“Kare Akera i Tae i Tona Ora”

“Kare ra e tangata i rave ua atu te rima iaia, no te mea kare akera i tae i tona ora.”​—IOANE 7:30.

1. Eaa nga tumu e rua kua akatere tikaia ta Iesu angaanga i rave ra?

“KARE oki te Tamaiti a te tangata i aere mai kia taviniia tona, ei tavini ra, e kia orongaia tona ora ei oko no te tangata e manganui,” ta Iesu i tuatua ki tana au apotetoro. (Mataio 20:28) Kua tuatua aia ki te kavana o Roma kia Ponotio Pilato: “I anau mai ei au nei, i aere mai ei au ki te ao nei, e akakite i te tuatua-mou.” (Ioane 18:37) Kua kite pu tikai a Iesu e eaa aia ka mate ei e eaa te angaanga ka umuumuia aia kia rave i mua ake i tona matenga. Kua kite katoa oki aia e eaa te maata o te tuatau nona kia akatupu i tana angaanga. Tana angaanga orometua ki runga i te enua nei ei Mesia e toru ua e te apa mataiti te roa. Kua akamata te reira i tona papetito angaia i te vai i te Kauvai i Ioridana (i te 29 T.N.) i te akamata anga te 70 epetoma akatutu tei totouia maira e kua akaopeia oki ma tona matenga ki runga i tetai rakau tamamae anga ra i rotopu i taua epetoma ra (i te 33 T.N.). (Daniela 9:​24-27; Mataio 3:​16, 17; 20:​17-19) No reira, ko ta Iesu rave anga angaanga katoa ki runga i te enua nei kua akatere tikaia na nga tumu e rua ra: te akakoroanga no tona aere maianga e tetai tu tikai no taua tuatau kotingaia ra.

2. Akapeea te akatutu angaia a Iesu Karaiti i roto i nga Evangeria ra, e akapeea tana akaari matakite anga i tana angaanga?

² Te akatutu maira nga Evangeria tataia ra ia Iesu e ko tetai tangata angaanga tei tutaka aere ra i te tiroa e te tipoto o te enua o Paretaina, i te akakiteanga i te tuatua meitaki o te Patireia o te Atua ra e te raveanga i te au angaanga mana e manganui. I te tuanga mua o ta Iesu angaanga orometua ririnui ra, te tuatuaia ra nona e: “Kare akera i tae i tona ora.” Kua tuatua a Iesu uaorai e “kare akerai i tae ki toku ora tikai.” I te vaitata anga ki te openga o tana angaanga orometua ra, kua taiku aia i te tuatua e “kua tae ki te ora.” (Ioane 7:​8, 30; 12:23) No to Iesu matakite i te ora, me kare te tuatau no tana angaanga akapapaia ra, kapiti katoa i tona matenga ei atinga, kua akatupu tikai i tana i tuatua e i rave oki. Te kiteanga i teia ka oronga mai i te kite oonu kia tatou i tona tu tangata e te akara anga no tona manakoanga, ma te tauturu anga ia tatou ‘kia aru i tona takainga vaevae’ kia piri vaitata atu.​—1 Petero 2:21.

Tamanako Tikai kia Rave i to te Atua Anoano

3, 4. (a) Eaa tei tupu i tetai kaikai akaipoipoanga i Kana? (e) Eaa te Tamaiti a te Atua i reka kore ei ki ta Maria manako anga e ka tau aia kia rave te apinga no te ngereanga i te uaina, e eaa ta tatou ka kite mei teianei?

³ E 29 T.N. te mataiti. E tokoiti ua nga ra i topa i muri ake i ta Iesu uaorai iki anga i tana au pipi mua ra. Kua aere katoa mai ratou ki te vira o Kana i te tapere o Galilea ki tetai akaipoipoanga. Tei reira katoa te metua vaine no Iesu ko Maria. E pou akera te uaina. I te manakoanga e ka tau kia rave aia i tetai apinga, kua tuatua maira a Maria ki tana tamaiti: “Kare a ratou wina.” Inara kua karanga atura Iesu kiaia: “Eaa taau iaku nei, e maine? kare i tae ki toku ora.”​—Ioane 1:​35-51; 2:​1-4.

⁴ Ta Iesu ra pauanga, “Eaa taau iaku nei e maine?” e tu uianga taito ia te akakite ra i te reka kore ki tei manakoia maira me kare e anoanoia ra. Eaa ra a Iesu i reka kore ei i ta Maria au tuatua? No te mea, e 30 mataiti aia i teianei. E tokoiti ua nga epetoma i mua akera, kua papetitoia aia, kua akatainuia ma te vaerua tapu, e kua akakiteia e Ioane Papetito ra e ko “te Punua-mamoe a te Atua, ko tei apai ke atu i te ara a to te ao!” (Ioane 1:​29-34; Luka 3:​21-23) I teianei ka tika te arataki anga iaia ra kia aere mai anake mei ko mai i te Mana Teitei tei tono maira iaia. (1 Korinetia 11:3) Kare tetai ke, noatu me ko tetai mema piri vaitata o te pamiri ra, kare e tika kia akatere atu i te angaanga ta Iesu i aere maira ki te enua kia rave. Mei teaa ra te tamanako anga kia rave i te anoano o tona Metua te akakitea maira i ta Iesu pauanga kia Maria ra! Kia aiteite katoa tatou i te tamanako anga kia akatupu i ta tatou “apainga katoa” ki te Atua ra.​—Koheleta 12:13.

5. Eaa te temeio ta Iesu Karaiti i rave i Kana ra, e eaa te tupu anga no te reira ki etai ke ra?

⁵ I te mouanga i te tumu o te au tuatua a tana tamaiti, kua viviki ua a Maria i te tapae ke e kua akaue atura i te aronga tavini ra: “Ko tana e akaue mai kia kotou, ka akapera kotou.” E kua akakore atura Iesu i taua manamanata ra. Kua akaue atura aia i te au tavini ra kia akaki i te au ariki ki te vai, e kua akariro aia i te vai ei uaina meitaki roa. Kua tupu teia ei akamata anga i ta Iesu ra angaanga mana temeio, i te orongaanga i te akairo e tei runga iaia te vaerua o te Atua. I te kite anga te pipi ou i teianei temeio, kua akamaroiroiia to ratou akarongo.​—Ioane 2:​5-11.

Maroiroi no te Are o Iehova

6. Eaa ra a Iesu i riri ei i tana i akara i te iero i Ierusalema ra, e eaa tana i rave i reira?

⁶ Kare i roaia kua tae ki te tupuanga rau i te 30 T.N., e te aere atura a Iesu ratou ko tona au oa ki Ierusalema kia akono i te Pasa. Ia ratou i reira, kua kite atu tana au pipi i to ratou Arataki i te raveanga i tetai tu penei kare ratou i kite ana iaia i te rave anga i mua ana. Te aronga ngati Iuda okooko noinoi te okooko animara ra e te au manu ei au atinga i roto tikai i te iero ra. E te pati atura ratou i te aronga akamori tiratiratu ngati Iuda ra i te au tutaki teitei roa. No te ki i te riri, kua akono atura Iesu. Kua maani aia i tetai papa taura e kua tuaru atura i taua aronga okooko ra. Ma te riringianga i te au moni a taua aronga akono moni ra; kua akatauri atura aia i ta ratou au kaingakai ki raro. “Apai ke atu i tena au apinga,” tana i akaue atu ki taua aronga okooko kukupa ra. I te kite anga ta Iesu au pipi iaia ma taua tu maroiroi ra, kua maara ratou i te totou no te Tamaiti a te Atua ra: “Kua pou roa au i te maroiroi i toou are.” (Ioane 2:​13-17; Salamo 69:9) Ka tika katoa oki tatou kia paruru maroiroi e auraka e akatika i te au peu o teianei ao kia taviivii i ta tatou akamorianga.

7. (a) Na teaa i akakeu ia Nikodemo kia aere ki te Mesia ra? (e) Eaa ta tatou i kite mei ta Iesu ra akakiteanga ki te vaine Samaria ra?

⁷ Ia ratou i Ierusalema, kua rave a Iesu i etai akairo umere, e e manganui te au tangata kua akarongo iaia. Noatu rai ko Nikodemo, e mema no te Sunederi, me kare akavaanga teitei ngati Iuda ra, kua manako maata atu ia Iesu e kua aere atu kiaia i te po kia apiiia mai. I reira, kua noo atura Iesu e tana au pipi ki te “enua Iudea” ra no etai varu marama, i te tutuanga e te akariroanga te tangata ei au pipi. Inara, i muri ake i te tapeka angaia a Ioane Papetito ra, kua akaruke mai ratou i Iudea no Galilea. I te aerenga ratou na roto i te tapere ko Samaria, kua akono atura Iesu i tetai tuatau kia akakite tika atu ki tetai vaine Samaria ra. Na teianei i akapapa i te aerenga no to Samaria e manganui kia riro ei aronga akarongo. Kia matakite katoa oki tatou i te au tuatau kia tuatua no te Patireia.​—Ioane 2:23; 3:​1-22; 4:​1-42; Mareko 1:14.

Apiianga Maata i Galilea

8. Eaa te angaanga ta Iesu ra i akamata i Galilea?

⁸ I mua ake i te “ora” o to Iesu matenga, e maata oki tana kia rave i te tavini anga i tona Metua i te rangi ra. I Galilea kua akamata a Iesu i tetai angaanga orometua maata atu i to Iudea e Ierusalema. Kua aere atura aia “na Galilea katoa e kako rava ake, i te apii anga i roto i to ratou au sunago ra, e te tuatua anga i te evangelia o te basileia, e te akaora anga i te au maki ravarai, e te au mate katoa o te tangata.” (Mataio 4:23) Tana au tuatua akaaoanga: “Ka tataraara: te vaitata mai nei oki te basileia o te ao,” tei tangi atura i taua tapere katoa ra. (Mataio 4:17) I etai marama tokoiti ua, i te aere anga mai e rua nga pipi a Ioane Papetito kia rauka tetai ripoti tikai no Iesu, kua tuatua atu aia kia raua: “Ka aere korua, e akakite atu kia Ioane i te au mea ta korua e akarongo nei, e ta korua e kite nei; e te kite nei te matapo, te aere nei te pirikoki, kua tamāia te lepera, kua akarongo te turi, kua akatuia tei mate, kua tuatuaia atu te evangelia ki te tangata rikiriki. E te kore e maitu iaku nei, e ao tona.”​—Luka 7:​22, 23.

9. Eaa te au urupu ra i aere maata atu ei kia Iesu Karaiti, e eaa te apiianga ta tatou ka rauka mai no teianei?

⁹ ‘Tutuki akera to Iesu rongo e kako rava akera taua enua ra,’ e motuanga tangata maata tei aru mai iaia no Galilea mai, no Dekapoli, no Ierusalema, no Iudea, e no te pae i te kauvai i Ioridana ra. (Luka 4:​14, 15; Mataio 4:​24, 25) Kua aere mai ratou kiaia kare no tana au rapakauanga temeio anake mari ra no tana au apiianga meitaki ra. E mareka tana tuatua e te akamaroiroianga oki. (Mataio 5:​1–​7:27) E meitaki kia arikiia ta Iesu au tuatua ra. (Luka 4:22) Kua “va ua te tangata i tana apiianga,” no te tuatua maira aia no te au Tuatua Tapu ma te mana. (Mataio 7:​28, 29; Luka 4:32) Koai te ka kore e akavaitataia atu ki taua tu tangata ra? Kia tatanu katoa oki tatou i te tu karape no te apiianga kia akavaitata mai ei te au tangata ngakau tiratiratu ra ki te tuatua mou.

10. Eaa ra te au tangata o te oire i Nazareta ra i tautai kia tamate ia Iesu, eaa ra ratou i puapinga kore ei?

¹⁰ Inara, kare te aronga akarongo katoa ra ia Iesu i ariki atu. Noatu i te akamata anga i tana angaanga orometua, i tana apiianga i tona oire kainga i te tunako i Nazareta, te vaira tetai tamata anga kia tamate iaia ra. Noatu rai kua umere te au tangata oire ra i tana “tuatua meitaki,” te anoano ra ratou kia akara temeio. Inara, kare aia i rave i te au angaanga mana e manganui i reira, kua akakite atea atura Iesu i to ratou tu noinoi e te ngere i te akarongo. I te ki anga i te riri, kua tu ake taua aronga i te tunako ra, kua mou atu ia Iesu, e kua opara atu iaia ki te nia o te maunga ra e titiri atu iaia ki raro. Inara kua aere ke atura aia i ta ratou mou anga. Kare i tae mai ake te “ora” no tona matenga.​—Luka 4:​16-30.

11. (a) Eaa ra etai arataki akonoanga i aere mai ei kia akarongo atu ia Iesu? (e) Eaa a Iesu i akaapaia no te aati anga i te Ture Tapati?

¹¹ Te au arataki akonoanga​—te aronga tata tuatua, te au Pharisea, au Sadukea e etai atura​—e putuputu te tae atu ki te ngai e tutu ra Iesu. E manganui o ratou kua aere atu ki reira, kare kia akarongo atu e kia apii, mari ra kia kimi apa e kia tauta kia ereere iaia. (Mataio 12:38; 16:1; Luka 5:17; 6:​1, 2) Ei akatauanga, i te aerenga ki Ierusalema no te Pasa o te 31 T.N., kua rapakau atura Iesu i tetai tangata tei makiia ra no te 38 mataiti. Kua akaapa atura te au arataki akonoanga ngati Iuda ia Iesu no te aatianga i te Ture Tapati. Kua pau atura aia: “Te angaanga ua nei rai toku Metua, ka angaanga katoa oki au.” I teianei kua akaapa te au ngati Iuda ra iaia ma te akakino anga no te tuatuaanga e Tamaiti aia na te Atua ra na te karangaanga iaia ei Metua nona. Kua kimi ratou kia tamate ia Iesu, inara kua akaruke atu aia e tana au pipi i Ierusalema e kua aere atu ki Galilea. Ma te aiteite, ka pakari tatou me kopae ke i te au maroanga tau kore ma te aronga patoi ia tatou e rave maroiroi ra i te tutuanga Patireia e te akariro anga tangata ei pipi.​—Ioane 5:​1-18; 6:1.

12. Akapeea te atea ta Iesu rave anga i te ngai i Galilea ra?

¹² No tetai mataiti e te apa i muri akera, kua rave a Iesu i te maataanga o tana angaanga orometua ki Galilea, ma te aere anga ki Ierusalema no nga oroa mataiti e toru anake a te au ngati Iuda ra. I te katoa anga, kua rave aia e toru tere tutuanga i Galilea: te mea mua ma nga pipi ou e 4 ra, te rua ma te au apotetoro e 12, e ko tetai tei akatotoaia ra ma te au apotetoro tei tereniia ra kua tonokia katoa ki vao. Mei teaa ra tetai akakite anga maata i te tuatua mou ra te orongaia ki Galilea!​—Mataio 4:​18-25; Luka 8:​1-3; 9:​1-6.

Akakiteanga Mataku Kore ua i Iudea e Perea

13, 14. (a) I teea atianga te au ngati Iuda ra i kimi ei kia mou ia Iesu ra? (e) Eaa ra i korei i rauka i te opita ra kia tapeka ia Iesu?

¹³ Ko te tuatau purupuru anga rau o te 32 T.N., e te vai maira te “ora” o Iesu i te tuatau ki mua. Kua vaitata te Oroa o te Tapenakara ra. Kua raurau atu to Iesu ra nga apa taeake ra i teianei kiaia: “Ka akaruke mai koe i teianei enua, ka aere atu koe ki Iudea.” Te anoano ra ratou kia akaari a Iesu i tona mana temeio ki te aronga katoa e akaputu atu ki Ierusalema. Inara, te matakite ra Iesu i te tu kino. No reira kua tuatua aia ki tona au taeake: “Kare au e aere vave atu ki taua oroa ra; kare akerai i tae ki toku ora tikai.”​—Ioane 7:​1-8.

¹⁴ Kua taroaroa mai no tetai tuatau ki Galilea, kua aere atura Iesu ki Ierusalema “kare ra i aere akakite, i aere poiri ua.” Te kimi tika maira te au ngati Iuda iaia i te oroa ra, kua na ko akera: “Teiea aia nei?” I te otianga te apa o taua oroa ra, kua aere atura Iesu ki roto i te iero e kua akamata i te apiianga ma te mataku kore. Kua kimi ratou kia mou atu iaia, penei kia tuku iaia ki roto i te tapekaanga me kare kia tamate iaia. Inara, kare ratou i autu no te mea ‘kare i tae ki tona ora.’ E manganui i teianei kua akarongo ia Iesu. Noatu rai ko te aronga opita ta te au Pharisea i tono atu kia opu iaia kua oki mai ma te au rima apinga kore ua ra, i te na koanga: “Kare rava e tangata e tau te tuatua i ta tera ra tangata.”​—Ioane 7:​9-14, 30-46.

15. Eaa ra te au ngati Iuda ra i koikoi toka ei kia pei atu ia Iesu, e eaa ra te angaanga tutuanga tana i rave i muri akera?

¹⁵ Kua rave uaia atu te au maroanga i rotopu ia Iesu e te au ngati Iuda patoi ra iaia i tana apiianga no tona Metua i te iero ra i taua tuatau oroa ra. I te ra openga o taua oroa ra, i te riri anga i ta Iesu ra au tuatua anga no tona oraanga i mua ake i te riroanga ei tangata, kua kokoi ake te au ngati Iuda ra i te au toka ei pepei atu iaia. Inara kua pipini atura aia e kua oro ke atu kare i akakinoia. (Ioane 8:​12-59) I te nooanga ki vao ia Ierusalema, kua rave a Iesu i tetai angaanga akakitekite maata i Iudea. Kua iki aia e 70 pipi e, i muri ake i te apiianga ia ratou, kua tono atura ia ratou e tokorua i te aerenga kia rave te tutuanga i taua ngai ra. Kua aere atura ratou na mua ki te au ngai ravarai e te oire oki te ka aere atu a Iesu, ma tana au apotetoro katoa tana i parani ra kia aere atu.​—Luka 10:​1-24.

16. Mei teea tu kino a Iesu i aere ke atu ei i te tuatau o te Oroa Akatapu Anga ra, e eaa te angaanga maata tana i rave akaou?

¹⁶ I te tuatau paroro o te 32 T.N., te vaitata maira to Iesu “ora” i reira. Kua aere mai aia ki Ierusalema no te Oroa Akatapu Anga. Te kimi ua atura te au ngati Iuda kia tamate iaia. Ia Iesu e aaere ra i te ngai tomoanga i te iero ra, kua koropini ratou iaia. I te akaapa akaou anga iaia no te tuatua akakino, kua kokoi ratou i te au toka ei tamate iaia. Inara mei tana i rave i te au atianga i mua akera, kua aere ke atura Iesu. Kare i roaia tei runga aia i te mataara te apii ra, i teianei tuatau mei tera oire ki tera oire e tera vira ki tera vira i te tapere o Perea, i tetai pae o te Kauvai o Ioridana mei Iudea maira. E manganui tei akarongo kiaia. Inara na tetai tonoanga mai no tona oa akaperepere ko Lazaro kua kapikiia mai aia kia oki atu ki Iudea.​—Luka 13:33; Ioane 10:​20-42.

17. (a) Eaa te tuatua rapurapu i rauka ia Iesu iaia i tutu ra i Perea? (e) Eaa te akaari ra e kua matakite a Iesu i te akakoroanga o te angaanga tana ka tika kia rave e te tuatau oki no te au tupu anga ra?

¹⁷ Ko taua tuatua rapurapu ra no ko mai ia Mareta raua ko Maria, nga tuaine o Lazaro, tei noo ra ki Betania i Iudea. “E te Atu, i na, te tangata akaperepere naau ra, kua mate i te maki,” ta te karere i akakite atu. “Kare te reira maki e riro ei maki mate,” ta Iesu i pau atu, “kia akakakāia ra te Atua, e kia akakakāia te Tamaiti a te Atua i te reira.” Kia akatupu i teianei akakoroanga, kua vai atura Iesu i taua ngai ra no nga ra e rua. I reira kua tuatua atura ki tana au pipi: “Ka oki akaou tatou ki Iudea.” E mea ngata kia irinaki, i ta ratou pauanga: “E Rabi, i anoano akenei te ngati Iuda ia koe e peî ki te toka, e te oki akaou rai koe ki reira?” Inara te matakite ra a Iesu e ko te toenga atu o te “ora i te ao,” me kare te tuatau ta te Atua ra i akataka no tana angaanga orometua i te enua nei, kua poto. Kua kite tikai aia eaa tana ka tika kia rave e no teaa oki.​—Ioane 11:​1-10.

Tetai Temeio Kare e Rauka i Tetai kia Akakore

18. I to Iesu taeanga ki Betania, eaa te turanga i reira, e eaa tei tupu i muri ake i tona tae atuanga?

¹⁸ I Betania, ko Mareta te mea mua tei aravei atura ia Iesu, i te na koanga: “E te Atu, naringa koe i ko nei, kare e mate toku tungane.” Kua aru maira Maria ratou ko te aronga tei aere maira ki to ratou are. Pouroa ratou te aue ra. “Teiea aia te vaio angaia e kotou?” ta Iesu i ui atu. Kua pau atura ratou: “E te Atu ka aere mai ka akara.” I to ratou tae atu anga ki te menema akamaaraanga​—e ana ma tetai toka te vaira i tona ngai tuera anga​—kua karanga atura Iesu, “Ka uri ke atu i te toka na.” No te kite kore eaa ta Iesu i manako ra kia rave, kua patoi atura Mareta: “E te Atu, kua aunga i tenana, ko te po a oki teia.” Inara kua ui atura Iesu: “Kare au i karanga kia koe e, kia akarongo koe ra, ka kite koe i te kakā o te Atua?”​—Ioane 11:​17-40.

19. Eaa ra a Iesu i pure ei ki mua i te au tangata ra i mua ake i te akatuakaouanga ia Lazaro ra?

¹⁹ I te apai ke angaia te toka tei tapoki ra i te tomoanga ki te vaerua o Lazaro, kua pure maata ra a Iesu kia kite te au tangata ra eaa tana ka rave na roto i te mana o te Atua. I reira kua kapiki aia ma tetai reo maata: “E Lazaro, ka aere mai ki vao!” Kua aere maira Lazaro ki vao ma tona nga vaevae e nga rima kua takaiia ma te au takai tanumanga i vaiia oki te mata i te kakau. “Ka tatara, e tuku atu iaia kia aere ana,” ta Iesu i tuatua.​—Ioane 11:​41-44.

20. Akapeea te tupu anga ki te aronga tei akara ra i ta Iesu akatuakaou anga ia Lazaro ra?

²⁰ I te kite anga i teianei temeio, e manganui te au ngati Iuda tei aere maira kia akapumaana atu ia Mareta raua ko Maria kua tuku i to ratou akarongo kia Iesu. Ko etai kua aere atu e akakite ki te au Pharisea ra e eaa tei rokoia. Ta ratou manako anga? Kua viviki ratou ko te kau taunga nunui ra i te akapapa i tetai uipaanga no te Sunederi ra. I te taitaia, kua pekapeka ratou: “Te aa ua nei tatou? Maata rava ta teianei tangata akairo e rave nei. I vaio ua atu rai tatou iaia mei teianei rai, ka ope takiri te tangata i te akarongo iaia; e ka tae mai oki to Roma e rave i to tatou nei ngai, e te enua katoa oki.” Inara kua tuatua atu te Taunga Maata ko Kaiapha kia ratou: “Kare kotou i manako e, e mea meitaki ia tatou kia mate atu te tangata okotai, kia ora te tangata ravarai nei, auraka oki e mate te enua katoa.” No reira, mei taua ra mairai kua akapapa ratou kia tamate ia Iesu.​—Ioane 11:​45-53.

21. E akamata anga i teaa ta te temeio o te tuakaouanga o Lazaro ra?

²¹ No reira na te taroaroa anga i tona tae anga ki Betania, kua rauka ia Iesu kia rave i tetai temeio kare ra e rauka i tetai kia manako kore atu. Kua akamanaia e te Atua ra, kua akatuakaou mai a Iesu i tetai tangata tei mate ra no nga ra e a. Noatu rai ko te Sunederi rongo meitakiia ra kua oparaia kia akara e kia tuku i te tika no te mate ki runga i Tei Rave Temeio ra! No reira kua akono taua temeio ra ei akamata anga ki tetai tumu puapinga i te tarurike anga i ta Iesu ra angaanga orometua​—tetai taui anga mei te tuatau “kare akera i tae i tona ora” ki te tuatau “kua tae ki te ora.”

Akapeea Koe me Pau?

• Akapeea ta Iesu akaari anga e kua matakite aia i tana angaanga orongaia mai e te Atua ra?

• Eaa ra a Iesu i reka kore ei i te manako o tona metua vaine no te uaina ra?

• Eaa ta tatou ka kite mei te tu putuputu ta Iesu akono ma te aronga patoi ra?

• Eaa ra a Iesu i taroaroa ei i te akonoanga i te maki anga o Lazaro ra?

[Au Tutu i te kapi 12]

Kua tuku a Iesu i tona ririnui ki tana apainga i orongaia maira e te Atua ra