Pene 14

Ta Iesu au Pipi Mua

I MURI ake i te 40 ra i te metepara, kua oki atura Iesu kia Ioane, tei papetito ra iaia. I tona vaitata atu anga, i te akara anga kua tou atura Ioane kiaia e kua na ko atura ki te aronga i reira: “Ka akara na i te Punua-mamoe a te Atua, ko tei apai ke atu i te ara a to te ao! Koia teia taku i karanga ra e, te aere mai nei tetai tangata i muringao iaku nei, e kua riro aia i mua iaku: ko mua rai oki aia iaku.” Noatu rai e e pakari atu tona mataiti i tona katini ia Iesu, kua kite a Ioane e i ora ana a Iesu i mua ake iaia, ei peretana vaerua i te rangi ra.

Inara, i nga epetoma tokoiti ua i mua akera, i to Iesu aere anga kia papetitoia, penei kare a Ioane i kite papu e ka riro ko Iesu te Mesia. “Kareka au, kare au i kite iaia,” ta Ioane ia i akakite mai, “kia kitea ra aia e to Iseraela, i aere mai ei au e bapetizo ki te vai nei.”

Kua rave ua atura Ioane i te akataka anga ki te aronga tei akarongo ra iaia e eaa tei tupu i tana papetito anga ia Iesu: “Akara atura au i te Vaerua i te eke anga mai mei te rangi mai, mei te kukupa ra te tu, e kua noo iora ki runga iaia. Kare ra au i kite iaia, auraka tei tono mai iaku e bapetizo ki te vai nei, i karanga mai kiaku nei e, Ko taau e akara i te Vaerua i te eke anga mai, e te noo anga ki runga iaia, koia ïa, ko te ka bapetizo ïa ki te Vaerua Tapu. Kite atura oki au, e akakite atura oki au e, ko te Tamaiti teia na te Atua.”

I tetai ra mai te tu ua ra a Ioane ma tana nga pipi e rua. E, i to Iesu vaitata atu anga, kua na ko akera aia: “Ka akara na i te Punua-mamoe a te Atua!” Ei reira, kua aru atura aua nga pipi a Ioane Papetito ra ia Iesu. Ko Anederea tetai, e ko tetai ko te tangata tikai i tataiaʼi teia au mea nei, ko Ioane katoa oki tona ingoa. Ko teia Ioane, i ta te au akakitekite anga, e katini katoa aia no Iesu, penei e tamaiti na te teina o Maria, koia a Taromi.

I to Iesu anga mai anga ki muri e te kiteanga ia Anederea raua ko Ioane i te aru anga iaia, kua ui maira Iesu: “Eaa ta korua e kimi nei?”

“E Rabi,” ta raua i karanga atu, “e noo koe kiea?”

“Ka aere mai ka akara,” ta Iesu ia i pau atu.

Kua vaitata i te ora a i te avatea aiai, e kua noo atura a Anederea raua ko Ioane ia Iesu no te toenga atu o taua ra ra. I muri akera no te rekareka maata a Anederea kua aere viviki atura e kimi i tona taeake, ko tei tapaia ia Petero. “Kua kitea ia maua te Mesia,” tana i akakite atu kiaia. E kua arataki maira aia ia Petero kia Iesu. Penei i te reira taime tikai kua kitea e Ioane tona taeake koia Iakobo e kua arataki mai iaia kia Iesu, inara, kare ua a Ioane i tata i teia au tumu nona uaorai ki tana evangeria.

E ao akera, kua aravei akera a Iesu ia Philipa, no Betesaida aia, ko te oire katoa ia no reira mai a Anederea raua ko Petero ra. Kua karanga atura aia kiaia: “Ka aru mai iaku.”

E aravei akera oki a Philipa ia Natanaela, ko tei tapa katoaia ia Baratolomea, kua karanga atura: “Kua kitea e matou ta Mose i tata ki roto i te ture ra, e ta te au peroveta ra, ko Iesu i Nazareta, e tamaiti na Iosepha.” Kua ekoko a Natanaela. “E meitaki ainei to Nazareta mai?” ko tana ia i karanga atu.

Kua raurau atura Philipa: “Ka aere mai ka akara.” Ia raua e aere maira kia Iesu, kua tuatua iora Iesu ia Natanaela: “Ka akara na i te ngati Iseraela tikai, kare ua e pikikaa o roto iaia.”

“Noea to kite iaku?” ta Natanaela ia i ui atu.

Kua na ko atura Iesu: “I mua uake i ta Philipa karanga atu anga ia koe, i raro ake koe i te suke, kua akara atura au ia koe.”​—⁠NW.

Kua umere a Natanaela. E kua tuatua maira: “E Rabi [Puapii tona aiteanga], ko te Tamaiti koe a te Atua; ko te Ariki koe o Iseraela.”

“No te mea i karanga atu au kia koe na e, te akara atura au ia koe i raro ake i te suke ra, i akarongo ei koe?” ta Iesu i ui atu kiaia. “E mea ngiti tena i taau ka kite a muri nei.” Ei reira kua taputou atura aia: “Tika, tika tikai taku e karanga atu kia kotou, Teia kotou ka kite i te rangi i te mavete anga, e te au angela a te Atua i te kake anga atu, e i te eke anga mai, i runga i te Tamaiti a te tangata nei.”

I muri poto ake i te reira, kua akaruke atura Iesu ma taua aronga pipi ou nana ra, i te O i Ioridana e kua aere atu ki Galilea. Ioane 1:​29-51.

▪ Koai te au pipi mua a Iesu ra?

▪ Akapeea a Petero, penei ma Iakobo katoa i te akaaravei angaia kia Iesu?

▪ Na teaa i akapapu i te manako o Natanaela e ko te Tamaiti a te Atua a Iesu ra?