Pene 50

Akapapaanga kia Aro Atu i te Takinga Kino

I MURI ake i te apii anga i tana au apotetoro i te au ravenga no te akono i ta ratou angaanga tutu aere, kua akamatakite atura Iesu ia ratou i te aronga patoi. Kua karanga aia: “I na, te akaunga atu nei au ia kotou, mei te mamoe i rotopu i te au luko ra . . . Kia matakite ra ia kotou i te tangata, ka tuku oki ratou ia kotou ki te sunederi, e pāpā oki ia kotou i roto i to ratou au sunago; E noku nei e taki naiaʼi kotou ki mua i te aroaro o te au tutara, e te ui ariki.”

Noatu rai te kino o te takinga kino anga te ka aro atu tana au pipi, kua taputou papu atura Iesu: “Kia tuku ra ratou ia kotou, auraka e taitaia i te tu o ta kotou ka karanga atu; e akakiteia mai kotou i te tuatua i reira ra. Kare oki ko kotou tei karanga atu, ko te vaerua ra o to kotou Metua tei tuatua i roto ia kotou na.”

Kua karanga katoa a Iesu: “Ei reira te tuakana e tuku atu ei i te taeake kia mate, e te metua i te tamaiti; e tu mai oki te au tamariki ki runga e tamate i to ratou au metua.” Kua kapiti katoa maira aia: “E e makitakitaia kotou e te tangata katoatoa i toku nei ingoa; ko te tāpu marie ra e kia tae ki te openga, koia te ka ora.”

E puapinga maata to te tutu aere. No te reira tumu kua akaketaketa maira Iesu i te umuumu anga no te manako pakari kia raukaʼi te vai ma te tu rangatira no te rave i te angaanga. Kua tuatua katoa aia: “E kia takinga-kino ratou ia kotou i tetai oire, e oro ke atu ki tetai: tikai oki taku e karanga atu kia kotou nei, Kare e kako te au oire o Iseraela ia kotou, e tae mai ei te Tamaiti a te tangata.”

E tika e kua orongaia e Iesu teia apiianga, akamatakite anga, e pera katoa teia akamaroiroi anga ki tana au apotetoro e 12 ra, inara te tika katoa ra no te aronga te ka rave i te tutu aere anga e kako rave ake teianei ao i muri ake i tona matenga e te tuakaouanga. Te akakiteia maira te reira i tana tuatua ki tana au pipi e ‘e makitakitaia kotou e te tangata katoatoa,’ kare na to Iseraela anake ua tei tonokia atura te au apotetoro kia tuatua atu kia ratou. Pera katoa oki, penei kare te au apotetoro ra i taki naia ki mua i te aroaro o te au tutara, e te ui ariki i ta Iesu akaunga atu anga ia ratou i to ratou tere poto ua no te tutu aere. Mei te reira katoa oki, kare te aronga akarongo i tuku ua i to ratou ngutuare tangata kia tamateia.

No reira i tana tuatua anga e kare e kako ia ratou ta ratou kotinga no te tutu aere anga “e tae mai ei te Tamaiti a te tangata,” te totou maira Iesu kia tatou e kare e oti i tana au pipi i te tutu aere i te Patireia tei akanooia ra e kako rava ake te ao katoa nei i mua ake i te taenga mai te Ariki akakakaia koia a Iesu Mesia ei opita rave na Iehova i te akapouanga ia Aramakito ra.

I te rave ua atu anga i tana apiianga no te tutu aere, kua karanga a Iesu e: “Kare te pipi i rai atu i tana orometua, kare oki te tavini i rai atu i tona pu.” No reira ka tau rai te au pipi a Iesu kia manako e ka takinokinoia ratou e ka takinga kinoia mei iaia ra no te tutu anga i te Patireia o te Atua. Inara kua akamaroiroi atura aia: “Auraka e mataku i te ta mai i te kopapa nei, kare te [meta, NW] e mate ia ratou: e mataku ra kotou iaia, ko te tika iaia kia tamate takiri i te kopapa e te [meta katoa ki Keena, NW].”

Na Iesu ra e akanoo mai te akatauanga no te reira. Kua akakoromaki aia i te mate ma te mataku kore, kare i tuku ua i tona tu tiratiratu ki te Atua kia Iehova ra, kiaia Tei ki ra i te mana katoatoa. Ae, ka rauka ia Iehova i te tamate i te “meta” koia te tangata (tera te aite anga i teia tuatua nei ko te manakonako anga no te tuatau ki mua ei meta ora) me kare ka rauka iaia i te akatuakaou i tetai tangata kia rekareka i te oraanga mutu kore. Mei teaa ra te aroa e te takinga meitaki a Iehova koia te Metua i te rangi ra!

Ei reira a Iesu i akamaroiroi atu ei i tana au pipi ma tetai akatutu anga tei akamaata maira i ta Iehova utuutu anga aroa ia ratou ra. Kua ui maira aia: “Kare aina e taki rua mea manu rikiriki e okoia i te asario okotai nei? kare oki tetai o ratou ra e ngaro i to kotou Metua kia topa ki raro i te enua. Te rauru oki o to kotou na upoko, kua ope ia i te tatauia. Auraka mari kotou e mataku, e maata to kotou meitaki i to te au manu rikiriki e manganui.”

Te tuatua no te Patireia ta Iesu i akaue atura i tana au pipi kia akakitekite aere ka akatataka ke i te au ngutuare tangata, i te ariki anga tetai papaki e te kopae anga tetai papaki ra. Kua akataka maira aia: “Auraka e manako e, i aere mai ei au e apai mai i te au i te enua nei; kare au i aere mai e apai mai i te au, e [koke, NW] ra.” No reira no tetai tangata o te ngutuare kia mou i te tuatua mou o te Puka Tapu e tau aia kia maroiroi. Kua karanga a Iesu e: “Ko tei maata tona inangaro i tona metua tane e tona metua vaine, e mea ngiti iaku, kare aia e tau iaku; e tei rai tona inangaro i te tama e te tamaine, e mea ngiti iaku, kare aia e tau iaku.”

I te taopenga i tana apiianga, kua akataka maira Iesu e ko te aronga e ariki mai i tana au pipi te ariki katoa maira iaia. “E ko te ka o mai i tetai kapu vai anu na tetai o teianei aronga tangata rikiriki, no te mea e pipi aia naku, tikai taku e karanga atu kia kotou, Kare takiri aia e ngere i te tutaki.” Mataio 10:16-42.

▪ Eaa te au akamatakiteanga ta Iesu i oronga ki tana au pipi?

▪ Eaa te akamaroiroi anga e te akapumaana tana i oronga kia ratou?

▪ Eaa ta Iesu au apiianga i tau katoaʼi no te au Kerititiano o teia tuatau nei?

▪ No teea tu i kore ei te pipi na Iesu i rai atu i tona orometua ra?