ua nei?

▪ I ea a Iesu i te kitea anga e taua aronga akara etu ra?

▪ Eaa tatou i kite ei e na Satani i oronga mai i te etu ra ei arataki i te aronga akara etu ra?