Pene 22

E a Pipi Tei Kapikiia

I MURI ake i te tauta anga e tamate ia Iesu i tona oire kainga i Nazareta ra, kua aere atura aia ki te oire i Kaperenauma i vaitata i te Tai o Galilea ra. Na teia i akatupu i tetai atu totou na Isaia ra. Koia tei totou maira e ka kite te au tangata o Galilea tei noo i te pae ki tai ra i tetai marama maata.

I to Iesu rave ua atu anga i tana angaanga akakiteanga i te marama na te tutu anga i te Patireia i reira, kua kitea e ia e a o tana au pipi ra. Kua aere kapiti ana teia aronga ma ia katoa i mua akera, mari ra i oki akaou ratou ki ta ratou angaanga tautai ia ratou i oki mai ei ma Iesu mei Iudea maira. Penei, kua kimi a Iesu ia ratou, i te mea kua tae te tuatau no te rave marie anga, ei au tauturu nana e akamatau kia rave i te angaanga a muri ake i tona akaruke anga.

E no reira ia Iesu e aaere ra i taatai e kua kite atura ia Simona Petero e tona nga taeake te tama ra i ta ratou kupenga, kua aere atura aia kia ratou. Kua aere atura aia ki rungao i to Petero pai e kua pati atu kiaia e neke ki vao atu mei taatai. I to ratou tae atu anga ki vao ua atura, kua noo a Iesu ki raro i roto i te pai e kua akamata i te ako atu i te aronga tini i taatai ra.

I muri akera kua karanga atu a Iesu kia Petero e: “O atu ki te moana, tuku atu ei i ta kotou kupenga i tetai aronga ika.”

“E te Atu,” e na Petero ei, “i tauta ua na matou mei te aiai e ao akenei, e kare e ika i rauka; kia tuatua maira koe, ka tuku rai au i te kupenga ki raro.”

I te tuku angaia te kupenga ki raro, e maata te ika i mou mai ki roto e kua akamata te kupenga i te motu. Kua viviki ua, teia nga tangata i te tareva atu i to ratou nga taeake i te pai i te pae mai kia aere atu e tauturu. Kare i roa kua ki nga pai e rua i te ika e manganui ra, e vaitata iora i te tomo. I te kiteanga i te reira, kua tipapa iora Petero ki raro i mua ia Iesu e kua na ko atura: “E aere ke koe, e te Atu, e tangata ara oki au.”

Kua karanga atura a Iesu kia Simona: “Eiaa e mataku; mei teianei atu, e tangata taau e rauka.”

Kua karanga katoa oki a Iesu i te taeake o Petero koia a Anederea ra. “Ka aru mai iaku,” kua raurau atura aia ia raua, “e akariro au ia korua ei ravakai tangata.” Kua karanga katoaia to raua nga taeake ravakai koia nga tamaroa a Zebedaio ra, ko Iakobo raua ko Ioane, e kua akarongo katoa raua kare i taroaroa. No reira kua akaruke teia aronga tokoa nei i ta ratou angaanga ravakai e kua riro ko ratou te aronga mua e a o ta Iesu au pipi tei rave marie i te aru anga iaia. Luka 5:​1-11; Mataio 4:​13-22; Mareko 1:​16-20; Isaia 9:​1, 2.

▪ Eaa a Iesu i karangaʼi i tana au pipi kia aru atu iaia, e koai ra ratou?

▪ Eaa te semeio i matakuia e Petero ra?

▪ Eaa te tu ravakai ta Iesu i pati i tana au pipi ra kia rave?