Pene 16
Maroiroi no te Akamori ia Iehova
KO NGA apa taeake no Iesu—koia etai atu tamaroa a Maria ra—ko Iakobo, ko Iosepha, ko Simona, e Iuda. I mua ake ka aere atu ei ratou ma Iesu e tana au pipi katoa ki Kaperenauma, e oire i vaitata i te Tai o Galilea ra, penei kua tapu atu ratou i to ratou kainga i Nazareta no te akapapa te ngutuare tangata i te au apinga ta ratou ka anoano.
Inara eaa a Iesu i aere ei ki Kaperenauma e kare i rave ua atu i tana angaanga orometua i Kana, i Nazareta ra, me kare i tetai atu ngai i te au maunga i Galilea ra? Ko tetai tumu, no te mea e meitaki atu to Kaperenauma tu e e oire maata atu oki ia. Pera katoa, ko te maata anga ta Iesu au pipi ou te noo ra i Kaperenauma me kare i vaitata ua ki reira, no reira kare ratou e akaruke i to ratou au kainga kia raukai iaia te apii ia ratou ra.
I tona nooanga ki Kaperenauma, kua rave a Iesu i te au angaanga umere, mei tana i akakite mai i etai marama i muri akera. Inara kare i roa ana kua aere akaou a Iesu e tona au oa i runga i te mataara. Ko te tuatau tupu anga rau ia, e te aere atura ratou ki Ierusalema ki te Pasa o te 30 T.N. Ia ratou i reira ra, kua kite tana au pipi i tetai tu no Iesu tei kore ratou i kite i mua ana.
Kia tau ki te ture a te Atua, te umuumuia ra to Iseraela kia tuku i te au atinga manu. No reira, kia ngoie uaʼi no ratou, kua rave te aronga okooko i Ierusalema ra te oko i te au manu a vaevae e te au manu rere katoa oki no te reira akakoroanga. Inara te oko ra ratou i roto tikai i te iero ra, e te pikikaa ra i te au tangata na te akakake anga i te moni oko kia ratou.
I te ki anga i te riri, kua anga iora a Iesu i te taura ei papa e kua tuaru atura i te aronga oko ki vao. Kua riringi atura i te moni a te aronga oko ra e kua akatauri atura i ta ratou au kaingakai. “Apai ke atu i tena au apinga”! ko tana ia i kapiki atu ki te aronga i oko i te kukupa ra. “Eiaa e akariro i te are o taku Metua ra, ei are oko anga apinga”!
I te kite anga ta Iesu au pipi i te reira, kua manako akera ratou i te totou no te Tamaiti a te Atua ra: “Kua pou roa au i te maroiroi i toou are.” Inara kua ui atura te ngati Iuda: “Eaa taau akairo e akakite mai, i akapera mai ei koe? Kua karanga atura a Iesu: “Ka vavaʼi ua na i teianei nao, e kia po toru ake, kua tu akaou ïa iaku.”
Kua manako te ngati Iuda e te tuatua ra a Iesu no te nao tikai, e kua ui maira ratou: “E a ngauru ma ono te mataiti i te akatu anga i teianei nao; e ka tu akaou ia koe i te po toru?” Inara te tuatua ra a Iesu no tona kopapa ko te nao ia. E toru mataiti i muri iora, kua manako akaou tana au pipi i teia tuatua nana i tona akatuia mai anga mei te mate maira. Ioane 2:12-22; Mataio 13:55; Luka 4:23.
▪ I muri ake i te akaipoipoanga i Kana ra, kua aere atu a Iesu ki teea au ngai?
▪ Eaa a Iesu i riri ei, e eaa tana i rave?
▪ Eaa ta te au pipi a Iesu i manako i te kiteanga i tana angaanga?
▪ Eaa ta Iesu i tuatua no “teia nao,” e eaa te aite anga o tana tuatua?